Tâi-oân Kàu-hōe Kong-pò 780 Hō/Kong-kò/Tâi-lâm Sîn-ha̍k-īⁿ Táng-sū-hōe Khé-sū

Tâi-lâm Sîn-ha̍k-īⁿ Táng-sū-hōe Khé-sū

(Chit phiⁿ tī goân-chheh tē 6 ia̍h)

Kok-ūi kèng-ài ê tho̍k-chiá pêng-an. Pún-kài ê Lâm Tāi ū gī-koat, kau-tài pún-hōe tio̍h tui-hôe chiàn-sî tiong Tâi-lâm Sîn-ha̍k-īⁿ só͘ hun-sit ê tô͘-su kap pī-phín. Goán chham-siông liáu, tē-it pō͘ sī beh ēng Kong-pò lâi kong-kò kap pài-thok, ài kok-ūi goán pang-bâng. Lí nā chai bó͘ só͘-chāi ū Sîn-ha̍k-īⁿ ê tô͘-su á bu̍t-phín, pài-thok lí thè goán sàng hō͘ Tâi-lâm Sîn-ha̍k-īⁿ, á-sī pò goán chai, hō͘ goán thang siu-hôe. Ǹg-bāng tit kok-ūi ê hia̍p-le̍k, goán ē chò oân Lâm Tâi só͘ kau-thok ê sū.

Táng-sū-tiúⁿ: Au Chìn-an kín-khé.

Bō͘-chi̍p Sin-seng

Tâi-lâm Sîn-ha̍k-īⁿ kū-nî ū ke siat Chong-kàu Kàu-io̍k-kho (Pó-bó kho). Kin-nî in-ūi to͘-ha̍p-siōng, 9 goe̍h bô bō͘-chi̍p sin ê ha̍k-seng. Taⁿ ài bō͘-chi̍p chhun-kùi pan ê sin-seng. Hi-bōng-chiá, chhiáⁿ chù-ì ē-bīn só͘ kì ê sū-hāng:

1. Ji̍p-ha̍k chu-keh kap siu-gia̍p nî-hān: Ko Tiong pit-gia̍p thêng-tō͘; siu-gia̍p nî-hān nn̄g nî.

2. Bō͘-chi̍p jîn-oân: Kúi-nā miâ.

3. Goān-su: Thang tùi pún-īⁿ lâi thó, hān kàu pún-nî 12 goe̍h 31 ji̍t thê-chhut.

4. Thê-chhut su-lūi: (1) Goān-su. (2) Lí-le̍k-piáu. (3) Tiong-hōe á-sī Siông-siat-pō͘ ê chhui-chiàn-su. (4) Pit-gia̍p chèng-su.

5. Khó-chhì kho-bo̍k: Kok-bûn, Eng-bûn, Sèng-keng tāi-ì (Chhòng-sè-kì, Lō͘-ka kap Sù-tô͘ Hêng-toān chit 3 pún); kháu-thâu chhì-mn̄g kap sin-thé kiám-cha.

6. Khó-chhì kî-ji̍t: 1954 nî chiaⁿ goe̍h 20 ji̍t (pài 3) siōng-ngó͘ 9 tiám khí.

7. Khó-chhì tē-tiám: Chāi pún-īⁿ lāi-bīn.

Hùi-sîn kok kàu-hōe ê bo̍k-su kap thoân-tō-su, chiong téng-bīn ê iàu-hāng thong-ti hō͘ kàu-hōe ê chheng-liân lú-chú chai.

Bîn-kok 42 nî 12 goe̍h 1 ji̍t,

Tâi-lâm Sîn-ha̍k-īⁿ,

Īⁿ-tiúⁿ: N̂g Chiong-hui.