Tâi-oân Kàu-hōe Kong-pò 780 Hō/Siā-lūn/Sè-kài kap Sèng-tàn

Siā-lūn

Sè-kài kap Sèng-tàn

(Chit phiⁿ tī goân-chheh tē 3 ia̍h)

Ki-tok sèng-tàn sī sè-kài bān lâng só͘ hoaⁿ-hí ê. Ia̍h sī sè-kài bān lâng só͘ ǹg-bāng ê. Chit ê ǹg-bāng taⁿ í-keng si̍t-hiān. Tī teh beh ngiâ-chih Sèng-tàn-cheh ê sî, lán koh chi̍t pái lâi siūⁿ sè-kài só͘ teh ǹg-bāng ê, taⁿ tùi Ki-tok kàng-sè í-keng si̍t-hiān.

(1) Tit-kiù ê ǹg-bāng: Lô-má 8:24, "In-ūi lán tit-kiù sī tùi ǹg-bāng." Ki-tok kàng-sè sī beh chhōe sit-lo̍h ê lâi kiù in. In-ūi I beh kiù I ê peh-sèⁿ thoat-chhut in ê chōe-ok.

(2) Hó ê ǹg-bāng: 11 Thiap 2:16, "Lán ê Chú Iâ-so͘ Ki-tok, kap lán ê Pē Siōng-tè, chiū-sī thiàⁿ lán, iā tī un-tián chiong éng-oán ê an-ùi kap hó ê ǹg-bāng siúⁿ-sù lán." Lâng nā tit-tio̍h choân sè-kài, iā sòng-sit i ê sèⁿ-miā, ū sím-mi̍h lī-ek. Ko-lô-se 1:27, "Ki-tok tiàm tī lín chò êng-kng ê ǹg-bāng." Lia̍h tit-tio̍h Iâ-so͘ chò tē-it hó.

(3) Hok-khì ê ǹg-bāng: Thê-to 2:13, "Him-bō͘ hit ê tōa hok-khì ê ǹg-bāng, kaplán chì-tōa ê Siōng-tè kap Kiù-chú Iâ-so͘ Ki-tok êng-kng ê hián-hiān." Chú lâi sè-kan ēng I ê pêng-an hō͘ kìⁿ-nā him-bō͘ I ê lâng. I sī hok-khì ê goân-thâu.

(4) Hó-táⁿ kap khoa-kháu ê ǹg-bāng: Hi-pek-lâi 3:6, "To̍k-to̍k Ki-tok chò Kiáⁿ tī-lí I ê ke, lán nā chip-siú tùi ǹg-bāng só͘ ū ê hó-táⁿ kap khoa-kháu, kian-kò͘ kàu-bóe, chiū chò I ê ke."

(5) Tit oa̍h ê ǹg-bāng: I Pí-tek 1:3, "Goān lán ê Chú Iâ-so͘ Ki-tok ê Siōng-tè, iā sī I ê Pē, tit-tio̍h o-ló; I chiàu I ê tōa lîn-bín, ēng Iâ-so͘ Ki-tok tùi sí-lâng tiong koh oa̍h, bat têng-chài siⁿ lán, lâi tit-tio̍h oa̍h ê ǹg-bāng." Khó͘ à, chī-chūi ē kiù lán thoat-chhut chit ê ē sí ê thé. Kám-siā Siōng-tè, tùi oa̍h-miā Ki-tok thang tit-tio̍h oa̍h.

(6) Chheng-khì ê ǹg-bāng: I Iok-hān 3:3, "Kìⁿ-nā khò I chiah ū chit hō ǹg-bāng ê, pún-sin chheng-khì, chhin-chhiūⁿ I sī chheng-khì." Sè-kan sī ù-òe ê só͘-chāi, chí-ū tiàm tī Ki-tok chiah ū chheng-khì ê ǹg-bāng, thang chiâⁿ-chò tē-chiūⁿ ê iâm.

(7) Chheng gī ê ǹg-bāng: Ka-lia̍p-thài 5:5, "In-ūi lán óa-khò Sîn, tùi sìn teh thèng-hāu só͘ ǹg-bāng ê gī." In-ūi tī thiⁿ-ē, bô siúⁿ-sù pa̍t ê miâ tī lâng ê tiong-kan, hō͘ lán tiàm tī i lâi tit-kiù. Tùi A-tong ê ûi-ke̍h, hō͘ sè-kài chò ū chōe ê; tùi Iâ-so͘ Ki-tok kam-goān kàng-sè chiâⁿ-chò lâng ê iūⁿ-siùⁿ sūn-ho̍k kàu sí, hō͘ chèng-lâng chò ū gī ê (Lô-má 5:19; Hui 2:6-- 8).

Só͘-í lán beh o-ló kám-siā lâi khèng-chiok Kiù-chú Iâ-so͘ Ki-tok ê kàng-seng.