1. Lú Soan chí-bē tāi-ke kiong-hí,
Múi-nı̂ chit pái chài-lâi saⁿ-kı̀ⁿ;
Khui-hoē chhù-tiúⁿ Bí-chu káng-tō,
B. B. B. ián-chàu chin-chiàⁿ hó.
2. Pah nı̂ khèng-chiok kı̀-liām hoàn-teng,
Sui sı̄ kán-tan iā ū kiàn-chèng;
Thiⁿ-khı̀ iām-jia̍t tāi-ke jím-nāi,
Múi chiat chō-chiū ū hūn chū lâi.
3. Cha-keng lūn-jı̂n Bú-tong Bo̍k-su,
Chhoā lán bat lâng thiah-lí hong-hù;
Khó-sioh sı̂-kan in-ūi hān-chè,
Chhù-chhù hō͘ lán lı̄-ek chin choē.
4. Chá-tó-hoē chú-niá saⁿ chí-bē,
Se̍k-iông hoē chú-chhı̂ kóng siông-soè;
Kè-óng khai lâi Chiong-hui Bo̍k-su,
Chêng-tāi, bı̄-lâi, hiān-chāi khó-lū.
5. Pē-kiáⁿ kàu-io̍k Chiau-liông Bo̍k-su,
Bú lú koan-hē loē-iông hong-hù;
Hun-cho͘ thó-lūn kok cho͘ chí-bē,
Jia̍t-lia̍t thó-lūn tāi-ke toà-hoê.
6. Bú-tong káng-chō múi tn̂g kám-tōng,
Hi-bōng chí-bē kim-āu ióng-chòng;
Sin kí-goân ı̄ⁿ-siōng Sòng Bo̍k-su,
Tiâu-tiâu iú-lí kam-giân chhù-sū.
7. Oàn pē-bú tè Chú Bí Bo̍k-su,
Thiah-bêng chin-lí iàu-tiám giân-sû;
Chiau-liông kàu-io̍k kàu-hoē sêng-jı̂n,
Bāng lán koan-im kim-āu cheng-chı̀n.
8. Kàu-io̍k, keng-chè, hu-hū, pô-sek,
Sı̍t-chè būn-toê thó-lūn chek-ke̍k;
Ló chheng ba̍k-chêng chham-khó sı̍t-hêng,
Sı̄-toā thiàⁿ soè, sı̄-soè hàu-kèng.
9. Hu-chhe tâng-sim chāi ka hia̍p-le̍k,
Bia̍t su saⁿ-thiàⁿ kok hián châi-tek;
Sèng-io̍k būn-toê koan-sim chāi-lāi,
Thê-kióng ı̀-kiàn kiōng-tông hióng-ài.
10. Soan-iông hok-im ki-pún iàu-kiāⁿ,
Kim-giân chí-kàu chhiat-sı̍t tâng kiâⁿ;
Chit pái só͘ tit hō͘ goán boán-ı̀,
Ou-àm lú-kài, pang-kiù tâng khı̀.
11. Kúi jı̍t lêng-siu sui sı̄ sú-jia̍t,
Jím khó͘ siōng-chı̀n cheng-sı̂n koàn-thiat;
Tāi-ke kau-thong jı̄n-chhut kū iú,
Kı̀ⁿ-bı̄n hoaⁿ-hí chhut-la̍t khan-chhiú.
12. Choè-āu goān Chú chiok-hok Lú Soan,
Tē 2 sè-kí ióng-io̍k sêng-choân;
Hia̍p-le̍k sı̍t-hêng chı̍t kiāⁿ toā-sū,
Tāi-ke kiān-khong chı̀n-chhut ūi Chú.
(Lú-soan Goe̍h-khan Tē 68-69 kı̂, 1965 nı̂ 8-9 goe̍h)
