Tâi-oân beh ké chò Hêng-séⁿ

Lán chit Tâi-oân ê tē-hng, hiān-sı̂ Kiaⁿ-siâⁿ put-chí tùi-tiōng , só͘-í gı̄-lūn beh siat-chò Hêng-séⁿ ; í-keng kiâⁿ bûn-su hō͘ Tō-tâi , Tō-tâi iā ū chhut kò-sı̄ thong-ti hâng-kau peh-sı̀ⁿ kóng , Sı̄ in-ūi beh siat Hêng-séⁿ só͘-hùi bô-kàu ,ko͘-put-chiong tio̍h chiū chhut káng-kháu ê hoè-mı̍h ke thiu-hun , khioh-lân chū-chóng , pang-chān só͘-hùi . Iā ū hun-hoat Úi-oân tı̄ ta̍k só͘-chāi , kah lâng tùi chit sı̀-goe̍h chhe-it-jı̍t khí ,nā ū beh chài-hoè chhut-kháu tio̍h pò Úi-oân chai , hō͘ i cha-giām , soè-lı̂ , chiah niá-toaⁿ khí kiâⁿ . Kàu chit 4-goe̍h 20-jı̍t Tō-tâi ū koh chhut kò-sı̄ kóng-bêng , chêng-tiuⁿ ê kò-sı̄ sı̄ lâng khoàⁿ bô bêng-pe̍k , tı̀-kàu iâu-giân húi-pòng ; sı̍t-chāi bô-iáⁿ lóng-chóng beh thiu ; lūn-kàu chhia chài , lâng taⁿ, í-kı̍p lāi-káng chûn-chiah lâi-óng , lóng bô beh thiu , nā-sı̄ jı̍p-káng ê hoè-mı̍h chiàu-kū teh thiu ;to̍k-to̍k ū sin-siat chit-ê hoat-tō͘ , chiū-sı̄ chhut-káng ê hoè-mı̍h tiāⁿ-tio̍h chı̍t-pah-hun beh thiu 5 lı̂ . Chóng-sı̄ ū lâng teh kóng , in-ūi Saⁿ-kau m̄ kam-goān hō͘ i thiu ,chit-ê hoat-tō͘ kiám-chhái siat bē-lo̍h . Iā ū lâng teh kóng pa̍t-jı̍t nā beh siat Séng-siâⁿ , sı̄ beh siat tı̄ Chiang-hoà-koān Sa̍h-tang-pó hit-tah . Iā teh kóng bô loā-kú teh-beh tùi An-pêng siat tâng-soàⁿ thong kàu Phêⁿ-ô͘ , Ē-mn̂g , thang pò kín-kip ê siau-sit.

(Tâi-lâm-hú-siâⁿ Kàu-hoē-pò tē-11-tiuⁿ, 1886 nı̂ 5 goe̍h)