Chú-āu 1865 nı̂ khí, hok-im tē 2 piàn thoân kàu Tâi-oân, kàu-taⁿ thâu boé 93 nı̂ kú.
Chit pái lâi thoân ê kong-hoē, sı̄ So͘-kek-lân kúi-nā pah-bān sı̀n-tô͘ tiong ê kúi-nā bān-lâng chhut-goā tı̄ Eng-kiat-lı̄ thàn-chia̍h ê sı̀n-tô͘, só͘ cho͘-chit ê Soan-tō-hoē.
Iā lâm-lú ê Soan-tō-hoē, nı̂-nı̂ kok ū siu-jı̍p kúi-cha̍p-bān ê hiàn-kim, tān-sı̄ thoân-tō jı̂n-châi toā khiàm; só͘-í khí-thâu khah chē sı̄ tńg-khı̀ So͘-kek-lân, chhiáⁿ pún só͘-chāi ê lâng lâi. Koh So͘-kek-lân sı̄ chin kan-kia̍t ê tē-hng; chóng-sı̄ Toā-o̍h chin sio̍k, bô lūn loā sàn ê lâng to ū ki-hoē thang tha̍k; só͘-í lâi Tâi-oân ê Se-kàu-su khah chē lóng chı̀n ū ha̍k-būn, iā khı̂n-khiām, ū chû-sim, koh chhin-chhiat, ū lé-sò͘!
Tı̄ 60 goā nı̂ chêng, goá 5, 6 hoè ê sı̂, nā thiaⁿ-tio̍h “Âng-mn̂g-hoan” 3 jı̄, kám-kak chin ko-kùi, sim-koaⁿ seⁿ-khí chin hó kám-chêng hoan-gêng.
Goá 13 hoè khı̀ hō͘ Mûi Bo̍k-su mn̄g tō-lí ê sı̂, i ná mn̄g, ná chú-pn̄g; chú-se̍k chiū phâng khı̀ hō͘ Lı̂m Ha̍k-kiong Kàu-su chia̍h, chin pêng-bı̂n-hoà! Goán 10 goā lâng khiā tı̄ tâi-chêng beh niá sé-lé. Mûi Bo̍k-su teh káng-tō ê tiong-kan, soà mn̄g goá ba̍k-chiu thiàⁿ loā-kú? I khı̀ Jı̄-lûn-á pò͘-tō, khoàⁿ-tio̍h kha-chhiú phoà-siùⁿ, tı̄ thô͘-kha teh chhê ê lâng, i khı̀ pa̍t-ūi pò͘-tō liáu, chiah tò-tńg tı̄ hit ê lâng ê sin-piⁿ, thau-hiat gı̂n-phiò hō͘--i. Koh Lân I-seng siāng hit ê sı̂-chūn, siá phoe hō͘-goá, phoe thâu siá, “Liāu Tit hiaⁿ pêng-an!” Kı̂-û ê So͘-kek-lân lâng, toā pō͘-hūn sı̄ án-ni!
Soan-kàu-su tāi-seng chū-chāi tı̄ Tâi-lâm, Kı̂-āu, Tām-chúi, Chiang-hoà, Tâi-pak téng.
Tâi-oân kàu-hoē ê te̍k-sek, m̄-sı̄ Tè-kok chú-gı̄ ê sian-hong! M̄-sı̄ chu-pún chú-gı̄ ê cháu-káu! M̄-sı̄ bûn-hoà chhim-lio̍k!
Chiū-sı̄ beh ēng Sèng-keng khí-chō Tâi-oân kàu-hoē! Beh chiong sèng Ò-kó͘-sū-teng sió-khoá bat ê “In-tián” tō-lí! Kap Lō͘-tek Má-teng khah bat ê “In-tián” tō-lí! Lâi chhián-bêng sı̍t-hêng!
1.Sı̍t-hiān toè Chú thoân-tō! I-pēⁿ! Koáⁿ-kúi! Piàn-piáⁿ! Hi-seng kàu-sí!
2.Sı̍t-hêng Sū-thê-hoán cheng-sı̂n! Chiong Kū-iok oāⁿ chò Sin-iok; oân-choân chiong Au-hong, Bí-ú, Se-iûⁿ ê sè-sio̍k kàu-hoē ê sı̍p-koàn, lóng chóng sàu-tû kàu chheng-khı̀!
Tı̄ 36 nı̂ chêng, Tang-iûⁿ 3 toā úi-jı̂n ê chı̍t ê Hō-chhoan Hong-gān Sian-seⁿ, lâi Tâi-oân lú-hêng thoân-tō; kàu Tang-káng ê sı̂, kā goán kóng, “Tâi-oân kàu-hoē, iáu sı̄ Iâ-so͘ sı̂-tāi ê kàu-hoē! Sè-kài bô lūn sím-mı̍h só͘-chāi ê kàu-hoē lóng to-siáu ū piàn-chit! chí-ū Tâi-oân kàu-hoē, kap Sèng-keng só͘ kı̀ tng-sı̂, Chú tı̄ Iû-thài kok thoân-tō ê chêng-hêng chin siāng khoán!”
3. Ha̍k-sı̍p Pó-lô phó͘-piàn thoân hok-im, tı̄ boē sı̀n Chú ê lâng ê tiong-kan! “Tùi sı̀n kàu sı̀n” ê ‘Sı̀n hok-im’! “Tùi Ki-tok sı̍p-jı̄-kè í-goā, m̄-chai poàⁿ hāng !!”
(Tâi-oân Kàu-hoē Kong-pò tē 823 hō, 1957 nı̂ 7 ge̍h)
