Tân Hûn-thêng Sió-toān

Tân Hûn-thêng Thoân-tō sı̄ Tâng-oaⁿ sio̍k, Kim-tun hiuⁿ ê lâng, chhut-sı̀ tı̄ A.D.1852. I saⁿ hè ê sı̂ pē-bú ū ı̂-ku lâi Tâi-oân, khiā-khí tı̄ Gō͘-khó͘-khiⁿ chng tióng-sêng. I 21 hè ê sı̂ ū khı̀ choè Kai Bo̍k-su ê ha̍k-seng, Āu-lâi i chiū choè thoân-tō, toà tı̄ kúi-nā só͘-chāi ê pài-tn̂g. Án-ni choè kang ū 26 nı̂ kú, í-āu ū hioh-khùn 2 nı̂ goā, kàu Hoâ bo̍k-su kàu Tâi-oân ê sı̂, I ū lâi kà-sı̄ I-ê thó͘-im, tùi hit-tia̍p ū chiap-soà kà Sòng i-seng ê thó͘-im, iā ū pang-chān I-koán kap Lú-o̍h-tn̂g ê kang, koh siông-siông thoân tō-lí. Tùi hit-sı̂ I ê sin-thé chia̍p-chia̍p ū tú-tio̍h phoàⁿ-pı̄ⁿ, chiū boē-oē koh tam-tng khah choē ê kang-tiâⁿ. Āu-lâi I ū siū-phài khı̀ thoân tō-lí tı̄ Sū-lı̂m-koe ê lé-pài-tn̂g. I ū tú-tio̍h sim-chōng-pı̄ⁿ chiū hut-jiân hūn-khı̀ put-chí kú chiah chai lâng. Tùi án-ni sin-thé chiū koh-khah soe-lám, put-tek-put tio̍h hioh kang, lâi chēng-ióng sin-thé. Hit-nı̂ I tú-tú sı̄ 60 hè, ū choè kang tı̄ kàu-hoē lāi 37nı̂ ê kú. Tùi án-ni I chiū chhoā I-ê ke-āu kè hái khı̀ Hok-chiu, kap I-ê toā kiáⁿ khiā-khí, tı̄ hia 4 ge̍h jı̍t kú, I-ê pı̄ⁿ ná tāng bô khí chhn̂g. Ū Bí-pō͘-hoē ê Bo̍k-su, Tiúⁿ-ló chia̍p-chia̍p lâi thàm I , soà thoè I kı̂-tó; koh siông-siông ū chū-chı̍p I ê kàu-hoē lâi ke-lāi lé-pài. Í-āu chiâⁿ cha̍p jı̍t ê tiong-kan lâng ū khah sóng-khoài, chiū siūⁿ beh tò lâi Tâi-oân, bô phah-sǹg soà koh hō͘ I kám-tio̍h chin siong-tiōng, chiū tı̄ A.D. 1914, 3 ge̍h 27 hō an-jiân siān-chiong. I ū hióng-siū 62 hè. Ū bâi-chòng tı̄ Bân-ip Lâm-koan goā Sı̂-seng-lí, Gô-thâu-hōng niá kàu-hoē ê hûn-tē.