Tân Lāu-leng Tiúⁿ-ló ê Sió-toān

Lāu-leng chek sè-hàn ê sı̂, sı̄ kā lâng chò kho͘-lo̍h. Koè-lâi thiaⁿ-tio̍h tō-lí hó, chiū jı̄n-chin káng-kiù kàu ē tha̍k Sèng-keng, ē siá Pe̍h-oē-jı̄. A. D. 1885 tı̄ Giâm-chêng hō͘ Kam Bo̍k-su kā i kiâⁿ Soé-lé chiap-la̍p, 1900 nı̂ chò chip-sū, 1904 nı̂ chò tiúⁿ-ló. Bat kap thoân-tō sian-seⁿ chhut-goā pò͘-tō. In-ūi ba̍k-chiu thiàⁿ, ū khı̀ I-koán hō͘ Má I-seng i, khiok ū khah hó; nā-sı̄ in-ūi siông-siông thiàⁿ, āu-lâi soà chheⁿ-mı̂. Tùi án-ni, thó͘-khùi i bô thang khoàⁿ Sèng-keng. Ū thiaⁿ-tio̍h kóng ū chheⁿ-mê-jı̄, chiū tı̀-ı̀ ài o̍h. Ū kin bó͘ bo̍k-su o̍h, khı̂n-khı̂n tha̍k kàu ē tha̍k Sèng-keng, bô koh-iūⁿ ba̍k-kng ê lâng. Kı̀-tı̂ chin hó, sèng-keng ū chām á-sı̄ kui-chiuⁿ ē oa̍t-liām. Choè-kı̄n 3, 4 nı̂, Giâm-chêng Kàu-hoē bô sian-seⁿ, khah-siông sı̄ i choè chú-lí, chiūⁿ tâi tı̍t kóng, tı̍t tha̍k,bô su ba̍k-kng ê. Tı̄ 7 goe̍h 17 jı̍t, (khı̀ i ê chhin-chhek ê só͘-chāi liâu-ióng liáu tńg-lâi), tı̄ pài tn̂g thiaⁿ sı̀-koè so-so khoàⁿ-khoàⁿ kóng, siu-lí liáu ū hó-sè bô, lóng hó á-boē, mn̄g tang mn̄g sai, goá kā i kóng, iáu-boē kàu-gia̍h hó. Kiâⁿ oá tâi-á ê pak-pêng-thâu koh so-so leh kóng, tio̍h koh lâi chò chú-lí, goá chiū khan i the-í chē. Lé-pài soah, koh kap i khı̀ in tau, chē tiap-á-kú, in-ūi hō͘ lâi, goá chiū tńg-lâi. Goá kā i kóng, khah bān lí nā khah khoàⁿ -oa̍h, goá chiah lâi mn̄g lí chá-chêng kàu-hoē ê sū. Ai-ah ! kong-im bô thèng-hāu lâng, tı̄ 7 goe̍h 20 àm, Siōng-tè ū tiàu chit ê chı̄n-tiong ê lāu-lô͘-po̍k tńg-khı̀ lah ! Tı̄ 21 ē-po͘, ū Pe̍h-hô Si Khe-chhoan Sian-seⁿ, Koan-á-niá Chiā Bo̍k-kiông Sian-seⁿ, í-kı̍p chē-chē hoē-iú lâi kā i sàng-chòng. Iā-sı̄ chin lāu-jia̍t. Hióng-siū 76 hoè, sı̄ Giâm-chêng Kàu-hoē, Siōng-tè ê tē-it lāu ê lô͘-po̍k lah ! Siá kúi-kù lâi siàu-liām i. (Tâi-oân Kàu-hoē-pò tē 572 koàn, 1932 nı̂ 11 ge̍h)