Tân Só͘-io̍k ê Sió-toān

Só͘-io̍k chiū-sı̄ Chúi-tńg-kha ê kàu-hoē Tân Hı̂m Tiúⁿ-ló ê tē saⁿ kiáⁿ. I tùi soè-hàn chiū tit-tio̍h Chú-jı̍t-o̍h ê kà-sı̄, i tùi soè-hàn kàu taⁿ ū chin koai, hō͘ kàu-hoē lāi-goā lóng o-ló i; bô phah-sǹg tı̄ téng-ge̍h 12 jı̍t chiū hō͘ Chú kéng-tiàu i lı̄-khui sè-kan, kin-nı̂ 24 hè. Hàiⁿ ah! chin-chiàⁿ phah-sńg, sit-lo̍h chit ê hó kap ū lō͘-ēng ê chheng-liân-lâng. Tı̄ 12 hō ē-po͘ tı̄ pún-tn̂g choè bâi-chòng-sek. Lūn i ê choè lâng goá ài siá kúi hāng khó-chhú pâi-lia̍t tı̄ ē-toé. 1.I ê sı̀n Chú. Ū siú tō-lí iàu-kín lé-pài. 2.I ê iú-hàu. Tùi oē thàn chı̂ⁿ ê sı̂ khí, chia̍h-chhēng chhı̀n-chhái, ta̍k ge̍h-jı̍t ū khek-liám chı̂ⁿ hō͘ pē-bú choè ka-têng ê só͘-hùi. 3.Thiàⁿ hiaⁿ-tı̄. Hiaⁿ-tı̄ ū tú-tio̍h tāi-chı̀ i chin hoaⁿ-hí pang-chān. 4.Chı̄n-tiong. I ū hō͘ kúi-nā lâng chhiàⁿ, ū Loē-tē lâng iā ū Pún-tó lâng, tāi-ke lóng chin tùi-tiōng i, chin thiàⁿ i, káⁿ sı̀n-iōng i. 5.Gâu thun-lún. Goá siá kúi-jı̄ ài hō͘ lâng o̍h i ê hó bô͘-iūⁿ lâi kui êng-kng tı̄ Thiⁿ-pē. (Tâi-oân Kàu-hoē-pò tē 426 koàn, 1920 nı̂ 9 ge̍h)