Tùi-oā Hı̀
Tùi-oā Hı̀ Toā hoaⁿ-hí ê hó Siau-sit (Lō͘ 2:10) Tâi-lâm Chit chhut ke̍k sı̄ beh hō͘ Chú-jı̍t-o̍h ko-téng kho chò, lâi siá ê. Lāi-iông chiàu sian-seⁿ ê ı̀-sù, tām-po̍h piàn-keng bô iàu-kín, chóng-sı̄ beh kà ha̍k-seng ê í-chêng, iàu-kín sian-seⁿ tio̍h gián-kiù, Chú chhut-sı̀ hit sı̂ ê Iû-thài ê siā-hoē chōng-thài, ia̍h soat-bêng hō͘ ha̍k-seng bêng-pe̍k. Nā chit tè ke̍k ē-thang pang-chān lia̍t-ūi Chú-jı̍t-o̍h ê Sèng-tàn Chiok-hō-hoē, sı̄ goá ê sim só͘ goān. Jı̂n-bu̍t. 1.Kò͘-iûⁿ--ê, A. B. C. D. E. F....... 2.Thiⁿ-sài chı̍t miâ. Kı̂-thaⁿ sò͘-miâ. Tiûⁿ-só͘. Pek-lı̄-hêng iá-goā. Chún-pı̄. 1.Poè-kéng—iûⁿ-kûn teh khùn, thiⁿ ū chheⁿ. 2.Bú-tâi—chó (iū) pêng chı̍t tè chio̍h-í. 3.Chiàu-bêng— àm-àm. (Tùi bú-tâi chiàⁿ-pêng kò͘-iûⁿ ê jı̍p-lâi). A.‘E-hng thài chiah léng-khı̀. Khong-khı̀ chēng kàu ná chhin-chhiūⁿ chin chong-giâm ê khoán. Iûⁿ-á lóng koai-koai teh khùn, lán lâi hang chı̍t-ē-á hoé lè, chiah lâi khùn.’ It-tông‘án-ni hó.’...... (E. Chò tiong-sim, it-tông chē) B. (Bô goân-khı̀)‘Á-á-á! Sè-kan thài ē chiah bô sim-sek, ta̍k-jı̍t to teh hō͘ Lô-má koaⁿ kap peng khún-tio̍k, lán beh án-choáⁿ-iūⁿ koè-jı̍t lè!’ (thó͘-khùi). C.‘Ū-iáⁿ tō-tio̍h! Í-sek-lia̍t ê peh-sı̀ⁿ m̄-chai tio̍h tı̄-tang-sı̂ chiah ē tùi chit ê kan-khó͘ ê seng-oa̍h siū tháu-pàng.’(Ū chı̍t-ē-á). D.‘Goá teh siūⁿ hit ê hō-choè Bí-sài-a hit ê, nā khah-kín lâi m̄-chiaⁿ hó.’ E.‘Tio̍h là! (Khah-tāng ê siaⁿ) tāi-ke thiaⁿ lè! Goá chò-chêng-jı̍t khı̀ Iâ-lō͘-sat-léng ê sı̂, ū khı̀ tiān-nı̍h, tú hó thiaⁿ-kı̀ⁿ sian-siⁿ teh kóng hit-ê Bí-sài-a koh bô loā-kú ē lâi lán chit ê Pek-lı̄-hêng.’ (It-tông chin gông-ngia̍h chē thêng) D. Siáⁿ hoè ah! Bí-sài-a beh lâi hò͘ⁿ! F. Án-choáⁿ! Beh lâi lán chia hò͘ⁿ! B. (Iû-goân bô goân-khı̀) He káⁿ-sı̄ sian-seⁿ kóng m̄-tio̍h, á-sı̄ lí thiaⁿ m̄-tio̍h. E. Bô ah! Lâng Sian-seⁿ hian Sian-ti Bí-ka ê chheh tha̍k kóng, “To̍k-to̍k lín Pek-lı̄-hêng, I-hoat-tāi tı̄ Iû-tāi ê siâⁿ-tiong, sui-jiân pi-bı̂, nā-sı̄ teh beh ū jı̂n kun tùi lín chhut, thoè goá chiàu-kò͘ Í-sek-lia̍t ê peh-sı̀ⁿ.” Án-ni goá bêng-bêng ū thiaⁿ-kı̀ⁿ. A. Hit-ê Bí-sài-a tek-khak ē koáⁿ hia ê kiau-ngō͘ ê Lô-má koaⁿ-hú kap hia ê chân-jím ê kun-tūi tùi lán Iû-thài kok chhut-khı̀. C. Tio̍h lah! Tek-khak ē cheng-ho̍k sè-kài lóng-chóng ê kok-ka. Iâ-lō͘-sat-léng khí chı̍t keng chin-súi ê Ông-kiong, hō͘ Bí-sài-a chē ūi chò Hông-tè. D. Í-sek-lia̍t ê peh-sèⁿ pı̀ⁿ chin kiông, chin hó-gia̍h, lán ē-thang chò chin gâu ê toā-koaⁿ. E. M̄-sı̄ ah! Sian-seⁿ kóng hit ê Bí-sài-a, m̄-sı̄ hit hō chiàn-cheng ê hông-tè. B. (Sió-khoá goân-khı̀) Bô sı̄ sím-mı̍h khoán ê hông-tè leh! Koáⁿ-kín kóng no͘h! E. Sian-seⁿ hian Sian-ti Í-sài-a siá hit-pún toā-pún Sèng-chheh tha̍k kóng, “Ū chı̍t ê kiáⁿ beh chhut-sı̀, sı̄ Siōng-tè siúⁿ-sù ê, lán siū i ê lı̄-ek; i tek-khak tam-tng kok-ka ê chèng-sū, chheng-ho͘ m̄-nā chı̍t-iūⁿ, kiò-choè Sı̂n-biāu, Bô͘-sū Choân-lêng ê Siōng-tè, éng-oa̍h ê Chú-cháiⁿ, Pêng-hô ê jı̂n-kun.”Kóng sı̄ pêng-hô ê jı̂n-kun lah! (Hut-jiân thiⁿ pı̀ⁿ kng, kò͘-iûⁿ ê lóng tio̍h kiaⁿ; thiⁿ-sài chhut-hiān). Thiⁿ-sài. Bo̍h-tit kiaⁿ; in-ūi goá pò-lín toā hoaⁿ-hí ê siau-sit, hō͘ peh-sèⁿ lóng ū hūn, in-ūi kin-á-jı̍t tı̄ Tāi-pı̍t ê siâⁿ Pek-lı̄-hêng, í-keng ūi-tio̍h lín seⁿ chı̍t ê chín-kiù ê, chiū-sı̄ Chú Ki-tok. Lín beh khoàⁿ-kı̀ⁿ chı̍t ê eⁿ-á ēng pò͘ pau, khùn tı̄ bé-chô-lāi, chit ê chiū-sı̄ hō͘ lín chò kı̀-hō. (Thian-peng kap thiⁿ-sài chhut-lâi lâi gı̂m-si (Sèng-koa-tūi ia̍h hó) Chàn-bí-koa 60 siú 1 chat (nn̄g pái) á-sı̄ Sèng-si 145 siú lóng-chóng. (Thiⁿ-sài lı̄-khui, thiⁿ piàn àm.)
(Ū chı̍t-ē-á, kò͘-iûⁿ ê chiah khiā khí-lâi).
F. O! Bí-sài-a chhut-sı̀ lah! Kiù-chú lán ê ông chhut-sı̀ lah! E. Lán tio̍h koáⁿ-kín lâi khı̀ Pek-lı̄-hêng, lâi khı̀ pài hit ê thiⁿ-sài pò lán ê Kiù-chú Ki-tok. It-tông. Goá ia̍h lâi-khı̀....... Koáⁿ-kín lâi-khı̀....... (Kò͘-iûⁿ ê tùi jı̍p lâi ê só͘-chāi chhut-khı̀). (Sèng si 146 siú 1 chat. Sèng-koa-tūi). (Tâi-oân Kàu-hoē-pò tē 540 koàn, 1930 nı̂ 12 ge̍h)