Tùi-oē

Chit kúi-tang lâi, sui-bóng Tâi-oân-lâng ê bú-gí ı̀-sek ta̍uh-ta̍uh-á teh cheng-ka, m̄-koh goá jı̄n-ūi, lán ê bú-gí pı̄ siau-bia̍t ê gûi-ki goân-chāi. Che sı̄ bo̍k-chiân ê hiān-sı̍t. Lán ài kè-sio̍k chhui-sak bú-gí ê chháu-kin ūn-tōng, kó͘-lē ka-têng ê bú-gí ı̀-sek, éng-hióng kap kàm-tok chèng-hú ê gí-giân chèng-chhek. Lán iáu tı̄ chhiúⁿ-kiù bú-gí ê tē-it kai-toāⁿ. Chêng kúi-kang kap gún a-kong tı̄ kong-chhia-chām tán kong-chhia, tú-tio̍h nn̄g-ê siàu-liân ma-ma chhoā saⁿ-ê gín-á, iōng Pak-kiaⁿ-gí teh kóng ha̍k-hāu ê bú-gí kàu-ha̍k. Goá thiaⁿ in ê kháu-im bêng-bêng tō-sı̄ Tâi-oân-lâng, thiaⁿ bô gō͘ hun-cheng goá tō tòng bē-tiâu kóng: “Chin sit-lé, chhiáⁿ-mn̄g lín kám sı̄ Tâi-oân-lâng?” 『是啊!』In kóng sı̄. Soà--lo̍h goá koh kóng: “Lín kám sı̄ beh hō͘ lán ê bú-gí siau-sit?” Sui-bóng sı̄ nńg-nńg ê kháu-khı̀, goá mā sı̄ hō͘ ka-tı̄ kiaⁿ--tio̍h. Goá khoàⁿ-tio̍h hit ê ma-ma ba̍k-chiu thı̀ⁿ kah chin toā-lúi, i kóng:『可是我會聽.』“M̄-koh lí bē-hiáu kóng, tio̍h--bô?” Siàu-liân ma-ma tı̀m-thâu. Kı̀-jiân khai-sí--a goá tō kè-sio̍k tui--a: “Goá kóng--ê lí lóng thiaⁿ ū, tio̍h--bô?” Siàu-liân ma-ma iū-koh tı̀m-thâu, goá koh kè-sio̍k tui: “Tán gún chiah-ê ē-hiáu kóng Tâi-gí--ê sí liáu-liáu, siáng beh kóng hō͘ lí thiaⁿ? Tán-kàu hit-sı̂ Tâi-gí mā ē sí--khı̀, án-ne kám ē-sái?” Lēng-goā chı̍t-ê siàu-liân ma-ma kóng: “Gún tau ê gín-á Tâi-gí lóng kóng kah chin hó.” Goá sim-koaⁿ-lāi siūⁿ-kóng kám sı̄ án-ne? “Chin sit-lé, goá tú-chiah ū thiaⁿ-tio̍h lín nn̄g-ê ma-ma ê tùi-oē sı̄ iōng Pak-kiaⁿ-gí teh kóng, án-ne kám bē bô-ı̀-tiong chō-sêng gín-á ê kè-ta̍t chhò-loān?” Bô sı̂-kan siông-sè soeh-bêng, m̄-chai in kám thiaⁿ ū goá siūⁿ beh piáu-ta̍t ê ı̀-sù.『 我也很想學, 可是不知道怎麼開始......』Bengo! Tio̍h-chióng--a. “Goá ē kiàn-gı̄ lí chhoē hó-pêng-iú tàu-saⁿ-kāng lí liān-sı̍p, lí nā ū koat-sim beh o̍h, pêng-iú chóng--sı̄ ē kā lí pau-iông.” 『我會開始試試看的.』Siàu-liân ma-ma án-ne kóng, tông-sı̂ goá thiaⁿ-tio̍h a-kong teh hoah:「Phek-iàn, chhia lâi--a-o͘......” (TGB Thong-sı̀n tē 79 kı̂, 2006 nı̂ 4 goe̍h)