Tùi Sı̂-cheng ê Hoat
Téng-nı̂ Kàu-hoē-pò ū ı̀n chı̍t-tiuⁿ toaⁿ, kı̀ jı̍t-chhut jı̍t-lo̍h ê sı̂ , hō͘ lâng thang khoàⁿ lâi chhiâu in-ê sı̂-cheng . Chit-tiuⁿ ū toā lō͘-ēng . Chóng-sı̄ ū só͘-chāi khah bē-ēng-tit ; lâng nā toà tı̄ lāi-soaⁿ , bô khoàⁿ-kı̀ⁿ jı̍t-chhut jı̍t-lo̍h , hit-tiuⁿ toaⁿ khah bô lō͘-ēng . Só͘-í koh ke chı̍t-ê sin-hoat , hō͘ lâng chhı̀n-chhái só͘-chāi lóng ē tit tùi sı̂-cheng . Jı̍t-thâu sı̄ tang-pêng khí , sai-pêng lo̍h ; kàu tiong-tàu ê sı̂ jı̍t-thâu tùi-lâm . Só͘-í lâng nā ēng jı̍t-kui á-sı̄ pa̍t-mı̍h hoat-tō͘ chai jı̍t-thâu tùi-lâm ê sı̂, i chiū chai jı̍t-tiong-tàu ê sı̂ . Chóng-sı̄ jı̍t-thâu tú-tú tùi lâm ê sı̂, bô tek-khak sı̄ 12 tiám-cheng ; ū-sı̂ sı̄ 12 tiám chhut , ū-sı̂ iáu-boē 12 tiám .Taⁿ ē-té ı̀n chı̍t-tiuⁿ hō͘ lín chai jı̍t-thâu tùi lâm ê sı̂ sı̄ tú-tú kúi tiám-cheng . Chóng m̄-bián chiong ta̍k-jı̍t lóng ı̀n ; nā-sái thàn cheh-khı̀ lâi tùi , kı̂-û ê jı̍t thang chhui-chhek . Tiong-ng hit-choā sı̄ kı̀ lín ê cheh-khı̀ sio̍k tı̄ goán se-le̍k sím-mı̍h goe̍h sím-mı̍h jı̍t . Chit-ê m̄-nā ha̍p tı̄ kin-nı̂ ê lō͘-ēng , ta̍k-nı̂ lóng pêⁿ-pêⁿ sı̄ án-ni ; in-ūi nā sǹg se-le̍k ê nı̂ cheh-khı̀ sı̄ tiāⁿ-tio̍h hit-jı̍t , nı̂-nı̂ bô oāⁿ . Cheh-khı̀ Se-le̍k Jı̍t tùi lâm ê sı̂ Siáu-hân Chiaⁿ-goe̍h chhe 6 12,,06 Tāi-hân Chiaⁿ-goe̍h 20 12 ,,11 Lı̍p-chhun Jı̄-goe̍h chhe 4 12 ,,14 Ú-súi Jı̄-goe̍h 20 12 ,,14 Keⁿ-tı̍t 3-goe̍h chhe 3 12 ,,12 Chhun-hun 3-goe̍h 20 12 ,,08 Chheng-bêng 4-goe̍h chhe 4 12 ,,03 Kok-ú 4-goe̍h 19 11 ,,59 Lı̍p-hā 5-goe̍h chhe 5 11 ,,56 Siáu-boán 5-goe̍h 20 11 ,,56 Bông-chéng 6-goe̍h chhe 5 11 ,,58 Hā-chı̀ 6-goe̍h 21 12 ,,02 Siáu-sú 7-goe̍h chhe 7 12 ,,05 Tāi-sú 7-goe̍h 22 12 ,,06 Lı̍p-chhiu 8-goe̍h chhe 7 12 ,,06 Chhú-sú 8-goe̍h 23 12 ,,02 Pe̍h-lō͘ 9-goe̍h chhe 7 11 ,,58 Chhun-hun 9-goe̍h 22 11 ,,53 Hân-lō͘ 10-goe̍h chhe 8 11 ,,48 Sng-kàng 10-goe̍h 23 11 ,,44 Lı̍p-tang 11-goe̍h chhe 7 11 ,,44 Siáu-soat 11-goe̍h 22 11 ,,46 Tāi-soat 12-goe̍h chhe 6 11 ,,51 Tang-chı̀ 12-goe̍h 21 11 ,,58 Lâng nā ài chai jı̍t tùi lâm ê sı̂ , ū kúi-nā ê hoat-tō͘ thang ēng . Taⁿ chiong chı̍t-hāng kı̀ tı̄ ē-té . Tio̍h pı̄-pān chı̍t-ki tek á sı̄ chhâ , thih , lóng thang , chóng-sı̄ iàu-kín tio̍h tı̍t , chha-put-to 3 chhioh tn̂g ē-chò--tit . Chit-ki tio̍h hē thán-tó , pêⁿ-pêⁿ , chı̍t-thâu khoà tùi lâm , chı̍t-thâu khoà tùi pak, chiàⁿ-chiàⁿ , lı̄ tē chha-put-to 2 chhioh . Iā tio̍h pı̄-pān koh chı̍t-ki, khah-té , iû-goân tio̍h tı̍t-tı̍t , chiong nn̄g tiâu soàⁿ siāng-thâu pa̍k tı̄ hit-ê toā-ki ê ē-té , tūi-lo̍h tú-tú tı̄ ē-bı̄n lı̄ chha-put-to chhioh-poàⁿ, chhin-chhiūⁿ ē-té chit-ê tô͘ ê khoán-sit. Téng-po͘ ê sı̂ lâi khoàⁿ chiū tı̄ i-ê sai-pêng ū nn̄g ê iáⁿ. Jı̍t-thâu ná-koân, chit nn̄g-ê iáⁿ ná saⁿ-oá , kàu jı̍t tùi chiàⁿ lâm ê sı̂ nn̄g-ê iáⁿ chiū ha̍p chò-hoé chò chı̍t-ê , tú-tú tı̄ hit nn̄g ki ê ē-té . Koè-tàu ê sı̂ nn̄g-ê iáⁿ tùi tang-pêng koè--lâi , ná kú ná lı̄-khui . Tio̍h chim-chiok khoàⁿ nn̄g-ê iáⁿ chò-hoé ê sı̂ ; āu-lâi tùi téng-bı̄n chit-tiuⁿ-toaⁿ thang chai hit-tia̍p sı̄ tú-tú kúi-tiám-cheng .
(Tâi-lâm Hú-siâⁿ Kàu-hoē-pò Tē 134 koàn, 1896 nı̂ 5 ge̍h)