Goá tú lâi Toā-tiū-tiâⁿ ê tē-it ê chá-khí, in-ūi tı̄ chng-kha í-keng ióng-sêng ê sı̍p-koàn, chiah gō͘-tiám goā tio̍h cheng-sı̂n ah, tó tı̄ bı̂n-chhn̂g téng àn-sǹg, sı̄ khí--lâi khah hó leh, iah sı̄ kè-sio̍k tó leh khah hó? In-ūi iah bô liáu-kái chit-ê só͘-chāi ê chōng-hóng, goá bô siūⁿ-beh in-ūi goá chı̍t-ê lâng ê koan-hē khı̀ éng-hióng-tio̍h kı̂-tha pa̍t-lâng ê hioh-khùn sı̂-kan. Tı̄ goá ê piⁿ-á ū cha̍p kúi ê tiàm-goân, chı̍t-ê chı̍t-ê tó tı̄ hia, ná-chhiūⁿ han-chı̂ khoáⁿ. Ū lâng chhùi khui-khui, ū lâng ba̍k-chiu poàⁿ-bi poàⁿ-bi, mā ū lâng phak leh khùn, kui ê pâng-keng lóng-sı̄ chhàu-koāⁿ-sng-bı̄. Chiah jı̄-goe̍h tiong, thiⁿ-khı̀ tio̍h ná joa̍h-thiⁿ kāng-khoán joa̍h, iû-kı̂ chit kúi kang khı̀-hāu piàn-hoà chiok toā.
Chiah ê lâng m̄-chai tàu-té siáⁿ-mih sı̂-chūn chiah ē peh--khí-lâi leh? Goá chı̍t-bı̄n leh siūⁿ kó͘-chá sè-hàn sı̂-chūn ê tāi-chı̀, chı̍t-bı̄n koh leh chhai-chhek kap su-khó to͘-chhı̄-lâng ê seng-oa̍h hong-sek. Hit-ê sı̂-chūn Toā-tiū-tiâⁿ ê chái-khí ū chhı̄-tiûⁿ koh-chióng boē mı̍h-kiāⁿ ê kiò-boē-siaⁿ, hō͘ lâng chin siàu-liām hit chióng lāu-jia̍t ê ke-kéng. Toà tı̄ gún chhù-piⁿ ê gín-á mā lóng chiok chá tio̍h khí--lâi, kā in chhù--lí tàu boē iû-chia̍h-koé. Tú thiaⁿ-tio̍h beh poaⁿ-khı̀ chng-kha ê sı̂-chūn, goá sim-lāi mā bô siáⁿ goān-ı̀ lı̄-khui Tâi-pak, tān-sı̄ tán kàu toā-lâng kā chhù--lí toā-sè-hāng mı̍h-kiāⁿ lóng poaⁿ-khı̀ gû-chhia téng, kā gún mā phō-khı̀ gû-chhia téng, chı̍t lō͘ hàiⁿ leh hàiⁿ leh hiòng chháu-tē ê lō͘ chhut-hoat, goá ê sim-lāi soah ū kóng-boē-chhut ê hoaⁿ-hí.
A-pà kap a-bú chhoā goá poaⁿ-khı̀ chng-kha ê chêng-kéng it-tı̍t kàu taⁿ mā iá phû tı̄ goá ê náu-hái tiong. Goá chêng chı̍t kang ê thàu-chá ū khı̀ kó͘-chá goá sè-hàn sı̂ toà-koè ê ke-á se̍h-se̍h kiâⁿ-kiâⁿ, m̄-koh, í-keng kah kı̀-ek tiong ê chhù-piⁿ keh-piah bô-kāng ah. Lâu-á-chhù lóng piàn kū--khı̀ ah, chı̍t chióng siok-bo̍k bô-nāi ê sim-chêng chhiong-boán tı̄ goá ê sim-lāi. Hiông-hiông goá thâu chı̍t kái hoat-kak sı̂-kan koè-liáu sı̄ hiah-nı̄-á kín, ba̍k-chiu khoàⁿ-boē-tio̍h ê sı̂-kan ê lâu-sit, kı̂-sı̍t mā sı̄ kah khe-liû ê lâu-sit sı̄ kāng-khoán, chı̍t-tiám chı̍t-tiám kā thô͘-soa kap chio̍h-thâu ūn-khı̀ kàu khe-chúi ê chhut-hái-kháu. Lán lâng ê jio̍k-thé mā-sı̄ tè sı̂-kan ê choán-piàn, chiām-chiām siau-boâ piàn lāu, piàn bô-lō͘-iōng--khı̀.
Goá tio̍h tı̄ chit khoán o͘-pe̍h loān-siūⁿ tiong su-khó chiok chē tāi-chı̀, tı̄ chit-ê tiong-kan, khùn tı̄ goá piⁿ-á ê lâng khoàⁿ--khı̀-lâi lóng iá bô beh peh--khı̀-lâi ê khoán, ū ê koh khùn kah kō͘ⁿ-kō͘ⁿ-kiò. Jı̍t-thâu mā ta̍uh-ta̍uh-á ùi thang-á-mn̂g ê chı̍t phāng chiò--jı̍p-lâi, thiⁿ mā kng--khí-lâi ah. Ke-á-lō͘ óng-hoê ê kha-pō͘-siaⁿ mā chiām-chiām bô-êng khí-lâi. Khoàⁿ-tio̍h goá cha-hng koāⁿ--lâi ê hit kha phoê-siuⁿ-á iá-koh khǹg tı̄ goá khùn ê só͘-chāi ê piⁿ-á, kám-kak ná-chhiūⁿ ka-kı̄ bô chhēng-saⁿ khiā tı̄ ta̍k-ke ê bı̄n-thâu-chêng kāng-khoán, chiok kiàn-siàu ê. Goân-pún goá siūⁿ-beh tán ta̍k-ke iah-boē peh--khí-lâi chı̀n-chêng, tio̍h kā siu-khı̀ tû-á lāi, m̄-koh, goá koh bô-goān-ı̀ bô chun-tiōng pa̍t-lâng chhı̀n-chhái khı̀ khui tû-á, só͘-í chí-hó tán ta̍k-ke lóng khùn chhíⁿ liáu-āu chiah koh kóng. Goá iū-koh siūⁿ-khí goán lāu-pē kap lāu-bú, su-hiong ê sim-chêng hiông-hiông chiàm-boán tio̍h goá ê sim-koaⁿ.
Chit-má goá sin-thé khiàm-an ê lāu-bú èng-kai khí-chhn̂g leh chhı̄-ke. Hiòng thang-á-mn̂g kā khoàⁿ--khı̀, tùi-bı̄n chhù-piⁿ ê chhù-lāi-té o͘-sô-sô, khoàⁿ-boē-chhut ū lâng khí-chhn̂g ê khoán. Goá thau-thau leh siūⁿ, Tâi-pak ê chá-khí chin-chiàⁿ sı̄ bô-liâu, nā-sı̄ tı̄ chng-kha, tû-liáu pēⁿ-lâng í-goā, sı̄ bô-lâng ē khùn kàu hiah-nı̄-á oàⁿ. Siūⁿ-tio̍h í-āu ka-kı̄ mā-sı̄ ài kap pa̍t-lâng kāng-khoán koè chit khoán oàⁿ-khí-chhn̂g ê jı̍t-chí, ná-chhiūⁿ chı̍t-phı̀ⁿ o͘-hûn tio̍h khàm tı̄ goá ê sim-koaⁿ-thâu ah. Iû-kı̂, thâu-ke chêng chı̍t kang hō͘ goá chhut-khı̀ Tâi-pak ke-thâu kiâⁿ-kiâⁿ leh, goá siūⁿ khó-lêng sı̄ in-ūi goá bô chò khang-khoè, só͘-í chiah boē chhin-chhiūⁿ in hiah-nı̄-á thiám. Koè chit khoán ê seng-oa̍h, ka-kı̄ kám chin-chiàⁿ ū ki-hoē ē chhut-thâu leh? Hoê-sióng thâu-ke Lí Ōng-hok cha-àm tùi goá kóng ê oē, tı̄ goá ê sim-koaⁿ-thâu lāi, chı̍t pái iū-koh chı̍t pái ê su-khó, lú lâi lú kám-kak tùi ka-kı̄ ê chiân-tô͘ bâng-bâng hái-hái, sim-chêng sı̄ lú lâi lú ut-chut. Goá beh án-choáⁿ chiah ē-tàng tu̍t-phoà khùn-kéng, ū chhut-thâu-thiⁿ ê chı̍t kang leh? Lú siūⁿ goá lú pi-siong, só͘-í khah kín kā a-bú hō͘ goá ê hiuⁿ-hoé tiah ân-ân, chhùi--lí O-mı̂-tô Hu̍t se̍h-se̍h-liām, hi-bāng sı̂n-bêng ē-tàng pó-pı̀, jı̂-chhiáⁿ chí-sı̄ goá beh án-choáⁿ kiâⁿ chiah hó. Goá siūⁿ siōng tiōng-iàu ê iah-sı̄ ài khò ka-kı̄ ê phah-piàⁿ. Nā-sı̄ ū ha̍k-būn koh ka-siōng phah-piàⁿ, it-tēng ē-sái tu̍t-phoà ba̍k-chêng ê khùn-kéng, kiâⁿ-chhut chı̍t tiâu kong-bêng ê lō͘ lâi. M̄-koh, goá eng-kai ài khı̀ tui-kiû tó-chı̍t-mn̂g ê ha̍k-būn leh? Ū-chı̂ⁿ-lâng ê kiáⁿ, ē-sái tha̍k i-kho, tān-sı̄ chhiūⁿ goá chit khoán, chham kok-tiong lóng jı̍p-boē-khı̀ ê lâng, goá siūⁿ chí-hó tán-thāi sı̂n-bêng ê an-pâi ah. Thó͘-tē-kong, Má-chó͘ Pô, sı̄-m̄-sı̄ sè-kan só͘-ū ê lâng lóng chhin-chhiūⁿ to̍k-io̍h kāng-khoán? Kám sı̄ kóng lâng ê pún-sèng sı̄ siān-liông leh?
“Ûi-tek ah, goá mā kā lín a-pà kóng--koè ah, goá kiò lí lâi goá ê tiàm sı̄ ūi-tio̍h beh kā lí hùn-liān chò chı̍t ê ū-lō͘-iōng ê lâng. Só͘-í, goá hi-bāng lí ē-sái chhin-chhiūⁿ tı̄ chng-kha sı̂ kāng-khoán phah-piàⁿ, nā-sı̄ án-ne, lí chū-jiân tio̍h ū chiân-tô͘ lo̍h.”
Thâu-ke Lí Ōng-hok sian-siⁿ tùi goá kóng ê oē, tı̄ goá ê náu-hái tiong phû-chhut, i ná-chhiūⁿ sı̄ iú-ı̀ beh tiám-chhíⁿ goá. Keng-koè a-pà pêng-iú ê siāu-kài, goá lâi-kàu i ê tiàm chia̍h-thâu-lō͘, i chhin-chhiat jı̂-chhiáⁿ chı̍t hoan kó͘-lē ê oē, hō͘ goá kám-kak chin-chiàⁿ kám-tōng, ba̍k-sái kiōng-beh lâu--chhut-lâi. M̄-koh, goá chin kín tio̍h chín-chok khí-lâi, sui-jiân kóng goá chit khoán ê piáu-hiān sı̄ chng-kha gín-á chin chū-jiân, bô-ké-sian ê piáu-hiān, tān-sı̄ siōng-hó iah-sı̄ m̄-ài hō͘ pa̍t-lâng khoàⁿ--tio̍h, gō͘-hoē kóng goá sı̄ chı̍t ê ài-khàu ê nńg-kha-hê chiah hó. Thâu-ke sui-jiân bô kóng beh kā goá hùn-liān chò tiàm-lāi ê keng-lí jı̂n-châi, m̄-koh, i tùi goá kóng chiok chē chin kám-sim, chin kó͘-bú ê oē. I kóng:
“Ûi-tek ah, goá mā chai-iáⁿ lí chin ài tha̍k-chheh. Lín lāu-pē ū kā goá kóng lí chin siūⁿ-beh kè-sio̍k seng-ha̍k. Lâng oa̍h tı̄ ū lí-sióng, ū bo̍k-piau, sı̄ chı̍t kiāⁿ chin hó ê tāi-chı̀. Tān-sı̄, m̄-chai lí ū hó-hó siūⁿ--koè bô? It-poaⁿ-lâng kóng ê ha̍k-būn chí-sı̄ iōng lâi tit-tio̍h siā-hoē tē-ūi ê chı̍t chióng kang-kū niā-niā, sı̄ beh iōng lâi kái-siān ka-kı̄ ê seng-oa̍h, che iá tio̍h sı̄ khai-thok pún-sin seng-oa̍h ê chı̍t chióng ha̍k-būn. Nā chiàu án-ne kóng--khí-lâi, kı̂-sı̍t kah khiām-chı̂ⁿ sı̄ kāng-khoán ê ı̀-sù. Só͘-í, goá ài lí chū kin-á-jı̍t khai-sí, hó-hó-á toè goá o̍h chò-seng-lí. Chò seng-lí tio̍h-sı̄ chı̍t chióng ha̍k-būn, lí kóng kám m̄-sı̄ leh? Chı̀-chió, goá pún-lâng tio̍h ū chit khoán ê keng-giām. It-poaⁿ leh pı̀ⁿ Bûn-hoà ūn-tōng ê siàu-liân-lâng, kı̂-sı̍t lóng-sı̄ chı̍t-koá bô-lêng, bô siáⁿ chhut-thoat ê bí-thâng niā-niā. Lâng chí-iàu ū-chı̂ⁿ, tio̍h chū-jiân ū lâng hōng lí ûi sin-sū. Jı̂-chhiáⁿ, sı̍t-chè leh thui-tōng kap chiáng-ak lán bûn-hoà hoat-tián ê lâng mā lóng sı̄ chit khoán lâng leh. Só͘-í, goá jı̄n-ûi chí-iàu hó-hó thàn-chı̂ⁿ tio̍h ē-sái lo̍h. Goá pún-lâng mā sı̄ kan-taⁿ tiong-ha̍k pit-gia̍p niā-niā, tān-sı̄ nā-sı̄ ū su-iàu, goá mā-sı̄ ē-sái khai-chı̂ⁿ chhiáⁿ chı̍t ê tāi-ha̍k pit-gia̍p ê lâng lâi thè goá chò khang-khoè. Ū lâng kóng, Tâi-oân chı̂ⁿ im kha-ba̍k, lí mā khó-lêng thiaⁿ-koè chı̍t kù oē? Che tio̍h-sı̄ siong-gia̍p ê cheng-sı̂n, án-ne lí liáu-kái á bô?”
“Sı̄, goá liáu-kái ah.”
Sui-jiân sı̄ án-ne kóng, tān-sı̄ goá iah-sı̄ kám-kak koài-koài, bô-hoat-tō͘ oân-choân siong-sı̀n i tùi goá só͘ kóng ê oē. Sui-jiân, i kóng--ê chū-jiân ū i ê tō-lí, tān-sı̄, chhut-jı̍p siā-hoē, kám chin-chiàⁿ khò án-ne tio̍h ē ū kàu ah? Goá sim-lāi ū tām-po̍h-á bô-kam-goān, chin siūⁿ-beh thê-chhut bô-kāng ê khoàⁿ-hoat lâi chham-siông. Tān-sı̄, goá kiaⁿ ê che kan-taⁿ sı̄ goá chit-ê chng-kha gín-á thian-chin lōng-bān ê siūⁿ-hoat niā-niā. Thâu-ke só͘ tāi-piáu ê siūⁿ-hoat khó-lêng sı̄ chí tı̄ siā-hoē siōng ū-thâu ū-bı̄n ê lâng ê siūⁿ-hoat, in ū-hoat-tō͘ keng-êng chiah-nı̄-á toā ê khı̀-gia̍p, i só͘ kóng ê oē eng-kai sı̄ bô-m̄-tio̍h. Goá ū chiah-nı̄-á gâu ê thâu-ke, āu-pái tńg-khı̀ chng-kha sı̂, goá ē-sái hiòng chng-kha ê chhin-chiâⁿ iah-sı̄ pêng-iú, hó-hó-á chhàu-toāⁿ chı̍t-ē leh. Thâu-ke iah-ū kóng, “lâng” chit-ê jı̄ sui-jiân sı̄ kan-taⁿ nn̄g phiat niā-niā, m̄-koh, lán oa̍h tı̄ chit-ê sè-kan siōng, it-tēng iah-sı̄ ài hō͘-siong pang-bâng kap ha̍p-chok, khah án-choáⁿ kóng, khò chı̍t ê lâng siūⁿ-beh ū chhut-thâu-thiⁿ, iah-sı̄ chiâⁿ piàⁿ leh. Goá siūⁿ i kóng ê koh ū tām-po̍h-á tō-lí. Tı̄ o͘-pe̍h loān-siūⁿ ê tiong-kan, chá-khí chheng-sin ê khong-khı̀ í-keng ū sió-khoá piàn khah lah-sap, goá sı̄m-chı̀ kám-kak heng-khám ū bô siáⁿ sóng-khoài. Nā-sı̄ kóng bûn-hoà ūn-tōng ê kiat-kó, oân-choân sit-pāi, tān-sı̄ lán ê bûn-hoà ūn-tōng nà-ē iah-sı̄ it-tı̍t hō͘ só͘-ūi ê sin-sū khan leh kiâⁿ leh? Che tāi-khài tio̍h-sı̄ lán it-poaⁿ-lâng bô-hoat-tō͘ liáu-kái ê só͘-chāi loh. Ū chı̍t nn̄g ê lâng tı̄ chit-ê sı̂-chūn peh--khí-lâi, goá mā kín toè in khí--lâi, cháu-khı̀ piān-só͘.
Goán khùn ê só͘-chāi sı̄ tı̄ chhng-khò͘ ê jı̄-lâu, só͘-í, múi chı̍t kang ê chá-khí lóng thiaⁿ-boē-tio̍h tû-pâng ū jı̄m-hô ê tōng-chēng. Múi chı̍t kang, goán lóng sı̄ seng tı̄ chhng-khò͘ chit pêng sé-bı̄n sé-liáu-āu, chiah toè seng lâi ê kı̂-tha tiàm-goân khı̀ thâu-ke hia chia̍h-pn̄g. It-tı̍t kàu goá lâi ê tē-saⁿ kang, goá hoat-kak chı̍t kiāⁿ chin chhù-bı̄ ê tāi-chı̀, goá kám-kak goán thâu-ke giâ ê pit tio̍h ná chhı̄ ah-á ê lâng the̍h ê tek-ko kāng-khoán, tiàm-lāi ê só͘-ū tiàm-goân tio̍h ná ah-á kāng-khoán. Ah-á sı̄ toè chhı̄ ah-á ê lâng ê tek-ko hong-hiòng lâi koat-tēng in beh khı̀ tó-ūi. Che khó-lêng sı̄ goá chit-ê chng-kha-lâng tùi to͘-chhı̄ seng-oa̍h hē chiok toā ê kià-bāng, chiah ē ū chit khoán siūⁿ-hoat. Só͘-ū ê lâng lóng chē chı̍t liàn ûi leh chia̍h-pn̄g, múi chı̍t ê lâng lóng sı̄ bô-êng leh pe-pn̄g, che khó-lêng sı̄ lô-tōng-chiá ê kui-kí. Lô-tōng-chiá ài kín kā pn̄g chia̍h hō͘ liáu khı̀ chò-sit, só͘-í, chia̍h-pn̄g kín soah chū-jiân piàn-chò lô-tōng kai-chân ê phó͘-phiàn hiān-siōng. Khoàⁿ-tio̍h in chia̍h-pn̄g bô pō͘ tio̍h it-tı̍t thun-khı̀ pak-tó͘ lāi hit khoán piàⁿ-sı̀ thun piàⁿ-sı̀ chia̍h ê chia̍h-hoat, goá kám-kak che kám ē kah in tı̄ siong-gia̍p siōng ūi-tio̍h beh tit-tio̍h koh-khah toā ê lı̄-ek ê sim-thài sı̄ kāng-khoán leh.
Lú siūⁿ goá lú kám-kak goá m̄-chai beh án-choáⁿ lâi léng-tō chı̍t phoe lâng. Goá siūⁿ goá sı̄ kah in oa̍h tı̄ bô-kāng sè-kài ê lâng. Tān-sı̄, goá mā liáu-kái thâu-ke chı̍t-khai-sí tio̍h beh kiò goá koán-siàu sı̄ chhut-chū it-phiàn hó-ı̀. Tû-liáu koán-siàu í-goā ê sı̂-kan, goá mā kah kı̂-tha ê tiàm-goân kāng-khoán, ài khiā tı̄ kūi-tâi ê āu-piah, chhiú--lí the̍h chı̍t ki chhioh, lâi chio-ho͘ hiâm-tang hiâm-sai ê lâng-kheh. Goá kám-kak chit khoán ê khang-khoè sı̍t-chāi m̄-sı̄ chı̍t ê cha-po͘-lâng eng-kai chò ê, khiā tı̄ kūi-tâi hia ê hit khoán chu-bı̄ sı̍t-chāi chin oàn-khı̀, iû-kı̂ sı̄ tú-tio̍h lú-sèng ê lâng-kheh, ài tı̄ in bı̄n-thâu-chêng chhùi-chhiò ba̍k-chhiò, tàm-thâu soeh-to-siā, hō͘ goá kám-kak chiok boē-koàn-sı̀. M̄-koh, goá chai-iáⁿ bô koàn-sı̀ mā-sı̄ boē-sái, só͘-í, goá tiāⁿ-tiāⁿ chı̄n-liōng kó͘-lē goá ka-kı̄ kóng: chin kín tio̍h ē koàn-sı̀, goá eng-kai sı̄ ē-tàng sek-èng chit khoán ê khang-khoè chiah tio̍h. Tı̄ koán-siàu-phō͘ hong-bı̄n, goá mā tiāⁿ-tiāⁿ kā chioh-chı̂ⁿ hō͘ lâng kap kā lâng chioh-chı̂ⁿ, chit nn̄g hāng mı̍h-kiāⁿ chhòng tò-péng khı̀.
Só͘-í, goá tio̍h-ài tiāⁿ-tiāⁿ tı̄ goá ê thâu-khak-lāi put-toān ê liān-sı̍p, hi-bāng goá ū-hoat-tō͘ ē-tàng kā in kı̀-tiâu. Goá siūⁿ lán lâng oa̍h tı̄ chit-ê sè-kan, ná-chhiūⁿ chóng-sı̄ cháu boē khui chioh-chı̂ⁿ hō͘ lâng kap kā lâng chioh-chı̂ⁿ chit nn̄g chióng kap chı̂ⁿ ū koan-hē ê oa̍h-tōng, tān-sı̄, mā sam-put-gō͘-sı̂ tio̍h-sı̄ khı̀ siū-tio̍h chit nn̄g chióng hêng-ûi só͘ khùn-jiáu. Só͘-ūi chhiah-jı̄ chit-ê sû, mā sı̄ goá lâi-kàu Tâi-pak liáu, goá chiah chin-chiàⁿ liáu-kái i ê ı̀-sù. Tùi goá lâi kóng, goá ê khang-khoè nā-sı̄ kan-taⁿ su-iàu kı̀-siàu niā-niā, bô-su-iàu khı̀ èng-hù lâng-kheh, goá siūⁿ chit hūn thâu-lō͘ èng-kai sı̄ chı̍t hūn khin-sang ê thâu-lō͘. M̄-koh, sū-sı̍t m̄-sı̄ án-ne, goá su-iàu chio-ho͘ lâng-kheh. Chı̍t ê bô-chı̂ⁿ ê chng-kha gín-á, tiāⁿ-tiāⁿ ài kap hia ū-chı̂ⁿ ū-sè ê kùi-hū-jı̂n èng-siû, chiap-chhiok, sı̍t-chāi m̄-sı̄ goá ê choan-tióng. Kan-taⁿ siūⁿ--tio̍h, goá tio̍h thâu-khak-thiàⁿ. In-ūi goá sı̄ tı̄ khah sán-chhiah-lâng ê ka-têng chhut-sı̀, só͘-í, goá chiok kán-tan tio̍h ē-tàng liáu-kái sàn-chhiah-lâng boé mı̍h-kiāⁿ ê sim-lí. Nā-sı̄ ū-khó-lêng, goá goān-ı̀ chı̄n-liōng kā mı̍h-kiāⁿ boē khah sio̍k hō͘ in. Tān-sı̄, chit-má ê seng-lí-lâng chò-seng-lí ê sim-thài sı̄ put-koán sı̄ hó-gia̍h-lâng iah-sı̄ sàn-chhiah-lâng, lóng beh kā mı̍h-kiāⁿ ê kè-siàu khui chiok koân hō͘ in, só͘-í sàn-chhiah-lâng bô-hoat-tō͘ mā-sı̄ ài khai hiah-nı̄-á chē chı̂ⁿ lâi kā in boé.
Mā sı̄ in-ūi án-ne, goá lóng chı̄n-liōng phiah-khui chiap-thāi lâng-kheh ê khang-khoè. Goán ê tiàm múi kò goe̍h lóng ài kú-pān chı̍t kài ê chō-tâm-hoē. Chit-ê chō-tâm hoē ê bo̍k-tek, siōng chú-iàu pēng-m̄-sı̄ beh thiaⁿ thâu-ke kóng chı̍t-koá gō͘-sı̀-saⁿ iah-sı̄ liân-lo̍k tiàm-lāi ta̍k-ke ê kám-chêng, siōng chú-iàu sı̄ beh hō͘ gún ū ki-hoē lâi ha̍k-sı̍p chı̍t-koá siong-gia̍p siōng ê khò-têng. Thâu-ke tı̄ o͘-pang téng-koân toā-toā siá siong-gia̍p chú-gı̄ kúi ê toā-jı̄, chin jı̄n-chin kái-soeh siáⁿ-mih sı̄ chu-pún chú-gı̄ hō͘ gún liáu-kái. Tān-sı̄, goá iah-sı̄ thiaⁿ-liáu bū-sà-sà. Tàu-té sı̄ thâu-ke i kóng-liáu bô-chheng-chhó leh? Iah-sı̄ goá ka-kı̄ ha̍k-sek bô kàu? M̄-koh, goá ka-kı̄ chai-iáⁿ goá khiàm-khoat sı̀n-sim sı̄ chin-chiàⁿ ê. Khoàⁿ-tio̍h piⁿ-á kı̂-tha ê lâng, ùi lú-tiàm-goân kàu sin ûi lāu-kó͘-tong ê keng-lí, múi chı̍t ê lâng lóng tiām-chih-chih, chin jı̄n-chin leh thiaⁿ.
“In-ūi tio̍h-sı̄ án-ne, só͘-í, lán tùi-thāi lâng-kheh it-tēng ài ū lé-māu. Che choa̍t-tùi m̄-sı̄ ūi-tio̍h beh tui-kiû lı̄-ek niā-niā, i sı̄ chı̍t chióng siā-hoē su-sióng. Ē-tàng iōng lâi chò-ûi lán chò-lâng ê chı̍t ê ki-pún ê tō-lí.”
Goá sı̄ chiok bô-kán-tan chiah siūⁿ-chhut chit-ê kiat-lūn, tān-sı̄, goá iah-sı̄ bô-hoat-tō͘ liáu-kái, ūi-tio̍h beh pa-kiat lâng-kheh, kéng-jiân ū chiah-nı̄-á toā ê ha̍k-būn kap su-sióng tı̄ lāi-té. Sui-jiân, goá ū ùi chit lāi-té liáu-kái khah chē siā-hoē ê hiān-siōng, chēng-ka khah chē ê kiàn-sek. Tān-sı̄ beh kiò goá ke-chhùi piàn ah-chhùi, tong-jiân goá iah-sı̄ chò-boē-kàu. Tı̄ goá ê sè-kài tiong, goá jı̄n-ûi lí-lūn ê mı̍h-kiāⁿ m̄-bián siuⁿ chē, chí-iàu ē-tàng tùi lâng ū sêng-ı̀, án-ne tio̍h ē-sái ah. Nā-sı̄ kan-taⁿ beh iōng pa-kiat, o͘-pe̍h loān po lâi hōng-thāi lâng-kheh ê sı̂-chūn, goá kám-kak che kah sam-chhit-á ū siáⁿ-mih bô-kāng leh? Láu-sı̍t kóng, goá chin bô siūⁿ-beh kè-sio̍k lâu tı̄ tiàm-lāi chò--lo̍h-khı̀. Goá ta̍k-kang lóng leh pài-thok Thiⁿ-kong-peh, hi-bāng i ē-tàng hō͘ goá tı̄ gı̂n-hâng iah-sı̄ tı̄ kı̂-tha kong-si chhoē-tio̍h thâu-lō͘. Thâu-ke sui-jiân it-tı̍t kó͘-lē goá ài jı̄n-chin tha̍k-chheh, tān-sı̄, goá m̄-chai beh án-choáⁿ tha̍k khí, goá kan-taⁿ ē-tàng tı̄ kı̀-siàu liáu, ū-êng ê sı̂-kan, tha̍k chı̍t-koá pò-choá niā-niā.
Tiàm-lāi ū kui-tēng, siōng-pan sı̂-kan boē-sái khoàⁿ-chheh, nà ū khó-lêng ē-sái jı̄n-chin tha̍k-chheh leh? Goá bô-hoat-tō͘, chí-hó siá-phoe hō͘ a-pà kap a-niâ, kap in chham-siông. Goá kóng goá kam-goān tńg-khı̀ chng-kha chò khah chho͘-sio̍k ê khang-khoè, nā-sı̄ án-ne, goá iah-ū sı̂-kan tha̍k chı̍t-koá chheh. Jı̂-chhiáⁿ, a-bú ê sin-thé mā bô siáⁿ kiān-khong. Kı̀-jiân it-sim beh chhut-lâi chia̍h-thâu-lō͘, tio̍h eng-kai chhoē khah ū ı̀-gı̄ ê khang-khoè chò chiah tio̍h. Goán chhù--lí m̄-sı̄ ū chu-pún ê ū-chı̂ⁿ ka-têng, ká-sú nā-sı̄ ū chu-pún lâi kóng, koh lâi pò͘-liāu ê lâi-goân sı̄ iōng phoè-kip ê. Só͘-í, goá ê chiong-lâi sı̄ bô-khó-lêng chò pò͘-tiàm ê thâu-ke. Nā-sı̄ án-ne kóng, goá sı̍t-chāi bô-su-iàu tı̄ chia kè-sio̍k lōng-hùi sı̂-kan ah. A-pà, goá mā bô-goān-ı̀ kóng, goá tı̄ sū-gia̍p siōng iah-boē sêng-kong chı̀n-chêng tio̍h án-ne tńg-khı̀ lán chng-kha. Ūi-tio̍h beh kò͘-choân thâu-ke ê bı̄n-chú, goá siūⁿ goá eng-kai seng tńg-khı̀ chng-kha, tán lēng-goā chhoē-tio̍h thâu-lō͘ liáu-āu chiah-koh khí-lâi Tâi-pak. Goá siá-phoe hō͘ a-pà su-iàu iōng Hàn-jı̄ lâi siá, ūi-tio̍h beh siá chit tiuⁿ phoe, khai-liáu goá chiok chē cheng-sı̂n. Hó-ka-chài kong-ha̍k-hāu pit-gia̍p liáu, tı̄ goā-kháu leh chia̍h-thâu-lō͘ ê sı̂-chūn, múi chı̍t àm, goá lóng kah a-pà o̍h tha̍k Lûn-gí, só͘-í, chit-má tú-á-hó ē-sái iōng-tio̍h. Koè-khı̀, goá mā chhı̀ iōng Hàn-jı̄ siá koè phoe, goân-té sı̄ ūi-tio̍h chhù-piⁿ keh-piah ē lâi pài-thok goá thè in siá-phoe, goá kiaⁿ goá ē làu-khùi, só͘-í te̍k-piat ka-kiông khı̀ o̍h ê, siūⁿ-boē-kàu tı̄ chit-ê sı̂-chūn koh chin-chiàⁿ ū-lō͘-iōng ah.
M̄-koh, a-pà siá-phoe lâi kóng, a-bú khoàⁿ-tio̍h goá siá ê phoe tùi goá ū chit khoán ê siūⁿ-hoat kám-kak chiok sit-bōng. A-pà kóng, ū chı̍t kù sio̍k-gí, chı̍t lí thong tio̍h bān sū kái, chí-iàu ē-tàng oân-oân choân-choân liáu-kái chı̍t hāng tāi-chı̀ ê tō-lí, kı̂-tha só͘-ū ê tāi-chı̀ chha-put-to mā-sı̄ ē-tàng liáu-kái. Só͘-í, in hi-bāng goá kı̀-jiân í-keng leh siōng-pan, tio̍h ài thê-chhut nāi-sim kap ı̀-chı̀, chin-chiàⁿ lâi o̍h chı̍t-koá mı̍h-kiāⁿ, khip-siu jı̂n-seng ê keng-giām chiah tio̍h. A-pà tio̍h án-ne kóng ah, goá iah ē-tàng án-choáⁿ leh? Chí-hó bı̄n-phoê kek khah kāu leh, ióng-kám lâi bı̄n-tùi hiān-sı̍t ah. Goá siūⁿ goá chí-iàu tı̄ chia kā kı̀-siàu ê ki-chhó͘ phah hō͘ hó, o̍h ē-hiáu, goá āu-pái khı̀ siáⁿ-mih só͘-chāi lóng ē-sái chò koán-siàu ê khang-khoè. Só͘-í, goá koat-sim beh kè-sio̍k lâu tı̄ chia hó-hó-á phah-piàⁿ, goá ê bo̍k-te̍k pēng-m̄-sı̄ chún-pı̄ chiong-lâi beh chò toā-thâu-ke, goá chí-put-kò sı̄ siūⁿ-beh chhiong-sı̍t goá ka-kı̄ niā-niā. Só͘-í, goá chiām-sı̂ kā sim siu--tńg-lâi, choan-sim lâi chò goá tiàm-goân kı̀-siàu ê khang-khoè.
Tio̍h tı̄ chit-ê sı̂-chūn, goá kèng-jiân khı̀ ài-tio̍h chı̍t ê cha-bó͘ gín-á. Khó-lêng in-ūi goá ài koán-siàu jı̂-chhiáⁿ ài kò͘-tiàm, só͘-í, goá ê kı̄n-sı̄ mā lú lâi lú chhim. Múi chı̍t kang chò tāi-chı̀ ê sı̂-chūn, goá lóng it-tēng ài koà ba̍k-kiàⁿ chiah khoàⁿ ū mı̍h-kiāⁿ. Goá ê bı̄n-sek pún-té tio̍h khah pe̍h, pêng-siông-sı̂, goá mā bô chhiūⁿ kı̂-tha ê tiàm-goân kāng-khoán hiah-nı̄-á ài kóng-chhiò. Só͘-í, in kā goá hō chı̍t ê miâ kiò ‘lāu-kó͘-tóng’. Goá chit-ê lāu-kó͘-tóng ē khı̀ tâm loân-ài, kı̂-sı̍t sı̄ in-ūi goá khı̀ tú-tio̍h goá sè-hàn sı̂-chūn toà tı̄ Tâi-pak chhù-piⁿ ê cha-bó͘ gín-á. Goán tau goân-pún toà tı̄ Káng-to͘, tı̄ goá chhit hoè ê hit tang, a-pà thiaⁿ-tio̍h chng-kha chı̍t ê pêng-iú ê khó͘-khǹg, i kóng, tı̄ to͘-chhı̄ lāi leh cháu-chông siūⁿ-beh ū chhut-thâu-thiⁿ ê chı̍t kang, tān-sı̄, koh bô pá-ak ê sı̂-chūn, put-jû tńg-lâi chng-kha hoat-tián mā khah ū chiân-tô͘. In-ūi án-ne, gún tau tio̍h ùi Tâi-pak poaⁿ-tńg-khı̀ chng-kha, boé chı̍t tè thó͘-tē, khai-sí keng-êng chı̍t keng phah-chhek-á ê tiàm. Tān-sı̄, mā bô in-ūi án-ne thàn-tio̍h toā chı̂ⁿ. Thâu-tú-á kóng-tio̍h ê hit-ê cha-bó͘ gín-á, tio̍h-sı̄ lâu tı̄ goá kı̀-ek tiong ê cha-bó͘ gín-á, i ê miâ kiò A-lân.
Goá tē-it kái tú-tio̍h A-lân sı̄ tı̄ ū chı̍t tang ê chiaⁿ--goe̍h, A-lân chhēng chı̍t su chin súi ê saⁿ, beh khı̀ chiap kè-chhut-khı̀ goā-tē ê a-chí tńg-lâi chhù--lí. A-lân chhēng hiah-nı̄-á súi ê saⁿ, jı̂-chhiáⁿ koh chē kiō ê koan-hē, goân-pún tio̍h chin ū toā-sió-chiá khı̀-phài ê A-lân, khoàⁿ--khí-lâi koh-khah súi, koh-khah iau-kiau. Goá kap chı̍t tı̄n kâu-gín-á khiā tı̄ A-lân in tau mn̂g-kha-kháu leh tàu-lāu-jia̍t. Khoàⁿ-tio̍h A-lân hiah-nı̄-á súi, goá khoàⁿ kàu chhùi-khui-khui, chhùi-noā kiông-beh lâu--chhut-lâi. Tio̍h tı̄ hit-tang-sı̂, kı̂-tiong ū chı̍t ê gín-á thiau-kang beh khi-hū A-lân, i toā-siaⁿ hoah kóng A-lân beh chhut-kè loh, A-lân beh chò sin-niû loh. Goá kan-taⁿ khoàⁿ-tio̍h A-lân ba̍k-thâu kat-kat, bô siáⁿ hoaⁿ-hí. ‘Phùi’ chı̍t siaⁿ, chhùi-noā tio̍h hiòng gún chit pêng phùi--koè-lâi. Só͘-ū ê gín-á lóng cháu-liáu-liáu, A-lân ê chhùi-noā tú-á-hó phùi tı̄ goá ê bı̄n téng-koân. Tán goá hoat-hiān hoat-seng siáⁿ-mih tāi-chı̀ í-keng boē-hù ah. Só͘-í, goá chí-hó bô-siáⁿ sóng-khoài khàu-bı̄n khàu-bı̄n tńg-khı̀ chhù--lí. Kàu chhù liáu-āu, goá koh kiaⁿ a-pà sı̄-m̄-sı̄ ū khoàⁿ-tio̍h tú-á hoat-seng ê tāi-chı̀. A-lân ê thâu-mn̂g pa̍k liáu ná-chhiūⁿ chhân-ne khoán, i ê bı̄n chiok kó͘-chui, ná-chhiūⁿ ang-á. Tān-sı̄, i hoat phı̂-khı̀ ê sı̂-chūn kèng-jiân sı̄ hiah-nı̄-á chhiah. Sui-jiân i sı̄ chı̍t ê cha-bó͘ gín-á, khoàⁿ-tio̍h i hit khoán chhiah-pê-pê ê bı̄n, goá mā kiông-beh tòng-boē-tiâu siūⁿ-beh kā phah. Tio̍h án-ne goá iah bô ki-hoē kah A-lân kóng tio̍h oē, gún tio̍h kui-ke-hoé poaⁿ-khı̀ chng-kha ah. Khı̀ chng-kha liáu-āu, goá mā tiāⁿ-tiāⁿ ē khı̀ siūⁿ-tio̍h A-lân. Í-āu chiām-chiām toā-hàn, goá chiah liáu-kái sı̄ án-choáⁿ A-lân ē hiah-nı̄-á siū-khı̀, i siū-khı̀ m̄-sı̄ bô goân-in ê. A-lân chū sè-hàn tio̍h sı̄ chı̍t ê chá-se̍k ê cha-bó͘ gín-á, i it-tı̍t jı̄n-ûi kóng, in tau só͘-ū ê châi-sán kap ke-si èng-kai lóng-sı̄ i ê mı̍h-kiāⁿ. Jı̂-chhiáⁿ, i choa̍t-tùi bô beh kè-khı̀ pa̍t ê só͘-chāi. I tùi i ê a-bú kóng, chit-ê chhù sı̄ i ê, èng-kai chhut-khı̀ ê sı̄ i ê a-hiaⁿ. A-tek ah, lí khoàⁿ leh, i chit khoán ê kò-sèng ū siáⁿ-lâng káⁿ chhoā i chò bó͘ leh?
A-lân ê lāu-bú hi-bāng goá ē-tàng thè i kóng kúi kù oē, tān-sı̄ goá m̄-chai beh án-choáⁿ kóng khah hó, kan-taⁿ ē-tàng gōng-gōng khiā tı̄ hia, m̄-chai beh jû-hô sı̄ hó. Kò-sèng hiah-nı̄-á kiông ê A-lân khı̀ hō͘ lâng kóng beh chhut-kè, tong-jiân sı̄ ē siū-khı̀. Chí-sı̄ hit-tong-sı̂ khoàⁿ-tio̍h A-lân kó͘-chui ê hêng-iáⁿ, goá khoàⁿ kah gōng--khı̀, só͘-í, m̄-chiah ē siám-phiah boē-hù, ngē-sí khı̀ hō͘ chhùi-noā phùi--tio̍h. Mā-sı̄ in-ūi án-ne, goá chiah ē tiāⁿ-tiāⁿ khı̀ siūⁿ-tio̍h A-lân.
Tı̄ chng-kha, chhiūⁿ goá chit khoán ê siàu-liân-lâng chū-jiân ū chiâⁿ chē moê-lâng-pô ē lâi goán tau thê-chhin, tān-sı̄ goá liáu-kái, nā bô chhiūⁿ A-lân hit khoán ê cha-bó͘ gín-á, goá sı̄ boē chhı̀n-chhái tap-èng ê.
Sui-jiân kóng goá sı̄ hiah-nı̄-á su-liām A-lân, tān-sı̄ goán nn̄g lâng kı̀-jiân tio̍h í-keng hun-khui tı̄ bô-kāng ê só͘-chāi, beh koh ū tàu-tı̄n ê ki-hoē sı̄ bô siáⁿ hi-bāng. Chit-má í-keng m̄-sı̄ chı̍t ê lōng-bān ê sı̂-tāi ah, tı̄ chit-ê í kim-chı̂ⁿ ûi chú ê siā-hoē, í A-lân chit khoán tiâu-kiāⁿ ê cha-bó͘ gín-á, chha-put-to í-keng hō͘ tó chit ê só͘-chāi, hó-gia̍h-lâng ê kiáⁿ phāⁿ--khı̀ ah. Só͘-í, goá láu-chá tio̍h bô koh leh siàu-liām ū-khó-lêng ē-tàng kah A-lân tàu-tı̄n. Mā-sı̄ in-ūi án-ne, goá lâi-kàu Tâi-pak liáu-āu, goá sui-jiân ū siūⁿ-tio̍h kó͘-chá sı̂-tāi ê tāi-chı̀, tān-sı̄ pēng bô te̍k-piat khı̀ siūⁿ-tio̍h A-lân. M̄-koh, m̄-chai sı̄ hó-miā iah-sı̄ pháiⁿ-miā, goá hoâi-gı̂ A-lân tio̍h tı̄ goán tiàm keh-piah ê cha̍p-hoè-tiàm leh chia̍h-thâu-lō͘. Múi chı̍t kang ê chá-khí, goá tı̄ tiàm thâu-chêng ê têng-á-kha leh sàu-thô͘-kha ê sı̂, goá lóng ē khı̀ khoàⁿ-tio̍h keh-piah tiàm chı̍t ê ná-chhiūⁿ A-lân ê lú-tiàm-goân, hāi goá it-tı̍t siūⁿ-beh chai-iáⁿ, tàu-té hit-ê sı̄-m̄-sı̄ A-lân leh? Tio̍h tı̄ goá múi chı̍t kang o͘-pe̍h loān-siūⁿ ê jı̍t-chí tiong, ū chı̍t kang chá-khí, hō͘ goá khı̀ tú-tio̍h A-lân kap in ma-ma lâi gún tiàm boé mı̍h-kiāⁿ. Hiông-hiông khoàⁿ-tio̍h in, goá mā bô siūⁿ hiah chē, chhong-chhong pōng-pōng tio̍h sàu-chhiú the̍h leh, cháu-khı̀ mn̄g kóng, lí sı̄-m̄-sı̄ A-lân? Ah lí sı̄ a-ḿ tio̍h m̄? Goá sı̄ Ûi-tek la. Kó͘-chá toà tı̄ lín keh-piah Ông Chı̀n-san ê hāu-seⁿ Ûi-tek la. Hō͘ goá kiaⁿ-chı̍t-ē, A-lân ê láu-bú piáu-hiān chhut chı̍t hù boē-tàng siong-sı̀n ê piáu-chêng, gāng tı̄ hia. Siūⁿ kui poàⁿ po͘ chiah hō͘ i siūⁿ-tio̍h, chhiò kóng, ah, lí sı̄ A-tek ho͘hN. Í-keng hiah toā-hàn ah, chha-put-to boē-jı̄n-chit ah. Goá mā tı̄ chit-ê sı̂-chūn chiah khı̀ siūⁿ-tio̍h, thâu-tú-á ka-kı̄ chhong-pōng ê hêng-ûi sı̍t-chāi sı̄ chiok pháiⁿ-sè.
A-lân kap in láu-bó pēng bô te̍k-piat piáu-hiān chhut chiok hoaⁿ-hí ê piáu-chêng iah-sı̄ tùi koè-khı̀ chiok hoâi-liām ê sim-chêng. Goá siūⁿ, to͘-chhı̄ ê lâng sı̄ boē it-tı̍t oa̍h tı̄ koè-khı̀. Chhiú the̍h-tio̍h sàu-chhiú, goá soah kám-kak m̄-chai beh jû-hô sı̄ hó.
“Khoàⁿ-tio̍h lín hiah-nı̄-á ū-goân-khı̀, sı̍t-chāi sı̄ chiok hó ê. Goán lāu-pē kap lāu-bú mā chin hó-sè.”
“Án-ne o͘, āu-pái in nā lâi Tâi-pak chhit-thô, chiah chhiáⁿ in lâi gún tau chē la.”
“Hó, to-siā a-ḿ.”
Goá jı̍t su iā bāng ê tiông-hông tio̍h tı̄ chit kúi kù kán-tan ê tùi-oē tiong kiat-sok. In bó-lú ná-chhiūⁿ kip beh khı̀ tó-ūi, goá mā pháiⁿ-sè koh kā in kô-kô-tı̂ⁿ, kè-sio̍k hoâi-liām koè-khı̀ ê tāi-chı̀. Chí-hó kóng, “Chhiáⁿ lín ū-êng sı̂, lâi gún chng-kha chhit-thô, goán a-bú it-tēng ē chiok hoaⁿ-hí ê.”
“Hó ah, goán ū-êng sı̂ it-tēng ē khı̀. Lí mā it-tēng ài lâi goán tau chē o͘.”
A-lân ná-chhiūⁿ chin bián-kióng kah in lāu-bú phah chı̍t ê chio-ho͘ tio̍h jı̍p-khı̀ tiàm--lí ah. Che khó-lêng tio̍h-sı̄ só͘-ūi ê iân-hūn. Chū hit kang liáu, goá tio̍h ē-sái ta̍k-kang kah A-lân kóng-oē ah. Goá ê sim ná-chhin-chhiūⁿ hoat-chhun ê bé-á kāng-khoán, kui-kang lóng sı̄ leh siūⁿ A-lân. Joa̍h-thiⁿ liáu-āu, múi chı̍t àm lóng sı̄ chiok joa̍h chiok joa̍h, ta̍k-ke lóng khùn bô siáⁿ ē khı̀. Só͘-í, gún tio̍h ha̍p-khí-lâi chhut-chı̂ⁿ khı̀ boé ki-á-peng. Ū chı̍t kái, goá siūⁿ-beh kā sè-hàn sı̂-chūn ê tāi-chı̀ kóng hō͘ A-lân thiaⁿ.
“A-lân, lí kám iah ē-kı̀-chit lí phùi chhùi-noā tı̄ goá ê bı̄n chit kiāⁿ tāi-chı̀ leh?”
Goá nā ē-tàng kā chit-ê hō͘ lâng siàu-liām ê tāi-chı̀ kóng hō͘ A-lân thiaⁿ tio̍h hó loh. Goá m̄-káⁿ ū koh-khah chē ê ǹg-bāng. Goá kan-taⁿ hi-bāng ē-sái kā goá khǹg tı̄ sim-koaⁿ-thâu ê su-bō͘ kap khó͘-chhó͘ piáu-ta̍t chhut-lâi, ká-sú nā-sı̄ án-ne hun-chhiú, goá mā bô oàn-hūn ah. Che tio̍h ná-chhiūⁿ goá chū i hia chioh mı̍h-kiāⁿ tio̍h-ài kā mı̍h-kiāⁿ hâiⁿ i kāng-khoán, goá tùi i ê su-liām sı̄ in-ūi i hō͘ goá ê, só͘-í kā goá sim-lāi ê bō͘-chêng choân-pō͘ kóng hō͘ i thiaⁿ, jiân-āu hi-bāng ē-tàng chı̍t ê lâng léng-chēng chı̍t-ē leh. Goá ná-chhiūⁿ sin-khu téng-koân phāiⁿ chı̍t ê chiok toā chiok tāng ê pau-ho̍k-á, goá chin siūⁿ-beh kā chit-ê pau-ho̍k-á khǹg--lo̍h-lâi, hó-hó chhoán chı̍t-kháu-khùi leh. Goá khoàⁿ-tio̍h i kah pa̍t-lâng kóng-oē, chhiò-bi-bi, goá sim-koaⁿ-thâu tio̍h chiok boē-sóng-khoài. Goá bêng-bêng tio̍h-sı̄ leh oàn-tò͘. Sui-jiân kóng goá it-hiòng lóng jı̄n-ûi oàn-tò͘ sı̄ jio̍k-chiá ê hêng-ûi, tān-sı̄, goá ka-kı̄ mā bô siáⁿ pān-hoat. Goá chin-chiàⁿ sı̄ ta̍k-ke kóng ê lāu-kó͘-tóng. Só͘-í, goá it-tı̍t tı̄ goá ê sim-lāi mē goá ka-kı̄ lāu-kó͘-tóng, bô-lō͘-iōng, khin-sı̄ goá ka-kı̄. Goá boē-tàng liáu-kái goá ê tông-sū sı̄ án-choáⁿ ē-tàng tùi cha-bó͘ gín-á bô siáⁿ kám-kak. Pêng-siông-sı̂, in kóng-oē chiok n̂g, chiok chho͘, tān-sı̄ in koh bô-ài tâm loân-ài, in chit khoán lâng tàu-té sı̄ gōng-lâng iah-sı̄ khiáu-lâng leh? Goá chı̍t bı̄n chia̍h ki-á-peng, chı̍t bı̄n tiām-tiām leh siūⁿ. Goá khoàⁿ-tio̍h in hō͘-siong leh sái-ba̍k-sek, ná-chhiūⁿ leh hoâi-gı̂ goá chit-ê lāu-kó͘-tóng sı̄ ē-hiáu chia̍h ki-á-peng bô? M̄-koh, goá sı̄ ūi-tio̍h loân-ài leh siong-sı̂n, ūi-tio̍h bí-lē ê ko͘-niû leh hoân-ló, goá choa̍t-tùi m̄-sı̄ gōng-toā-tai. Goá kám-kak goá tùi kám-chêng ê bô-nāi kah in bô-liâu ê tùi-oē pí-kàu khí-lâi, sı̄ ke chiok ko-siōng.
Pí-kàu khah kı̂-koài ê sı̄, goá tùi goá sè-hàn sı̂ hō͘ A-lân phùi chhùi-noā ê tāi-chı̀ pēng bô hiah-nı̄-á chāi-ı̀, tian-tò sı̄ hit kang A-lân kap in a-bú lâi tiàm-lāi tùi goá léng-tām ê thài-tō͘, hō͘ goá kám-kak chin sit-bāng. Só͘-í, goá bô ióng-khı̀ chı̀n-chı̍t-pō͘ khı̀ kah i kóng-oē. Goá tı̄ sim-lāi tùi goá ka-kı̄ kóng, m̄-thong khı̀ chū chok to-chêng. Goá hoán-séng goá ka-kı̄, kan-taⁿ khı̀ tú-tio̍h chı̍t ê cha-bó͘ gín-á, goá tio̍h kā ka-kı̄ ê hi-bāng kap chiân-tô͘ lóng khǹg khı̀ piⁿ-á, nā-sı̄ án-ne tio̍h bô lâm-chú-hàn ê khı̀-khài ah. Goá sı̄m-chı̀ siūⁿ-beh kūi toà goán pē-bú ê bı̄n-thâu-chêng, hiòng in siā-choē. Tān-sı̄, loân-ài ê sim-chêng ná-chhin-chhiūⁿ chı̍t chiah bô-lâng ē-tàng khòng-chè ê iá-bé, i láu-chá tio̍h thiàu-lı̄-khui goá ê jio̍k-thé, sı̄m-chı̀ tı̄ bāng-tiong mā-sı̄ toè A-lân ê hêng-iáⁿ leh cháu-chông loh. Goá ka-kı̄ khoàⁿ-tio̍h goá ka-kı̄ koè chit khoán thòng-khó͘ ê jı̍t-chí, tı̄ sim-koaⁿ lāi, tùi A-lân sı̄ ū chı̍t hūn ài-ı̀, tān-sı̄ mā ū chı̍t hūn oàn-hūn ê bû-nāi. Ài-ı̀ kap oàn-hūn kāng-khoán lóng sı̄ chı̍t chióng thòng-khó͘ ê kám-chêng.
Ūi-tio̍h beh tùi-khòng chit khoán bû-nāi ê sim-chêng, goá chí-hó jı̄n-chin tha̍k-chheh. Put-koán sı̄ úi-jı̂n ê kò͘-sū iah-sı̄ sió-soat, chí-iàu ū chheh thang khoàⁿ, goá tio̍h-sı̄ leh khoàⁿ-chheh. Mā in-ūi án-ne, goá hō͘ thâu-ke kéng-kò kúi-ā-táu ah. Goá tı̄ tiàm-lāi-bı̄n ê sı̀n-iōng mā in-ūi án-ne lóng sit--khı̀ ah. Thâu-ke hiòng keng-lí kóng goá sı̄ chı̍t ê bô jı̄n-chin ê siàu-liân-ke, tùi tiàm bô chı̄n-tiong, sı̄ chı̍t ê lám-noā ê lâng. Chit khoán pháiⁿ-miâ-siaⁿ bô-joā-kú tio̍h tı̄ tiàm-lāi thoân--khui. Che hō͘ goá kám-kak chin bô-kong-pêⁿ. Tiàm-lāi koán-siàu ê pō͘-hūn, goá lóng chhú-lí liáu chin jı̄n-chin, jı̂-chhiáⁿ bô chı̍t-sut-á chha-chhò. Goá koán ê siàu-phō͘ m̄-bat hō͘ thâu-ke kóng-koè jı̄n-hô ê put-boán. Goá chí-sı̄ chò-siàu í-goā ê sı̂-kan mā bô beh chhut-khı̀ goā-kháu, tiāⁿ-tiāⁿ chı̍t ê lâng koaiⁿ tı̄ tiàm-lāi tha̍k-chheh, koè jı̍t-chí án-ne niā-niā. Tı̄ chit toāⁿ sı̂-kan, goá tùi kiâⁿ chhut tiàm-bı̄n ū chı̍t chióng kóng-boē-chhut ê kiaⁿ-hiâⁿ. Joa̍h-thiⁿ chı̍t kàu, tiàm-bı̄n goā-kháu ê ke-á-lō͘ chhiong-boán tio̍h lāu-jia̍t ê khı̀-hun, goá ê thòng-khó͘ tio̍h koh-khah chhim. Khó-lêng in-ūi goá kám-kak chit tiûⁿ chiàn-cheng m̄-sı̄ kan-taⁿ sı̀-gō͘-tang tio̍h ē kiat-sok, ài ū tn̂g-kı̂ chiàn-cheng ê sim-lí chún-pı̄ chiah ē-sái. Tiàm-lāi ê lú-tiàm-goân mā siū-tio̍h goá ê éng-hióng, tiāⁿ-tiāⁿ ē thê-khí-tio̍h chiàn-cheng ê kio̍k-sè, sui-jiân boē-tàng kóng sı̄ oân-choân siū-tio̍h goá ê éng-hióng, tān-sı̄ in ē sam-put-gō͘-sı̂ cháu-lâi pān-kong-sek lâi khoàⁿ pò-choá, liáu-kái kio̍k-sè, che sı̄ sū-sı̍t.
Tı̄ bı̂n-kan cho͘-chit liáu chı̍t ê Hông-bı̂n Hōng-kong-hoē, chò-seng-lí ê thâu-ke mā tiāⁿ-tiāⁿ thiaⁿ-kóng ē thê-chhut chin chē bô-kāng ê ı̀-kiàn kap kè-oē. Mā in-ūi án-ne, goá soah bô hoat-tō͘ kè-sio̍k tı̄ pān-kong-sek lâi tha̍k-chheh ah, in-ūi ta̍k-ke lóng khai-sí o̍h goá cháu-lâi khoàⁿ pò-choá, keng-lí hoat-phı̂-khı̀ kā goá mē kàu chhàu-thâu-sái. Ūi-tio̍h beh hiòng i thê-chhut bô-giân ê khòng-gı̄, goá khiā tı̄ tiàm--lí ê sı̂-kan sı̄ lú lâi lú tn̂g. Sı̂-kan í-keng kàu la̍k-goe̍h té, chèng-hú kong-pò͘ liáu Tâi-oân pún-tó chı̀-goān-peng ê pān-hoat. Goá ná-chhiūⁿ hiông-hiông kak-chhíⁿ kāng-khoán, siūⁿ-tio̍h chı̍t ê lâm-chú-hàn èng-kai ū ê chok-ûi. Chı̍t-sı̂-kan, goá ê sim-chêng khí-khí lo̍h-lo̍h, mā m̄-chai sı̄ án-choáⁿ, kèng-jiân ba̍k-sái tio̍h án-ne lâu--lo̍h-lâi.
Siūⁿ-tio̍h tı̄ kò͘-hiong ê a-pa kap a-bú, goá ê sim-chêng sı̄ koh-khah tı̂m-tāng. Cha-po͘ gín-á lâu-ba̍k-sái m̄-chai sı̄-m̄-sı̄ chin-chiàⁿ hiah-nı̄-á bô-lō͘-iōng? Nā chin-chiàⁿ sı̄ án-ne, goá ka-kı̄ nà ū siáⁿ-mih lâm-chú khı̀-khài thang kóng leh? Múi chı̍t kái khoàⁿ-tio̍h a-peng-ko phāiⁿ chhèng kiâⁿ tı̄ lō͘--lí, goá tio̍h ū chı̍t chióng him-siān ê kám-kak, siūⁿ-beh kah in kāng-khoán. Só͘-í, goá siūⁿ-beh khı̀ chò-peng. Goá ê pē-bú kap pa̍t-lâng ê pē-bú bô kāng, in sı̄ bêng-lí jı̂-chhiáⁿ khéng ūi ka-kı̄ ê kiáⁿ-jı̂ siat-sióng ê pē-bú. Goá siūⁿ, in it-tēng ē-tàng liáu-kái goá siūⁿ-beh tı̄ cheng-sı̂n seng-oa̍h siōng tu̍t-phoà hiān-chōng ê sim-chêng. Put-koán jû-hô, goá sı̄ bô-hoat-tō͘ kè-sio̍k koè chit khoán ê jı̍t-chí ah. Khı̀ chò-peng chit kiāⁿ tāi-chı̀ tio̍h tú-á-hó ná-chhiūⁿ sı̄ kā goá chit-ê lâng the̍h-chhut-lâi chò chı̍t ê phêng-toàn. Cha-po͘-lâng tio̍h-sı̄ ài khı̀ chò-peng, ài thong-koè chit khoán ê khó-giām chiah ē-sái. M̄-koh, goá m̄-chai a-pà kap a-bú ê sim-koaⁿ té sı̄-m̄-sı̄ í goá ē-tàng tı̄ chit keng tiàm chò cha̍p tang ê tiàm-goân lâi kám-kak-tio̍h kiau-ngō͘ leh? Goá siūⁿ lán cha-po͘-kiáⁿ tio̍h it-tēng ài khı̀ chò-peng, chiah ū-hoat-tō͘ tı̄ chit-ê siā-hoē khiā-khí. Tı̄ chiàn-tiûⁿ chiàn-sí choa̍t-tùi sı̄ pí phoà-pēⁿ sí--khı̀ iah-sı̄ kui-kang koaiⁿ tı̄ chhù-lāi hip--sí koh-khah ū lâm-chú khı̀-khài. Ē-tàng ūi-tio̍h chı̍t ê bo̍k-piau put-toàn hiòng-chêng kiâⁿ, í chit chióng hoaⁿ-hí ê sim-chêng, sı̄m-chı̀ ē-tàng tùi kok-ka ū kòng-hiàn, che tio̍h-sı̄ goá chit-má choân-pō͘ ê ǹg-bāng ah. Siōng kài thiòng ê tio̍h-sı̄ goá ē-tàng lı̄-iōng chit-ê ki-hoē tùi A-lân kóng chı̍t kù lı̄-piat ê oē. Sûi-tio̍h Tiong-goân-chiat lú lâi lú chiap kı̄n, lāu-jia̍t ê khı̀-hun lú lâi lú kāu, àm-sı̂ mā lú lâi lú joa̍h. Ū chı̍t kang, tú-á lo̍h-koè sai-pak-hō͘ liáu ê hông-hun, goá koat-tēng beh lâi-khı̀ chhoē A-lân.
Tiàm-bı̄n koaiⁿ liáu-āu, chha-put-to cha̍p-tiám ah. Goá kū-choa̍t kı̂-tha pêng-iú ê iau-chhiáⁿ, goá kóng goá beh lâi-khı̀ chı̍t ê se̍k-sāi ê pêng-iú tau pài-hóng. Jiân-āu, goá tio̍h toè tı̄ A-lân ê āu-piah-bı̄n, it-tı̍t kiâⁿ-kàu Éng-lo̍k-teng hù-kı̄n, goá chiah kā A-lân kiò tiâu.
“A-lân, goá siūⁿ-beh tı̄ choè-kı̄n sı̂-tiāu tiàm-lāi ê khang-khoè, chit-má tú-á-hó beh khı̀ lín tau hiòng a-ḿ kò-sı̂. Lán sı̄ sè-hàn sı̂-chūn ê chhù-piⁿ, goá nā kā gún a-bú kóng, i it-tēng ē chiok su-liām lín ê.”
“Án-ne o͘ ........”
Khoàⁿ-tio̍h A-lân thâu tàm hō͘ kē-kē, léng-tām ê hoê-tap goá ê būn-tê, goá kám-kak chin bêng-hián, A-lân lēng-goā ū tāi-chı̀ khǹg tı̄ sim-koaⁿ-lāi. Só͘-í, i pēng bô kā goá ê oē tòng-choè chı̍t-hoè-sū. I leh hoân-ló i ka-kı̄ ê tāi-chı̀.
“A-ḿ ū tı̄ leh bô ?”
“Khó-lêng ū tı̄ leh.”
Thiaⁿ-tio̍h i án-ne kóng, goá khah hòng-sim ah. Tān-sı̄, A-lân ná-chhiūⁿ beh khàu--chhut-lâi khoán, ân-ân phō-tio̍h hō͘- soàⁿ, kiâⁿ chiok kín, ná-chhiūⁿ sı̄ leh koáⁿ-lō͘ leh. Goá siūⁿ A-lân nā-sı̄ bô hoan-gêng goá khı̀ in tau, i it-tēng ē kóng in lāu-bú bô tı̄ leh chiah tio̍h, só͘-í, goá mā toè tı̄ i ê āu-piah, kiâⁿ-liáu kín-kín. A-lân tiām-tiām lóng bô kóng-oē, hō͘ goá kám-kak heng-khám ū chı̍t kháu khı̀ chhoán boē khı̀ kāng-khoán. Kàu A-lân in tau liáu-āu, goá hoat-kak A-lân in tau lāi ū chha-put-to nn̄g-saⁿ ê ka-cho̍k toà tàu-tı̄n. Khoàⁿ-tio̍h A-lân tńg--lâi, ū chı̍t ê kah in toà tàu-tı̄n ê a-pô tio̍h lâi kā A-lân kóng, in kè--chhut-khı̀ ê a-ché ê gín-á tú-á-hó moá chı̍t hoè, in a-ché ê ang-sài lâi chhù--lí chiap in lāu-pē kap lāu-bú khı̀ chia̍h-pn̄g ah. A-lân the̍h chı̍t tiâu í-á hō͘ goá chē, i kóng: “A-bú in sûi tio̍h tńg--lâi, lí chē chı̍t-ē.” Jiân-āu, i tio̍h jı̍p-khı̀ pâng-keng. Goá siūⁿ i khó-lêng sı̄ beh khı̀ kā hō͘-soàⁿ kap i ê mı̍h-kiāⁿ khǹg hō͘ hó-sè. Goá tòng-boē-tiâu mn̄g i: “A-lân, sı̄-m̄-sı̄ hoat-seng siáⁿ-mih tāi-chı̀ leh?” Thiaⁿ-tio̍h goá án-ne mn̄g, A-lân ê ba̍k-sái soah chha̍p-chha̍p tih--lo̍h-lâi. Goá kín ùi í-á khiā--khí-lâi, cháu-khı̀ pâng-keng ê mn̂g-kha-kháu.
“A-lân, tàu-té hoat-seng siáⁿ-mih tāi-chı̀ leh? Lán chhut-goā chia̍h-thâu-lō͘ ê lâng sı̄ boē-sái lâu-ba̍k-sái o͘, nā lâu-ba̍k-sái tio̍h-sı̄ kap jı̄n-su kāng-khoán o͘.”
Goân-pún siūⁿ-beh an-ùi A-lân kóng chia̍h-thâu-lō͘ ê lâng boē-sái lâu-ba̍k-sái, tān-sı̄, A-lân sı̄ lú lâi lú siong-sim, i kóng i mā bô siūⁿ-beh kè-sio̍k tı̄ tiàm-lāi chò ah.
“Sı̄ án-choáⁿ, hō͘ siáⁿ-mih lâng khi-hū leh?”
“.............”
“Ē-tàng kóng hō͘ goá chai-iáⁿ bô?”
A-lân it-tı̍t iô-thâu.
“Tàu-té sı̄ án-choáⁿ la?”
“.............”
“A-lân, goá ê ı̀n-siōng tiong, lí sı̄ chı̍t ê kian-kiông ê lú-sèng, tān-sı̄, kin-á-jı̍t tàu-té nà ē án-ne?”
A-lân lú khàu, goá lú hoân-ló, goá sim-lāi siūⁿ, tàu-té sı̄ siáⁿ-mih-lâng káⁿ khi-hū A-lân, goá mı̂-ná-chài it-tēng thè A-lân pò-siû.
“A-lân, ū siáⁿ-mih tāi-chı̀ goá lâi thè lí kái-koat.”
Toà tàu-tı̄n ê a-pô mā thiaⁿ-tio̍h A-lân ê khàu-siaⁿ, goá sı̄ lú lâi lú kip.
“Mā m̄-chai sı̄ án-choáⁿ, A-lân tio̍h it-tı̍t khàu boē thêng?”
“A-lân, kin-á-jı̍t nà ē hiah-nı̄-á ài-khàu leh ?”
A-pô mā lâi kàu goá ê piⁿ-á koan-sim A-lân, chit-ê sı̂-chūn A-lân chiah kóng chhut goân-in.
“Goá ê hō͘-soàⁿ khı̀ hō͘ lâng sio chı̍t khang ah la.”
“Tı̄ tó-ūi leh? Goá nà ē khoàⁿ bô ?”
A-pô ná-chhiūⁿ hoat-seng siáⁿ-mih toā tāi-chı̀ kāng-khoán, cháu-jı̍p-khı̀ khǹg hō͘-soàⁿ ê pâng-keng, kā hō͘-soàⁿ phah-khui kiám-cha.
“Tó-ūi leh? M̄-sı̄ hó-hó kap chá-khí kāng-khoán leh?”
“Ū la! Lí khoàⁿ chia ū chı̍t khang.”
A-lân kā hō͘-soàⁿ chhiúⁿ--koè-lâi, kā hō͘-soàⁿ khı̀ hō͘ hoé sio--tio̍h ê só͘-chāi pí hō͘ a-pô khoàⁿ. Goá mā oá-koè-khı̀ khoàⁿ. Goá khoàⁿ-tio̍h A-lân pe̍h-iù-iù ê chhiú, kí-tio̍h chha-put-to chı̍t ê lâng chéng-cháiⁿ toā hō͘ hoé sio--koè ê khang.
“Ūi sím-mı̍h lâng beh sio lí ê hō͘-soàⁿ--leh?”
Goá ná mn̄g, mā ná liáu-kái chit ki hō͘-soàⁿ tùi A-lân ê tiōng-iàu-sèng. Ùi A-lân in tau ê keng-chè chōng-hóng lâi khoàⁿ, A-lân chia̍h-thâu-lō͘ mā í-keng sı̀-gō͘-tang ah. Tān-sı̄, i ê sin-súi mā chiah chı̍t kò goe̍h cha̍p-peh kho͘ niā-niā. I beh boé chı̍t ki ta̍t cha̍p-jı̄, cha̍p-saⁿ kho͘ ê hō͘-soàⁿ pēng-m̄-sı̄ hiah-nı̄-á kán-tan ê tāi-chı̀. Boé-tio̍h sio̍k mı̍h-kiāⁿ, iōng bô nn̄g kái tio̍h pháiⁿ--khı̀, só͘-í, i khiām poàⁿ tang ê chı̂ⁿ lâi boé chit ki khah hó ê hō͘-soàⁿ. Iōng-tio̍h chiah hó ê hō͘-soàⁿ, i tong-jiân sı̄ ē the̍h-chhut-lâi tián hō͘ chhù-piⁿ keh-piah ê lâng khoàⁿ. Goá ē-tàng liáu-kái i the̍h hō͘ in khoàⁿ hit khoán hoaⁿ-hí ê sim-chêng. Sui-jiân sı̄ kan-taⁿ sio chı̍t khang sè-sè khang-á, tùi A-lân lâi kóng khó-lêng sı̄ sio-tio̍h i ê tē-jı̄ sèⁿ-miā kāng-khoán. Goá kám-kak chit-ê sio A-lân hō͘-soàⁿ ê lâng sı̍t-chāi sı̄ khó-ò͘, chin siūⁿ-beh thè A-lân chhut chı̍t-kháu oàn-khı̀.
“Kā goá hō͘-soàⁿ sio chı̍t khang ê lâng mā m̄-sı̄ thiau-kang ê la. Ū chı̍t ê lú-tiàm-goân kā goá kóng, thâu-ke chia̍h-hun ê sı̂-chūn, bô chù-ı̀ khı̀ kā iah-boē hoa--khı̀ ê hoan-á-hoé lak-jı̍p-khı̀ goá ê hō͘-soàⁿ. Só͘-í, chiah ē chin pháiⁿ-ūn khı̀ sio-tio̍h chı̍t khang.”
“Goân-lâi sı̄ án-ne o͘, sui-jiân kóng i m̄-sı̄ thiau-kang, tān-sı̄, i kám ka-kı̄ lóng m̄-chai-iáⁿ leh?”
“I ū khoàⁿ-tio̍h tong-jiân sı̄ chai-iáⁿ chiah tio̍h.”
“Hó lo̍h la, A-lân, goá siūⁿ lí tio̍h-ài khoàⁿ khah khui leh. Ū sı̂-chūn, chit khoán tāi-chı̀ lí kā tòng-chò sı̄ lí khah soe, ē-tàng án-ne siūⁿ, lí ē kám-kak khah hó-koè lah.”
Tı̄ chit-ê sı̂-chūn, goá ē-tàng oân-choân liáu-kái sı̄ án-choáⁿ A-lân ē hiah-nı̄-á siong-sim. Chit-ê pi-kio̍k ê hoat-seng, chú-iàu ê goân-in sı̄ in-ūi thâu-ke khoàⁿ--tio̍h ê hit khang kap chit-ê lú-tiàm-goân só͘ khoàⁿ--tio̍h ê hit khang só͘ tāi-piáu ê ı̀-gı̄ sı̄ bô-kāng ê. Ūi-tio̍h hō͘-soàⁿ khı̀ hō͘ sio chı̍t khang tio̍h hiah-nı̄-á siong-sim, che khióng-kiaⁿ ê m̄-sı̄ hó-gia̍h-lâng ē-tàng liáu-kái ê tāi-chı̀. Ká-sú nā ū siūⁿ--tio̍h, mā bô-khó-lêng goān-ı̀ ūi-tio̍h chia̍h chı̍t ki hun lâi poê chı̍t ê lú-tiàm-goân cha̍p-jı̄-saⁿ kho͘.
“A-lân, m̄-thang ūi-tio̍h hō͘-soàⁿ ê tāi-chı̀ koh siū-khı̀ lo̍h. Chı̍t ki hō͘-soàⁿ pēng bô-hoat-tō͘ lâi tāi-piáu chı̍t ê lâng. Chū-chiông goá lâi-kàu Tâi-pak liáu-āu, goá chiah liáu-kái, goá só͘ chun-kèng ê lâng sı̄ kha ta̍h sı̍t tē ê lâng, pēng-m̄-sı̄ hit khoán chhēng-saⁿ chhēng kah súi-súi-súi ê lâng. Ta̍k-hāng tāi-chı̀ lóng o̍h pa̍t-lâng sı̄ bô-hoat-tō͘ lâi piáu-hiān-chhut chı̍t ê lâng ê kò-sèng. A-lân, lí khó-lêng mā chai-iáⁿ, tiàm-lāi ê lâng lóng kiò goá lāu-kó͘-tóng. M̄-koh, goá kin-nı̂ mā chiah tú-á jı̄-cha̍p hoè. Goá nā bô kı̀ m̄-tio̍h lí kin-nı̂ sı̄ cha̍p-káu hoè hō͘?”
A-lân tı̄ chit-ê sı̂-chūn mā í-keng bô leh khàu ah. I kiâⁿ-chhut pâng-keng, goá mā toè i kiâⁿ--chhut-lâi, chē tı̄ tú-á poaⁿ--lâi ê í-á.
“A-lân, sè-hàn ê sı̂-chūn, lí phùi-chhùi-noā tı̄ goá ê bı̄n téng-koân chit kiāⁿ tāi-chı̀, lí iah ē-kı̀-tit bô? Hit-ê sı̂-chūn, lí sı̄ chı̍t-ê kò-sèng chin kiông ê lâng.”
A-lân kóng: “Kám ū chit khoán tāi-chı̀, goá nà ē lóng boē-kı̀-tit leh?” I piáu-hiān-chhut chin bô-hoat-tō͘ siong-sı̀n ê piáu-chêng, m̄-koh, i ê bı̄n í-keng ū bı̂-bı̂-á leh chhiò ah. A-lân thè goá chiong tê-poe-á thı̂n tê thı̂n hō͘ tı̄ⁿ.
“Goá chin hoâi liām lán sè-hàn sı̂-chūn ê tāi-chı̀. Tān-sı̄, goá chit-má tio̍h tih-beh khı̀ chò-peng ah. Só͘-í, goá thiau-kang lâi lín tau hiòng lín kò-sı̂. Sui-jiân, chèng-sek jı̍p-khı̀ chò-peng èng-kai sı̄ tı̄ mê-nı̂ ê tāi-chı̀, m̄-koh, goá beh seng tńg-khı̀ chng-kha hó-hó toàn-liān goá ê sin-thé. Nā-sı̄ kè-sio̍k lâu tı̄ Tâi-pak, khióng-kiaⁿ goá ê sin-thé ē lú lâi lú chha, lú lâi lú bô-lō͘-iōng. Tı̄ chia, lah-sap ê khong-khı̀, ut-chut ê tāi-chı̀ kui-toā-tui, sim-chêng it-tı̍t bô kóng kài hó.”
Kóng kàu chia, goá hoat-hiān chhù-piⁿ keh-piah toà tàu-tı̄n ê a-pô, lóng tı̄ piⁿ-á leh khoàⁿ hó-hı̀ khoán, thau-thau-á leh kóng sè-siaⁿ-oē. A-lân ê sim-chêng í-keng chin loān ah, goá bô goān-ı̀ koh in-ūi goá ê tāi-chı̀ lâi hō͘ i chhau-hoân. Só͘-í, goá siūⁿ goá tiām-tiām lâi thiaⁿ i kóng siáⁿ-mih, mā hó ke liáu-kái A-lân ê tāi-chı̀. A-lân thiaⁿ-liáu goá ê oē mā ná-chhiūⁿ siū-tio̍h kám-tōng ê khoáⁿ, i ê ba̍k-chiu it-tı̍t khoàⁿ thô͘-kha, ná-chhiūⁿ sı̄ leh hoâi-liām koè-khı̀ ê tāi-chı̀. I ê bı̄n-sek mā tı̄ chit-ê sı̂-chūn piàn-liáu khah hó-khoàⁿ, i ê ba̍k-chiu mā sam-put-gō͘-sı̂ ê khoàⁿ ùi goá chia lâi.
“Goá bô goān-ı̀ kè-sio̍k koè chit khoán ê jı̍t-chí ah. Chit-má tú-á-hó ū chı̍t ê chin hó ê ki-hoē lâi kái-piàn. Ká-sú goá ê ı̀-goān nā ū-hoat-tō͘ lâi sı̍t-hiān, nā án-ne lāu-kó͘-tóng tio̍h ē piàn-chò a-peng-ko loh.”
“Nā án-ne tio̍h chiok hó ah. Goá ē kià mı̍h-kiāⁿ khı̀ hō͘ lí.”
“A-lân, lí m̄-bián kià mı̍h-kiāⁿ lâi hō͘ goá, lí chí-iàu ū sı̂-kan siá-phoe lâi hō͘ goá tio̍h ē-sái loh.”
Chı̍t-sı̂-kan, goá ná-chhiūⁿ ū hit chióng í-keng khı̀ chò-peng ê sim-chêng kāng-khoán, ba̍k-sái sı̄ kiông-beh lâu--chhut-lâi, oē mā kiông-beh kóng boē lo̍h-khı̀.
“Ûi-tek hiaⁿ, lí chin liáu-put-khí, sı̄ án-choáⁿ lâng kiò lí lāu-kó͘-tóng lí lóng boē siū-khı̀ leh?”
“Goá nā-sı̄ chin-chiàⁿ siū-khı̀, goá m̄ tio̍h ài kah lâng oan-ke? Só͘-í, goá siūⁿ-beh iōng sı̂-tiāu thâu-lō͘ lâi hō͘ ta̍k-ke liáu-kái goá ê ióng-khı̀. Hia ê lâng lóng sı̄ chı̍t-koá m̄-káⁿ sı̂-thâu-lō͘ ê nńg-kha-hê. Ká-sú, goá nā ē-tàng tı̄ ta̍k-ke ê bı̄n-thâu-chêng thê-chhut sı̂-chit, goá siūⁿ che it-tēng sı̄ chı̍t kiāⁿ chin chhù-bı̄ ê tāi-chı̀.”
“Kóng ê mā sı̄.”
“A-lân, goá lēng-kang chiah koh lâi pài-hóng lí hó ah. Kin-á-jı̍t í-keng chin oàⁿ ah, chiah chhiáⁿ lí thè goá hiòng a-ḿ mn̄g an.”
“Iah chá leh mā.”
“Goá siūⁿ goá iah sı̄ lēng-kang chiah-koh lâi pài-hóng hó ah.”
Goá ùi í-á khiā--khí-lâi, khoàⁿ-tio̍h A-lân ê ba̍k-chiu leh khoàⁿ goá, goá ê bı̄n ná-chhiūⁿ âng--khí-lâi. Siūⁿ-tio̍h goá iah ū chiok chē oē siūⁿ-beh kóng, tān-sı̄, kan-taⁿ kóng bô chı̍t-poàⁿ niā-niā, goá ná khı̀ hō͘ lâng ùi āu-piah-bı̄n kā goá khian-tiâu leh kāng-khoán.
“Ûi-tek hiaⁿ, lí nā chin-chiàⁿ khı̀ chò-peng, goá it-tēng ē siá-phoe hō͘ lí.”
“Hó, goá chiah tán lí ê phoe.”
Goá ùi A-lân in tau kiâⁿ--chhut-lâi, chiap-chhiok-tio̍h goā-kháu chheng-liâng ê khong-khı̀, goá ná-chhiūⁿ kám-siū-tio̍h A-lân leh siá-phoe hō͘ goá ê hit chióng kám-kak. A-lân nā chin-chiàⁿ siá-phoe hō͘ goá, goá mā iah-sı̄ ka-kı̄ chı̍t ê lâng, siūⁿ-tio̍h chia, goá ū chı̍t chióng kóng-boē-chhut ê siok-bo̍k tı̄ sim-koaⁿ-lāi. Kā A-lân chı̍t ê lâng pàng tı̄ chhù--lí, goá tùi A-lân ê ka-cho̍k mā ū kám-kak tio̍h put-boán. Giâ-thâu khoàⁿ-tio̍h moá thiⁿ ê liû-chhiⁿ, goá phah-sǹg beh iân khe-á-piⁿ kiâⁿ-tńg-khı̀ sok-siā. Chit-ê sı̂-chūn, goá ū chı̍t chióng siūⁿ-beh pàng-sat it-chhè, khai-sí goá lēng-goā chı̍t chióng bô-kāng ê jı̂n-seng ê chhiong-tōng. M̄-chai sı̄ án-choáⁿ, goá kèng-jiân siūⁿ-beh kiâⁿ tı̄ Tām-chúi-hô piⁿ, toā-siaⁿ chhiùⁿ-chhut kun-tūi tiong tiāⁿ-tiāⁿ leh chhiùⁿ ê chı̀n-hêng-khek. Tu̍t-jiân-kan, goá hoat-hiān tio̍h goá ê koa-siaⁿ sı̄ hiah-nı̄-á kāu, hiah-nı̄-á ióng.
