Tāi-ke Hia̍p-le̍k

Kúi-nā nı̂ chêng Jı̍t-pún kap Ngô͘-lô-su kau-chiàn, Jı̍t-pún tı̍t-tı̍t khah-iâⁿ, Ngô͘-lô-su tı̍t-tı̍t khah-su. Hit-sı̂ Ngô͘-lô-su ū chı̍t-ê chin gâu ê goân-soè miâ hō-chò Kū-lô-pat-kin. I kı̄n-lâi ū tù chı̍t-pún chheh kı̀-chài in nn̄g-kok kau-chiàn ê sū. Chiông-tiong ū gı̄-lūn chı̍t-hāng, chiū-sı̄ teh mn̄g-khoàⁿ siáⁿ-sū Ngô͘-lô-su siông-siông khah-su, lóng bô khah-iâⁿ; in-ūi Ngô͘-lô-su sı̄ toā-ê kok, m̄-sı̄ sió-khoá ê kok. Khiok ū chē-chē hāng ê in-toaⁿ; chiàu Tāi-jı̂n kóng ū chı̍t-hāng chin iàu-kín, chiū-sı̄ in-ūi Ngô͘-lô su pún-kok ê peh-sı̀ⁿ bô thé-thiap in-ê peng ê sū, chē-chē m̄-chai in teh kau-chiàn sı̄ in-ūi siáⁿ-sū iā bô siông-siông chiap-tio̍h su-iâⁿ ê siau-sit thang kap in-ê peng tâng-sim hoaⁿ-hí tâng-sim iu-būn.

Jı̍t-pún kok ê peh-sı̀ⁿ m̄-sı̄ án-ni, in tı̄ in-ê pún-kok ta̍k-lâng lóng chai-iáⁿ put-chí ài khah-iâⁿ in-ê tùi-te̍k, lóng ài bián-lē peng-teng tio̍h chin hó-táⁿ thè pún-kok sio-thâi, tio̍h chı̄n pún-hūn ho̍k-sāi in-ê Hông-tè. Peng nā khah-iâⁿ, peh-sı̀ⁿ lóng kā in kiong-hí; nā tú-tio̍h sí-sit, tāi-ke kā in an-ùi. Chiū in-ê peng chin hó-táⁿ koat-toān, ná-chún chhin-chhiūⁿ kúi-nā chheng-bān ê peh-sı̀ⁿ lóng tı̄-teh khoàⁿ.

Chiàu goá phah-sǹg lán-ê Kàu-hoē beh khah-iâⁿ Mô͘-kúi iā eng-kai tio̍h án-ni, chiū-sı̄ chèng hiaⁿ-tı̄ chí-moē lóng tio̍h ū hūn, m̄-thang phah-sǹg che-sı̄ Bo̍k-su á-sı̄ Thoân-tō sian-siⁿ ê tāi-chı̀ nā-tiāⁿ. Nā khoàⁿ-kı̀ⁿ kàu-hoē léng-tām tò-thè, tio̍h hoân-ló, lâi kı̂-tó Siōng-tè; kàu-hoē nā heng-ōng, tio̍h hoaⁿ-hí, lâi kám-siā i. Sian-siⁿ nā chhut-khı̀ pò͘-tō, hiaⁿ-tı̄ kap i khı̀ sı̄ hó; nā bē-tit-thang khı̀, iáu-kú tio̍h mn̄g i-ê siau-sit, kap i tâng-sim hoaⁿ-hí. Sian-siⁿ nā lóng bô chhut-khı̀ pò͘-tō sûn hiaⁿ-tı̄, tio̍h khó͘-khǹg i, hō͘ i khah chhut-la̍t chı̄n i-ê pún-hun.

Iā m̄-thang kan-taⁿ siūⁿ pún-tông kàu hoē ê sū nā-tiāⁿ, tio̍h tàu tam-tng thong Tâi-oân Kàu-hoē ê koan-hē. Lâm-lō͘ ê kàu-hoē nā heng-ōng, pak-lō͘ kàu-hoē thiaⁿ-liáu tio̍h hoaⁿ-hí. Āu-soaⁿ ê Kàu-hoē nā khah léng-tām, soaⁿ-chêng ê Kàu-hoē tio̍h thè in kiû. Iā tio̍h ài thiaⁿ Tāi-hoē ê siau-sit, iā tio̍h tı̀-ı̀ Phêⁿ-ô͘ ê Soan-tō-hoē.

Hiān-kim, jı̍p-kàu ê hiaⁿ-tı̄ chí-moē ū 3000 goā lâng; lán nā lóng tı̀-ı̀ koat-toàn beh khah-iâⁿ Mô͘-kúi, chhin-chhiūⁿ Jı̍t-pún ê peh-sı̀ⁿ lóng koat-toàn beh iâⁿ Ngô͘-lô-su kok, chiū tek-khak m̄-bián kiaⁿ, in-ūi bô loā-kú lán beh khoàⁿ-kı̀ⁿ Mô͘-kúi ê kok chám-jiân khah-su, iā lán ê Chú ê kok toā heng-khí.

(Tâi-oân Hú-siâⁿ Kàu-hoē-pò tē 269 koàn,1907 nı̂ 8 ge̍h)