Tāng tàⁿ ê Hok

Chá-chêng chiáu-chiah lóng bô sı̍t. Siat-sú ū niau, bâ, lāi-hioh beh kā in, chiū bô sı̍t thang poe khı̀, kan-ta ū kha thang cháu, siông-siông cháu bē lı̄ chiū hō͘ in kā khı̀ chia̍h. Tāi-ke chin chhám, iā siông-siông chin kiaⁿ-hiâⁿ. Ū chı̍t jı̍t chhek-chiáu-á, pe̍h-thâu-khek, hoe-bı̂, bāng-thang-á, poàⁿ-thiⁿ-á, pan-kah kap hún-chiáu lóng chū-chı̍p lâi chham-siông khoàⁿ tio̍h án-cháiⁿ-iūⁿ siat-hoat tı̂-hông, bián-tit hō͘ in ê tùi-te̍k hāi kàu án-ni. In tāi-ke tâng-sim chı̍t-ı̀ gı̄-tiāⁿ kiû Siōng-tè chhut-thâu châu-bia̍t hiah ê niau, bâ kap lāi-hio̍h. Siōng-tè ı̀n kóng I beh khoàⁿ-kò͘. Chóng--sı̄ hiah ê pháiⁿ chiáu kap ok siù iû-goân lâi lia̍h chiáu-á toā sè kā khı̀ chia̍h. In chiàu kū chin chhám. Bó͘ chá-khí hiah ê siū chhi-chhám ê chiáu lâi kàu bó͘ só͘-chāi teh thó chia̍h. In tāi-ke toā hoân-ló. Chı̍t chiah pan-kah teh lâu ba̍k-sái kóng, chā ē-po͘ i kap i ê hū-jı̂n lâng tú-á chia̍h pá, chò-hoé teh chē, hut-jiân-kan chı̍t chiah pháiⁿ ê lāi-hio̍h lâi lia̍h i ê hū-jı̂n lâng kā i chia̍h-khı̀ i pún-sin hiám-hiám cháu bē lı̄. Tú-tú teh kóng ê sı̂ ū sè chiah bāng-tang-á kóng, chā mı̂ i kap kúi-nā ê pêng-iú hioh tı̄ oa̍h-oa̍h teh hoat ê lı̂-pa-lāi, ū chı̍t chiah ok-to̍k ê niau lâi kā sí i ê lāu-pē. Lóng teh thı̂-khàu, ai-ai chhám-chhám, in-ūi Siōng-tè bô siat-hoat bia̍t-bô tùi-te̍k. Sim teh iu-ut hit-sı̂ tı̄ thô͘-bı̄n in khoàⁿ chē-chē kiāⁿ mı̍h, lóng ū mn̂g khah tn̂g in seng-khu só͘ hoat ê mn̂g, sek-tı̄ kap in sûi chiah chiáu ê mn̂g chha-put-to sio tâng, ū-ê khah tn̂g, ū-ê khah té, iā lóng ū nn̄g kiāⁿ sio-liân chò chı̍t tùi, chı̍t-tùi. Hiah ê chiáu khoàⁿ-liáu m̄ chai sı̄ sím-mı̍h mı̍h, iā m̄ chai beh chò sím-mı̍h lō͘-ēng. Ū chı̍t chiah lāu-lāu ê hún-chiáu, khah ū tı̀-sek kóng, Hiah ê kı̂-koài ê mı̍h kiò-chò sı̍t-kó͘, sı̄ Siōng-tè thiaⁿ lán ê kı̂-tó, soà siat-hoat beh kiù lán, bián-tit hō͘ lán tú-tio̍h châu-bia̍t; múi chiah chiáu in tio̍h koà chı̍t tùi sı̍t-kó͘ tú-tú ha̍h in ê seng-khu, kàu pháiⁿ niau, bâ, lāi-hio̍h nā lâi beh kā hit-sı̂ in ē poe, chiū khah khoài cháu-lı̄ bián-tit sí. Tāi-ke thiaⁿ-liáu put-chí sim-sek, hún-chiáu soà kà in tio̍h án-cháiⁿ-iūⁿ koà hiah ê sı̍t. Ū hó-táⁿ ê chhek-chiáu kóng i koat-toàn m̄ koà hit hō ê mı̍h-kiāⁿ, i kóng lán nā khang-chhiú siōng-chhiáⁿ oh-tit tí-tng tùi-te̍k, koh hô-hòng nā koà hiah ê tāng-tāng pháiⁿ khoàⁿ ê mı̍h chiū khah tı̂ⁿ-poàⁿ, ún-tàng beh hō͘ in kā sí, án-ni koà hiah ê hùi-khı̀ ê sı̍t sı̄ tian-tò thó-sí nā-tiāⁿ. Hún-chiáu koh bián-lē, i m̄ thiaⁿ. Hoe-bı̂ chai hún-chiáu ê ı̀-sù, khoàⁿ hiah ê sı̍t chiū hoat siū-khı̀ kóng, Siōng-tè nā beh kiù lán, siáⁿ-sū bô châu-bia̍t hit hō bô lō͘-ēng ê bâ kap niau? I soà kóng Siōng-tè nā bēng-lēng tio̍h koà hit hō tāng ê sı̍t, che sı̄ ná-chún toā biáu-sı̄ in. Chóng--sı̄ pan-kah kap pe̍h-thâu-khek kóng, Siōng-tè pí lán khah chai-iáⁿ. I ū toā tı̀-sek; I nā hoan-hù sáⁿ hoè, eng-kai sūn-thàn chiū khah tio̍h, káⁿ tio̍h koà khoàⁿ-māi. Án-ni hún-chiáu, pan-kah kap pe̍h-thâu-khek lóng koà sı̍t chhı̀ khoàⁿ-bāi, kı̂-û ê chiáu lóng khoà-lū kóng, nā koà tāng-tāng ê sı̍t kiaⁿ-liáu koh khah hām-hāi. Tú-tú hit-tia̍p hut-jiân-kan chı̍t chiah bâ thiàu jı̍p in tiong-kan beh kā in. Koà sı̍t-kó͘ ê chiáu khoài-khoài poe koân-koân lóng bô siū hāi; chóng--sı̄ m̄ koà sı̍t-kó͘ --ê iû-goân tú-tio̍h tùi-te̍k ê hāi-sí. Tùi án-ni in chai sui-jiân koà tāng ê sı̍t, iáu-kú che ū ke-thiⁿ in ê la̍t thang thoat-lı̄ tùi-te̍k ê chhiú-thâu. Lia̍t-ūi hoē-iú ah! Lán tāi-ke ū-sı̂ sı̄ chhin-chhiūⁿ bô koà sı̍t ê chiáu, hō͘ Mô͘-kúi toā hāi. Siōng-tè só͘ ēng ê hong-hoat lâi kiù lán, m̄ sı̄ bia̍t-bô pháiⁿ kúi ê tùi-te̍k, ū-sı̂ sı̄ chhin-chhiūⁿ ēng khah tāng ê tàⁿ hō͘ lán taⁿ. Ū-sı̂ hō͘ lán tú-tio̍h pı̄ⁿ-thiàⁿ, seng-lí sit-pāi, ngó͘-kok hō͘ hong-thai phah pháiⁿ, kiáⁿ-jı̂ sí-sit hit hō. Lán tú-tio̍h, sim-koaⁿ m̄ kam, m̄ hâng-ho̍k, teh siūⁿ tam-tng hiah-ê sı̄ ná chhi-chhám. Chóng--sı̄ lán nā kam-goān thàn Siōng-tè ê hó ı̀-sù, chiū hiah ê tāng-tāng ê chhı̀-liān beh pı̀ⁿ-chò chhin-chhiūⁿ sı̍t-kó͘ hō͘ lán ē-tit thoat-lı̄ tùi-te̍k, soà ē-tit poe kàu khah kı̄n-oá thiàⁿ lán ê Thiⁿ-pē. (Tâi-oân Kàu-hoē-pò tē 410 koàn, 1919 nı̂ 5 ge̍h)