Kó͘-chá kó͘-chá, han-chı̂ chia̍h kàu pá. Nā-sı̄ koh khah chá, han-chı̂ mā chia̍h bē pá. Hit-ê sūn-niâ, goā-kok lóng iáu-sı̄ hoan-hoan bı̄ khai-hoà, Lán kā chheng-ho͘ chò “hoan-pang”.
Kóng ū chı̍t kang, hoan-pang ê kok-ông chia̍h-pá siuⁿ-êng, m̄-chai tó chı̍t tiâu tn̂g-á khı̀ siūⁿ--tio̍h,chiū kā pō͘-hā kóng : “Thiaⁿ-kóng tang-hong ê Khóng-chú-kong ū chiok chı̀n-pō͘ ê bûn-hoà, Lín ta̍k-ê chek-sı̂ chek-khek pau-ho̍k-á khoán khoán--leh, kín khı̀ kā Khóng-chú-kong chhú-keng.”
Án-ne-seⁿ ê sı̂-chūn niâ, chiòng hoan-tāi-sài chiū thêng-hûn kà-bū ( m̄ sı̄--lah, sı̄ chē hui-ki), kín kín lâi kàu Khóng--kà . Tú-hó, Khóng-chú khı̀ chiu-iû lia̍t-kok, kan-ta chhun Khóng-chú-má tı̄ chhù, tı̄ chàu-kha teh chú-pn̄g, chhá-chhài. Chiòng hoan-tāi-sài tı̄ mn̂g-kháu khoàⁿ Khóng-chú-má bô-êng chhih-chhih, toā-tiáⁿ sè-tiáⁿ chhi-chhi chhà-chhà, siūⁿ kóng m̄-chai teh chè-chō sím-mı̍h ko-téng bûn-hoà, m̄-káⁿ kā kiáu-jiáu, kan-ta khiā tı̄ chàu-kha mn̂g-kháu niau-niau khoàⁿ, ná-chhiūⁿ chin hò͘ⁿ-hiân ê khoán.
Khóng-chú-má it-sı̂-tek m̄-chai hoan-tāi-sài tàu-té sı̄ beh tı̍h sím-mı̍h, chiū kā i tú chhá-hó ê tāu-chhài sàng in. Chiòng hoan-tāi-sài sûi-sı̂ hoaⁿ-hí kàu kiông beh làu-ē-hâi, má-siōng chē chhit-sù-chhit tńg-khı̀ pò kok-ông chai. Kok-ông phı̄ⁿ-tio̍h phang-bı̄ sûi lâu-chhùi-noā, to-á, poâⁿ-á sa leh toā-chhùi sè-chhúi chiū kā sut lo̍h-khı̀. Bô nn̄g-ē chhiú chı̍t-pau tāu-chhài sut kàu chhun bô saⁿ-chhùi. Chiòng hoan-tāi-sài koáⁿ-kín kā kok-ông kóng: “Khé-pín Pē-hā, he sı̄ khóng-chú-má sàng--lán ê bûn-hoà, m̄-sı̄ beh hō͘ Lí chia̍h--ê !”
Kok-ông chek-sı̂ kā chhun--lo̍h-lâi ê tāu-chhài the̍h lâi khoàⁿ-khoàⁿ sǹg-sǹg--leh , tú-hó chhun 26 ki , chiū chiàu In ê hêng lâi chō bûn-jı̄. Che tio̍h-sı̄ tāu-chhài-gê-á jı̄ ê lâi-goân !
