Tēⁿ Chheng-hoé sū-kiāⁿ

A-kong kóng-koè chin chē kò͘-sū hō͘ goá thiaⁿ, lâi Tâi-pak tha̍k-chheh chı̀n-chêng, goá tiāⁿ-tiāⁿ thiaⁿ a-kong “oē-sian”. A-kong kóng, Jı̍t-pún sı̂-tāi, Jı̍t-pún kéng-chhat tāi-jı̂n chin pháiⁿ chin giâm, hō͘ peh-sèⁿ bē-tàng ké-siáu, ta̍k-ê to koai-koai-á thiaⁿ-oē. Hit-tong-sı̂, a-kong sı̄ siā-lāi ê kah-tiúⁿ, hoat-seng chı̍t-kiāⁿ kiaⁿ-thian tōng-tē ê toā tāi-chı̀----“Tēⁿ Chheng-hoé sū-kiāⁿ”. Chheng-hoé--á sı̄ siā-lāi ê lô-hàn-kha-á, hàn-chháu chho͘-ióng koh toā-châng, kha-chhiú liú-lia̍h, kûn-thâu kang-hu chin hó. Ū chı̍t-kang, ài thè-lâng chhut-thâu ê Chheng-hoé--á kap Jı̍t-pún tāi-jı̂n khí chhiong-thu̍t, soah kā tāi-jı̂n phah—sí, tāi-chı̀ toā-tiâu--loh, 10 goā ê tāi-jı̂n ùi Tâi-pak koáⁿ kàu Gı̂-lân beh lia̍h Chheng-hoé--á, Chheng-hoé--á lāu-sı̂n chāi-chāi, koh tı̄ i ê chháu-chhù lāi-té teh khùn. Tāi-jı̂n seng lâi chhoē a-kong, poàⁿ-mê kiò a-kong chhoā-lō͘ beh khı̀ lia̍h Chheng-hoé--á. A-kong kóng i kiaⁿ kah phı̄-phı̄-chhoah, tāi-jı̂n iōng to ah i kiâⁿ, kiâⁿ kàu Chheng-hoé--á in tau mn̂g-kha-kháu, a-kong seng kho̍k-mn̂g, bô-lâng kā ı̀n-siaⁿ, chit-chūn, tāi-jı̂n kā chhâ-mn̂g chàm--khui, Chheng-hoé--á ùi chhù-téng thiàu--lo̍h-lâi, chhiú--nih chı̍t-ki tn̂g-to chhut-la̍t ùi tāi-jı̂n sin-khu phoà--lo̍h, kı̂-tiong chı̍t-ê tāi-jı̂n keng-kah-thâu hoeh toā-káng lâu--chhut-lâi, Chheng-hoé--á kha-chhiú chin mé, sûi thiàu jı̍p-khı̀ àm-mo͘-mo͘ ê chháu-po͘, ǹg khe-piⁿ cháu--khı̀. Kui toā-tı̄n tāi-jı̂n jiok i bē tio̍h, Chheng-hoé--á chin kín tō tı̄ khe-po͘--nih cháu kah bô khoàⁿ-kı̀ⁿ lâng--a. Keng-koè chı̍t lé-pài, tāi-jı̂n it-tı̍t bô hoat-tō͘ lia̍h-tio̍h Chheng-hoé--á, Chheng-hoé--á sı̀-koè siám-pih, sim-lāi siūⁿ kóng, nā koh lâu tı̄ chia chóng ē hông lia̍h--tio̍h, tō koat-sim khı̀ Tn̂g-soaⁿ Ē-mn̂g bih--chı̍t-ē, beh cháu chı̀n-chêng chı̍t-mê, lâi kap goán a-kong sio-sı̂, koh pài-thok a-kong chiàu-kò͘ in lāu-bú, a-kong kiò i chhut-mn̂g chāi-goā ka-tı̄ ài sè-jı̄, sū-sū khah thun-jún--leh. Keh-tńg-kang, Chheng-hoé--á koh khı̀ chhoē chhiàⁿ--i ê tē-chú chioh só͘-hùi, chit-chūn, tē-chú chhiáⁿ Chheng-hoé--á lâu lo̍h-lâi chia̍h tiong-tàu-tǹg, lim-chiú sio-sı̂. Ná teh chia̍h-chiú ê sı̂, tē-chú siah chı̍t-poâⁿ âng-khı̄, chhiáⁿ Chheng-hoé--á phoè-chiú chia̍h--lo̍h, koè bô joā kú, Chheng-hoé--á hoat-hiān ka-tı̄ kha-nńg chhiú nńg, chiah chai-iáⁿ tiòng-to̍k--a, hō͘ tē-chú siat-kè--khı̀, tē-chú thau-thau-á kiò lâng khı̀ pò kéng-chhat, Jı̍t-pún tāi-jı̂n chin kín tō kā i pau-ûi, Chheng-hoé--á bián-kióng peh--khí-lâi, piàⁿ sèⁿ-miā beh cháu, m̄-koh bē-hù--a, tō kā tn̂g-to poé--khí-lâi, tùi ka-tı̄ pak-tó͘ chhah--lo̍h-khı̀, kam-goān chū-sat, mā boài sí tı̄ Jı̍t-pún-lâng chhiú-thâu. A-kong kóng, chit-ê tē-chú chin ok-chit, kā Chhneg-hoé--á chhut-bē, nā bô, phêng Chheng-hoé--á ê kang-hu, Jı̍t-pún tāi-jı̂n beh lia̍h i, chiâⁿ piàⁿ--leh! Chhneg-hoé--á sí liáu-āu, siā-lāi ê lâng thau-thau-á kā i pài, koh ū kā khí sè-keng biō-á, lō͘-boé hiuⁿ-hoé jú lâi jú ōng, soah khı̀ hō͘ Jı̍t-pún-lâng khà-tiāu. Tē-chú in tau āu--lâi lóng bē pêng-chēng, pe̍h-kha-tê ê niau-á, jı̍t--sı̂ thiàu-khı̀ in chhù-boé-téng, chhù-hia̍h lóng ta̍h-phoà liáu-liáu, chiâⁿ kióng-pò͘. Tē-chú āu--lâi ê sun-á, 1-ê cha-po͘ 1-ê cha-bó͘ lóng gōng-gōng, khoàⁿ--lâi sı̄ pò-èng. A-kong kóng: “Lâng teh chò, thiⁿ teh khoàⁿ.” Chheng-bêng poē-bōng, Chheng-hoé--á ê bōng lı̄ goán hái-piⁿ ê chó͘-bōng bô joā hn̄g, goá ē kiò a-kong chhoā goá khı̀ i ê bōng pài-pài, koh kā i bōng téng-koân ê chháu-á koah-koah chheng-chheng--leh, Chheng-hoé--á bô sı̄-sè, i ê bōng bô lâng kā pài. tha̍k ko-it hit-nı̂ ê Chheng-bêng, goá koh choan-kang chah chı̍t-tâi hip-siòng-ki, kā goá sè-hàn sim-ba̍k-tiong ê eng-hiông hip chı̍t-tiuⁿ-á siòng, a-kong khoàⁿ goá án-ne, chhiò-chhiò bô ke kóng-oē. Tha̍k tāi-ha̍k ê sı̂, tē-it-pái chham-ka iû-hêng sı̄-ui, tang-boé-sı̂-thiⁿ, chin koâⁿ ê poàⁿ-mê, ha̍k-tiúⁿ chhoā-thâu, chiòng-lâng khiâ o͘to͘bai toè tı̄ āu-piah, ná chhiùⁿ-koa ná ǹg chêng kiâⁿ, goán chhùi--nih chhiùⁿ: “Tâi-oân tó-sū goân-pún bí-lē, siū goā-pang thóng-tı̄ liáu sò͘-pah-nı̂, sui-jiân eng-hiông tāi-tāi poē-chhut, m̄-koh lóng poàn-tô͘ lâi hi-seng......” Tà-bâng ê àm-mê, goá siòng tùi Koan-im-soaⁿ kha ê Tām-chúi-hô, siūⁿ-tio̍h goá sè-hàn ê eng-hiông, sim-lāi tiām-tiām teh liām: “Chheng-hoé chek--á, chhiáⁿ sù goá kàu-gia̍h ê ióng-khı̀, chhin-chhiūⁿ lí tong-nı̂ tùi-khòng Jı̍t-pún-lâng kāng-khoán, chhiáⁿ lí chāi-thian chi lêng, pó-pı̀ Tâi-oân mài koh hō͘ goā-pang chhim-lio̍k thóng-tı̄, Tâi-oân chá chı̍t-jı̍t to̍k-lı̍p kiàn-kok”. A-kong koè-sin beh chhit-nı̂--loh, Chheng-hoé chek--á ê bōng mā ū 10 nı̂ bô lâng khı̀ kā chéng-lí--a, bōng téng-koân it-tēng choân koaⁿ-bang......goá mā chiâⁿ hoâi-liām tha̍k-chheh ê sı̂, hit-chióng pí thiⁿ khah toā ê chı̀-khı̀...... (TGB Thong-sı̀n tē 40 kı̂, 2003 nı̂ 1 goe̍h)