Tēⁿ Khe-phoàn Bo̍k-su ê Sió-toān

Tēⁿ Khe-phoàn Bo̍k-su ê Sió-toān A. D. 1894 nı̂ Tēⁿ Khe-phoàn chhut-sı̀ tı̄ Tâi-lâm chhı̄-goā Éng-khong-chng Gô͘-khı̂-thâm. Sı̀ hoè chiū bô lāu-pē; siū lāu-bó poê-iúⁿ, iā tı̄ kàu-hoē ê Sió-o̍h tha̍k-chheh. Tiúⁿ-ló-kàu Tiong-o̍h chut-gia̍p liáu, chiū tı̄ Thài-pêng-kéng kà Sió-o̍h. Jı̍p Tâi-lâm Sı̂n-ha̍k-hāu gián-kiù, chut-gia̍p āu tiàm Hiang-kó-the̍h chò thoân-tō nn̄g nı̂; 25 hoè ê sı̂ siū A-Lí-káng kàu-hoē phèng-chhiáⁿ chò bo̍k-su, toà 12 nı̂ kú. I sı̄ Tâi-oân kàu-kài siāng chió hoè siū àn-chhiú ê lâng. Tēⁿ Bo̍k-su tı̄ Lí-káng chāi-jı̄m tiong, ū chò kúi-nā hāng chin tiōng-iàu ê kang. 1.Kó͘-bú hun-siat Tiong-hoē. I kap Gô͘ Hi-êng, Lı̂m Iàn-sı̂n, Ko Tok-hêng, Liāu Tit chit kúi ūi Bo̍k-su, chı̄n-la̍t kó͘-bú hun-khu chū-tı̄. Tāi-seng siat Ko-hiông Kàu-bū-kio̍k tāi-lí Tiong-hoē pān sū. Ū cho͘-chit 12 tiâu ê kui-kí hiàn hō͘ Tiong-hoē chhâi-koat, siū san-kái chhun 8 tiâu. Cho͘-chit Kàu-bū-kio̍k, lāi-bı̄n hun 5 pō͘, chiū-sı̄ hiān-sı̂ kok Tiong-hoē só͘ ēng ê. Ko-hiông chū-tı̄ keng-koè nn̄g nı̂, goân-pún ê Tiong-hoē kám-kak hó-sè, chiū hun chò 4 khu, chheng chò ‘Khu gı̄-hoē’ lâi chū-tı̄. Ki-kò͘ chiàu Ko-hiông Kàu-bū-kio̍k ê khoán. Sı̀ khu hun-liáu nn̄g nı̂ kú chin sūn-sū. Hit-sı̂ Tâi-oân Tāi-hoē í-keng ū hun-siat Tiong-hoē ê kui-kí piān-piān, chiū thê-chhut sin-chhéng, chek-sı̂ tit-tio̍h hú-khó; Lâm-pō͘ Tiong-hoē kái chheng-chò Lâm-pō͘ Tāi-hoē. Choân Tâi ê chheng-chò Tâi-oân Tāi-hoē. Án-ni hun Tiong-hoē chū-tı̄ ē sêng-kong, sı̄ tùi Tēⁿ Bo̍k-su kap kúi-ūi tông-chı̀ ê ló͘-le̍k . 2.Hoat-khan “Kàu-hoē Sin-pò.” Tēⁿ Bo̍k-su kám-kak beh kó͘-bú chū-tı̄ cheng-sı̂n tio̍h ēng pò-choá. Só͘-í ēng thêng-siá-pán ka-kı̄ siá, ka-kı̄ ı̀n, hoat-hêng “Ko-hiông Ki-tok-kàu-pò”, múi goe̍h 1000 pō͘. M̄-kú tio̍h-la̍t m̄ hó khoàⁿ, chiū bō͘-chı̍p 5 chheng kho͘, tùi Tāi-pán bé ke-si kap oa̍h-jı̄. Keng-koè chē-chē ê lân-koan chiah ē thang hoat-hêng. Khó-sioh ı̀n liáu bô súi, āu-lâi Pa Phok-sū siāu-kài, chiah tùi Siōng-hái bé sin-sek ê oa̍h-jı̄ lâi ı̀n, soà oāⁿ miâ kiò “Kàu-hoē Sin-pò”, tiûⁿ-só͘ tı̄ Pı̂n-tong Séng-sè-siā. Lı̂m Iàn-sı̂n Bo̍k-su chò hàn-bûn chú-pit, Su-tiân Sian-siⁿ chò Jı̍t-bûn chú-pit, Tēⁿ Bo̍k-su chò pe̍h-oē-jı̄ chú-pit kiam Séng-sè-siā chú-sū. Tēⁿ Bo̍k-su múi lé-pài 3 jı̍t lâi Pı̂n-tong phian-chip, kàu-chèng kap kı̀-siàu. Ūi-tio̍h Séng-sè-siā ê sū-bū, i bat 3 mê-jı̍t bô khùn. Hit-tia̍p ū hoat-hêng nn̄g-chheng goā pō͘ siau tı̄ choân Tâi, toā kó͘-chhui chū-tı̄ cheng-sı̂n. Siông-siông chá-chá lâi, àm-àm chiah tò-khı̀, tiong-tàu-tǹg khai chū-hùi; án-ni kè-sio̍k 4, 5 nı̂ kú. 3.Khí sin pài-tn̂g. Tı̄ Lí-káng 12 nı̂ kú ê kang, tiong-kan chı̍t hāng, chiū-sı̄ kó͘-bú khí sin ê pài-tn̂g kap siok-sià. Che iā thang hō͘ Lí-káng ê hoē-iú siàu-liām. Hun-khu chū-tı̄ ê bo̍k-tek í-keng ta̍t-sêng, Tēⁿ Bo̍k-su toà Lí-káng iā 12 nı̂ à, i chiū sı̂-jı̄m hō͘ Ka-gı̄ Tông-hoē chhiáⁿ, tiàm Ka-gı̄ chò bo̍k-su 13 nı̂. Tı̄ Ka-gı̄ Tiong-hoē gâu kó͘-bú, pān-lí châi-bū-pō͘ 5 nı̂ kú. Ka Tiong ē-thang kap kı̂-û 3 Tiong-hoē saⁿ-kap chı̀n-pō͘, Tēⁿ Bo̍k-su ê ló͘-le̍k chin toā, sı̄ tāi-ke só͘ ē kı̀-tit ê. I toà Ka-gı̄ ê sı̂, ūi-tio̍h Lo̍k-moâ-sán chi-hoē, khiâ-chhia sı̀-kè tê-iân lâi khí pài-tn̂g. Koh iā chı̍t-pái khí kàu-sek, nn̄g pái-cheng-tiok pài-tn̂g. Iā ū tô͘-su-koán kap chı̍t chō ı̂ⁿ-hêng Chú-jı̍t-o̍h ê káng-tn̂g. Khó-sioh chiàn-cheng tiong chit nn̄g chō siū thiah-húi. Tēⁿ Bo̍k-su in-ūi ba̍k-chiu ê koan-hē ū kéng chin tú-hó ê N̂g Bú-tong Bo̍k-su lâi chiap-jı̄m. Choè-āu ū khı̀ tiàm Chúi-té-liâu ê kàu-hoē. Sui-jiân ba̍k-chiu hoe, iáu-kú chı̄n la̍t thoân-kàu, sûn hoē-iú, kà Chú-jı̍t-o̍h, kà lâng toâⁿ-khı̂m. I kè-e̍k ài tı̄ 3 nı̂ kú hō͘ chit ê kàu-hoē hoat-tián. Bô phah-sǹg tú-tio̍h phoà-pēⁿ oá 6 kò-goe̍h. Tı̄ sin-le̍k 6 goe̍h 24 àm 10 tiám 55 hun, Siōng-tè tiàu i tò khı̀, hióng-siū 58 hoè. Keh jı̍t hoé-chòng, 7 goe̍h 3 hō ē-po͘ tı̄ Pı̂n-tong kàu-hoē kú-hêng bâi-kut-sek. Hoē-chòng-chiá moá-moá, ū Tāi-hoē Gı̄-tiúⁿ Lâu Chı̀n-hong Bo̍k-su, Ka Tiong Gı̄-tiúⁿ Tân Kong-hui Bo̍k-su, Ko Tiong Su-kı̀ Chiong-sêng Bo̍k-su kap Ka-gı̄ Lí-káng Chúi-té-liâu kàu-hoē tāi-piáu ê tiàu-sû, Tēⁿ Bo̍k-su iáu ū bo̍k-su-niû, 5 ê hāu-seⁿ, 3 ê cha-bó͘-kiáⁿ kap lāi-goā-sun 17 ê. I thâu-boé 34 nı̂ kú ê thoân-kàu seng-oa̍h ū chē-chē ê hó bô͘-iūⁿ. Tāi-hoē Gı̄-tiúⁿ kap Ko Tiong tāi-lí gı̄-tiúⁿ ê tiàu-sû lóng chheng-chàn i sı̄ Tâi-oân kia̍t-chhut thian-châi chong-kàu-ka. Kí kúi nā hāng lâi kóng: (1) I bat tam-tng Tāi Tiong-hoē gı̄-tiúⁿ Thoân-tō kio̍k-tiúⁿ. Pa Phok-sū ê Tāi-hoē chòng, Lâm-pō͘ Siat-kàu 70 chiu-nı̂ kı̀-liām-hoē, Sòng Phok-sū lâi Tâi hùn-heng, Tâi-oân Phok-lám-hoē tiong ê liân-ha̍p pò͘-tō. Chiah ê lóng-sı̄ i chò Tāi-hoē ê gı̄-tiúⁿ ê sı̂ só͘ chò ê sū. (2) I ē chò si kap tù-chok. Sèng-si ê lāi-bı̄n ū 33 siú sı̄ i chò, á-sı̄ hoan e̍k--ê; koh ū siá kúi-nā pún Sèng-tàn Chún-pı̄-chı̍p. Choè-āu iā ka-kı̄ chò bông-jı̂n phòng-jı̄ ê Sèng-keng Kong-iàu kap Sèng-si. (3) Tı̀-ı̀ chong-kàu kàu-io̍k kap chú-lú ê kàu-io̍k. I kap kò͘ N̂g Sū-bēng Bo̍k-su khui thâu-chı̍t-hoê Chú-jı̍t-o̍h Kàu-oân Káng-sı̍p-hoē. Khı̂n-khiām hō͘ kiáⁿ-jı̂ tha̍k-chheh: tióng-lâm Heng-hui sı̄ khí-kho i-su; chhù-lâm Sek-an sı̄ koaⁿ-soàⁿ thih-tō ê ki-koan-sū; saⁿ-lâm Choân-seng sı̄ bo̍k-su; sı̀-lâm Hiân-lí sı̄ kok-hāu kàu-oân; gō͘-lâm Chhong-éng sı̄ Tâi-oân Tāi-ha̍k Kang-ha̍k-ı̄ⁿ tha̍k-chheh. Toā cha-bó͘-kiáⁿ kè io̍h-che-su; tē-jı̄ cha-bó͘-kiáⁿ kè Su-hoān ha̍k-hāu kàu-oân; tē-saⁿ--ê tha̍k su-hoān pit-gia̍p. I sui-jiân bô lâu châi-sán, iáu-kú ū lâu sı̀n-gióng hō͘ kiáⁿ-sun. Iā lâu chı̍t hù bo̍k-su ê kong-ho̍k chò kı̀-liām, hoan-hù kiáⁿ-sun tāi-tāi tio̍h ū lâng sio-soà chò Tēⁿ Bo̍k-su. Taⁿ i tńg-khı̀ lah! Soah in ê tio̍h-boâ lâi an-hioh, in só͘ chò ê kang iā tè in (Khé 14:13). (Tâi-oân Kàu-hoē-kong-pò 752 koàn; 1951 nı̂ 8 goe̍h)