Tē-kiû ê sū lí lóng bat bô

Kiàn-ha̍k Lóng sı̄ bô; tāi-lio̍k sı̄ ū. Goá lâi ke kóng chı̍t-sut-á, chhiáⁿ bóng thiaⁿ. Tē-kiû tô͘-bı̄n, ū oē chı̍t-choā chı̍t-choā, ū thán-tı̍t choā, iā ū thán-hoâiⁿ--ê. Che hō-chò tō͘. Choân kiû-bı̄n ū 360 choā, chiū-sı̄ 360 tō͘. Tùi lâm kàu pak ê choā, hō-chò keng-soàⁿ; tùi tang kàu sai, hō-chò hūi-soàⁿ. Hūi-soàⁿ chiūⁿ pak, á-sı̄ lo̍h lâm, sı̄ tùi chhek-tō sǹg khí. Keng-soàⁿ chhut sai, á-sı̄ jı̍p tang, sı̄ tùi Gut-lı̂n-úi-chhı̀ (Greenwich) ê chú-ngó͘ soàⁿ sǹg khí (Chit-tiâu chú-ngó͘ soàⁿ ê khí-tiám, sı̄ tı̄ Lûn-tun kau-goā Thim-su hô-piⁿ ê káng, hia ū Gut-lı̂n-úi-chhı̀ ê thian-bûn-tâi). Tùi hia sǹg jı̍p tang, tang-keng 120 tō͘, chiū-sı̄ Tâi-oân ê ūi-tı̀. Lâng beh hun- koah thó͘-tē, á-sı̄ thian-bûn sū, á-sı̄ sái chûn ê lâng lóng tùi-tiōng chit-hō tō͘-sò͘. Ha̍k-seng teh mn̄g, Tâi-oân téng-po͘ 9 tiám, iā tı̄ Jı̍t-pún téng-po͘ kúi tiám? Lâng m̄-bián phah tiān-pò khı̀ mn̄g, nā khoàⁿ tē-kiû tô͘ ê tō͘ sò͘ lâi sǹg chiū chai. Jı̍t-thâu ê kng, chı̍t tiám cheng, chı̀n-hêng 15 tō͘. Jı̍t-pún ūi-tı̀, tı̄ tang-keng 135 tō͘, Tâi-oân sı̄ tang-keng 120, án-ni saⁿ-lı̄ 15 tō͘, sı̄ chha chı̍t tiám. Lán chia 9 tiám, in hia 9 tiám koè liáu, sı̄ téng-po͘ 10 tiám. Koh mn̄g Ìn-tō͘ téng-po͘ kúi tiám? Ìn-tō͘ sı̄ tı̄ tang-keng 100 tō͘, lı̄ Tâi-oân 20 tō͘, 20 tō͘ ēng 15 tō͘ lâi pun, tit-tio̍h chı̍t tiám 20 hun. Lán téng-po͘ 9 tiám, in iáu-boē 9 tiám, só͘-í tio̍h tùi lán ê 9 tiám khàu-tû chı̍t tiám 20 hun, chiū chai Ìn-tō͘ sı̄ chá-khí 7 tiám 40 hun. Ēng án-ni lâi chhui-sǹg thiⁿ-ē sím-mı̍h kok, hiān-chāi sı̄ sím-mı̍h sı̂, lán lóng ē chai. Tē-kiû ū loā toā? Lâng se̍h tē-kiû chı̍t-lı̀n, ū 7 bān goā lí. Kap goe̍h sio- pí, goe̍h tio̍h 40 lia̍p chiah ū chı̍t lia̍p tē-kiû. Tâi-oân lia̍h tı̍t sio-chiap, tio̍h 75 ê Tâi-oân tó, chiah ē thang tùi tē-kiû bı̄n ê tiong-ng, khoân chı̍t-liàn. Tē-kiû chı̄n pak ê só͘-chāi, hō chò Pak-ke̍k; chı̄n lâm ê só͘-chāi hō chò Lâm-ke̍k, hit nn̄g só͘-chāi ke̍k koâⁿ, thong-nı̂ kian peng. Tı̄ hia, chı̍t nı̂ 6 goe̍h jı̍t jı̍t-sı̂, 6 goe̍h jı̍t mê-sı̂. Pak-ke̍k nā mê-sı̂, Lâm-ke̍k chiū jı̍t-sı̂, chiàu án-ni lûn-liû. Chiàⁿ Pak-ke̍k, Chiàⁿ Lâm-ke̍k, bô lâng toà hia. Tùi hái lâi khoàⁿ, ū pun chò 5 ê iûⁿ. Chiū-sı̄ Thài-pêng-iûⁿ, Toā-sai-iûⁿ, Ìn- tō͘-iûⁿ, Pak-pêng-iûⁿ, kap Lâm-pêng-iûⁿ. Tùi lio̍k-tē lâi khoàⁿ, ū pun chò 6 toā chiu, chiū-sı̄ A-se-a chiu, Au-lô-pa chiu, A-hui-lı̄-ka chiu, Ò-tāi-lı̄-a chiu, Pak A-bí-lı̄-ka chiu kap Lâm A-bí-lı̄-ka chiu. Tùi khı̀-hāu lâi khoàⁿ, ū joa̍h ê tē-hng, un-hô ê tē-hng, koâⁿ ê tē-hng, hun chò 5 toā khu-he̍k. Chiū-sı̄ Jia̍t-tài, Pak Un-tài, Lâm Un-tài, Pak Hân-tài kap Lâm Hân-tài. Choân sè-kài ê lâng, iok ū 20 ek; Tâi-oân chiah ū chhit-pah bān, án-ni lâi sio-pí, ū 285 poē Tâi-oân lâng ê chē. In nā kóng lâi lí ê chhù, kā lí tùn chhiú chhéng-an, chı̍t lâng tùn chı̍t-ē, chı̍t jı̍t tùn ē liáu bē, lí ê chhiú kàu boé sím-mı̍h khoán? (Tâi-oân Kàu-hoē Kong-pò tē 707 hō, 1947 nı̂ 11 ge̍h)