Tı̀n-tiān Chiong-kun Pa Phok-sū
Tı̀n-tiān Chiong-kun Pa Phok-sū Pa Phok-sū chó͘-che̍k Hoat-kok; chó͘-sian ūi-tio̍h sı̀n-gióng ê chū-iû, chiū poaⁿ-khı̀ So͘-kek-lân. Pa Phok-sū 16 hoè teh tha̍k toā-o̍h ê sı̂, tit-tio̍h lêng-kám, chiū koat-sim hiàn-sin. Kàu pit-gia̍p ê sı̂, toā-o̍h beh lâu i toà bó-hāu chò chō͘-kàu; chóng-sı̄ i koat-sim beh lâi Tâi-oân chò soan-kàu-su. Tāi-ke chin gông-ngia̍h! chı̍t ê ū cháiⁿ-siòng-châi ê lâng beh khı̀ kàu chı̍t ê phian-phiah, toà pah-goā bān cha̍p-sek lâng, bô bûn-bêng ê sió hái-sū, thoân-tō chiâⁿ-cha̍p nı̂ kú ê soan-tō-tē chò soan-kàu-su! Sı̍t-chāi chin bô chhái!! Thang kóng “Thâi-ke ēng gû-to.” [Āu-lâi tı̄ Siōng-hái choân Tiong-kok 500 goā ê soan-kàu-su toā hoē-khó ê sı̂, Pa Phok-sū tio̍h jı̄ miâ; i ê moē-sài toà tı̄ Soàⁿ-thâu ê Khip Bo̍k-su tio̍h it miâ.] Káu-cha̍p-saⁿ nı̂ chêng, Má I-seng lâi chò Sian-hong. Peh-cha̍p-chhit nı̂ chêng, Kam Bo̍k-su lâi Koà-soè. Peh-cha̍p-sı̀ nı̂ chêng, Pa Phok-sū lâi Tı̀n-siú. Pa Phok-sū lâi Tâi-oân thâu-boé 62 nı̂ kú, i lâi ê sı̂ Tâi-oân tú-á siat-kàu 10 nı̂, i tı̄ Tâi-lâm pia̍t-sè, kàu taⁿ 23 nı̂. Bó-hoē tı̄ 93 nı̂ kú só͘ phài lâi ê: 1. Bo̍k-su 22 lâng: Kap Pa Phok-sū tâng sı̂-chūn sı̄ 17 miâ; í-chêng nn̄g miâ, í-āu 3 miâ. 2. I-seng 15 lâng: Kap Pa Phok-sū tâng sı̂-chūn 12 miâ; í-chêng nn̄g miâ, í-āu chı̍t miâ. 3. Tiong-o̍h sian-siⁿ 4 lâng: Lóng tı̄ Pa Phok-sū ê sı̂-tāi. 4. Lú soan-kàu-su 21 miâ: Kap Pa Phok-sū tâng sı̂-chūn 18 miâ; í-āu 3 miâ. 5. Hō͘-sū 8 miâ: Kap Pa Phok-sū tâng sı̂-chūn 7 miâ; í-āu chı̍t miâ. Í-siōng lâm soan-kàu-su 41 lâng, lú soan-kàu-su 29 lâng; kiōng 71 lâng tiong chí-ū 9 miâ kap i bô siāng sı̂-chūn. Iā tùi Pa Phok-sū lâi liáu í-āu kàu kū-nı̂ 80 nı̂ kú, siū sı̂n-ha̍k kàu-io̍k ê kiōng 381 lâng; kı̂-tiong 294 lâng sı̄ tı̄ i ê sı̂-tāi lāi, 4 hūn tı̀n 3 hūn khah ke. Pa Phok-sū chin thiàⁿ ha̍k-seng: chhin-chhiūⁿ tı̄ 40 goā nı̂ chêng, thǹg chhiah-kha liâu koè Sai-lê khe, kàu Sai-lê ke khoàⁿ pè tông-chek Liāu Sam-tiōng ê pēⁿ. Pa Phok-sū chin khek-kí! Goân-pún chı̀-goān to̍k-sin; āu-lâi in-ūi phoà-pı̄ⁿ jı̍p-ı̄ⁿ, chiah kap kò͘ i ê hō͘-sū kiat-hun. Kàu i ê Phok-sū-niû koè-sin liáu, i chiū bô niá sin-súi (38 nı̂ chêng, Tâi-lâm sin-bûn pò Pa Phok-sū ê nı̂-hōng 360 pōng); koh chò to̍k-sin-chiá kàu it-seng. Pa Phok-sū sı̄ chin khı̂n-khiām phok-sò͘ ê lâng! I m̄-nā kà chheh, i iā sı̂-sı̂ tha̍k-chheh! I iā sûn kàu-hoē, iā tù-chok! I ū chài-pán Kam Jı̄-tián nn̄g piàn, kap thiam-pó͘ Eng Hoâ Jı̄-tián! Kàu chhit peh-cha̍p hoè ê sı̂ koh hoan-e̍k Sin Kū-iok ê pe̍h-oē-jı̄ Sèng-keng!! Sı̄m-chı̀ kàu i 80 goā hoè lı̂m-chiong í-chêng iáu teh tam-tng Tang-mn̂g í-kı̍p Thài-pêng-kéng nn̄g ūi tông-hoē ê gı̄-tiúⁿ, kap lâng chē-mê, chē-jı̍t!! Pa Phok-sū chiong i ê hiaⁿ só͘ hiàn chı̍t bān kho͘ lâi khí sı̂n-ha̍k ê hāu-sià. I iā siat chheh-pâng, kà tô͘-tē khioh-jı̄ ı̀n-soat; tùi chheh-pâng ū ióng-sêng kàu-hoē chin-chē ê jı̂n-châi. Tı̄ 28 nı̂ chêng goá kap pè loē-tē Lı̂m Chiàu Bo̍k-su tı̄ Siōng-hái Kàu-sū kong-só͘ kap Pa Phok-sū teh chia̍h-pn̄g ê sı̂, goán nn̄g lâng sı̄ chhin-chhiūⁿ iau-gō-sian, Pa Phok-sū iā sı̄ sán kho̍k-kho̍k, bô thang chhin-chhiūⁿ lāi-bı̄n pa̍t ê lâng-kheh khah chē lóng chin pûi-phàng, pak-tó͘ iā chin pûi, bı̄n âng kiat-kiat. Chóng-sı̄ Pa Phok-sū hán-tit phoà-pēⁿ, i ê kiān-khong tn̂g-siū-hoat kóng sı̄ “Toā chia̍h! Toā khùn!! Toā chò kang!!!” Pa Phok-sū ê bo̍k-phiau: To̍k-to̍k Iâ-so͘! Éng-oán Iâ-so͘!! I m̄ khò sè! I chin kiaⁿ Hōng-soaⁿ, A-kâu kap Gô͘ Á-chhiûⁿ hit hō sū-kiāⁿ chài hoat, tı̀-kàu Tâi-oân tit-tio̍h “Bı̂n-kàu siong-an.” I iā bô bō͘-bêng kiû-lı̄; sui-jiân hit sı̂ ê chèng-hú ū ēng hun-chiong sàng i, chóng-sı̄ i sí-chiong it-koàn sı̄ “Chèng-kàu hun-lı̄,” só͘-í kàu-hoē bô siū chèng-piàn ê éng-hióng. Sui-jiân Tâi-lâm Saⁿ-kau kóng beh hiàn in ê kong-chı̂ⁿ hō͘ kàu-hoē keng-êng “Tiong-se-o̍h,” kap Tâi-tiong Lı̂m Hiàn-tông Sian-seⁿ hiah ê sin-sū chiong in kúi-cha̍p-bān kho͘ beh hō͘ kàu-hoē siat Eng Hoâ su-ı̄ⁿ; chóng-sı̄ Pa Phok-sū m̄ káⁿ “Ēng pa̍t-lâng ê kûn-thâu-bó cheng chio̍h-sai,” iā “M̄ káⁿ pa̍t-lâng toh-nih ngeh bah chhı̄ ta-ke.” Pa Phok-sū m̄ káⁿ kiâⁿ hit hō “Bô chı̂ⁿ siūⁿ beh chò thâu-ke” á-sı̄ “Chiù-choā hō͘ pa̍t-lâng sí” ê lō͘. I choa̍t-tùi beh kiâⁿ “Thian-chō͘ chū-chō͘” ê lō͘! Sui-jiân bô hō͘-sû iā kam-goān!! Pa Phok-sū ê kàu-hoē keng-êng hoat: (1)Nā m̄ sı̄ Pē hō͘ i, bô lâng ē chiū-kı̄n Chú! (2) Chú ê iûⁿ thiaⁿ Chú ê siaⁿ! (3) Hô͘-lı̂ ū khang, pe-chiáu ū siū, to̍k-to̍k Jı̂n-chú bô khoà thâu-khak ê só͘-chāi! (4) Bô ēng kim-gı̂n, chí-ū ēng Iâ-so͘ ê miâ hō͘ sı̀n ê lâng tit kiù! (5) Sı̀n-tô͘ ū jia̍t-sim, chū-jiân ū kàu-hoē! Thoân-kàu-ka ū jia̍t-sim, chū-jiân ū keng-hùi! (6) Sı̀n-tô͘ lóng sı̄ “Sian-ti! Chè-si!! Kun-ông!!!” (7) Kàu-hoē bô koân-kē! Kàu-chit bô toā-sè! Ta̍k khoán ê hoē-gı̄ sı̄ Ki-tok pah-thé ê liân-lo̍k! Ta̍k khoán ê ki-koan sı̄ Ki-tok-tô͘ ê hun-kang ha̍p-chok!!!
(Tâi-oân Kàu-hoē Kong-pò tē 826 hō, 1957 nı̂ 10 goe̍h)