Khǹg chı̍t-lúi n̂g kiok-hoe,
Khǹg boē-lo̍h tùi lí ê siàu-liām.
Goá ê sin-sè chhin-chhiūⁿ iù-iù ê hoe-lúi,
Tán boē-hù lāu-pē thiàⁿ-sioh,
Chiū tāi-seng hō͘ hong chhoe-lo̍h.
Tı̄ goá iáu boē-hù chhut-sı̀ ê chhun-thiⁿ,
Bông-bū tà tı̄ soaⁿ-kok ê chá-khí,
Lí iáu liû-loân phoē-toaⁿ ê sio-lo,
Chiū hō͘ peng-á thoa kàu khoe-piⁿ.
Chhèng-siaⁿ thàng-koè lí ê kha-chiah,
Huih-chúi ná lō͘-chúi tih-lo̍h chháu-iá.
Âng-kı̀-kı̀ ê thó͘-toē,
Bô sím-phoàⁿ ê sí-choē,
Toà hō͘ goá bô lāu-pē ê gín-á-sı̂,
Bô huih-sek ê chheng-chhun-kı̂.
Goá ê sı̀ⁿ-miā tùi pi-kio̍k khai-sí,
Tı̄ hong-thai-mı̂ goá chá-sán chhut-sı̀.
A-kong oàn-thàn, hiuⁿ-hoé tùi goá tn̄g--khı̀.
A-bú moá-goe̍h chiū phō goá lı̄-khui.
Jı̍t-sı̂ āiⁿ goá kā lâng soé-saⁿ,
Mı̂-sı̂ tı̄ ko͘-teng ē-kha, thè lâng choè saⁿ.
Chá-chêng ê kı̀-tı̂ chhin-chhiūⁿ bū-bū ê kū iáⁿ-phı̀ⁿ.
M̄-káⁿ hō͘ pêng-iú kàu tı̄ chhù--nih,
M̄-káⁿ hō͘ lâng chai-iáⁿ, lán bû-ko͘ ê koè-khı̀.
Kan-ta siūⁿ beh thoat-lı̄,
M̄-káⁿ hoê-sióng ê gín-á-sı̂,
M̄-bat kô͘-io̍h ê khang-chhùi,
Tâi tı̄ goá ê sim-koaⁿ-íⁿ--nih.
Tı̄ ı̄-hiong liû-lōng, soà-chiap sin ê jı̂n-seng,
Chiap lí ê gia̍p, choè hū-kho i-seng.
Sin ê ka-têng tú-tú khí-thâu,
Tiōng-hu chiū hiâm goá kang-chok koè-thâu,
Ta-ke hiâm goá boē hiáu-tit kò͘-ke,
Gín-á ài goá chia̍p-chia̍p kap in choè-hoé.
A-bú ū-sı̂ siá-phoe lâi,
Ná-chún teh oàn-thàn, goá bô kap i tı̄-teh.
Tı̄ pı̄ⁿ-ı̄ⁿ tong-tı̍t, bô khùn ê àm-mı̂,
Khoàⁿ lí ê siōng, ba̍k-sái ek kàu ba̍k-kı̂ⁿ.
Chin-chiàⁿ ǹg-bāng lí khiā tı̄ seng-khu-piⁿ,
Hō͘ goá chhin-chhiūⁿ pa̍t-lâng ê cha-bó͘-kiáⁿ,
Ū lāu-pē thang thiàⁿ,
Ū lāu-pē kap goá hun-hióng,
Só͘-ū ê sit-lo̍h kap lí-sióng.
Khǹg chı̍t-lúi n̂g kiok-hoe,
khǹg boē-lo̍h tùi lí ê siàu-liām.
Goá ê sim-su chhin-chhiūⁿ khin-khin ê hoe-lúi,
Tè hong poe--khı̀, kàu tı̄ thiⁿ-téng,
Goá boē-hù kı̀ⁿ-bı̄n ê lāu-pē sin-piⁿ.
Tı̄ lí bat lâu-huih tó--lo̍h ê só͘-chāi,
Tı̄ goá bat pi-siong lı̄-khui ê kò͘-hiong,
Ǹg-bāng chhut-thâu-thiⁿ ê sı̂-jı̍t,
Goá iáu oē-hù khoàⁿ--kı̀ⁿ.
(Tâi-bûn-thong-sı̀n tē 62 kı̂, 1999 nı̂ 3 goe̍h)
(Tâi-bûn Bóng-pò tē 65 kı̂, 2002 nı̂ 2 goe̍h)
