Khǹg chı̍t-ki pek-ha̍p-hoe,
Khǹg boē-lo̍h tùi lí ê siàu-liām.
Goá ê chheng-chhun chhin-chhiūⁿ sûn-pe̍h ê hoe-lúi,
Tú-tú khui-hoe chiū hō͘ lâng at-chı̍h.
Lán sin-hun N̄g-goe̍h-jı̍t ê chá-khí,
Chhèng-siaⁿ jiáu-loān Tâi-pak Îⁿ-khoân ê chhun-thiⁿ,
Tı̄ pı̄ⁿ-ı̄ⁿ kap tâm-phoàⁿ hoē-gı̄ lâi-lâi-khı̀-khı̀,
Lí hán-tit kap goá saⁿ-kı̀ⁿ.
Hit-mı̂ lán ēng seng-khu saⁿ-an-ùi.
Soaⁿ-kok ê bū chhin-chhiūⁿ phoē, kā lán pau-ûi.
Un-loán ê sip-khı̀ hō͘ lán kiông beh choa̍t-khùi,
Iā m̄-goān kā ba̍k-chiu thí-khui.
Pâng-keng-mn̂g hiông-hiông hō͘ lâng lòng-khui,
Peng-á kia̍h-chhèng kā lí thoa--khı̀.
Liân goā-saⁿ iā m̄ hō͘ lí oāⁿ,
Bı̂n-chhn̂g-piⁿ kan-ta chhun chı̍t-siang chhéng-thoa.
Siāng-mı̂ goá siōng-boé-pái soé lí ê seng-khu.
Tùi pe̍h-siak-siak ê kha-chiah,
Bong chhèng-chí thàng--koè ê huih-jiah.
Chhim kàu bong-bô-toé ê khang-chhùi,
Éng-kiú kha̍p tı̄ goá ê kı̀-tı̂.
Ba̍k-sái bô lâu poàⁿ-tih.
Choa̍t-bōng hō͘ goá ê sim léng-ki-ki,
Hō͘ goá ê ba̍k-chiu ko͘-ta ná chhâ.
Âu-kiò iā boē chhut-siaⁿ.
Kiaⁿ-hiâⁿ sok-ân goá ê siaⁿ-toà,
Goá ê sim boē koh chhiùⁿ-koa.
Tı̄ bô chı̄n-pōng ê àm-mı̂,
Chı̍t-lia̍p chéng-chí bô lâng khoàⁿ--kı̀ⁿ,
Tiām-tiām tı̄ goá ê pak-lāi puh-íⁿ.
Gín-á tı̄ hong-thai-mı̂ chá-sán chhut-sı̀,
“Ah, cha-bó͘--ê! “
Lí ê lāu-pē thiaⁿ--tio̍h chiū hàiⁿ-thâu lı̄-khui.
Goā-ke khǹg goá liōng-chá kái-kè, kóng hó-sè,
Gín-á moá-goe̍h chiū sàng hō͘ lâng chhı̄.
Poàⁿ-mı̂ eⁿ-á thı̂-khàu, goá phō i kiâⁿ kàu thang-á-kháu,
Khoàⁿ i boán-chiok suh-ni, chēng-chēng khùn--khı̀.
Goá ê ba̍k-sái lâu kàu hı̄-á-kı̂ⁿ,
M̄-kam kā i phō lı̄-khui sin-piⁿ.
Hit-tia̍p goá kak-chhíⁿ:
Gín-á sı̄ goá ài poē ê sı̍p-jı̄-kè,
Sı̄ lán bat saⁿ-thiàⁿ ê ı̀n-kı̀,
Sı̄ choa̍t-bōng-tiong to̍k-it ê ǹg-bāng,
Khó͘-thàng-tiong siōng-toā ê hoaⁿ-hí.
Gō͘-cha̍p-nı̂ chhin-chhiūⁿ toā-chúi lâu--koè,
Goá ê chheng-chhun tùi thoah-pang téng-bı̄n noá--koè,
Tùi poàⁿ-mı̂ chiam-soàⁿ ê khang-phāng Ǹg--koè.
Cha-bó͘-kiáⁿ chiām-chiām toā-hàn,
Chhin-chhiūⁿ lí, ū o͘-pe̍h hun-bêng ê ba̍k-chiu,
Hoān-sū ū ka-kı̄ ê phoàⁿ-toàn.
Soè-hàn i tè goá khı̀ thè lâng soé-saⁿ,
Bē be̍h-gê-ko--ê tiāⁿ-tiāⁿ sàng hō͘ i thn̂g-á.
Ū chı̍t-jı̍t gín-á mn̄g goá:
“Lí kap bē be̍h-gê-ko--ê kiat-hun kiám-hó?
Án-ni, goá ta̍k-jı̍t lóng ū thn̂g-á thang chia̍h.”
Soà-chiap i kóng soè-soè-siaⁿ,
“Án-ni goá iā ū chı̍t-ê pa-pa, thang thiàⁿ goá.”
Cha-bó͘-kiáⁿ toā-hàn, bô su hō͘ ta-po͘ gín-á,
Kap lí kāng-khoán, choè hū-kho i-seng.
Tı̄ goā-kok khai-gia̍p, siⁿ-kiáⁿ tēng-ki,
Sui-bóng siàu-liām, iáu-sı̄ goá choè-toā ê an-ùi.
Goá iû-goân chiú tı̄ soaⁿ-kha ê chhù--nih.
Gō͘-cha̍p-nı̂ āu chiah kiâⁿ-jı̍p koe-chhı̄,
Khiā tı̄ lí phah-piàⁿ ū-hūn ê kı̀-liām-pi,
Thâu-chı̍t-pái iû-chāi ba̍k-sái teh lâu.
Tı̄ chèng-lâng bı̄n-chêng,
Chhut-siaⁿ ūi lí thı̂-khàu.
Thâu-chı̍t-pái,
Goá ê kha-chiah khiā thêng-thêng,
Gō͘-cha̍p-nı̂ ê thoa-boâ bô hō͘ goá lê-thâu.
Kú-nı̂ thèng-hāu ê chèng-gı̄ chit-tia̍p chiah kàu:
Lán ê hi-seng m̄-sı̄ choē-chèng,
Sı̄ le̍k-sú éng-kiú ê kiàn-chèng,
Chhin-chhiūⁿ tiám-to̍h ê hoé-pá,
Chiò-koè thiⁿ-kng chêng ê khòng-iá.
Khǹg chı̍t-ki pek-ha̍p-hoe,
khǹg boē-lo̍h tùi lí ê siàu-liām.
Lán ê chheng-chhun chhin-chhiūⁿ chheng-pe̍h ê hoe-lúi,
khui tı̄ kú-tn̂g só͘-thiàⁿ ê thó͘-toē,
Siū at-chı̍h iā bô oàn-hoé.
(Tâi-bûn-thong-sı̀n tē 62 kı̂, 1999 nı̂ 3 goe̍h)
