Tı̄ Hêng-chhun-koān thoân-tō

Kū-nı̂ 12 goe̍h 17, chiū-sı̄ pài-it, hit-mê goá tùi An-pêng lo̍h-chûn khı̀ Tang- káng, tı̄-hia chham Tong Sian-siⁿ, Âng I-seng, keng Sian-siⁿ chhú-chê. (Keng Sian-siⁿ chiū-sı̄ Chó͘-ke Sèng-chheh Kong-hoē chhe--ê, lâi Tiong-kok liāu-lí bē Sèng-chheh ê sū; hit-tia̍p chham Keng Sian-siⁿ-niû ū lâi Hú-siâⁿ sio- thàm.) Kàu pài-saⁿ mê-hng, goán sı̀-ê koh-chài tah chı̍t-chiah siong-chûn beh khı̀ lâm-lō͘-boé, khoàⁿ hia hit-ê Teng- lâu, iā beh chhoē hit só͘-chāi ê Ka-lé. Pài-gō͘ chá-khí kàu-tè; tāi-seng khı̀ khoàⁿ Teng-lâu, iā ū lâng kiò-chò Teng- tâi. Chit keng lâu sı̄ khí tı̄ Gō-loân-phı̄ⁿ, chiū-sı̄ Tâi-oân hái-sū ke̍k-lâm ê só͘-chāi, saⁿ-bı̄n ǹg-hái, chı̍t-bı̄n khò-soaⁿ. Lâu sı̄ ı̂ⁿ-ı̂ⁿ, chha-put-to 8 tn̄g koân, tn̄g-goā khoah; bô lâng teh toà; tiâu-kang khí teh tiám-teng chò kiâⁿ-chûn ê lō͘-ēng. Hit-ki teng chin-kng, lı̄ gō͘ la̍k phò͘ lō͘, iā khoàⁿ ē bêng. Teng--nı̍h ū la̍k tiâu sim, sim sı̄ ı̂ⁿ-khoân--ê, lāi-goā hun-chò la̍k- têng; nā lóng-chóng tiám, chı̍t-mı̂ tio̍h ēng chı̍t-siuⁿ, chiū-sı̄ nn̄g tháng ê thô͘- thoàⁿ-iû. Ū mı̂ tú-tio̍h bô bông-bū, tiám saⁿ-tiâu-sim iā ē chiok-kng. Teng ê chhang-kńg chin toā ki, múi-ki bé tio̍h gō͘ kho͘ gı̂n. Ta̍k-mı̂ tùi jı̍t-lo̍h tiám kàu jı̍t-chhut, kui-mê tiāⁿ-tio̍h ū lâng sio-lûn-liû teh kò͘. Tı̄-hia ū saⁿ-ê Goā-kok lâng teh chò hit-keng lâu ê chú-sū, iā ū chhiàⁿ kúi-nā ê Tn̂g-lâng teh tàu-kha- chhiú; in-ê chhù khí oá tı̄ hit-ê Lâu- kha. Kàu-taⁿ khí ū sı̀-nı̂ goā ê kú; hit- sı̂ in-ūi kiaⁿ Ka-lé, só͘-í khí kàu put-chí kian-kò͘ chām-gâm, chhin-chhiūⁿ phàu- tâi ê khoán-sit. Lâu sı̄ ēng thih-pán chò--ê, lāi-goā toā-sè kok-ūi ê chhèng chin-chē; phah-sǹg thong Tâi-oân ê chheⁿ-hoan khı̀ phah, iā bô iàu-kín. Khí hit-keng ê só͘-hùi lóng-chóng khai ū saⁿ sı̀ cha̍p-bān gı̂n, sı̄ tùi Hái-koan chhut--ê.

Goán tı̄-hia pài-gō͘ hioh chı̍t-jı̍t, hō͘ Chú-sū ê lâng hó-lé khoán-thāi. Pài-la̍k koè--lâi Hêng-chhun-koān. Koān- siâⁿ khí í-keng chhit peh nı̂ kú, kàu-taⁿ boē ū loā-chē lâng toà tı̄-hia. Tı̄-hia koè lé-pài. Pài-it chá-khí, khı̀ Ka-lé-chng. Hia-ê Ka-lé í-keng kui-hoà kúi- nā nı̂, chiông-tiong chē-chē-ê ē hiáu-tit kóng pe̍h-oē, iā chiàu-lē thı̀-thâu, iā ū chhù-the̍h, lāi-bı̄n bı̂n-chhn̂g, í-toh, oáⁿ-tı̍h-tū lóng piān; chóng-sı̄ iáu-boē ū lâng bat-jı̄. In hit-cho̍k, lâng kiò-chò Pâi-oân, khiok bô loā-chē lâng. Chiàu in kóng, in chham Āu-soaⁿ Ti-pún ê Ka- lé sı̄ siāng-cho̍k, hiàng-sı̂ ū pun-thiah; tı̄-hia ê lâng-gia̍h khah-chē. Iáu ū chı̍t-cho̍k hō-chò A-mı̂-á, sı̄ teh hō͘ in chhe- ēng; nā beh kiò i chò-kang, m̄-bián chhut-chı̂ⁿ hō͘ i. I ka-tı̄ lóng bô chèng- choh, kan-ta tùi Tn̂g-lâng lâi siu-cho͘, khı̀ chia̍h-ēng.

Goán khı̀, tāi-seng tùi Siau-má-lı̂ kàu Chi-la-soh; hia-ê thâu-lâng hō-chò Bûn- kiat. Goán tı̄-hia hō͘ i chhiáⁿ, iā tām- po̍h mı̍h sàng i. I put-chí hó khoán- thāi goán, chí-ū bô hoaⁿ-hí goán m̄ chham in chò-hoé chia̍h-chiú; in-ūi goán chai chit-ê chiú chin lı̄-hāi, koat- toàn m̄-hō͘ i chhiáⁿ. Kàu hit mê koè-- lâi Káng-kháu; hia-ê thâu-lâng hō-chò Kap-teng, kóng sı̄ Bûn-kiat ê bó-kū. Hit-mê ū chhoā cha̍p-goā-ê lâi tı̄-hia, chhiùⁿ-khek thiàu-bú, chiū-sı̄ hoaⁿ-hí goán khı̀ ê ı̀-sù. Goán iā ū gı̂m-si hō͘ in thiaⁿ, āu-lâi goá sūn ki-hoē kóng tō-lí. In tāi-ke tiām-tiām teh thiaⁿ; chit-ê Bûn-kiat ū chiong goá ê oē hoan-e̍k hō͘ in chai. In kóng tō-lí sı̄ hó, in ài thàn; in-ūi Tn̂g-lâng pek i tio̍h ho̍k-sāi kong- má-pu̍t, in put-chí m̄-ài, kóng sı̄ hiàng; mn̄g goán khoàⁿ ho̍k-sāi Siōng-tè tio̍h cháiⁿ-iūⁿ. Goán chiū kóng hō͘ in thiaⁿ; koè bı̂n-á-chá-khí iáu-boē khí-sin, Tong Sian-siⁿ iā sūn ki-hoē koh kā in kóng. Hit-sı̂ kóng bô loā-chē oē, in-ūi bô ki- hoē thang toà khah-kú; siūⁿ beh chheh sàng in, in to m̄-bat-jı̄, sı̄ bô lō͘-ēng. Kan-ta khó͘-khǹg in m̄-thang pài-pu̍t; iā ū chhiáⁿ in lâi Hú-siâⁿ. In kóng ǹg- bāng jı̄-goe̍h-kan ài-beh lâi; hit-tia̍p nā kàu, goán chiū thang khah siông-sè kà- sı̄ in. Goán teh siūⁿ, beh chhe lâng tiàm tı̄ in tiong-kan thoân tō-lí, khó-sioh put-chí khiàm-kang, in-ūi sin-siat ê só͘-chāi í-keng chē ūi; nā bô chhe lâng khı̀, iū kiaⁿ-liáu in chiām-chiām hō͘ lâng ín-iú khı̀ thàn khiàn-sńg pháiⁿ hong-sio̍k, kiám m̄ sı̄ sit-liáu ki-hoē? Chhiáⁿ ta̍k- ūi ê hiaⁿ-tı̄ in-ūi chit-ê tāi-chı̀ kiû Siōng- tè khui-lō͘; lán m̄-thang kan-ta siūⁿ ka- tı̄ tit-tio̍h kiù chiū hó, tek-khak tio̍h ài chèng-lâng tit-tio̍h kiù.

Goán pài-jı̄ e-hng kàu Chhia-siâⁿ; pài-saⁿ kàu Pang-liâu; pài-sı̀ kàu Tang-káng, lóng pêng-an.

(Tâi-lâm Hú-siâⁿ Kàu-hoē-pò, Tē 20 tiuⁿ, 1887 nı̂ 2 ge̍h)