Tı̄ hn̄g-hn̄g ê só͘-chāi
Goá ū thiaⁿ-kı̀ⁿ
Gín-á ê khàu-siaⁿ
Siaⁿ-siaⁿ ê pi-ai
Khàu bô hoaⁿ-hí ê sè-kài
Tı̄ lāu-jia̍t ê chhı̄-lāi
Goá ū khoàⁿ
Chhiū-á bô lâng ài
Chhiⁿ-âng-teng sı̀-kè chai
Ū chhia bô ba̍k-chiu
Lāu-lâng gín-á
Kiâⁿ koè ke-á-lō͘
Lóng-sı̄ kiaⁿ-hiâⁿ ê kha-pō͘
Tı̄ pò-choá tiān-sı̄
Goá ū thiaⁿ--kı̀ⁿ
Ū lâng leh toā-siaⁿ
Ū lâng chông khı̀ thiaⁿ
Biō-sı̄ ián-káng-thiaⁿ
Thiaⁿ bē-liáu ê hó oē
Hiàn hō͘ lán ê thó͘-tē
Hoat-su sèng-jı̂n bû-siōng-jı̂n
Chı̍t phiⁿ chı̍t phiⁿ ê boán-chiok
Chı̍t tiôⁿ chı̍t tiôⁿ ê an-ùi
Ùi chháu-tē kàu to͘-chhı̄
Goá ū khoàⁿ
Soán-kú chı̍t-piàn ko̍h chı̍t-piàn
Chhiáⁿ-kheh chia̍h-toh bō͘-khoán
Chı̍t-thoaⁿ koh chı̍t-thoaⁿ
Chiàn-pò soan-toân-toaⁿ
Chı̍t-tioⁿ chı̍t-tioⁿ
Pun hō͘ lán ê thô͘-kha
Tı̄ siū-siong ê thó͘-tē
Goá ū thiaⁿ--kı̀ⁿ
Choan-ka ha̍k-chiá
Kóng bı̂n-chú chèng-tı̄
Kóng kong-pêⁿ chèng-gı̄
Toā jı̂n-bu̍t
Pian ū-sǹg
Chē chı̀n-kháu-chhia chiok chhù-bı̄
Tóng-êng-sū-gia̍p chiok thàn-chı̂ⁿ
Ha̍p-hoat it-chhè lóng-sı̄
Thàu-chá kàu àm-mı̂
Lâi-lâi khı̀-khı̀
Hāng-boé ke-thâu
Ha̍k-seng-gín-á phāiⁿ chheh-pau
Khiâ kha-ta̍h-chhia
Hō͘ toā-lâng chài
Jı̍t..piàⁿ mı̂..piàⁿ
Hō͘ lâng chhiò su-tai
Tı̄ hn̄g-hn̄g ê só͘-chāi
Goá ū khoàⁿ
Chiap Má-chó͘ ngiâ hu̍t-gê
Jı̂n san jı̂n hái
Chò ū ı̀-gı̄ ê tāi-chı̀
Khah chē chı̂ⁿ to leh khai
Kóng sı̄ ē pó-pı̀
Kiáⁿ-sun hó io-chhı̄
Āu-tāi ū hok-khı̀
Ē pêng-an toā thàn-chı̂ⁿ
Tı̄ hn̄g-hn̄g ê só͘-chāi
Goá ū khoàⁿ
Tùi-bı̄n hoāⁿ phah hui-toâⁿ
Tiān-sı̄ mûi-thé ū lâng leh kóng
“Tû-lí chiú-sú chhú-chi thaⁿ”
Chia̍h chı̍t-sı̀-lâng Tâi-oân bí
Lim chı̍t-sı̀-lâng Tâi-oân chúi
Niá chı̍t-sı̀-lâng ê hok-lı̄
Kóng tio̍h Tâi-oân i tō oàn
Kam-goān khoàⁿ lâng phah Tâi-oân
Tı̄ hn̄g-hn̄g ê só͘-chāi
Goá ū thiaⁿ--kı̀ⁿ
Bí-kok tńg--lâi ê phok-sū toā-koaⁿ-hó͘
Chiap hu̍t-gê ngiâ Má-chó͘
Pò-choá tiān-sı̄ toā-siaⁿ pūi
Kóng tāi-su ū tı̀-hūi
Kóng chong-kàu hó chû-pi
Khí-chhù hō͘ lâng khiā
Ba̍k-chiu kim-kim
Khoàⁿ lâng beh thun beh chia̍h
