Tı̄ koa-siaⁿ ê tiong-kan lâi sio-tú

Múi chı̍t-ê bı̂n-cho̍k lóng ū sio̍k-tı̄ i ka-kı̄ ê bı̂n-iâu, in-ūi múi chı̍t-ê bı̂n-cho̍k lóng bat tı̄ chı̍t-tè thó͘-tē seng-oa̍h koè. Tng pē kong ê hoeh-koāⁿ tih-lo̍h chhân-thâu, tng a-bú ê ba̍k-sái lâu-jı̍p khe-kau, tı̄ hit-tè thó͘-tē siⁿ-chiâⁿ ê san-hô, í-keng chiâⁿ-chò ū kám-chêng ê ho͘-hoàn ê san-hô, tı̄ hit-tè thó͘-tē hoat-seng ê kò͘-sū, í-keng chiâⁿ-chò ū sı̀ⁿ-miā ē kóng-oē ê le̍k-sú. Le̍k-sú khek-tı̄ san-hô, san-hô liû-thoân kò͘-sū, kò͘-sū kiâⁿ-koè sim-lêng, hoà-chò chı̍t-lia̍p chı̍t-lia̍p ū hoeh, ū ba̍k-sái ê im-hû, hō͘ tāi-tāi kiáⁿ-sun tı̄ koa-siaⁿ ê tiong-kan lâi sio-tú. Tâi-oân sı̄ chı̍t-tè thó͘-tē, bat ū chin-choē lâng tı̄ chia toà koè, ū sim lo̍h-tē ê lâng, ē thiaⁿ-tio̍h le̍k-sú teh kóng-oē, bô sim siⁿ-kin ê lâng, éng-oán sı̄ koè-lō͘ ê lâng-kheh. Lâng-kheh! Hoan-gêng jı̍p-lâi chē! Chóng-sı̄, pài-thok lè, mài thè goán chhut chú-ı̀ kóng toā-siaⁿ oē, goán koh khah gōng, koh khah han-bān mā ē-hiáu liāu-lí ka-kı̄ ê ke. Kiám bô thiaⁿ kó͘-chá lâng teh kóng: “Jı̂n-chêng sè-sū nā put-ti, thiaⁿ lâng cháiⁿ-iūⁿ liām koa-si”, “Poe-té m̄-thang chhı̄ kim-hı̂”, “Saⁿ-pō͘ chu-lūi”, “Su-siang-ki”, “Ióng-kám ê Tâi-oân lâng”, ū chı̍t-jı̍t “Lán beh chhut-thâu-thiⁿ”. (Tâi-oân Kàu-hoē Kong-pò tē 2076 kı̂, 1991 nı̂, 12 goe̍h)

(Gân Sı̀n-seng Tâi-gí Bûn-ha̍k soán, 2002 nı̂ Chin-pêng Khı̀-gia̍p Chhut-pán)