Chiū án-ni an-bı̂n?
Chı̍t-chhíⁿ kàu éng-oán?
Sè-chiūⁿ tit boē-tio̍h ê hok-khı̀,
Taⁿ lı̂m-kàu sin-piⁿ?
M̄-káⁿ kı̂-tó ê an-jiân,
Chiong-kui-boé ū èng-ún?
Goá ê jı̂n-seng chhin-chhiūⁿ bû-kı̂ tô͘-hêng,
Chhiú-khàu ê tāng-tàⁿ hō͘ goá thı̂-khàu bô-thêng.
Sí-bô ná-chún to̍k-it ê siám-pı̄,
Tı̄ kaⁿ-lô bô-khùn ê àm-mı̂,
Kúi-nā-pái goá siuⁿ-bô oa̍h--teh ê ı̀-gı̄.
Beh-oa̍h á-sı̄ m̄-oa̍h?
Hám-liat ê oē o͘-àm-tiong pō͘-pō͘ kūn-oá.
Bong to-pı̀ⁿ ê poàⁿ-mı̂,
Goá ta̍uh-ta̍uh pek-mn̄g ka-kı̄,
Sı̄ cháiⁿ-iūⁿ chhiú-kut phı̍h-phı̍h-chhoah?
Sı̄ tùi sí ê kiaⁿ-hiâⁿ, iâⁿ-koè tùi siⁿ ê chhiah-ia̍h?
Kan-ta chı̍t-to, koat-ı̀ ê chı̍t-to,
Só͘-ū ê khó͘-thàng chek-sı̂ koah-lı̄,
Tùi jio̍k-thé ê sok-pa̍k tháu-pàng ka-kı̄.
Sı̄ cháiⁿ-iūⁿ iû-chāi to-á lak--lo̍h?
Sı̄ tùi m̄-chai ê sè-kài ê tiû-tû?
Á-sı̄ kam-goān koh choè kaⁿ-siû?
Chhoē-bô kái-tap ê sı̂-khek,
Chı̍t-ê thiⁿ-sài poe kàu goá ê bı̄n-chêng.
“Í-keng boē sái-tit thoa lah.”
I kā goá siang-chhiú ê chhâ-kê kòng-phoà,
Giú goá ê chhiú poe kàu thiⁿ-téng.
Goá pı̀ⁿ-chiâⁿ choè chı̍t-lia̍p khang-pak ê chháu-chí,
Tı̄ bô chı̄n-pōng ê khong-kan poe-lâi poe-khı̀.
Iā chhin-chhiūⁿ chı̍t-tih hái-chúi,
Tı̄ sı̂-kan ê kńg-lê-á-éng--nih tńg-se̍h khoàⁿ bô-tio̍h té.
Che chiū-sı̄ sí-āu ê ke̍k-lo̍k?
Choa̍t-tùi ê chū-iû?
Chia chiū-sı̄ thian-kok?
Goá hō͘ kú-lu kú-lu ê siaⁿ khip-ín,
Sı̄ hoan-sàng goá ê an-hûn-khek?
Kú-kú í-chêng thiaⁿ--koè,
Tùi bú-thé ê chhim-khiⁿ thoân--lâi,
Goân-sí chhin-chhiat ê ho͘-kiò?
Tu̍t-jiân goá thiaⁿ-tio̍h gín-á ê khàu-siaⁿ,
Oaⁿ-á, oaⁿ-á, oaⁿ-á,
Se̍k-se̍k iù-iù ê siaⁿ chhui-pek goá ê bú-sèng,
Hō͘ goá m̄-kam koh sim-būn.
“Chhiáⁿ lí ún-chún goá tò-tńg.”
Goá chhun-chhut siang-chhiú khún-kiû,
“Hō͘ goá tò-tńg-khı̀ goân-lâi khiā-khí ê só͘-chāi.”
Thiⁿ-sài bô ı̀n poàⁿ-kù, chiū the̍h chhâ-kê khàu goá ê chhiú.
I chhut-la̍t e,
Goá it-tı̍t lak, it-tı̍t lak,
Tok-to̍k tok-to̍k ê chiat-chàu,
Chhin-chhiūⁿ chhiⁿ-sı̂n sio-chông ê po̍k-chà,
Tı̄ goá ê siang-pêng pōng bô-soah.
------ -----
Nāu-cheng teh hiáng,
Goân-lâi í-keng thiⁿ-kng,
Kap chā-hng kāng ê sı̂-khek cheng-sı̂n,
Thâu-chı̍t-pái,
Goá ê sim ū chheng-chhíⁿ ê kám-siā.
