Tı̄ tē-bı̄n-ē chò kang

 Tı̄ tē-bı̄n-chiūⁿ in-ūi lâng siông-siông ēng chhâ sı̄ ná-kú ná-khoeh. Hó-tit, tı̄ tē-bı̄n-ē Siōng-tè ū pı̄-pān thô͘-thoàⁿ. Chit-ê thô͘-thoàⁿ goân-pún sı̄ chhiū-ba̍k, āu-lâi hoà-khı̀ kiat chò tēng-tauh ê mı̍h. 
 Thô͘-thoàⁿ sı̄ thia̍p chı̍t-chân chı̍t- chân. Ū-sı̂ hiah chân ê siang-thâu-boé ū khiau-khí lō͘-chhut tı̄ tē-bı̄n, nā-sı̄ hit- ê lō͘-hiān ê thô͘-thoàⁿ khah-siông sı̄ khah hā-téng, ē-té sı̄ khah-hó, só͘-í lâng ài khui thán-khiā ê hām ku̍t hit-ê siōng- téng--ê. Kàu hām-té ū khui thán-hoâiⁿ ê toā-lō͘; koh, tı̄ toā-lō͘ ê piⁿ-á ū khui hāng-á. Lóng sı̄ àm-bong-bong. Siāng-chhim ê thô͘-thoàⁿ-khòng sı̄ saⁿ-pah-goā tn̄g. Ū-sı̂ hiah-ê thán-hoâiⁿ ê lō͘ ū chhut tı̄ hái-té ê ē-té. Tı̄ lán Tâi-oân ê pak-sı̀ ê Ke-lâng-thâu ū thô͘-thoàⁿ-khòng. 
 In-ūi thô͘-thoàⁿ-khòng sı̄ chhim, hong- khı̀ oh-tit jı̍p, só͘-í lâng khah-siông ū ke- khui koh chı̍t-ê hām tı̄ toā-lō͘-bé, chiū tı̄ chit-pêng ê hām-kha ū khí toā-hoé beh ín hit-pêng ê khı̀ tùi chia kek--khí-lâi. Án-ni-seⁿ sı̄ hō͘ hit-ê khòng-lāi thang khah thong-hong. Thâu-chı̍t-ê khui ê hām sı̄ hō͘ lâng kap mı̍h chiūⁿ-lo̍h ê lō͘, sı̄ hō-chò lo̍h-hām. Hit-pêng sio-hoé--ê sı̄ hō-chò khí-hām. 
 Ku̍t thô͘-thoàⁿ ê kang sı̄ chin gûi- hiám. Thang hun-pia̍t saⁿ toā-hāng: 
 (1) Lâng nā beh chiūⁿ-lo̍h hām chiū tio̍h ta̍h tı̄ tháng-lāi hō͘ téng-bı̄n ê chhia chiūⁿ-khí lūi-lo̍h. Ū-sı̂ pa̍k-tháng ê thih-liān ē tn̄g hō͘ lâng tǹg--sí. 
 (2) Khòng-lāi ū kúi-nā iūⁿ ê to̍k-khı̀. Siāng-hiám--ê hō-chò hoé-khı̀. Phı̀-jū thô͘-khut-té ū chhiū-ba̍k ê mı̍h teh noā tı̄ lāi-bı̄n, lâng nā ēng koáiⁿ-á tu̍h--lo̍h-khı̀ kiáu-lā hit-ê thô͘-moâi chiū ū puh kóng-á khí-lâi. He chúi-kóng-á lāi ê khı̀ chiū-sı̄ hoé-khı̀. Hoé-khı̀ put-chí gâu to̍h, iā teh to̍h ê sı̂ ài pia̍k. Án-ni- seⁿ, lâng tı̄ khòng-lāi m̄-thang ēng pêng- siông ê teng-á. Lâng nā ni chı̍t-ki tâng-chiam kap chı̍t-ki sio-khı̀ khah-khoài thàu-koè tâng-chiam. Só͘-í lán thang chai ū mı̍h gâu ín sio-khı̀, ū mı̍h khah-bān ín. Khòng-lāi ê hoé-khı̀ nā tú-tio̍h jia̍t kàu-gia̍h-toā chiū pia̍k, nā bô chiū bē. In-ūi án-ni ku̍t thô͘-thoàⁿ ê sai-hū ū chiong iù-iù ê tâng-lô pau i-ê teng, chiū teng-lāi to̍h ê hoé ê jia̍t nā kàu tı̄ hit tâng-lô, tâng-lô ē ín i sı̀-soàⁿ, só͘-í goā-bı̄n ê hoé-khı̀ nā tú-tio̍h hit-ê tâng- lô chiū jia̍t bô kàu-gia̍h-toā thang hō͘ i pia̍k-phoà.
 (3) Ū-sı̂ tı̄ khòng-lāi chúi-choâⁿ chhiong--chhut-lâi, ia̍h ū-sı̂ piⁿ-á kap téng-koà ū pang--lo̍h-lâi. Ūi-tio̍h chiah-ê hong-hiám ê sū-chêng chē-chē lâng bat siū toā-hāi. 
 Ū chı̍t-jı̍t ū nn̄g-ê ku̍t thô͘-thoàⁿ ê sai- hū tı̄ khòng-lāi. Chı̍t-ê iáu-boē chhoā- bó͘, sı̄ sı̀n Iâ-so͘ ê lâng. Koh chı̍t-ê ū bó͘-kiáⁿ, ū khoàⁿ-khin kiù-sè ê chin-lí, ia̍h ū oàn-hı̄n i saⁿ-kap chò kang ê phoāⁿ. Tng hit-jı̍t hit nn̄g-lâng teh tiàm tı̄ lo̍h-hām-kha ê ūi. Sı̀n Chú ê sai-hū hut-jiân khoàⁿ-kı̀ⁿ téng-bı̄n ê só͘-chāi teh pang--lo̍h-lâi ia̍h toā-chúi beh lâu chhut- lâi. I chai sı̄ toā hong-hiám, koh bô- loā-kú ē teh in lóng sí. Sı̂ ū kàu thang ka-tı̄ cháu poâⁿ-jı̍p tı̄ tháng-lāi kiò téng- bı̄n ê lâng kín-kín chiūⁿ i khí-lâi. Teh-beh chò án-ni i siūⁿ i-ê tùi-te̍k iáu-boē ū chiap-la̍p Iâ-so͘, ia̍h ū bó͘-kiáⁿ, só͘-í pek i tio̍h koáⁿ-kín kiù i-ê sı̀ⁿ-miā. I sûi-sı̂ thàn i-ê hó-phoāⁿ ê oē thoat-lı̄ chai-ē. Sı̀n Chú ê lâng siū sí. 
 Lán bat oàn-hı̄n Iâ-so͘ chò I-ê tùi-te̍k. Tng I tı̄ sè-kan ū ki-hoē thang kiù ka-tı̄. Chóng-sı̄ bô. I hoaⁿ-hí siū-sí kiù lán. Lán eng-kai tio̍h siàu-liām I-ê toā-in, o-ló I bô soah. 

(Tâi-lâm Hú-siâⁿ Kàu-hoē-pò, Tē 101 koàn, 1893 nı̂ 9 ge̍h)