T K C Lô-má-jı̄ Chhui-hêng Pō͘-hoē Tiû-pı̄ Úi-oân-hoē

Chit-pang T. K. C. Hā-lēng-hoē, ū tit-tio̍h Gı̄-tiúⁿ í-kı̍p Tiû-pı̄ Úi-oân-hoē ê hó-ı̀, ū te̍k-pia̍t khui koan-hē Lô-má-jı̄ ê chı̍p-hoē 3 pái, hō͘ lán thang chai Tân Gı̄-tiúⁿ, í-kı̍p Tiû-pı̄ Úi-oân-hoē ê chu-ūi sian-siⁿ ū “Sian-kiàn chi bêng.” Tı̄ chit 3 pái thó-lūn-hoē ê kiat-kó, Lô-má-jı̄ sı̄ tùi Tâi-oân Kàu-hoē ê chiong-lâi chin ū tiōng-iàu-sèng, só͘-í tio̍h ài tı̄ T. K. C. ê lāi-bı̄n cho͘-chit Lô-má-jı̄ Chhui-hêng Pō͘-hoē. (Siông-sê chhiáⁿ khoàⁿ Táng Kàu-siū só͘ pò--ê). In-ūi beh èng chit ê siaⁿ ê koan-hē, tı̄ 7 ge̍h 30 jı̍t 13 tiám, tı̄ Tâi-lâm Sı̂n-ha̍k-iⁿ ê káng-tn̂g, ū khui T. K. C. Lô-má-jı̄ Chhui-hêng Pō͘-hoē Tiû-pı̄ Úi-oân-hoē. Chit ê pō͘-hoē ê chú-chí sı̄: 1. Tı̄ choân Tâi ê kàu-hoē chhui-hêng Lô-má-jı̄ ê kàu-io̍k, hō͘ hoān-nā sio̍k tı̄ Tâi-oân Ki-tok Tiúⁿ-ló Kàu-hoē ê lâng, bô chı̍t lâng boē-hiáu tha̍k keng, si. 2. Kè-oē beh hoat-hêng choân-bûn-tek, it-poaⁿ-tek, jı̂-tông-tek ê Lô-má-jı̄ chheh, thang chò T. K. C. Bûn-khò͘. Cho͘-chit sı̄ tùi kok Tiong-hoē chhui-chiàn N̄g miâ í-siōng ê tāi-piáu lâi kiat-sêng chit ê Pō͘-hoē. Hit ê pō͘-oân chhin-chhiūⁿ ē-bı̄n: An Bō͘-lí, Bêng Iú-tek, Chhı̂ Bêng-hong, Gô͘ Iāu-bêng, Keh Hô-lia̍t, Khu Thian-teng, Khó͘ Iú-châi, Lí Ngá-kok, Lı̂m Chong-gı̄, Lı̂m Kok-hông, Loā Ní-thui, Lū Jı̂n-tek, N̂g Chiong-hui, Niû Siù-tek, Siau Bêng-chiok, So͘ Thian-bêng, Tân Chheng-tiong, Tân Kong-hui, Tân Tiâu-kéng, Táng Tāi-sêng (Pō͘-tiúⁿ), Tēⁿ Jı̂-gio̍k (Su-kı̀), Tēⁿ Liân-khun. Chit ê chı̍p-hoē sı̄ Tiû-pı̄ Úi-oân-hoē ê koan-hē, boē tit thang sûi-sı̂ choè T. K. C. ê pō͘-hoē. M̄-kú hit-sı̂ ū tit-tio̍h Tân Gı̄-tiúⁿ ê hó-ı̀, beh iōng phoe chhéng-mn̄g Chóng-hoē T. K. C. (í-keng thong-koè, Ed) Pō͘-hoē, ū kè-ūi beh pài-thok Lâm, Pak lióng Sı̂n-ha̍k-ı̄ⁿ ê kàu-siū, í-kı̍p kı̂-thaⁿ ê lâng siá choē-choē ê goân-kó. Ǹg-bāng sio̍k tı̄ Tâi-oân Kàu-hoē ê hiaⁿ-ché, lín nā ū hó ê goân-kó, pài-thok lín bô sè-jı̄ kià khı̀ hō͘ Tâi-pak chhı̄, Tiong-san lâm-lō͘, Tâi-oân Tāi-ha̍k I-ha̍k-ı̄ⁿ Seng-hoà-ha̍k kàu-sek, Táng Tāi-sêng Kàu-siū. I oē kap Bêng Bo̍k-su liân-lo̍k thang lâi hoat-khan. Ǹg-bāng tha̍k Pò ê hiaⁿ-ché, nā ū lâng te̍k-pia̍t tùi Lô-má-jı̄ ū chhù-bı̄, á-sı̄ ı̀-kiàn ê sı̂, chhiáⁿ m̄-thang sè-jı̄, kap Tēⁿ Jı̂-gio̍k (Tâi-lâm-koān Tang-chio̍h-khu Pò͘-tē Ki-tok-kàu Hok-im-tn̂g) liân-lo̍k. (Tâi-oân Kàu-hoē-kong-pò tē 731 kı̂, 1949 nı̂ 11 ge̍h)