Talk abo͘t my job

Tı̄ pó͘-sı̍p-pan khang-khoè mā chha-put-to poàⁿ-tang--a, goá sı̄ kà gín-á Eng-gí hām kok-tiong Eng-bûn. Goá toà ê pó͘-sı̍p-pan ū sı̀-ê hun-pò͘; goá sı̄ sin-lâng ê koan-hē, só͘-í sı̀-ê só͘-chāi lóng ài cháu. Ū nn̄g-ê hun-pò͘ tı̄ Hōng-soaⁿ , nn̄g-ê tı̄ bêng-chheⁿ hāu-khu, ē-sái chin kán-tan tō hoat-kak tio̍h chit nn̂g-ê só͘-chāi ê bô-kâng. Hōng-soaⁿ hia ê pē-bú toā-pō͘-hūn sı̄ chò seng-lí--ê, bē chia̍h--ê, chhēng--ê, iōng--ê, goá koh ū chı̍t-ê ha̍k-seng in tau sı̄ khui sı̂n-toâⁿ--ê, hōng-sāi Sam-thài-chú. Hōng-soaⁿ ê pē-bú kā gín-á kau hō͘ pó͘-sı̍p-pan , ǹg-bāng gín-á tio̍h tha̍k-chheh, m̄-koh in bô-êng thang koan-sim gín-á ê sêng-chek, siūⁿ kóng gín-á nā tha̍k ē khí--lih tō kè-sio̍k tha̍k; bô, mā bô iàu-kín--ê, sı̄ khah siau-ke̍k ê pē-bú. In ê gín-á mā khah bô tiōng tha̍k-chheh, kóng khah tı̍t-chiap--ê, tō-sı̄ khah bô-ài tha̍k-chheh. Tùi gún lâi kóng, gín-á mā khah pháiⁿ kà. Nā tı̄ bêng-chheⁿ ha̍k-khu hia ê pē-bú tō bô-kâng--lo͘h, hia ê pē-bú chin chē sı̄ office worker (siōng-pan-cho̍k), chin tiōng gín-á ê sêng-chek hām kàu-io̍k, gín-á chū sè-hàn tō sàng pó͘-sı̍p-pan , m̄-chiah hia ê pó͘-sı̍p-pan chiok chē, mā chin kēng-cheng. Goá ū chı̍t-ê tı̄ Hōng-soaⁿ teh tha̍k kok-tiong ê ha̍k-seng, in tau kan-taⁿ ma-ma teh thàn-chı̂ⁿ, chhù--nih ê keng-chè chiâⁿ ngā-táu, ha̍k-hùi tiāⁿ bān-kau, m̄-koh i chin jı̄n-chin, kok-tiong chiah khai-sí chiap-chhiok Eng-bûn, i ê thâu-khak sui-bóng bô cheng-kong, m̄-koh chin khéng tha̍k, chı̀n-pō͘ chin chē. Choè-kı̄n soah ūi-tio̍h chı̂ⁿ ê būn-tê, chhù--nih ê tiān-oē hông ka-tn̄g, pó͘-sı̍p-pan mā bô hoat-tō͘ lâi--a. Goá kám-chhiok chin chhim. Lâng tı̄ siā-hoē ê kai-kip sı̄ án-choáⁿ tio̍h-ài chiah bô kong-pêⁿ, lóng pa̍t-lâng teh kā lán hun-lūi? Ka-têng ê in-sò͘, éng-hióng tio̍h gín-á ê kàu-io̍k, soà--lo̍h-lâi tō-sı̄ sio-liân-soà bô kong-pêⁿ thāi-gū ê khai-sí. (TGB Thong-sı̀n tē 65 kı̂, 2005 nı̂ 2 goe̍h)