Pêng-iú, Lí bat chia̍h koè tang-hún--bô? pe̍h-pe̍h iù-tiâu iù-tiâu ná mı̄-soàⁿ, kim-ku̍t kim-ku̍t koh sió-khoá thang-kng thang-kng, kài-sêng bí-hún, chia̍h--khí-lâi khiū-khiū núi-núi, ku̍t~1-ē thun lo̍h-âu, hit-chióng chu-bı̄ thong lâng chai.
Nā kóng-tio̍h tang-hún liāu-lí, tang-hún gô-bah, tang-hún ah-bah, iah-sı̄ tang-hún jiû-hı̂-keⁿ lóng hō͘ lâng lâu chhùi-noā, iáu-ū tang-hún-thng, tang-hún-pau, lóng-sı̄ hó thng-thâu ē-sái-chit chia̍h kah pá. Tn̄g-tio̍h koâⁿ-thiⁿ sı̂, chia̍h hoé-ko, khǹg chē tang-hún chò chhài-té, pau-niá Lí ē chia̍h kah pak-tó͘ mo͘h-leh it-tı̍t so, pá-tong-tong koh bē ùi.
Lēng-goā beh pò lín 1 chióng liāu-lí, “chhá-tang-hún”, bat chia̍h--koè-ê ê lâng it-tēng o-ló kah tak-chhùi-chı̍h. Tı̄-chia sūn-soà kà lín án-choáⁿ chhá-tang-hún. chhá-tang-hún, tio̍h chham bah-si, hiuⁿ-ko͘, tong-hê, bo̍k-ní, koh lām 1-koá chheⁿ-chhài, tāu-chhài iah-sı̄ ko-lê-chhài lóng-chóng hó. beh chhá chı̀n-chêng, seng kā chia-ê chham-liāu khiàn-phang chhá-se̍k, jiân-āu hē 1-sut-á chúi, chhá--khí-lâi chiah bē siuⁿ-ta pháiⁿ lo̍h-âu, sûi-āu chiah kā sé-hó ê tang-hún ka-ka chián-chián chò khah té-chat--leh, khǹg lo̍h-khı̀ tiáⁿ-lāi sûi-sı̂ iân-lō͘ chhá, iân-lō͘ lāng, bián goā-kú, phang-kòng-kòng, khiū-teh-teh ê chhá-tang-hún, í-keng ē-sái-chit chhoân kàu toh-téng, pó-chèng Lí chia̍h 1 oáⁿ liáu-āu beh koh té, nā-sı̄ tn̄g-tio̍h pak-tó͘ tng-iau ê sı̂-chūn, soah bē-kı̀-tit beh ngeh-chhài to ē--o͘.
Chiah-nı̍h hó-chia̍h ê tang-hún, án-choáⁿ chè-chō--ê, Lí kám-chai? tàu-té sı̄ tang-thiⁿ ê tang-hún, iah-sı̄ Tiong-kok Soaⁿ-tang-lâng chò ê Tang-hún? chhiáⁿ lín ta̍k-ê thiaⁿ goá kóng khoàⁿ-māi.
Tang-hún ê goân-liāu sı̄ le̍k-tāu, le̍k-tāu tio̍h seng chı̀m-chúi chı̀m hō͘ nńg, chiah kā e hō͘ iù, chhin-chhiūⁿ e tāu-leng án-ni, e-hó tio̍h koh hiâⁿ hō͘ kún, hiâⁿ-kún chú-se̍k liáu-āu chiah koh koè-lı̄, kā tāu-phoh lı̄-tiāu, kā chúi-hun lı̄-ta, tiō pı̀ⁿ-chiâⁿ chhiūⁿ chò âng-ku-koé ê koé-chhè án-ni. soà--lo̍h-khı̀ kā le̍k-tāu-chhè iōng ki-khı̀ thiu-si, toā-tiâu sè-tiâu khoàⁿ sán-phín ê siat-kè, thiu-si liáu-āu, tiō 1 koāⁿ 1 koāⁿ kā khe̍h-jı̍p-khı̀ léng-tòng-khò͘, léng-tòng kàu lêng-hā 18 tō͘ C, tang-hún-chhiáng ê thâu-ke kóng, che tiō-sı̄ chò tang-hún kap chò mı̄-soàⁿ, tāu-chhiam, toā-mı̄ bô-kāng ê só͘-chāi, bô keng-koè léng-tòng ê koè-thêng, tang-hún-si (tiâu) ē kiap-kiap chò-hoé, án-ni tiō bô-chhái-kang, só͘-í tang-hún-chhiáng ê si-siat kùi tı̄ léng-tòng-khò͘ ê khai-siau, léng-tòng koè-thêng nā sūn-sı̄, chò-chiâⁿ ê tang-hún chiah ē 1-tiâu 1-tiâu, 1-si 1-si.
Ùi léng-tòng-khò͘ léng-tòng chhut--lâi ê tang-hún, chiah koh keng-koè khan-só͘, hang-ta, tiō ē-sái-chit pau-chong chhut-hoè. che sı̄ chit-má ê ki-su̍t, kó͘-chá sı̂-tāi, tiō bô chiah khoài-sok hong-piān.
Koè-khı̀ bô léng-tòng ki-su̍t, chò tang-hún tiō khoàⁿ thiⁿ-khı̀, Tiong-kok tang-pak só͘-chāi, thiⁿ-khı̀ koâⁿ-sih-sih, in tiō-sı̄ lı̄-iōng koâⁿ-thiⁿ sı̂ kā tang-hún iōng peng-kak léng-tòng, thèng-hāu jı̍t-thâu khah sio-lo̍h chiah lâi pha̍k tang-hún, m̄-kú in bô kóng tang-hún, in lóng kóng chò hún-si. āu--lâi, ū Tiong-kok-lâng lâi kàu Lán Tâi-oân, tiō ū chı̍t-koá Soaⁿ-tang lâng keng-êng hún-si kang-chhiáng, in tiō kā sán-phín kiò-chò hún-si, mā ū lâng kap Tâi-oân-lâng tàu-tı̄n 1 ē kú, sūn-èng Tâi-oân-lâng ê ı̀-sù, kāng-khoán kóng-chò tang-hún.
Kó͘-chá tang-hún sı̄ tang-thiⁿ chiah ū leh chò ê chia̍h-mı̍h, m̄-sı̄ Soaⁿ-tang-lâng chò ê soaⁿ-Tang-hún, sui-jiân chhı̄-bı̄n-siōng mā ū Soaⁿ-tang-pâi ê tang-hún, he sı̄ phín-pâi miâ, m̄-thang gō͘-hoē gō͘-kái khı̀, bô-kāng ê só͘-chāi, bô-kāng ê bûn-hoà, tong-jiân ū bô-kāng ê hō-miâ hâm-ı̀, “kok-iú chhian-chhiu”, Tiong-kok-lâng hō ê miâ ū ngá-khı̀, Lán Tâi-oân-lâng hō ê miâ mā chin kah-bı̄.
Kóng kàu chia, sūn-soà kóng jı̍t-pún-lâng ê tang-hún kiò siáⁿ-mı̍h? “chhun-ú“, tiō-sı̄ chhun-thiⁿ lo̍h-hō͘ ê ı̀-sù, án-choáⁿ kóng? Jı̍t-pún-lâng chò tang-hún, kāng-khoán su-iàu tı̄ koâⁿ-thiⁿ iōng peng léng-tòng, tı̄ chhun-thiⁿ thiⁿ-khı̀ sio-lo̍h ê sı̂, chiah koāⁿ-koāⁿ chhut-lâi pha̍k jı̍t-thâu, 1 sı̂-kan, pha̍k tang-hún ê toā-tiâⁿ, tek-ko téng 1-koāⁿ 1-koāⁿ ê tang-hún-si (tiâu), kài-sêng tı̄-leh lo̍h mn̂g-mn̂g-á hō͘, “chhun-ú, chhun-hō͘” chit-khoán kéng-tı̀, kám m̄-sı̄ chin ū si-jı̂n ê khı̀-chit!
Tang-hún, iah-sı̄ hún-si? Iah-sı̄ “chhun-ú”? kám ū-lâng siūⁿ-tio̍h Tâi-oân-lâng hō-miâ ê goân-ı̀? Tâi-oân-lâng ê khı̀-chit tı̄ toeh? Tâi-oân-lâng beh ū khı̀-chit, it-tēng tio̍h iōng Tâi-oân-lâng ê koan-tiám, iōng Tâi-oân-lâng ê oē-gí, chiah ē-tàng piáu-ta̍t chhut Tâi-oân-lâng ê goân-bı̄, koáⁿ-kín lâi o̍h Tâi-gí-bûn, iōng ka-kı̄ ê goân-im, iōng ka-kı̄ ê khùi-kháu, keng-koè bûn-ha̍k ê chhú-lí, kiàn-lı̍p Tâi-oân-lâng ko-ngá ê phín-chit.
Kám-siā Chhân-tiong “Thài-pin khı̀-gia̍p kong-si “ thâu-ke Gân--sian-seⁿ thê-kiong chè-chō tang-hún ê koè-thêng, kap Tâi-oân-lâng kā tang-hún hō-miâ ê iû-lâi, hō͘ Lán liáu-kái bô-kāng kok-tō͘ ē sán-seng bô-kāng bûn-hoà ê lāi-hâm.
