Le̍k-ài m̄ sı̄ thiàⁿ-thàng
Chāi-chá Chi-ná hun choè Lia̍t-kok ê sı̂, Chhó͘-kok Kiong-ông kap Chı̀n-kok Lē-kong tı̄ Ian-lêng ê só͘-chāi kau-chiàn; Chhó͘-peng toā pāi, Kiong-ông chı̍t ba̍k tio̍h siong. I niá peng ê chóng si-lēng-koaⁿ miâ kiò Chú-hoán, sim-lāi put-chí hoân-ló. M̄-kú i chı̍t ê phiah chin m̄ hó, chiū-sı̄ ài chia̍h chiú; nā chia̍h chiú chiū khùn kui-mı̂ kui-jı̍t; in-ūi chhut-kun, só͘-í kı̀m chiú. I ū chı̍t ê lô͘-po̍k, miâ Iông-kok, put-chí gâu khoán-thāi i, chin gâu thiàⁿ i ê chú-lâng, khoàⁿ-kı̀ⁿ Chú-hoán hoân-ló kàu án-ni, siūⁿ i pêng-sò͘ ài chia̍h chiú, chiū phâng chı̍t toā au, tng chèng lâng ê bı̄n-chêng phiàn i kóng sı̄ tê. Chú-hoán chı̍t-ē phı̄ⁿ chiū chai-kiò sı̄ chiú; chiū siūⁿ, Che sı̄ Iông-kok thiàⁿ goá, só͘-í chhòng chiú phiàn kóng sı̄ tê, lâi hō͘ goá chia̍h. I chiū kā i lim-lo̍h-khı̀, koh kiò phâng tê lâi. Iông-kok iû-goân chiong chiú hō͘ i; bô siūⁿ chı̍t au kè chı̍t au; chia̍h-liáu soà toā chùi, tó tı̄ tiùⁿ-pı̂ⁿ lāi, khùn kàu put-ti thian-tē. Chhó͘ Kiong-ông siūⁿ keh jı̍t beh koh kap Chı̀n-kok kau-chiàn; chiū chhe lâng khı̀ chhiáⁿ Chú-boán lâi chham-siông; siáⁿ chai Chú-hoán chiú-chùi ná sí chı̍t poaⁿ-iūⁿ. Chiū siūⁿ ka-kı̄ iā tio̍h-siong, choan khò Chú-hoán chı̍t lâng; taⁿ I án-ni, beh thài oē koh kau-chiàn tit? Ko͘-put-chiong thàu mı̂ thiu peng tò-khı̀. Chiū chiong Chú-hoán kau-thok chı̍t ê chin gâu cho̍h-chı̀ⁿ, miâ kiò Ióng Iû-ki, lâi pó-hō͘ I, kiaⁿ-liáu hō͘ Chı̀n-kok lia̍h khı̀, chiū chin lêng-jio̍k. Kàu keh-jı̍t ê jı̍t beh tàu, Chú-hoán chiú-chùi cheng-sı̂n, chiah chai chiah-ê tāi-chı̀, chiū kóng, Iông-kok hāi goá, Iông-kok hāi goá; goá thài ū bı̄n thang koh kı̀ⁿ goá ê ông? Chiū ka-kı̄ chū-chı̄n lâi sí.
Chiàu án-ni khoàⁿ, Chú-hoán ê lô͘-po̍k Iông-kok, phâng chiú hō͘ Chú-hoán chia̍h ê sı̂, pèng bô poàⁿ tiám beh hāi Chú hoán ê ı̀-sù ;put-kò in-ūi Chú-hoán pêng-sò͘ ài chia̍h chiú, só͘-í chiong chiú hō͘ i chia̍h, ài tit i hoaⁿ-hí, sǹg-sı̄ chhut tı̄ thiàⁿ-thàng ê sim; bô liāu Chú-hoán kèng-jiân in-ūi án-ni lâi gō͘ toā-sū, soà liáu sı̀ⁿ-miā. Hiān-sı̂ ê pêng-iú siông-siông khǹg lâng chia̍h-hun lim-chiú, kiám m̄-sı̄ iû-goân chhut tı̄ hó-ı̀? M̄-kú āu-lâi in-ūi hit ê lâng soà tiâu hun boē koé-tit, tı̀-kàu kheng-ka tōng-sán; á-sı̄ in-ūi chiú-chùi; lâi lāu chhut tāi-chı̀, kiám m̄ sı̄ hó-ı̀ pı̀ⁿ chiâⁿ pháiⁿ-ı̀ lah? Só͘-í chin sim thiàⁿ pêng-iú ê, lóng tio̍h chhut tı̄ jı̂n-ài, m̄-thang chhut tı̄ le̍k-ài, nā sı̄ le̍k-ài, chiū bô sǹg sı̄ chin thiàⁿ-thàng. Chim-giân ū kóng, “Thiàⁿ kiáⁿ-jı̂ ê, chiū-sı̄ hāi kiáⁿ-jı̂, ” iā sı̄ chit ê ı̀-sù.
Káu ok liân-lūi chiú sng
Sòng-kok ū chı̍t keng chiú-tiàm, chiú iā chin hó, kè-chı̂ⁿ iā kong-tō, chih-chiap lâng-kheh iā chin un-khûn, chio-pâi iā koà kàu koâiⁿ. Chóng-sı̄ lóng bô lâng boé, sı̄m-chı̀ chiú iā pâi kàu soà sng khı̀. Tiàm chú-lâng siūⁿ-liáu chin kı̂-koài, chiū mn̄g i ê pêng-iú kóng, Che sı̄ sím-mı̍h iân-kò͘? I ê pêng-iú kóng, Kiaⁿ lín ê mn̂g-kháu hit chiah káu thài ok. Tiàm chú-lâng kóng, Káu ok àn-cháiⁿ-iūⁿ oē hō͘ chiú bô seng-lí? I ê pêng-iú kóng, Káu ok lâng chiū m̄-káⁿ khı̀ lín hia. Āu-lâi tiàm-chú tùi goā-bı̄n chhe chı̍t ê gín-ná the̍h chı̂ⁿ koāⁿ chiú-pân, beh lâi tah chiú; hit chiah káu kó-jiân cháu jı̍p, beh khı̀ kā i. Hit ê gín-ná kiaⁿ chı̍t-ē, cháu kàu bé-á tı̍t-khı̀; chiah chai chiú ē bô lâng tah, sı̄ ūi-tio̍h án-ni ê iân-kò͘.
Taⁿ Iâ-so͘ ê tō-lí, boē kóng tit m̄-sı̄ hó ê tō-lí, iā boē kóng tit sı̄ bô kong-tō, iā boē kóng tit bô ēng hó-lé chih-chiap lâng, iā m̄ sı̄ bô ū hó ê chio-pâi; m̄-kú iáu ū lâng m̄ káⁿ oá--lâi. Chit ê iân-kò͘ sui-jiân oē kóng tit sı̄ bô siū Sèng-sı̂n ê kám-tōng, chóng-sı̄ hit tiong-kan, iā boē bián-tit ū tām-po̍h sı̄ chhin-chhiūⁿ hit hō ok káu ê chó͘-tòng. Só͘-í hoān-sū tio̍h ka-kı̄ choè hó só͘ kiâⁿ ê bô͘-iūⁿ, tı̄ kà-sı̄ tio̍h toan-chong bô siâ, giân-gú toan-chiàⁿ bô thang hiâm, hō tùi-te̍k ka-kı̄ kiàn-siàu, bô tè thang kóng lán ê pháiⁿ. ( Thê-tó: 7, 8)
Gâu tû bê sı̀n
Nn̄g chheng nı̂ chêng Tiong-kok ū chı̍t-ê lâng, ho̍k-sı̀ⁿ Se-bûn, tan-miâ kiò Pà, choè Gia̍p-siâⁿ ê koāiⁿ-koaⁿ. Tng i khı̀ chiap jı̄m ê sı̂, khoàⁿ-kı̀ⁿ hia ê jı̂n-ian chin hi-bı̂, pah hāng sū lóng hong-hoè; i chiū chhâ-khó hit ê goân-in. Chhâ-liáu chiū chai hia ū chı̍t chéng ê pháiⁿ hong-sio̍k, chiū-sı̄ chı̍t-ê ang-ı̂ teh chok koài.
In-ūi chāi hit só͘-chāi ū chı̍t tiâu hô, ta̍k nı̂ khiā-chhiu ê sı̂ hô chúi chiū tiòng-khí--lâi, tı̀-kàu im-tio̍h hia ê lâng ê chhân-hn̂g chhù-the̍h sún-sit chin choē.
Hit ê lāu ang-ı̂ siⁿ chhut iâu-giân kóng hô-sı̂n teh siū-khı̀, tio̍h ēng mı̍h lâi chè-hiàn; iā tio̍h chiong chı̍t ê bē chhut-kè ê cha-bó͘ gín-ná chng súi-súi, chiong lô͘-tek pa̍k choè chûn hō͘ i chē, chiah kā i pàng hō͘ chúi lâu khı̀; lâu bô loā-hn̄g chiū tı̂m-lo̍h--khı̀, hō͘ choè sàng hō͘ hô-sı̂n choè bó͘. Ta̍k nı̂ lóng tio̍h án-ni. Koh hia ū saⁿ ê lāu-toā, iā kap hit ê ang-ı̂ tàu-khang; nā khoàⁿ-kı̀ⁿ ū chı̍t ê khah hó-gia̍h ê lâng, in chiū kóng i ê cha-bó͘-kiáⁿ oē ēng-tit choè hô-sı̂n ê bó͘. Hiah-ê hó-gia̍h lâng kò͘-tio̍h i ê kiáⁿ, chiū chiong chı̂ⁿ-gûn lâi mái-chiok in, in chiū tńg chı̍h-koan kóng, hô-sı̂n m̄ tı̍hⁿ chit ê, sı̄ ài hit ê. Só͘-í tı̀-kàu hó-gia̍h lâng lóng poaⁿ-khı̀ pa̍t só͘-chāi; chhun hiah-ê sòng-hiong lâng. Iū-koh ta̍k-nı̂ ū chúi-chai, só͘-í peh-sı̀ⁿ chin kan-khó͘. Se-bûn Pà í-keng chai sı̄ án-ni, siūⁿ nā beh ēng chhùi kóng sı̄ bô lō͘-ēng, in-ūi chèng peh-sı̀ⁿ bê sı̀n chin chhim, boē bián-tit oē ēng bô chêng-lí ê oē lâi piān-lūn. Chiū hoan-hù saⁿ ê lâu-toā kóng, Nā beh sàng cha-bó͘ gín-ná hō͘ hô-sı̂n choè bó͘ ê sı̂, goá iā beh lâi khı̀ pài i; ta̍k-ê kóng, Hó.
Kàu hit ê sı̂, hit saⁿ ê lāu-toā kó-jiân lâi chhiáⁿ Se-bûn Pà khı̀ khoàⁿ. Kiâⁿ kàu hô-piⁿ ê sı̂, khoàⁿ-kı̀ⁿ káng-chheng lâng oe-oe khoeh-khoeh teh thèng-hāu. Koh tia̍p-á-kú chiah khoàⁿ-kı̀ⁿ hit ê lāu ang-ı̂ lâi, ū sı̀ ê tô͘-tē kun-sûi i; ka-kı̄ lia̍h choè i sı̄ thoè sı̂n pān sū, put-chí kiau-ngō͘ ê khoán. Koh khoàⁿ hit ê beh hō͘ hô-sı̂n choè bó͘ ê cha-bó͘ gín-ná, siⁿ choè iā pêng-siông. Se-bûn Pà chiū tiàu hit ê lāu ang-ı̂ lâi kā i kóng, Goá khoàⁿ chit ê cha-bó͘ gín-ná bô sím-mı̍h súi, thèng-hāu goá kéng chı̍t ê khah piau-tı̀ ê chiah kā i sàng khı̀, chhiáⁿ lí chiong goá ê oē khı̀ kā hô-sı̂n kóng. Chiū bô iông-ún i ke kóng oē, kiò nn̄g ê kun-lâng kā I lia̍h-khí-lâi thiām-lo̍h hô--nı̍h; i pún-sin iā chng-choè chin sı̀n ê khoán, chéng-tùn I-koan, ēng khiân-sêng lâi khiā tı̄ hô-piⁿ, thèng-hāu i tò-tńg lâi hoê-ho̍k.
Kàu ū tia̍p-á-kú, bô khoàⁿ-kı̀ⁿ hit ê lāu ang-ı̂ tò-tńg-lâi, chiū tùi chèng lâng kóng, chit ê lāu lâng choè tāi-chı̀ chin bān, kàu taⁿ iáu-bē tò-tńg-lâi. Chiū kiò nn̄g ê siàu-liân ê ang-ı̂ lâi, kā i kóng, Lín su-bú khah lāu lah, choè tāi-chı̀ chin bān, lí khı̀ mn̄g i khoàⁿ hô-sı̂n kóng àn-cháiⁿ-iūⁿ; tio̍h liâm-piⁿ tò-lâi hoê-ho̍k goá. Chiū kiò kun-lâng koh kā in thoa-lo̍h-khı̀.
Keh chám-jiân kú, iû-goân bô tōng bô chēng; chiū tiàu hit saⁿ ê lāu-toā lâi kóng, Tàu-tí sı̄ hū-jı̂n-lâng lóng boē pān-sū, khı̀-liáu soà bô beh tò-tńg-lâi. Lín saⁿ lâng khah láu-liān, ta̍k-hāng tāi-chı̀ khah oē hiáu-tit; chhiáⁿ lí chiong goá ê ı̀-sù khı̀ kā hô-sı̂n kóng; tio̍h koáⁿ-kín lâi hoê-ho̍k. Iā bô iông-ún in hun-sò͘, kiò kun-lâng lóng kā in thoa-khı̀, thiām tı̄ hô--nı̍h. Chèng peh-sı̀ⁿ khoàⁿ-liáu toā kiaⁿ, Se-bûn Pà iû-goân ké choè chin khiân-sêng lâi thèng-hāu; m̄-kú iā sı̄ bô poàⁿ-lâng oē tò-tńg-lâi hoê-ho̍k. Chiū koh tiàu hiah-ê tē-pó chhiam-siú lâi, kā in kóng, Goá khoàⁿ hū-jı̂n-lâng kap lāu-lâng lóng sı̄ bô lō͘-ēng, ta̍k-ê ū khı̀ bô hê-thâu; lín tiong-kan sim8-mı̍h lâng choè tāi-chı̀ khah mé-lia̍h, tio̍h khı̀ chhui-pek in. Hiah-ê lâng toā kiaⁿ, ta̍k-ê kha̍p-thâu kiû kóng, Goán lóng m̄-káⁿ lah. Se-bûn Pà chiū kóng, Chhiáⁿ koh thèng-hāu tia̍p-á-kú. Chèng-lâng sim-koaⁿ pho̍k-pho̍k chhéng, kha-chhiú ngia̍uh-ngia̍uh chhoah. Koh kè ū hiah kú, Se-bûn Pà koh mn̄g chèng-lâng kóng, Lín phah-sǹg cháiⁿ-iūⁿ? Tāi-ke kóng, Goán chêng lóng hō͘ hit ê ang-ı̂ phiàn-khı̀; taⁿ m̄ káⁿ lah. Se-bûn Pà chiah kóng, Āu-lâi nā ū lâng koh kóng hô-sı̂n beh chhoā bó͘, goá chiū beh ēng i khı̀ choè hm̂-lâng. Tùi án-ni chiah kah chèng-lâng tò-khı̀.
Āu-lâi Se-bûn Pà khoàⁿ hit ê toē-sè ê koâiⁿ-kē, lâi khui hit tiâu hô; sui-jiân tú-tio̍h khiā-chhiu, iā lóng bô chúi-chai, peh-sı̀ⁿ lóng koh poaⁿ tò-tńg-lâi, bô loā-kú chiū chin heng-ōng. Ū lâng hiâm kóng, Se-bûn Pà ēng án-ni ê hoat-tō͘ sı̄ siuⁿ ngı̄, bô ū jı̂n-ài. Sū-put-ti chit kúi ê lâng hāi chin choē ê peh-sı̀ⁿ, keng-kè kúi-nā cha̍p nı̂ kú, koaⁿ-hú lóng bô hoat-tō͘ thang tı̄; chiū-sı̄ hō͘ chit kúi ê sí, in ê choē iā iáu pó͘ boē kè, hô-hòng koh oē tû-khı̀ āu-lâi ê hō-hoān.
Taⁿ hiān-sı̂ ū koá hong-súi sian-siⁿ, kap pok-koà, khoàⁿ-miā khoàⁿ-jı̍t ê lâng, kóng in ê só͘ toàn sı̄ chin tio̍h, bô chha bô chhok; lín chhiáⁿ bān chiah sı̀n i, kiò in ka-kı̄ seng khı̀ khoàⁿ in ê hong-súi, sǹg in ka-kı̄ ê miā-ūn; nā kó-jiân ū èng-giām, āu-lâi chiah khı̀ sı̀n i iā bē tı̂.
Chit-hı̂ tiò toā-tāi
Kó͘-chá Chi-ná chhit-kok ê sı̂, Chê-kok Ui-ông chē-ūi tē poeh nı̂, Chhó͘-kok ū khí chin choē peng beh lâi kong-phah Chê-kok, Ui-ông chiū chhe Sûn-u Khun khı̀ Tiō-kok chhiáⁿ kiù-peng, iā sàng Tiō-kok ê gûn chı̍t pah kim kap sı̀ cha̍p chiah bé. Sûn-u Khun m̄ hó hiâm ông ê lé-mı̍h siuⁿ po̍k, chiū toā chhiò, bō-iaⁿ iā lak--lo̍k-lâi. Ông chiū mn̄g kóng, Lí hiâm lé-mı̍h khah khin mah? Sûn-u Khun kóng, Sı̂n m̄ káⁿ hiâm. Ông kóng, Lí chhiò siáⁿ-sū? Sûn-u Khun chiū ı̀n i kóng, Goá kin-á-jı̍t tùi tang-pêng hia lâi, khoàⁿ-kı̀ⁿ chı̍t lâng pâi chı̍t ê ti-kha kap chı̍t cheng chiú, sio hiuⁿ teh hē kóng, Kiû sı̂n tio̍h pó-pı̀, hō͘ goá ê koâiⁿ-chhân kē-chhân lóng hó siu-sêng, hō͘ goá ê gō͘-kak moá-moá sı̄, toā-pūn lâu, soè-pūn tı̄ⁿ, ū thang chia̍h ia̍h ū thang thiò. Goá khoàⁿ I só͘ ēng ê mı̍h chin chió, i só͘ kiû ê ǹg-bāng iū chin toā, só͘-í chiah chiah ài chhiò.
Ui-ông chai i ê ı̀-sù, chiū ke-thiⁿ n̂g-kim nn̄g bān niú, pe̍h-ge̍k jı̄ cha̍p tè, bé sı̀ pah phit, chhia iā káng pah tiuⁿ. Sûn-u Khun chiah jı̍p Tiō-kok, kó-jiân chioh-tio̍h cheng-peng cha̍p bān, chiàn-chhia chı̍t chheng tiuⁿ. Chhó͘-kok ê peng thiaⁿ-liau8, thàu-mı̂ koáⁿ-kín cháu tò khı̀.
Lūn kàu hiān-sı̂ pài ngó͘-seng ê lâng sı̄ kap hit ê choh-chhân lâng sio-siāng, ka-kı̄ boé nn̄g ı̂ⁿ-á kim hiuⁿ chek, á-sı̄ pı̄-pān tām-po̍h bô iû bô iâm ê chè-mı̍h, taⁿ kàu biō-lāi khı̀ hàu, siūⁿ beh kiû chı̂ⁿ-châi, kiû hok-khı̀, á-sı̄ kiû siⁿ kiáⁿ. Hó kai-chài sı̄ hit ê ngó͘-siōng ū ba̍k-chiu boē oē khoàⁿ, ū hı̄-khang boē oē thiaⁿ, ū phı̄ⁿ-khang iā m̄ chai chu-bı̄. Nā beh sió-khoá ū lêng-siàⁿ, á-sı̄ ū tām-po̍h tı̀-sek, khoàⁿ-kı̀ⁿ lâng ēng chit khoán chho͘-sio̍k ê hiuⁿ chek, bô iáⁿ ê kim-gûn, kap hiah-ê chia̍h boē jı̍p-chhùi ê chè-mı̍h, lâi kiû it-khài ê toā hok-khı̀, khah ke mā chiong hit ê lâng kā i koáⁿ chhut mn̂g goā, soà chek-pı̄ hit ê lâng kóng, Lí khoàⁿ goá sı̄ thô͘ chhio̍k chhâ khek ê, boē oē hun-piat chin-ké phang-chhàu, chiah ēng chit hō lâi phiàn goá mah? Só͘-í Sèng-keng ū kóng, Lâng kèng-pài Siōng-tè, tek-khak tio̍h ēng sim sêng-sı̍t lâi kèng-pài I.
Tio̍h kiû ka-kı̄
Kó͘-chá Hā-tiâu ê sı̂, ū chı̍t ê ông miâ Pek-khé, kap Iú-hō͘ tı̄ Kam-te̍k ê só͘-chāi sio thâi; Pek-khé thâi-su. I ê chèng jı̂n-sı̂n chhiáⁿ i koh chéng-tùn peng-bé kap i kau-chiàn. Pek-khé kóng, M̄-bián koh chiàn lah; goá ê toē iā boē khah chió I, peh-sı̀ⁿ iā pí i khah choē, hoán-tńg sı̄ goá thâi-su, che tek-khak sı̄ goá ê tek-hēng m̄ hó, kà-sı̄ iā m̄ hó. Tùi án-ni Pek-khé chiū chē iā bô kiû hó ūi, chia̍h iā sı̄ bô chhē hó bı̄, ga̍k-khı̀ iā bô beh siu-lí, kiáⁿ-jı̂ iā bô kā i chng-thāⁿ, koh chun-kèng sı̄-toā, thiàⁿ-thàng sı̄-soè, kéng-soán gâu lâng, lâi tàu liāu-lí kok-sū. Taⁿ-chiah kè chı̍t nı̂ nā-tiāⁿ, hit ê Iú-hō͘ soà ka-kı̄ lâi hâng i.
Taⁿ chit-tia̍p ê lâng teh thoân-tō, múi-múi kóng lâng ê sim thài ngı̄, bô hiah-nı̍h khoài kám-hoà. Goá khoàⁿ chit kù oē iā bô tek-khak lóng án-ni. Taⁿ ài tāi-seng chhiáⁿ mn̄g thoân-tō--ê, tō-ha̍h ū joā chhim, phín-hēng ū joā hó. Nā sı̄ ka-kı̄ ê tō-ha̍k iā sió-khoá, phín-hēng iā bô thang o-ló, chı̍t-ē kóng-khí tō-lí, chhı̀n-chhái thoa-tang thoa-sai, put-tap put-chhit, lām-sám kóng-lóng teh , chiū kā i kè khı̀; nā choè tāi-chı̀, chhut-chāi in ê ı̀-sù, koài-phiah khek-po̍k, bô chhûn liông-sim, goá nā chit khoán ê thoân tō-lí, goá kiám thang kóng sı̄ lâng ê sim-koaⁿ thài ngı̄ mah? Sio̍k-gú kóng, Chiong sim pí sim. Koh kóng, Ka-kı̄ sı̀-niú-ńg tio̍h tû-khí-lâi. Nā beh ka-kı̄ bô hoaⁿ-hí káng-kiù Sèng-keng, bô beh chiàu Sèng-keng lâi kiâⁿ, hoán-tńg khı̀ khǹg lâng tio̍h chhâ-khó Sèng-keng, thàn Sèng-keng ê oē lâi kiâⁿ, án-ni kiám m̄ sı̄ chū-siong mâu-tún mah?
Khoàⁿ lâng teh kóng oē
Chāi-chá Khóng-chú chhut-goā kiâⁿ-iû, bé tè bô tio̍h lō͘, soà khı̀ chia̍h-tio̍h choh-chhân lâng ê tiū-á. Hit ê lông-hu siū-khı̀, chiong hit chiah bé thoa khı̀ ēng soh-á pa̍k teh. Khóng-chú kiò Chú-kòng khı̀ thó. Chú-kòng ēng khiam-sùn lé-māu ê bı̄n-sek, kap i kóng chin choē hó oē, iā kā i chē m̄-tio̍h.
Hit ê lông-hu m̄ hêng i, Khóng-chú kóng, Goá chiàu lâng ê hoat-tō͘ hó-hó kā i kóng, i khiok m̄ thiaⁿ; che sı̄ chhin-chhiūⁿ ēng seng-lé teh khoán-thāi iá-siù, toâⁿ ga̍k-khı̀ hō͘ chiáu thiaⁿ, sǹg sı̄ goá ê m̄ tio̍h,m̄-sı̄ i ê m̄ tio̍h. Chiū kah bé-hu khı̀; hit ê bé-hu chı̍t-ē khoàⁿ-kı̀ⁿ choh-chhân lâng chiū kóng, Lí só͘ choh ê chhân, tùi tang-hái kàu sai-hái, goá ê bé chhut-lâi, beh ta̍h-lo̍h khı̀ chhē chia̍h, cháiⁿ-iūⁿ oē bián-tit chia̍h-tio̍h lí ê tiū-á leh? Hit ê lông-hu thiaⁿ-liáu toā hoaⁿ-hí, chiū chiong bé tháu khí-lâi, hō͘ i khan tò-khı̀.
Taⁿ lūn-kàu lán ê lâng teh kau-chiap óng-lâi, iā tio̍h ı̂-sı̂ chè-gı̂, kiàn ki jı̂ chok; nā chip i chı̍t ê phiah, lia̍h sí-pán lâi choè, tek-khak sı̄ bô lı̄-ek. Phí-lūn tang-thiⁿ beh kàu, chiū tio̍h pı̄-pān mı̂-hiû, hē-thiⁿ tio̍h pı̄-pān joa̍h-saⁿ, chhùi-ta tio̍h pı̄-pān tê thng, iau tio̍h pı̄-pān pn̄g; che sı̄ tiāⁿ-tio̍h ê lí-khı̀. Thoân-tō ê iû-goân tio̍h án-ni. Phí-lūn nā kap thó͘-thún m̄-bat sèng-tō ê lâng kóng, tio̍h ēng khah khoài bat khah chhián-hiān ê tō-lí, in chiah thiaⁿ-liáu oē bêng-pe̍k; nā tú-tio̍h khah su-bûn ê tha̍k-chheh-lâng, tio̍h ēng khah chhim khah ò-biāu ê tō-lí, in thiaⁿ-liáu chiah oē jı̍p hı̄. Siat-sú nā kap phok-ha̍k su-bûn ê lâng, ēng hit hō hā-téng chho͘-ló͘ ê oē kap i kóng, tú-tio̍h iong-hu sio̍k-chú hoán-tńg lōng-khí bûn-be̍k, án-ni chiū hiah-ê su-bûn lâng thiaⁿ-liáu hoán-tńg oē khoàⁿ-khin, hiah-ê chho͘-kha chhiah-chhiú ê, iū ná chhin-chhiūⁿ ah-á teh thiaⁿ lûi, chū-jiân thiaⁿ-liáu chiū boē lo̍h hı̄, ia̍h beh thài ū kong-hāu leh? Khó-kiàn thoân-tō ê lâng, tio̍h ē bûn, ia̍h tio̍h oē bú, ū sı̂ chiàu lán pêng-siông, ū sı̂ tio̍h ēng bûn-ngá. Só͘-í tong-sı̂ Pó-lô teh thoân-tō, i sı̄ khoàⁿ kàu sím-mı̍h toē-hng, tùi sím-mı̍h hō lâng, eng-kai tio̍h kóng sím-mı̍h oē, lóng bô chip sí koat. Chhin-chhiūⁿ Sèng-keng ū kóng, M̄-thang ēng chin-chu hiat hō͘ ti káu. Chim-chiok lâi siūⁿ chit ê ı̀-sù, thang chai chin-chu ū chin-chu ê lō͘-ēng, ti káu ū ti káu ê só͘ ài; beh thài oē siāng chı̍t khoán lâi gı̄-lūn tit leh?
Siú tu thāi thò͘
Chong-chú ū kóng, Sòng-kok ū chı̍t ê choh-chhân lâng, khoàⁿ-kı̀ⁿ chı̍t chiah chhiⁿ-kiaⁿ cháu ê thò͘-á, chông-lâi tōng-tio̍h chhiū-tu soà sí-khı̀. Hit ê choh-chhân lâng chiū giâu-gı̂ hit châng chhiū-tu, sı̄ oē soah thò͘, chiū pàng-sak i keng-choh ê sū, choan-kang lâi toà chhiū-tu ē thèng-hāu, ǹg-bāng khoàⁿ ū thò͘ oē cháu--lâi, thang hō͘ lán khioh-tio̍h.
Taⁿ lūn-kàu thiⁿ-kha-ē ê mı̍h, ta̍k-hāng lán to ū hūn, put-kò tio̍h ēng kè-chı̂ⁿ lâi khı̀ boé, nā kan-ta khoàⁿ teh him-siān sı̄ bô lō͘-ēng. In-ūi hiān-sı̂ ê lâng nā khoàⁿ-kı̀ⁿ koaⁿ-ka chú-tē, á-sı̄ gia̍p-hō͘ kiáⁿ-sun, tit-tio̍h in sı̄-toā-lâng ê gia̍p-sán, kui jı̍t chia̍h-pá êng-êng, ia̍h bô choè sím-mı̍h thâu-lō͘, kan-ta sı̀-koè thit-thô hoaⁿ-hí khoài-lo̍k, chiū kóng, Hit-ê sı̄ ū toà sı̍t-lo̍k lâi chhut-sı̀, á-sı̄ kóng, Thian-châi ka-kı̄ lâi. Che put-jı̂-kò sı̄ kiò lâng m̄-thang tùi-tiōng chı̂ⁿ gûn kè-thâu. M̄ kú hit hō pı̂n-toāⁿ m̄ ài thàn ê lâng siông-siông ēng che lâi kóng, tı̀-kàu gō͘ lâi gō͘ khı̀, hām-hāi m̄-sı̄ sió-khoá. Án-ni kiám bô kap chit ê Siú-tu thāi-thò͘ ê lâng siāng khoán ê gōng mah? Thài m̄ siūⁿ lâng oa̍h tı̄ sè-kan, sui-jiân thiⁿ bô gō lâng, iā tio̍h lán pún-sin chhun-chhiú khı̀ the̍h lâi khǹg hit chhùi--nı̍h. Hô-hòng Siōng-tè siⁿ lán ū kha ū chhiú, sı̄ beh hō͘ lán ūn-tōng choè tāi-chı̀, m̄-nā pang-chān ka-kı̄, iā ài hō͘ pa̍t lâng tit-tio̍h lı̄-ek. Sio̍k-gú ū kóng, Thiⁿ-toē ı̂ⁿ lin-lin, chhoàn gō sı̄ toaⁿ-sin. Koh lâng sǹg sı̄ bān-hāng mı̍h tē-it lêng-khiáu ê, thài thang ka-kı̄ châu-that? Chiū-sı̄ cheng-siⁿ khı̂m-siù mā tio̍h sı̀-koè khı̀ thó chia̍h, bo̍h-kioh lâng sı̄ tē-it hoa̍t-phoat ê; kiám ū kóng, siⁿ lán ê seng-khu, sı̄ beh choè saⁿ-á kè, pak-tó͘ sı̄ beh choè pn̄g-táu nā-tiāⁿ? Sui-jiân chó͘-chiūⁿ ū lâu tām-po̍h sán-gia̍p, kàu-gia̍h hō͘ lán chı̍t-sı̀-lâng thang chia̍h, chhēng, ēng, iā m̄-thang kui-jı̍t bû só͘ sū-sū. Sòng-tiâu Lio̍k Siōng-san ū chı̍t chhiú koa, chiū-sı̄ choè lâi kà-sı̄ chit khoán ê lâng; koa-nı̍h kóng:
Thiaⁿ, thiaⁿ, thiaⁿ,
Hō͘ goá tio̍h-boâ thiⁿ chù-tiāⁿ,
Nā beh pı̂n-toāⁿ oē iau koâⁿ,
M̄-thang iau koâⁿ chiah oàn-miā,
Thiⁿ-nı̍h sı̂n-bêng ū teh thiaⁿ.
Hé-chhiⁿ oē sio goân-iá
Chi-ná Lia̍t-kok ê sı̂-tāi, Chhó͘-kok ê pian-kài Pi-liông ê toē-hng ū chı̍t ê cha-bó͘ gín-ná, kap Gô͘-kok pian-kài ê cha-bó͘ gín-ná saⁿ-kap chhái-sng. Gô͘-kok ê cha-bó͘ gín-ná in-ūi kún-chhiò, gō͘ siong-tio̍h Pi-liông ê cha-bó͘ gín-ná. Pi-liông ê lâng chiū chhoā hit ê tio̍h-siong ê cha-bó͘ gín-ná khı̀ chek-pı̄ Gô͘-kok ê lâng. Gô͘-kok ê lâng in-ūi kóng oē bô khiam-sùn, soà hō͘ Pi-liông ê lâng kā i thâi khı̀. Gô͘-kok ê lâng āu-lâi khı̀ Pi-liông pò-siû, chiong hit ê lâng choân-ke kā i thâi-sí liáu-liáu. Pi-liông ê toē-hng koaⁿ thiaⁿ-liáu chin siū-khı̀ kóng, Gô͘-kok ê lâng hó toā-táⁿ, chia̍h goá chin kàu, chiū niá peng khı̀ kong-kek i, bô lūn lāu-ê chíⁿ-ê it-chı̄n châu-bia̍t.
Tng hit sı̂ Gô͘-ông Î-mūi thiaⁿ-kı̀ⁿ chit ê tāi-chı̀, iā toā siū-khı̀, chiū hoat peng khı̀ kong-phah chhó͘-kok ê siâⁿ-tı̂. Tùi án-ni Gô͘, Chhó͘ nn̄g kok chiū tiāⁿ-tiāⁿ sio-thâi. Gô͘-kok chiū phài Kong-chú Kong niá peng khı̀ cheng Chhó͘-kok, tı̄ Koe-hū ê toē-hng toā sio-thâi; Chhó͘-peng thâi-su, liân goân-soè chiòng-koaⁿ, ū-ê sí, ū-ê hō͘ lia̍h khı̀. Gô͘-peng soà khı̀ kong-phah Chhó͘-kok ê kiaⁿ-siâⁿ. Kai-chài Chhó͘-ông cháu lı̄, kı̂-û ê thó͘-toē lóng hō͘ in chiàm khı̀. Āu-lâi Chhó͘-kok ê jı̂n-sı̂n jı̍p Chı̂n-kok khı̀ chioh peng lâi khek-ho̍k Chhó͘-kok ê toē. Chhó͘-ông in-ūi keng-kè chit pái ê thâi-su, chiū ēng sim lâi pān kok ê chèng-sū, thiàⁿ-thàng i ê peh-sı̀ⁿ, kèng-tiōng i ê jı̂n-sı̂n; kàu kúi cha̍p nı̂ āu, Gô͘-kok iā hō͘ Chhó͘-kok bia̍t-khı̀.
Sio̍k-gú kóng, Sió-khoá m̄ pó͘, toā khang chiū kan-khó͘. Chı̍t lia̍p chı̍t lia̍p ê hé-chhiⁿ nā bô hoa, oē sio piàn soaⁿ-iá. Chı̍t tih chı̍t tih ê chúi-choâⁿ nā bô soah, oē pı̀ⁿ-chiâⁿ kang-hô. Bô lūn sı̄ sió-khoá ê tāi-chı̀, tio̍h siat-hoat hō͘ kui tio̍k, m̄-thang chhut-chāi i ūn-tōng, kàu chı̍t-ē hoat-choh ê sı̂, soà boē siu-sı̍p tit. Chhin-chhiūⁿ Au-chiu chit nn̄g nı̂ ê toā kau-chiàn, kiám m̄ sı̄ tùi Ò-kok Hông-thài-chú ê khí-in mah? Hoē-iú ê choè sū, koh tio̍h chin soè-jı̄, m̄-thang lia̍h choè sió-khoá lâi bô kín-sı̄n, kiaⁿ-liáu oē toā-toā chó͘-tòng kàu-hoē ê chı̀n-pō͘.
Ū lé-sò͘ ê tit-tio̍h siúⁿ
Chāi-chá Lia̍t-kok ê sı̂, Tiō Siong-chú Kap Tı̀ Pek put-bo̍k, bô joā-kú soà jiá-khí kau-chiàn. Siong-chú tòng boē tiâu, peng pāi cháu jı̍p Chı̀n-iông siâⁿ, hō͘ Tı̀ Pek ûi-khùn chin kú. Āu-lâi khui-tit i ê chham-bô͘ Tiuⁿ Bēng-tâm hó-táⁿ khı̀ kı̀ⁿ Hân, Gūi, nn̄g lâng, soè in lâi poān Tı̀ Pek, kap Siong-chú liân-ha̍p, hoán-tńg kong-phah Tı̀ Pek, kàu Tı̀ Pek bia̍t khı̀ liáu. Teh siúⁿ-sù kong-sı̂n ê sı̂, khiok sı̄ Ko Hek tit-tio̍h siōng-téng siúⁿ. Bēng-tâm siūⁿ m̄ chhut, chiū kóng, Tı̄ Chı̀n-tông siâⁿ ê sū, Ko Hek iā bô toā kong-lô, àn-cháiⁿ-iūⁿ i siúⁿ siōng-téng? Siong-chú ı̀n i kóng, Goá tı̄ Chı̀n-iông ê sı̂, kok-ka chin gûi-hiám, goá ê ūi lóng boē pó-tit, chèng jı̂n-sı̂n ê tiong-kan, chiū ta̍k ê lóng ū kiau-ngō͘ bú-bān goá ê ı̀-sù, chí-ū Ko Hek iû-goân chin khiam-pi, bô sit kun-sı̂n ê lé-sò͘; só͘-í chiah siúⁿ i siōng-téng.
Hit sı̂ Khóng-chú thiaⁿ-kı̀ⁿ chit hō oē, chiū kóng, Án-ni chin hó; Siong-chú siúⁿ chı̍t ê lâng, chiū thiⁿ-kha-ē choè jı̂n-sı̂n ê, lóng m̄ káⁿ sit-lé lah.
Taⁿ sè-kan lâng tāi-khài lóng sı̄ án-ni; nā hit ê lâng ū châi ū sè thang hō͘ khò, lâng chiū pah-poaⁿ lâi hōng-sêng, chin gâu phô͘-tháⁿ; ia̍h nā hit ê lâng khah sit sè, á-sı̄ chı̂ⁿ í-keng liáu, lâng chiū hoán-tńg kóng i ê sı̄-hui, lēng-goā chit khoán ê bı̄n-ba̍k teh khoán-thāi i. Chit khoán ê lâng siāng tē-it choē. Iâ-so͘ ū kóng, Lâng tı̄ Siōng-tè ê bı̄n-chêng, ta̍k-hāng tāi-chı̀ lóng tio̍h khiam-pi, chiah oē tit-tio̍h Siōng-tè ê siúⁿ-sù; nā kiau-ngō͘ chū-khoa, sui-jiân ū kong-lô, iā bô tek-khak oē tit-tio̍h Siōng-tè ê siúⁿ-sù. Só͘-í Hoat-lı̄-sài lâng ê kı̂-tó, boē oē siū-tio̍h hoaⁿ-hí chiap-la̍p; nā-sı̄ thiu-hiòng ê lâng teh kı̂-tó, hoán-tńg tit-tio̍h Siōng-tè àⁿ-lo̍h-lâi thiaⁿ i.
Sûi-ki èng-piàn
Kó͘-chá ū chı̍t ê béng lâng, kiò choè Piān Chong, khoàⁿ-kı̀ⁿ ū nn̄g chiah hó͘ kong-ke chia̍h chı̍t chiah gû. Piān Chong chiū beh khı̀ phah hit nn̄g chiah hó͘; ū kun toè i ê lâng kóng, Chhiáⁿ bān chiah; hó͘ sǹg sı̄ béng-siù, gû sı̄ hó chia̍h ê mı̍h. Hiān-chāi nn̄g chiah hó͘, saⁿ-kap chia̍h chı̍t chiah gû, gû kı̀-jiân sı̄ hó ê chia̍h-mı̍h, nn̄g chiah hó͘ tek-khak oē saⁿ-chiⁿ chia̍h; nā saⁿ-chiⁿ chia̍h, chiū oē sio-kā; ia̍h sio-kā liáu toā chiah-ê oē tio̍h-siong, soè chiah-ê oē sí. Lí thèng-hāu tia̍p-á-kú, thâi chı̍t chiah tio̍h-siong ê hó͘, kiám bô it-kú lióng-tek mah? Án-ni lí chiū m̄-bián phah hó͘ ê lô-khó͘, koh-tit-tio̍h thâi-sí nn̄g chiah hó͘ ê hó miâ-siaⁿ. Piān Chong chiū thèng-hāu bô tia̍p-á-kú, kó-jiân nn̄g chiah hó͘ saⁿ-chiⁿ chia̍h soà sio-kā, soè chiah-ê kā kàu beh-sí beh-sí, toā chiah-ê iā tio̍h tāng siong. Piān Chong chiah oá khı̀ chiong nn̄g chiah lóng tu̍h--sí; kng tò-lâi ê sı̂, lâng m̄-chai, chin o-ló i, kóng i chı̍t ê lâng phah-sí nn̄g chiah hó͘, hit ê miâ-siaⁿ chiū chin thàu.
Taⁿ bô lūn toh-lo̍h chı̍t téng ê lâng teh choè tāi-chı̀, m̄-thang it-bı̄ khò ióng-béng, sái sèng-tē, ngı̄-ngı̄ beh choè; lóng tio̍h sûi-ki èng-piàn, khoàⁿ sı̂-sè chiah thang tín-tāng, chiū khah m̄ bián hùi siuⁿ choē ê khùi-la̍t, koh sêng-kong iā toā.
Chin gâu chhú pó
Chhó͘-kok ū chı̍t ê lâng, sı̀ⁿ Piān miâ Hô, tı̄ soaⁿ-nı̍h tit-tio̍h chı̍t tè chho͘ ge̍k, chiū the̍h khı̀ hiàn hō͘ Chhó͘-kok Lē-ông, kā i kóng,lāi bı̄n ū pó ge̍k, Lē-ông kiò tok-ge̍k ê sai-hū lâi khoàⁿ; hit ê sai-hū kóng, Sı̄ chı̍t tè chio̍h-thâu, thài ū sím-mı̍h kı̂-khá? Lē-ông kóng Piān Hô sı̄ khi-phiàn i, chiū chiong tò-kha kā chām-khí-lâi. Āu-lâi Lē-ông sí-khı̀, Bú-ông soà-chiap lâi chē ūi. Piān Hô koh chiong hit tè chho͘-ge̍k the̍h khı̀ hiàn hō͘ Bú-ông. Bú-ông iû-goân tiàu ge̍k-kang lâi khoàⁿ, iā kóng sı̄ chio̍h-thâu. Bú-ông iā kóng i sı̄ khi kun, chiong chiàⁿ-kha iā kā chām-khí-lâi. Kè bô joā-kú, Bú-ông iā sí, chiū oāⁿ Bûn-ông teh chē ūi. Chit ê Piān Hô chiah chiong hit tè ge̍k the̍h khı̀ tı̄ soaⁿ-kha, tı̄ hia tı̍t-tı̍t khàu, chiok-chiok ū saⁿ-mı̂ saⁿ-jı̍t, sı̄m-chı̀ ba̍k-sái lâu-liáu, soà lâu huih chhut-lâi. Bûn-ông chiū kiò lâng khı̀ mn̄g i, Sı̄ sím-mı̍h iân-kò͘? Kok-lāi ê lâng siū chām-kha ê hêng-hoa̍t sı̄ chin choē, lí siáⁿ-sū khàu kàu chit khoán ê chhám-chhoeh? Piān Hô chiah kóng, Goá m̄ sı̄ in-ūi teh khàu goá ê kha chām-khí-lâi, sı̄ in-ūi bêng-bêng sı̄ pó-ge̍k, lâi lia̍h choè sı̄ chio̍h-thâu, hiān-hiān sı̄ láu-sı̍t oē, kā lia̍h choè kóng pe̍h-chha̍t; só͘-í khàu-liáu chiah oē chiah-nih thòng-sim lah. Ông thiaⁿ-kı̀ⁿ che oē, chiū phài tok-ge̍k ê sai-hū, lâi boâ hit tè chio̍h-thâu, kó-jiân lāi-bı̄n hián chhut pó-ge̍k, soà chiong hit tè pó-ge̍k miâ kiò Hô--sı̄ ê phek. Kàu Chı̂n Sí-hông ê sı̂, Chiong hit tè phek khek choè Hông-tè ı̀n; āu-lâi liû-thoân choè kok-pó.
Taⁿ Iâ-so͘ ê tō-lí, kiám m̄ sı̄ bô tè thang chhú ê pó mah? Iâ-so͘ ū kóng, Thian-kok sı̄ chhin-chhiūⁿ khǹg tı̄ hn̂g-nı̍h ê pó-poè, lâng khoàⁿ-kı̀ⁿ, chiū chiong i só͘ ū ê khı̀ boē, lâi boé hit tè hn̂g. Khó-sioh lâng m̄ nā m̄-bat sı̄ pó, hoán-tńg ēng choē-choē hāng lâi húi-pòng. Kàu-hoē chho͘-siat ê sı̂, tú-tio̍h chin choē ê khún-tio̍k, siū chin choē ê lêng-jio̍k; m̄ nā chhin-chhiūⁿ Piān Hô hō͘ lâng chām kha nā-tiāⁿ, sim-chı̀ ū ê pàng-sak sı̀ⁿ-miā lâi kan-chèng tō-lí. Kai-chài thoân-tō ê lâng lóng bô loé-chı̀, thâu-chêng-ê poa̍h-lo̍h-khı̀, āu-bı̄n-ê koh chān-khí-lâi. Só͘-í chit-tia̍p kàu-hoē ū thang chiah-nih heng-ōng. Siat-sú lâng nā oē chhin-chhiūⁿ Chhó͘ Bûn-ông ê khoán, chim-chiok lâi chhúi-mô͘, chin ké liâm-piⁿ chiū bêng-pe̍k.
Siān iú siān pò
Chāi-chá Sòng-kok ū chı̍t ke-kháu put-chí gâu choè hó-sū, ta̍k-hāng chiàu jı̂n-ài kong-gı̄ lâi kiâⁿ. Keng-kè saⁿ tē lâng lóng bô koé-oāⁿ. Āu-lâi in chhù-nı̍h ū chı̍t chiah o͘-gû hut-jiân siⁿ chı̍t chiah pe̍h ê gû-á-kiáⁿ. Chiū khı̀ mn̄g Khóng-chú; Khóng-chú kóng, Che sı̄ hó ê tiāu-thâu, thang ēng lâi chè-hiàn Siōng-tè. Kè ū chı̍t nı̂ kú, in lāu-pē ê ba̍k-chiu iā bô choè thiàⁿ, hut-jiân-kan chhiⁿ-mı̂ khı̀. Hit chiah o͘-gû iū-koh siⁿ chı̍t chiah pe̍h gû-á-kiáⁿ. In lāu-pē kah in kiáⁿ khı̀ mn̄g Khóng-chú; in kiáⁿ chiū ı̀n i kóng, Kū-nı̂ khı̀ mn̄g i, kóng-liáu iā bô iáⁿ, koh hoán-tńg lí ê ba̍k-chiu iā bô khoàⁿ-kı̀ⁿ, mih-sái koh khı̀ mn̄g i? In lāu-pē chiū kóng, Sèng-jı̂n ê oē sui-jiân chiām-sı̂ bē èng-giām, āu-lâi tek-khak ū éng-hióng; tāi-chı̀ iáu-bē liáu, lí thang khı̀ mn̄g i.”
I ê kiáⁿ chiū koh khı̀ mn̄g Khóng-chú; Khóng-chú iû-goân kóng sı̄ hó tiāu-thâu, kah in khı̀ hiàn-chè hō͘ Siōng-tè. In kiáⁿ tò-lâi kā in lāu-pē kóng, iû-goân chiàu Khóng-chú ê oē khı̀ kiâⁿ; koh kè chı̍t nı̂, liân in kiáⁿ ê ba̍k-chiu iā soà chhiⁿ-mı̂.
Āu-lâi Chhó͘-kok niá peng lâi kong-Phah Sòng-kok, chiong siâⁿ-tı̂ ûi-khùn chin kú, niû-chháu chia̍h kàu lóng chı̄n, peh-sı̀ⁿ chiong in ê kiáⁿ oāⁿ pa̍t lâng ê kiáⁿ thâi khí-lâi chia̍h; in ūi ka-kı̄ siⁿ ê, thâi boē lo̍h chhiú. Bô chhâ-liāu chiū ēng sí-lâng ê kut-thâu lâi hiâⁿ; oē sio-thâi ê, lóng tio̍h khı̀ kap tùi-te̍k chiap-tı̄n; lâng sí chı̍t poàⁿ khah ke, khoàⁿ he chhám a̍h m̄ chhám? Kai-chài in pē-á-kiáⁿ in-ūi lóng chhiⁿ-mı̂, bô tiàu khı̀ choè peng, chiah bô tú-tio̍h chit hō ê kan-khó͘. Kàu āu-lâi Chhó͘-peng thè-khı̀, in pē-á-kiáⁿ ê ba̍k-chiu iā soà hó-hó-khı̀ lah.
Koh chı̍t hāng, Iông Hó͘ tı̄ Ló͘-kok choè jiáu-loān ê sı̂, Ló͘-kok ê jı̂n-kun bēng-lēng chiong siâⁿ-mn̂g koaiⁿ-khí-lâi; nā lia̍h tio̍h Iông Hó͘ ê, beh tāng-tāng siúⁿ in, nā pàng hō͘ cháu-khı̀, chiū beh tāng-tāng pān in ê choē. Iông Hó͘ hō͘ lâng ûi-khùn tı̄ lāi-bı̄n, boē tit chhut khı̀, chiū siūⁿ beh ēng khiàm koah âu lâi chū-chı̄n. Ū chı̍t ê kò͘ siâⁿ-mn̂g ê kā i kóng, Thiⁿ-kha-ē ê lō͘ chin choē, mih-sái tio̍h án-ni lâi kiâⁿ té-lō͘; goá pàng lí chhut khı̀. Iông Hó͘ chiū kia̍h kiàm the̍h chhiuⁿ, phah chhut ûi-goā lâi, cháu kàu siâⁿ-mn̂g kha, kò͘ siâⁿ-mn̂g ê chiū kā i khui. Iông Hó͘ beh chhut siâⁿ ê sı̂, hoán-tńg ēng chhiuⁿ tùi kò͘ siâⁿ-mn̂g-ê ê chhiú-tó͘ tu̍h chı̍t khang. Hit ê kò͘ siâⁿ-mn̂g ê sim-lāi àm-chı̄ⁿ oàn-hūn kóng, Chit ê lâng iā chin bô gı̄, goá piàⁿ-miā lâi pàng i chhut khı̀, i hoán-tńg kā goá tu̍h chı̍t-ē, chit hō lâng tú-tio̍h chit hō ê chai-eh, sǹg sı̄ eng-kai.
Āu-lâi Ló͘-kok ê jı̂n-kun thiaⁿ-kı̀ⁿ Iông Hó͘ í-keng cháu chhut siâⁿ goā, chiū toā siū-khı̀, mn̄g khoàⁿ tùi sím-mı̍h siâⁿ-mûi tô-cháu, chiū chiong kò͘ siâⁿ-mn̂g ê lóng-chóng lia̍h lâi; nā khoàⁿ ū tio̍h-siong ê, chiū kóng sı̄ ū kap Iông Hó͘ tí-te̍k tòng boē tiâu, án-ni tio̍h tāng-tāng siúⁿ in; bô tio̍h siong ê, chiū gı̂ in m̄ khéng chhut-la̍t, á-sı̄ thau pàng i cháu, lóng kā i tāng-tāng hêng-hoa̍t.
Taⁿ Sèng-keng ū kóng, Hoān-sū lóng kap sı̀n Chú ê lâng ū lı̄-ek. Án-ni thang chai lâng tı̄ chit sè-kan, lóng tio̍h chı̄n-sim chun-thàn tō-lí lâi choè tāi-chı̀, bô lūn tú-tio̍h sím-mı̍h hoān-lān kan-khó͘, á-sı̄ siū-tio̍h sím-mı̍h chhı̀-liān, boē-oē kóng-tit m̄-sı̄ ka-kı̄ ū lı̄-ek ê só͘-chāi. Khó-sioh ū chı̍t khoán chhián-kiàn ê lâng, nā tú-tio̍h khah bô chhèng-ı̀ ê sū, á-sı̄ gū-tio̍h sió-khoá ê chhı̀-liān, chiū oàn-thiⁿ hūn-toē, loé chit-ê, mē hit-ê, kóng thiⁿ bô ba̍k-chiu, lâng bô kong-tō, siān-sim tó teh gō, ok-sim tı̀ se-bō. Khiok m̄ chai só͘ tú-tio̍h ê hoān-lān kap só͘ siū ê chhı̀-liān, chiàⁿ sı̄ i pún-sin toā-toā ū lı̄-ek ê só͘-chāi.
Kı̂-koài ê tāi-chı̀
Saⁿ chheng nı̂ chêng, Chiu Bú-ông khí peng hoa̍t Tiū-ông. Kàu tek-sèng tò-lâi ê sı̂, ū tiàu nn̄g ê siū lia̍h ê peng-á lâi. Bú-ông mn̄g in kóng, Lín kok-nı̍h ū chhut sím-mı̍h kı̂-koài ê sū bô? Chı̍t ê peng-á kóng, Goán kok-lāi kı̂-koài ê tāi-chı̀, chiū-sı̄ chheng-thian pe̍k-jı̍t khoàⁿ-kı̀ⁿ thiⁿ-téng ê chhiⁿ, ia̍h lo̍h âng-hō͘ chhin-chhiūⁿ lo̍h huih ê khoán. Iáu chı̍t ê peng-á kóng, Chit ê tāi-chı̀ sui-jiân sı̄ kı̂-koài, sǹg sı̄ sió-khoá; goán kok-nı̍h tē it toā kı̂-koài ê tāi-chı̀, chiū-sı̄ kiáⁿ-jı̂ m̄ thiaⁿ lāu-pē ê oē, sió-tı̄ m̄ thiaⁿ hiaⁿ-ko ê oē, jı̂n-sı̂n m̄ thiaⁿ kun-ông ê oē, chit hō chiah thang sǹg sı̄ toā kı̂-koài ê tāi-chı̀. Bú-ông thiaⁿ-kı̀ⁿ chit hō oē, chiū ngiauh-khí-lâi, kā hit ê peng-á kiâⁿ chı̍t ê toā lé. Che Bú-ông m̄ sı̄ chun-kèng hit ê lia̍h lâi ê peng-á, sı̄ chun-kèng i só͘ kóng ê oē.
Taⁿ lán chia ê hū-jı̂n-lâng, bêng-bêng sı̄ thiⁿ siⁿ chū-jiân chı̍t siang oē kiâⁿ oē cháu ê hó kha, khiok tian-tò hùi chin choē sim-sı̂n, siū chin choē kan-khó͘ thàng-thiàⁿ, lâi pa̍k kàu soè-soè-soè, pháiⁿ kiâⁿ pháiⁿ ta̍h, ná chhin-chhiūⁿ tài-chı̍t ê khoán. Koh chı̍t hāng bêng-bêng sı̄ tē-it to̍k, chin khó͘ chin kùi ê a-phiàn hun, khioh kā i khoàⁿ choè thn̂g-tiⁿ bı̍t-tiⁿ ê mı̍h. Chá-chá àm-àm, chhit-chông peh-chông, iā sı̄ beh ó͘ lâi chia̍h, kheng-ka tōng-sán, bó͘-kiáⁿ pàng-làng teh, iā bô iàu-kín. Ia̍h koh bêng-bêng sı̄ chı̍t sin hit hō thô͘ chhio̍k, á sı̄ chhâ khek, choá kô͘ ê mı̍h,ū ba̍k-chiu boē khoàⁿ, ū hı̄-khang boē thiaⁿ, ū chhùi boē kóng oē, bô lêng bô siàⁿ ê ngó͘-siōng, khiok bô lūn sı̄ chun-kùi, hā-chiān, sòng-hiong, hó-gia̍h, ta-po͘, cha-bó͘, lāu-lâng gín-ná, gōng-ê sek-ê, ta̍k téng-hō ê lâng lóng teh liáu chı̂ⁿ liáu kang khı̀ kèng-pài i. Che kiám m̄ sı̄ lán chia iā saⁿ hāng tē it toā kı̂-koài ê tāi-chı̀ mah?
Kò͘ chêng bô kò͘ āu
Chong Chiu tı̄ Tiau-lêng ê só͘-chāi teh kiâⁿ-iû, khoàⁿ-kı̀ⁿ tùi lâm-hng ū chı̍t chiah chhiok-chiáu pe lâi, sı̍t tn̂g ū chhit chhioh, ba̍k-chiu ê toā beh kàu chı̍t chhùn; pe lâi ê sı̂, tùi Chong Chiu ê thâu-khak kā kha̍p chı̍t-ē, chiah pe khı̀ hioh tı̄ bı̄n-thâu-chêng ê la̍t-chí chhiū nı̍h. Chong Chiu chiū kóng, Che sı̄ sím-mı̍h chiáu, sı̍t sui-jiân tn̂g. Thài boē liâm-chia̍p, ba̍k-chiu hiah toā, khiok bô bêng-láng? Chiū bi oá khı̀, siūⁿ beh ēng toāⁿ-chí kā toāⁿ. Hut-jiân khoàⁿ-kı̀ⁿ chı̍t chiah am-pô͘-chê, hioh tı̄ chhiū-téng ı̀m-ńg ê só͘-chāi, toā-soè siaⁿ thı̂ kàu put-chí hó thiaⁿ, chhin-chhiūⁿ chin tek-koat è khoán; khiok m̄ chai āu-bı̄n ū chı̍t chiah chháu-kâu beh lâi lia̍h i. Hit chiah chháu-kâu kò͘ sô oá beh khı̀ lia̍h am-pô͘-chê; khiok m̄ chai āu-bı̄n hit chiah chhiok-chiáu khoàⁿ-kı̀ⁿ, iā thiàu oá lâi beh tok i. Hit chiah chhiok-chiáu beh tok hit bé chháu-kâu ê sı̂, iā m̄ chai Chong Chiu ēng toāⁿ-chí beh kā i toāⁿ. Chong Chiu khoàⁿ chit hō khoán-sit, chiū chia̍h chı̍t kiaⁿ, chiah thó͘-khùi kóng, Sè-kan ta̍k hāng to sı̄ án-ni, lóng sı̄ kò͘ tı̄ ba̍k-chiu chêng ê lı̄-ek, bô kò͘ āu-bı̄n ê hām-hāi; goá nā kan-ta kò͘ beh toāⁿ hit chiah chiáu, m̄ chai āu-bı̄n ū hó͘ á-sı̄ sai beh lâi kā goá á bô. Chiū chiong toāⁿ-chí kap keng siu-khí-lâi, koáⁿ-kín cháu tò-khı̀.
Taⁿ lūn-kàu sè-kan lâng, tāi-khài lóng sı̄ án-ni; ū-ê khò i kiông-béng lâi khi-hū nńg-chiáⁿ, ū-ê sı̄-toā khi-hū sı̄-soè, á-sı̄ hó-gia̍h khi-hū sòng-hiong, chun-kùi lêng-jio̍k pi-chiān; chí-ū kò͘ ba̍k-chiu-chêng ê khoàⁿ-oa̍h, lóng bô kò͘ āu-lâi ê hō-hoān. Thài m̄ siūⁿ bô lūn hō͘ lán án-cháiⁿ-iūⁿ ê ū sè-le̍k, án-cháiⁿ-iūⁿ ê hù-kùi, iā iáu ū chı̍t-ê koh-khah kiông, koh khah toā, tē-it hù-kùi ê, khiā tı̄ lán ê ka-chiah-āu teh kam-tok lán? Sio̍k-gú kóng, Ok bé ok lâng khiâ; koh kóng, Lâng beh hāi lâng Thiⁿ m̄-khéng, Thiⁿ beh hāi lâng tı̄ ba̍k-chêng. Lâng nā siūⁿ kàu tùi thiⁿ-nı̍h ū Siōng-tè teh kàm-chhat, chiū ka-kı̄ ê choē, to bô tè thang siám-pı̄, beh thài ū êng thang khı̀ khi-hū lâng leh?
