Tang-hng ê kò͘-sū 04

Chéng tí oa 
Chong-chú bat kóng, Ū chı̍t jı̍t chíⁿ-lāi ê súi-koe tùi Tang-hái ê pih kóng, Goá put-chí ài kap lí saⁿ-kap thit-thô, khoàⁿ sı̄ beh toà chíⁿ-noâ-téng, thiàu-lâi thiàu-khı̀, á-sı̄ beh toà chíⁿ-lāi ê piah-khang, hioh-khùn lâi tâm-lūn; he̍k-sı̄ toà chúi-bı̄n pàng teh hō͘ i phû, á-sı̄ tiàm-bı̄ chhàng-lo̍h lâi thô͘-soa toé, lóng chin hó thit-thô; bô lūn sı̄ ām-mûi, á-sı̄ tō͘-ún, to m̄ ta̍t-tio̍h goá. Taⁿ tit-tio̍h chit khut ê chúi, koh ū chiah-nı̍h toā, chiah-nı̍h khoah ê chíⁿ, iā sǹg sı̄ ke̍k lo̍k ê sè-kài lah. Pih Sian-siⁿ, lí cháiⁿ-iūⁿ m̄ khah siông lâi goán chit hō hó só͘-chāi thit-thô leh? Tang-hái ê pih chiū siūⁿ beh lo̍h-khı̀, tò-kha chhng iáu-bē jı̍p-khı̀, chiàⁿ-kha to í-keng khı̀ khê-teh lah, chiū toà chíⁿ-téng se̍h kúi-nā choā; soà tùi hit chiah súi-koe kóng, Lí boē hiáu-tit tang-hái ê toā mah? Káng chheng lí ê hn̄g, iáu-bē kàu-gia̍h thang pí i ê khoah; káng chheng tn̄g ê koâiⁿ, iáu-bē kàu-gia̍h thang pí-tit i ê chhim. Ú-tè ê sı̂, káu nı̂ ê chúi-chai, chit ê hái bô khoàⁿ-kı̀ⁿ ke-thiⁿ khah koâiⁿ. Thong-ông hit-tia̍p, chhit nı̂ ê khòng-hān, chit ê hái iā bô khoàⁿ-kı̀ⁿ kiám-chió khah kē; bô kóng in-ūi kú chiām-sı̂ piàn-keng, á-sı̄ ū choē chió ê chı̀n-thè. Che sı̄ goán tang-hái ke̍k lo̍k ê só͘-chāi. Hit chiah chíⁿ-lāi ê súi-koe thiaⁿ-kı̀ⁿ chiah-ê oē, tāi-seng chhiⁿ-chin koh gông-ngia̍h; āu-lâi siūⁿ liáu kiàn-siàu, tiām-tiām lóng bô ı̀-sù. 
Lūn-kàu sè-kan lâng, chí-ū chai êng-hoâ hù-kùi, ài choè toā-koaⁿ, thàn toā chı̂ⁿ, hak hó ê chhân, chhoā súi ê bó͘, ū choē-choē kim-gûn châi-pó, án-ni chiū lia̍h-choè chun-kùi; iā m̄ chai chiah-ê í-goā, iáu ū pí chit hō khah chun-kùi ê tāi-chı̀. Chhin-chhiūⁿ Pó-lô m̄ goān choè Iû-thài lâng ê koaⁿ, lâi kun-tè Iâ-so͘. Mô͘-se m̄ khéng hióng-siū Ai-kı̍p ông-kiong ê hok-khı̀, kam-goān kap Í-sek-lia̍t lâng phun-pho tı̄ khòng-iá. Gân Hoê khiā toà hit hō m̄ chiâⁿ só͘-chāi, sı̄ tǹg teh chia̍h chı̍t kheng-á pn̄g, chı̍t khok-á thng; chóng-sı̄ i lia̍h-choè chin khoài-lo̍k. Lia̍p-sat-lō͘ sòng-hiong kàu bô thang chia̍h, tiàm hó-gia̍h lâng ê mn̂g-kháu, thèng-hāu pun tām-po̍h ê lâu-san mı̍h lâi chí-ki, i iā lóng bô hoân-ló. Chhin-chhiūⁿ chit kúi lâng, kiám m̄-sı̄ kap lán siāng chı̍t khoán ê seng-khu, saⁿ tâng chı̍t khoán ê sèng-chêng; cháiⁿ-iūⁿ m̄ chai chia̍h hó chhēng hó sı̄ lâng só͘ him-siān mah? Cháiⁿ-iūⁿ i phian-phian-á m̄, hoán-tńg sı̂ hó gia̍h, kam-goān hō͘ sòng-hiong; bô him siān chun-kùi, kam-sim choè pi-chiān, bô hiâm kan-khó͘, put-lūn tú-tio̍h sím-mı̍h chhı̀-liān, iā bô koé-oāⁿ in ê sim-chı̀? Che kiám m̄ sı̄ piáu-bêng in sim-lāi kap ba̍k-chiu ê tiong-kan, lēng-goā ū chı̍t khoán ê kéng-gū, khah-iâⁿ tı̄ sè-kan ê êng-hoâ hù-kùi, kap hiah-ê chun-kùi hó-gia̍h kim-gûn châi-pó mah? Ia̍h hiah-ê mı̂-jı̍t tu-tu siūⁿ chit hō ê lâng kap chit ê chéng-tí-oa, ū sím-mı̍h hun-piat leh? 
Koh chı̍t hāng, lán chia ê lâng khah choē lóng m̄-bat chhut-goā, hō͘ i ke̍k kiâⁿ sı̄ tı̄ in pún hiuⁿ-siā, á-sı̄ kūn-hū ê po͘-thâu, in chiū phín kàu i khı̀ sím-mı̍h só͘-chāi thit-thô, joā hó kong-kéng; in ia̍h m̄ chai pa̍t-ūi ê siâⁿ-chhı̄ ū joā toā, lâng ū joā choē. Nā thiaⁿ-kı̀ⁿ chı̍t hāng khah kı̂-koài ê sū, in chiū lia̍h-choè sı̄ kóng pe̍h-chha̍t teh phiàn i. Iā nā hit hō m̄ eng-kai sı̀n, bô-iáⁿ bô chiah, liap chı̍t ê kúi-sı̂n ê miâ lâi phiàn lâng, in chiū sı̀n tauh-tauh, nā pa̍t lâng m̄ sı̀n, in chiū ke-thiⁿ kúi-kù lâi kan-chèng kàu khiā-chin kihā-hiān, che lóng sı̄ tùi tı̄ bô iat-le̍k ê só͘-tı̀. Koh m̄-nā chı̍t-poàⁿ-lâng sı̄ án-ni, kui kok ê lâng iā ū chit hō mâu-pēng. Chhin-chhiūⁿ Tiong-kok tı̄ kúi-cha̍p nı̂ chêng, boē kap goā-kok kau-thong óng-lâi boé-boē ê sı̂, ka-kı̄ lia̍h choè pún-kok sı̄ chin toā, koh chin gâu, khoàⁿ goā-kok lóng bô chiūⁿ ba̍k, kóng in sı̄ hoan-á só͘-chāi, bô siūⁿ-tio̍h Sèng-jı̂n ê kà-sı̄, tek-khak sı̄ bô sím-mı̍h khó-chhú; án-ni ka-kı̄ khoa-kháu chū-toā. Sū-put-ti goā-kok hiah-nı̍h bûn-bêng, kho-ha̍k iā chin hoat-ta̍t, bô lūn thian-bûn tē-lí, lâi-bē-lâi khı̀-bē-khı̀ ê sū, lóng ū gián-kiù khah chiâu-kàu. Kūn-lâi khah ū lâng kap kok kok teh lâi óng, chiah chai kàu goā-kok ê bûn-bêng ta̍k hāng hiah nı̍h chiâu-pı̄, m̄-kú che sǹg sı̄ ū kè-khı̀ goā-kok iû-le̍k, á-sı̄ pún-sin bat keng-kè ê, chiah oē chai kàu án-ni. Iā nā hit hō siú-kiū-phài m̄-ài kóng ı̂-sin ê oē hit hō lâng, nā thiaⁿ-kı̀ⁿ khah sin-kı̂ ê oē, iā bô koh-iūⁿ hit hō chéng-tí-oa teh thiaⁿ Tang-hái toā-pih ê oē lah. 
Chı̄n choè lâng ê pún-hūn 
Chó-toān ê chheh ū kóng, Tēng-kok ê tāi-hu koaⁿ, Pı̂ Chò, kā in kok-nı̍h ê cháiⁿ-siòng Chú-sán kóng, Goá khoàⁿ koh bô joā-kú Tēng-kok oē ū hé-chai; chhiáⁿ lí tio̍h choè chiò lâi kı̂-tó, ǹg-bāng khoàⁿ oē bián-tit ū chit ê chai-ē. Chú-sán m̄ thiaⁿ. Keh bô kúi-jı̍t, kó-jiân ū toā hé-chai. Pı̂ Chò koh kā i kóng, Nā m̄ thiaⁿ goá ê chhùi, m̄-bián joā-kú, iáu-kú ū hé-chai. Chú-sán ı̀n i kóng, Thiⁿ ê choè tāi, hō͘ lâng thài oē hiáu-tit? Āu-lâi ê sū, lâng ná oē chai? Put-kò tio̍h chı̄n lâng ê pún-hūn lâi choè, khah iàu-kín. Āu-lâi Tēng-kok kàu bé to iā pêng-an bô tāi-chı̀; iā bô koh ū hé-chai. 
Tâi-oân kap Tiong-kok éng ū chı̍t khoán hit hō lâng, choan-bûn kóng ké sian-ti ê oē, ū-sı̂ kóng, Koh joā-kú oē ū hé-chai, á sı̄ chúi-chai; ū-sı̂ kóng, Bó͘-mı̍h sı̂ oē tú-tio̍h un-e̍k ê kan-khó͘; lóng tio̍h thàn chá chhiáⁿ koá hê-siūⁿ á-sı̄ tō-sū, lâi choè chiò, thang kái tû chit khoán ê chai-ē. Án-ni sı̍t-chāi kan-ta lām-sám liáu chı̂ⁿ nā-tiāⁿ, lóng bô chı̍t-tiám-á ū lō͘-ēng. Ia̍h-keng ê chheh kóng, Chek-chū hó ê ke-lāi, in ê hok-khı̀ tek-khak ū chhun; chek-chū pháiⁿ ê ke-lāi, in ê chai-ē tek-khak chhiong-chiok. 
Su-keng-nı̍h iā kóng, Choè hó ê chiū ēng pah hāng hok-khı̀ siúⁿ-sù i; choè m̄ hó ê chiū chiong pah-hāng chai-ē kàng hō͘ i. Án-ni-siⁿ khoàⁿ, lâng tio̍h chiàu tō-lí lâi kiâⁿ, o̍h choè hó lâng, chiū thang siám-pı̄ ta̍k iūⁿ ê chai-lān. Hô-hòng chúi, hé, un-e̍k, chit hō chai-ē, sı̄ tùi lâng m̄ sió-sim lâi tú-tio̍h. Siat-sú oē chiong khiⁿ-kau khui hō͘ thàu, hoāⁿ-cha̍h khí hō͘ kian-kò͘, beh thài oē ū chúi-chai leh? Ia̍h nā chá-àm hé-chek oē hiáu soè-jı̄, ta̍k pái tāi-seng tı̂-hông, beh thài oē ū hé-chai leh? Koh lim-chia̍h nā oē hiáu-tit tio̍h chheng-khı̀, khiā-khí ê só͘-chāi kap sin-chhēng oē kín-sı̄n, ia̍h beh thài oē ū un-e̍k leh? M̄-kú lâng lóng m̄ tùi hit ê sı̍t-chāi ê sū lâi káng-kiù, kan-ta sı̀n hit hō hê-siūⁿ tō-sū ê liām-keng pài-chhàm, choè-chiò sio-hiuⁿ, chhòng-lòng hiah-ê bô lı̄-ek ê sū; hô ê lō͘ chhut-chāi i that-teh, bô beh khui; hō͘-hoāⁿ kù-chāi i tó-hoāi, bô beh siu-lí; koe-lō͘ oe̍h chiⁿ-chiⁿ, chhù-the̍h cha̍t thóng-thóng, sı̀-koè kiaⁿ-sí lô-lâng; khiā-khí ê só͘-chāi, iā ak-ak chak-chak; chia̍h chhēng ê mı̍h, iā boē hiáu-tit tio̍h chheng-khı̀ soè-jı̄, chiàu oē-seng ê hoat-tō͘ lâi kiâⁿ, kan-ta beh khò hiah-ê pu̍t-á, ēng choè-chiò ngiâ lāu-jia̍t, lâi ǹg-bāng in pó-pı̀, hō͘ lán pêng-an bô tāi-chı̀. Án-ni beh thài oē khò tit leh? 
M̄-thang khò-sè 
Tân Chín tı̄ Gūi-kok ê sı̂, choè chin toā ê koaⁿ, Hūi-chú tùi Tân Chín kóng, Lí tio̍h ài soè-jı̄ ho̍k-sāi ông chó-iū ê lâng. Lí khoàⁿ iông-liú sı̄ kài khoài oa̍h, kài khoài toā ê chhiū. Nā thán-hoâiⁿ kā i chai, i iā tian-tò siⁿ-khí-lâi; at-tn̄g kā i chai, i iā sı̄ oē oa̍h. M̄-kú ū chı̍t chân, sui-jiân ū chap lâng chai i, nā ū chı̍t lâng teh kā i pu̍ih, i chiū boē oa̍h, boē toā châng. Án-ni khoàⁿ, ēng cha̍p lâng teh chai, he chin chiān chin khoài oa̍h ê chhiū; iáu sı̄ boē tù-tit chı̍t ê lâng lâi teh pu̍ih i. Che sı̄ sím-mı̍h iân-kò͘ leh? In-ūi chai ê khah oh, pu̍ih ê khah khoài. Lí sui-jiân tit-tio̍h ông chin toā chai-poê, m̄-kú kiaⁿ-liáu beh pu̍ih lí ê lâng iā chin choē. Só͘-í lí tio̍h kín-sı̄n kap lâng saⁿ-hô, m̄-thang khò-sè, lia̍h-choè ông hō͘ lí khò chiū kàu gia̍h. Nā án-ni, chiah m̄ bián ū gûi-hiám. 
Hiān-sı̂ ê lâng, siat-sú ū sè thang khò, beh kah i bo̍h-tit giâ-chhut lâi ēng, sı̄ chin ûi-lân. Khah choē sı̄ hit hō chı̄n la̍t thiám-mı̄ koaⁿ-hú, ǹg-bāng i ê sè lâi hō͘ lán khò, chiah khı̀ chı̄n-la̍t kiau-ngō͘ pa̍t lâng; án-ni lia̍h choè chin thé-biān. Beh chhē hit hō bô kek-khùi ê lâng, sı̄ chin chió. Chāi-chá Chi-ná chhit-kok ê sı̂, Siong Iòng choè Chı̂n kok ê cháiⁿ-siòng, i choan khò Chı̂n Hàu-kong chı̍t ê lâng nā-tiāⁿ; kı̂-û liân thài-chú kóng oē lio̍h-á m̄ tio̍h, iā chiong thài-chú ê sian-siⁿ bı̄n-nı̍h kā i chhiah jı̄, phı̄ⁿ kā i koah khí-lâi. Kàu Hàu-kong sí, thài-chú chiap ūi, bô joā-kú soà lia̍h-khı̀, ngó͘-má hun-si. Án-ni khó-kiàn sè-le̍k sı̄ lóng boē khò tit. Lâng kóng bó͘-tan-hoe sui-jiân sı̄ hó, iā tio̍h ài ū le̍k-hio̍h lâi saⁿ hû-chhı̂. Nā-sı̄ kan-ta khò i oē pa-kiat hiah-ê ló-tia tāi-jı̂n, iā kap pa̍t lâng lóng boē hô, kiaⁿ-liáu i só͘ oá-khò ê ló-tia kap tāi-jı̂n iā hō͘ i khò boē tiâu. In-ūi lâng ê siⁿ-sí heng-soe sı̄ bô tek-khak. 
Lūn-kàu só͘ oē khò tit, to̍k-to̍k chı̍t ê nā-tiāⁿ, chiū-sı̄ lán ê Kiù-chú Iâ-so͘; iā lán só͘ khò I, m̄ sı̄ ài tit-tio̍h sè-kan hit hō khang-hu ê hoâ-bûn-hián, sı̄ ūi-tio̍h lêng-hûn éng-oa̍h ê iân-kò͘. Koh lán só͘ khò I, m̄ sı̄ khò I ê sè-thâu, sı̄ khò I ê jı̂n-ài kap un-tián. I ê jı̂n-ài bô lūn lâng ê pháiⁿ kàu toh-lo̍h, nā hoán-hoé jı̄n-choē lâi sı̀n-khò I, chiū oē tit-tio̍h kiù. In-ūi lâng ê só͘ kiâⁿ, lóng thàn in ê su-io̍k, boē bián-tit hoān-tio̍h Siōng-tè ê kài-bēng, chiàu kong-gı̄ lâi phoàⁿ-toàn, lóng tio̍h siū éng-oán ê hêng-hoa̍t. M̄-kú Siōng-tè put-jím kı̂ sim, chiah ēng chhut chit hō sio̍k-choē ê hoat-tō͘. Kóng sio̍k-choē, m̄ sı̄ chhin-chhiūⁿ sè-kan ēng chı̂ⁿ-gûn lâi mái-chiok, kiû-kiám in ê choē-koà, sı̄ ēng thoè-oāⁿ ê hong-hoat, chiū-sı̄ Siōng-tè khoàⁿ lâng hoān-tio̍h éng-oán tı̂m-lûn ê choē, chiū chiong i ê Kiáⁿ thoat-chhut, lo̍h-lâi sè-kan chhut-sı̀ chhin-chhiūⁿ lâng, lâi thoân Thian-kok ê hok-im, kiò lâng tio̍h sı̀n; kàu saⁿ cha̍p liân hè, soà hō͘ lâng lia̍h khı̀ tèng sí tı̄ sı̍p-jı̄-kè. Taⁿ nā chiàu lâng teh siūⁿ, Iâ-so͘ kı̀-jiân sı̄ Pē Siōng-tè thoat-chhut lâi, sè-kan lâng thài ū koân-lêng thang lia̍h I, koh kā I hāi sí leh? M̄-kú che chiū-sı̄ Siōng-tè ēng chhut sio̍k choē ê hong-hoat, kiò Iâ-so͘ thoè lâng sí, ēng I ê pó-huih soé lâng ê choē. Chóng-sı̄ sí āu saⁿ jı̍t Siōng-tè ū hō͘ I koh oa̍h, soà pe̍k-jı̍t seng thian, bēng-lēng I ê ha̍k-seng, khı̀ phó͘ thiⁿ-ē thoân hok-im. Lâng nā sı̀n I, chiū tit-tio̍h kiù, m̄ sı̀n ê kàu-bé tio̍h tēng choē. Só͘-í kóng oē khò tit ê chí-ū Iâ-so͘ nā-tiāⁿ, kı̂-û lóng boē khò tit liáu-liáu. 
Put ti put choē 
Chhân Sù bú-bān Cho͘-kok ê jı̂n-kun, Cho͘-kun beh thâi i. Chhân Sù chhiⁿ-kiaⁿ, chiū khı̀ kı̀ⁿ Hūi-chú, kiû thoè i seh-chêng. Hūi-chú chiū khı̀ kı̀ⁿ Cho͘-kun, mn̄g i kóng, Siat-sú chím-má ū chı̍t ê lâng lâi kı̀ⁿ lí, i tiâu-kò͘-ı̀ ēng chı̍t ba̍k chha̍uh-chha̍uh nih kā lí khoàⁿ, m̄ chai lí beh cháiⁿ-iūⁿ khoán-thāi i. Cho͘-kun kóng, I án-ni hı̀-lāng goá, goá tek-khak thâi i. Hūi-chú koh kóng, Nā-sı̄ lâi ê lâng sı̄ chhiⁿ-mı̂ ê, he beh cháiⁿ-iūⁿ? Cho͘-kun kóng, He goá bô kāng i; in-ūi kı̀-jiân sı̄ chhiⁿ-mı̂ ê lâng, i ba̍k-chiu to bô khoàⁿ-kı̀ⁿ, boē bián-tit oē chha̍uh-chha̍uh nih; lâng kóng put ti put choē, i ka-kı̄ to m̄-chai án-ni sı̄ sit-lé, só͘-í bô beh pān i ê choē. Hūi-chú chiū koh kóng, Nā án-ni chit ê Chhân Sù ê teh choè lâng, tı̄ tang-pêng ê sı̂, bû-bān-tio̍h Chê-hô͘, tı̄ lâm-sı̀ ê sı̂, iā lêng-jio̍k-tio̍h Chhó͘-ông, i tı̄ chit ê lām-sám khi-biô lâng ê tāi-chı̀, sǹg sı̄ pē-bú siⁿ-chiâⁿ ê chhiⁿ-mı̂ ê, lí mih-sái oàn-hūn i leh? Cho͘-kun thiaⁿ-liáu chiū soah-khı̀, bô khı̀ pān Chhân Sù. ê choē. 
Lūn-kàu sè-kan ê lâng, éng-éng ū hit hō ài kap siáu-jı̂n ê lâng lâi-óng, kàu āu-lâi hō͘ i lūi-tio̍h, siū khek-khui, ka-kı̄ iáu m̄ jı̄n m̄-bat lâng, hoán-tńg khı̀ oàn-hūn hit ê siáu-jı̂n, che kiám ū koh-iūⁿ chhin-chhiūⁿ kap chhiⁿ-mı̂ ê teh cheng-lūn hit ê ba̍k-chiu chha̍uh-chha̍uh nih mah? Ia̍h chiū-sı̄ kàu-hoē-lāi ê lâng, tùi sè-sio̍k lâng teh kau-chiap ū sı̂ in-ūi cheng-lūn tō-lí, piān-pok kàu beh saⁿ-mē. Lán iā bô siūⁿ, in to iáu-bē tit-tio̍h tō-lí, sim-koaⁿ bē siū Sı̂n ê kám-hoà, ba̍k-chiu chhin-chhiūⁿ bē khui leh; án-ni chiū m̄-thang kap in teh chhia-poâⁿ. 

Chū-siong mâu-tún

Chhó͘-kok ū chı̍t ê lâng teh boē tún, (chiū-sı̄ tı̂n-pâi), iā teh boē mâu, (chiū-sı̄ chhiuⁿ), ka-kı̄ o-ló i ê tı̂n-pâi cháiⁿ-iūⁿ ê kian-kò͘, bô lūn sím-mı̍h mı̍h, lóng chha̍k boē thàu kè khı̀. Koh kè bô joā-kú, iū-koh ka-kı̄ o-ló i ê chhiuⁿ sı̄ chin lāi, chin hó kǹg; bô lūn sím-mı̍h mı̍h chha̍k-liáu chiū thàu kè-khı̀. Tng hit-sı̂ ū chı̍t ê lâng mn̄g i kóng, Lí án-ni ka-kı̄ tián-lí ê mâu sı̄ joā lāi, tún sı̄ joā kian-kò͘, taⁿ m̄ chai toh-lo̍h chı̍t hāng khah sı̍t-chāi; thài m̄ ēng lí ê mâu lâi chha̍k lí ê tún khoàⁿ-bāi-teh? Hit ê Chhó͘-kok ê lâng soà bô poàⁿ kù oē thang ı̀n. 
Hiān-sı̂ ū chı̍t kù sio̍k-gú teh kóng, Chū-siong mâu-tún, á-sı̄ kóng, Ka-kı̄ mâu-tún, chiū-sı̄ chit ê tián-kò͘. Sı̄ teh chí hit-hō chı̍t chhùi tàu siang chı̍h, tāi-seng kóng ê oē kap āu-bı̄n lóng bô hô ê. Só͘-í bô lūn choè tāi-chı̀, í-kı̍p teh kóng oē, lóng tio̍h siūⁿ-lâi khı̀-tò, m̄-thang sûi-piān lām-sám kóng, chiah boē ū chit khoán chū-siong mâu-tún ê sū. 
Bô lı̄-ek lâng 
Chê-kok ū chı̍t ê chhut-miâ ê tha̍k-chheh lâng, miâ kiò Chhân Tiōng. I m̄-ài choè koaⁿ, kam-goān ún-ku san-lı̂m, choè kang tō͘ pá, khoàⁿ-phoà sè-kan bêng-lı̄ chit nn̄g jı̄. Āu-lâi ū chı̍t ê Sòng-kok ê lâng, miâ kiò Khut Kok, lâi kı̀ⁿ i, kā i kóng, Goá kú-kú chiū thiaⁿ-kı̀ⁿ sian-siⁿ lí ê hó miâ-siaⁿ, kóng lí pêng-seng koat-toàn m̄ khéng khò lâng chia̍h pn̄g. Taⁿ goá ū chı̍t khoán chai pû-á ê hoat-tō͘ beh hiàn hō͘ lí, oē hō͘ só͘ chai ê pû-á tēng khok-khok, ná chhin-chhiūⁿ chio̍h-thâu ê khoán, koh chin kāu, iā bô khang bô phāng. Chhân Tiōng thiaⁿ-liáu chiū kóng, Chai pû-á ê lō͘-ēng, sı̄ beh chiong i lâi toé tang toé sai. Nā sı̄ tēng kàu chhin-chhiūⁿ chio̍h-thâu, kāu-kāu koh bô khang bô phāng, án-ni chiū boē ēng tit thang phoà-khui khí-lâi toé mı̍h tit. Che beh kap lâng sǹg choè sím-mı̍h pû-á leh? Khut Kok chiū ı̀n i kóng, Nā án-ni goá chiū beh chiong chit ê hoat-tō͘ pàng hiat ka̍k liáu. Chóng-sı̄ chhin-chhiūⁿ Sian-siⁿ chit khoán ê m̄ khéng khò lâng chia̍h pn̄g, tek-khak iā sı̄ bô lı̄-ek tı̄ lâng; kiaⁿ-liáu sian-siⁿ iā sı̄ kap chit khoán tēng khok-khok ê pû-á sio siāng leh. 
Lâng kap khı̂m-siù hit ê toā hun-piat ê só͘-chāi, chiū-sı̄ lâng oē chai-kiò ho̍k-sāi Siōng-tè kap ho̍k-sāi lâng. Nā kan-ta chai ū i ka-kı̄, iā lóng m̄ chai ū pa̍t lâng, koh m̄ chai thang kóng ū chı̍t ūi chin-sı̍t bô lām-sám éng-oán oa̍h tı̄-teh ê Chú-cháiⁿ, án-ni chiū sit-lo̍h choè lâng ê chu-keh. Só͘-í Sèng-keng ū kóng, Lín ê kng tio̍h chiò tı̄ lâng ê bı̄n-chêng, hō͘ in khoàⁿ-kı̀ⁿ lín ê hó só͘ kiâⁿ, lâi kui êng-kng hō͘ lín tı̄ thiⁿ-nı̍h ê Pē. Chiàu án-ni khoàⁿ lâng nā chhin-chhiūⁿ hit hō siu-tō-jı̂n khı̀ ún-ku san-lı̂m, kan-ta beh kiù ka-kı̄ ê lêng-hûn, kiám m̄ sı̄ sit-lo̍h choè lâng ê pún-hūn? 
Kò͘-chip put-thong 
Tēng-kok ū chı̍t ê lâng beh chhut khı̀ boé chı̍t siang oê, tāi-seng tı̄ in chhù-nı̍h, chiū chiong i ê kha, niû khoàⁿ joā tn̂g joā toā, pí-kàu chı̍t ê iūⁿ chham kha-nı̍h hô-hô, chiū chhiáⁿ hē tı̄ toh-téng. Āu-lâi khı̀ kàu tı̄ koe-nı̍h, chiah siūⁿ-tio̍h boē kı̀-tit the̍h hit ê pān lâi. Tı̄ koe-chhı̄ nı̍h sui-jiân ū chin choē ê oê, khiok m̄-khéng boé, kóng i boē kı̀-tit the̍h hit ê iūⁿ lâi pí khoàⁿ-bāi-teh. Kàu thèng-hāu i tò-khı̀ in chhù, the̍h hit ê iūⁿ lâi ê sı̂, to í-keng soàⁿ chhı̄, tiàm lóng koaiⁿ liáu-liáu lah. In-ūi án-ni soà boé bô oê. Ū lâng kā i kóng, Lí thài m̄ ēng lí ê kha lo̍h-khı̀ pí, chhēng kàu oē hô-hô tú hó mih-sái tio̍h koh tò-khı̀ the̍h hit ê pān. I chiū ı̀n kóng, Lêng-khó͘ tio̍h sı̀n hit ê pān, m̄-thang sı̀n chit siang kha. 
Nā lūn sè-kan, iā ū chit khoán hit hō lâng, choan-choan sı̄ sı̀n kó͘-chá ê hoat-tō͘, m̄ sı̀n sin ê hoat-tō͘, m̄ chai kàu kó͘-chá ê hoat-tō͘, lóng sı̄ ha̍h tı̄ hit ê sı̂-ki teh ēng. Nā sı̄ kan-ta chai hit ê kó͘-chá ê hoat-tō͘, iā lóng boē hiáu-tit ı̂-sı̂ chè-gı̂, án-ni chiū tek-khak oē gō͘ toā-sū. 
O̍h m̄ tio̍h iūⁿ 
Tēng-koāiⁿ ê só͘-chāi, ū chı̍t ê lâng kah in bó͘ kā i choè chı̍t niá khò͘. In bó͘ mn̄g i kóng, Beh choè sím-mı̍h khoán? Hit ê lâng kóng, Chiàu chhin-chhiūⁿ goá kū ê khò͘ hit khoán. In bó͘ chiū chiong hit tè sin ê pò͘, húi-hoāi hō͘ pháiⁿ, chiah choè chı̍t niá kap i ê kū ê saⁿ-tâng. 
Koh ū chı̍t hāng; tı̄ kúi-cha̍p nı̂ chêng, Hiong-káng taⁿ-chiah koah kui Eng-kok, chiū ū chin choē Eng-kok lâng lâi tiàm tı̄ hia, káⁿ sı̄ in-ūi iáu-bē ū choè chhâi-hông ê sai-hū lâi, só͘-í hiah-ê Eng-kok lâng, ū khı̀ chhiàⁿ hia ê pún-toē lâng kā in choè iûⁿ-ho̍k. Hia ê pún-toē chhâi-hông pō͘-pı̂n m̄-bat khoàⁿ-kı̀ⁿ hit khoán ê saⁿ-á-khò͘, khoàⁿ-liáu hoan kı̀-kà, chia iā chı̍t ê tē-á, hia iā chı̍t ê tē-á, kui niá ui kàu choan khang. Chiū koh mn̄g in kóng, Beh cháiⁿ-iūⁿ choè? Hit ê Eng-kok lâng kóng, Chiàu goá kū ê hit khoán án-ni choè. Hit ê chhâi-hông chiū chiàu in kū ê pān, kā i ka lo̍h khı̀ choè, liân hit hō kiⁿ phoà khang koh thı̄ⁿ ê, i iā chiàu hit ê kiⁿ phoà ê sè-bı̄n, kā i ka hō͘ khui, chiah koh thı̄ⁿ. Kàu āu-lâi choè hó, hiahN khı̀ hō͘ hit ê Eng-kok lâng, thí-khui khí-lâi chı̍t-ē khoàⁿ, thài oē kui niá ka kàu chia iā chı̍t khang, hia iā chı̍t khang, chiah koh pó͘ kàu hoe lo̍k-lo̍k? Chiū ham i khau-chháu, m̄-nā m̄ kang-chı̂ⁿ hō͘ i, tian-tò beh kā i thó pò͘-sin ê gûn. Lióng-pêng cheng-lūn boē soah; āu-lâi ū lâng chhut-lâi kā in chhú, chiah tiâu-tı̍t. 
Lūn-kàu ta̍k kok ê hoat-tō͘ kap hong-sio̍k, to lóng ū hó iā ū pháiⁿ; m̄-kú beh thàn hit ê hó ê khah oh, beh o̍h pháiⁿ ê sı̄ khah khoài. Nā beh kan-ta chai hit-ê pháiⁿ ê só͘-chāi, iā m̄ chai thang o̍h hó ê, án-ni kap hit ê Tēng-kok ê hū-jı̂n-lâng teh choè khò͘, chham hit ê Hiong-káng chhâi-hông ê teh choè iûⁿ-ho̍k, ū sím-mı̍h koh-iūⁿ leh? 
Sià-seng chhú-gı̄ 
Tong-iông Tiông-pán-pho Tiō Chú-liông kiù A-táu, hit-sı̂ Lâu Pı̄ kap Chô Chhò kau-chiàn, Lâu Pı̄ thâi-su, i ê chiòng kap ke-koàn lóng sı̀-soàⁿ liáu-liáu. I ū chı̍t-ê tāi-chiòng miâ kiò Tiō Chú-liông, tı̄ pah-bān kun-tiong beh chhē in ê chú-bú kap sió chú-lâng, jı̍p kàu Tiông-pán-pho ê lâm-pêng, chiah khoàⁿ-kı̀ⁿ hu-jı̂n phō A-táu tı̄ chı̍t ê phoà chhiûⁿ-á ē chíⁿ-noâ-téng teh chē, ba̍k-sái sı̀-lâm-sûi. Chú-liông siūⁿ-khí Lâu Pı̄ to̍k-to̍k chit ê kiáⁿ nā-tiāⁿ, nā bô kiù i chiū Hàn-tiâu soà choa̍t-sû, chiū koáⁿ-kín chhiáⁿ Bí Hu-jı̂n chiūⁿ bé, thang saⁿ-kap tô-miā. Hu-jı̂n kóng, Goá sí sı̄ bô iàu-kín, chóng-sı̄ in lāu-pē chí-ū chı̍t ê kiáⁿ nā-tiāⁿ, choan-choan oá-khò chiong-kun pó-hō͘ i, m̄-thang in-ūi goá lâi liân-lūi lí. Kóng-liáu chiū chiong A-táu phō hō͘ i, soà thiàu lo̍h kó͘-chíⁿ--nı̍h sí. Chú-liông chiū chiong A-táu pa̍k toà seng-khu--nı̍h phe sı̀ⁿ-miā phah chhut bān-têng-ûi, chiong A-táu lâi hêng Lâu Pı̄. Āu-lâi tı̄ Se-sio̍k chiap-ūi choè hông-tè. Che sı̍t-chāi sı̄ choan khò Chú-liông ê ióng-béng. 
Lán tha̍k chit khoán ê kó͘-tián, siūⁿ khí Bí Hu-jı̂n pàng-sak sı̀ⁿ-miā, Chú-liông phe-miā kau-chiàn, án-ni lâi kiù A-táu, sı̄ in-ūi A-táu ê sí oa̍h chiū-sı̄ koan-hē Hàn-tiâu ê chûn bông, só͘-í khoàⁿ choè bô kè ê pó-poè; pàng-sak sı̀ⁿ-miā lâi kiù i, chiàu lí-khı̀ khiok eng-kai tio̍h án-ni. 
Taⁿ sè-kan lâng só͘ pó-poè--ê chiū-sı̄ sı̀ⁿ-miā, nā-sı̄ iáu ū pí sı̀ⁿ-miā koh khah iàu-kín ê, chiū-sı̄ boē sí-sit, boē bia̍t-bô ê lêng-hûn. Ki-tok kàng-lı̂m lâi sè-kan, pàng-sak sı̀ⁿ-miā tı̄ sı̍p-jı̄-kè, che tiâu-kò͘-ı̀ sı̄ beh lâi kiù sè-kan lâng ê lêng-hûn. Sèng-keng ū kóng, Jı̂n-chú kàu, sı̄ beh kiù sit-lo̍h ê lâng (Thài 18: 11). 
Kúi-koài ê pún-sū 
Chāi-chá ū chı̍t ê lâng teh kā Chê-ông ūi jı̄-ūi, Chê-ông mn̄g i kóng, Ūi sím-mı̍h tē-it ûi-lân? Hit ê ūi-kang kóng, Káu bé choè ûi-lân. Chê-ông koh mn̄g kóng, Ūi sím-mı̍h tē it khoài? Ūi-kang koh ı̀n i kóng, Kúi-koài iau-chiⁿ choè khoài ūi. In-ūi káu bé sı̄ lâng chá-àm siông-siông teh khoàⁿ, nā ūi chı̍t-tiám-á bô tú-hó ha̍h, lâng chiū liâm-piⁿ khoàⁿ oē chhut; só͘-í khah oh-tit ūi. Iau-chiⁿ kúi-koài sǹg-sı̄ bô hêng bô iáⁿ, iā bô lâng bat khoàⁿ-kı̀ⁿ; put-lūn ūi sím-mı̍h khoán, lâng lóng boē hiáu-tit hun-piat, só͘-í ū khoài ūi. 
Sè-kan éng ū chit chéng lâng, chin gâu chng-kı̂ choè-koài, pı̀ⁿ hiah-ê kı̂-koài ê tāi-chı̀, ka-kı̄ lia̍h choè sı̄ chin gâu, kı̂-sı̍t lóng sı̄ hiah-ê ūi kúi-koài ê pún-sū, lâi teh phiàn lâng nā-tiāⁿ. Che iā thang pí-phēng chhin-chhiūⁿ lâng kóng in ū hoat-tō͘ thang phoà tē-ge̍k khui thian-tông, che khiok khah khoài kóng, in-ūi oh-tit thang kap in piān-pok. Chóng-sı̄ lâng nā kóng in ū hoat-tō͘ thang kiù lâng chhut in ê pháiⁿ, pı̀ⁿ choè hó lâng, che khah oh-tit kóng, in-ūi ū iáⁿ bô iáⁿ lâng liâm-piⁿ chai. Iā chhin-chhiūⁿ Má-khó 2: 9 só͘ kı̀-chài Iâ-so͘ mn̄g chèng lâng kóng, Kā piàn-sūi ê kóng, Lí ê choē sià lah, á-sı̄ kóng, Khí-lâi, giâ lí ê pho͘-á lâi kiâⁿ, toh-lo̍h chı̍t hāng khah khoài? Chiū tng chèng lâng ê bı̄n-chêng i-hó hit ê lâng, hō͘ lâng chai Jı̂n-chú tı̄ toē--nı̍h ū koân thang sià choē. Lán ê Sèng-kàu nā ū kong-hāu thang kiù pháiⁿ lâng pı̀ⁿ choè hó lâng, hō͘ lâng khoàⁿ, peh-sı̀ⁿ chiū khah khoài sı̀n lán só͘ kóng boē khoàⁿ-kı̀ⁿ ê sū. 
Bat lâng khah-hó bat chı̂ⁿ 
Ló͘-kok ê cháiⁿ-siàng Bēng Hiàn-chú, khı̀ Chı̀n-kok tiâu-phèng. Chı̀n-kok ê cháiⁿ-siòng, Hân Soan-chú, siat iân-sia̍h khoán-thāi i; oāⁿ saⁿ-ūi ê kheh thiaⁿ, lóng pâi kàu chin súi, chin chiâu-pı̄, koh chin hó khoàⁿ. Hiàn-chú kóng, Chin-chiàⁿ sı̄ pù kàu-ke̍k liáu. Soan-chú kóng, Lín chhù pí goán chia án-cháiⁿ-iūⁿ? Hiàn-chú kóng, Goán chhù sòng kàu m̄ hó kóng. Chí-ū nn̄g ê tha̍k-chheh lâng, chı̍t-ê miâ kiò Gân Hoê, chı̍t-ê miâ kiò Chu Bû-lêng, hō͘ goá tit-tio̍h kok--nı̍h oē pêng-tiāⁿ, peh-sı̀ⁿ oē an-ún; goá só͘ ū ê, chı̄n chāi án-ni nā-tiāⁿ. Kàu Hiàn-chú chhut-khı̀, Soan-chú chiah kóng, I sı̄ kun-chú ê lâng, lia̍h hit hō poê-iúⁿ gâu-lâng choè hó-gia̍h. Goá sı̄ siáu-jı̂n ê lâng, chiah lia̍h chiah-ê kim-gûn chu-ge̍k choè hó-gia̍h. Goá ka-kı̄ siūⁿ sı̍t-chāi chin kiàn-siàu. 
Sio̍k-gú kóng, Bat lâng khah hó bat chı̂ⁿ, sı̍t-chāi chin ū-iáⁿ. M̄-kú sè-kan lâng, m̄-tān-nā pêng-iú, in-ūi chı̂ⁿ-châi lâi choa̍t-kau, chiū-sı̄ hiaⁿ-tı̄, pē-bú, bó͘-kiáⁿ, í-kı̍p chhin-chhek ê teh kau-chiap, to tio̍h chit hāng chı̂ⁿ choè thâu-chêng. Án-ni khó-kiàn chı̂ⁿ ê khùi-la̍t sı̄ chin toā, chin gâu pé-pa̍k lâng, nā m̄ sı̄ hit hō kam-goān hō͘ i sòng-hiong hoaⁿ-hí khoài-lo̍k lâi siú tō-lí ê lâng, chiū bô hiah khoài oē thoat-lı̄ chit hāng ê pé-pa̍k. Má-khó 10: 23, Iâ-so͘ tùi I ê ha̍k-seng kóng, Pù lâng beh jı̍p Siōng-tè ê kok sı̄ chin oh. Che sı̄ in-ūi ū chı̍t ê hó-gia̍h lâng lâi kı̀ⁿ Iâ-so͘, kūi-teh kiû khoàⁿ tio̍h cháiⁿ-iūⁿ choè, chiah oē tit-tio̍h éng-oán oa̍h. Iâ-so͘ kiò i tio̍h khı̀ piàn boē i ê ke-gia̍p, lâi chín-chè sòng-hiong lâng, chiū chı̂ⁿ-châi chek-chū tı̄ thiⁿ-nı̍h; chóng-sı̄ hit ê lâng thiaⁿ-kı̀ⁿ chit hō oē, bı̄n sûi-sı̂ piàn-sek, ū iu-chhiû ê khoán, iā soà choè i khı̀. Án-ni khó-kiàn chı̂ⁿ-châi ê khùi-la̍t teh pa̍k lâng sı̄ chin toā. Ài tit thoat-lı̄ chit khoán ê pé-pa̍k, tek-khak tio̍h khoàⁿ oē phoà chiah-ê sè-kan ê êng-hián; m̄-thang chhin-chhiūⁿ Hân Soan-chú, kan-ta oē hiáu-tit chng-thāⁿ goā-bı̄n ê hó khoàⁿ. 
Chāi Chı̂n ūi Chı̂n 
Hàn-tiâu ê sı̂ ū chı̍t ê lâng miâ kiò Koái Thong, sı̄ choè Hân Sı̀n ê chham-bô͘. Kàu Hân Sı̀n khı̀ phoà Chê-kok liáu-āu, Koái Thong ū kiò Hân Sı̀n tio̍h poān Hàn, chiong Chê-kok to̍k-lı̍p khí-lâi koán. Hân Sı̀n put-jím kı̂ sim, m̄ thiaⁿ i ê chhùi. Āu-lâi Hân Sı̀n hō͘ Hàn Ko-chó͘ thâi-khı̀. Koái Thong iā hō͘ lia̍h lâi. Hàn Ko-chó͘ mn̄g i kóng, Lí bat kah Hân Sı̀n chō hoán mah? Koái Thong ı̀n i kóng, Tō-chek (kó͘-chá ê pháiⁿ lâng)ê káu, khoàⁿ-kı̀ⁿ Giâu-tè (kó͘-chá ê sèng-ông)chiū toā pūi, chóng-sı̄ Giâu-tè m̄-sı̄ put-jı̂n ê jı̂n-kun, káu khoàⁿ-kı̀ⁿ m̄ sı̄ i ê chú-lâng, khiok sı̄ boē bián-tit bô pūi. Tong-sı̂ goá chai-kiò ū Hân Sı̀n, khiok boē hiáu-tit ū Pè-hā. Hàn Ko-chó͘ thiaⁿ-liáu soà sià-bián i ê choē. 
Lâng kóng, Chāi Chı̂n ūi Chı̂n, chāi Chhó͘ ūi Chhó͘, sǹg sı̄ kah lâng tio̍h chı̄n-tiong, tio̍h chı̄n pún-hūn. Chóng-sı̄ iā ài khoàⁿ sı̄ sím-mı̍h khoán ê chı̄n-tiong. Ū chı̍t chéng hit hō pāi-ka chú-tē, chham hiah-ê Ông--ko Liú--ko khı̀ oang, lóng bô beh kò͘ lāi-thâu, sı̄m-chı̀ tàu hiah-ê lâi khi-hū in ê chhin hiaⁿ-tı̄. Iā ū chı̍t-chióng hit-hō choan-bûn teh pang-chān tùi-te̍k, lâi siong-hāi pún-sin ê bú-kok, i iā hia-hia pai-pai, ka-kı̄ kóng sı̄ chèng-tı̍t bô phian-su, sı̄ chı̄n-tiong teh pò kok, m̄ chai án-ni tùi sím-mı̍h lâng teh chı̄n-tiong, iā teh pò sím-mı̍h lâng ê kok. Hài-ah! Chhin-chhiūⁿ chit khoán ê chı̄n-tiong, chit khoán ê sim-koaⁿ, soà khah-su hit hō káu ê lūi, iā soà m̄ chai thang hun-piat hó pháiⁿ. 
Poaⁿ chhù boē kı̀-tit poaⁿ bó͘ 
Ló͘ Ai-kong mn̄g Khóng-chú kóng, Goá thiaⁿ-kı̀ⁿ lâng teh kóng, hit hō chin gâu boē kı̀-tit tāi-chı̀ ê lâng, teh poaⁿ chhù ê sı̂, liân in bó͘ iā boē kı̀-tit poaⁿ khı̀. Khóng-chú kóng, Che iáu m̄ sı̄ gâu boē kı̀-tit ê lâng; hit hō chin gâu boē kı̀-tit ê lâng, liân i pún-sin iā soà boē kı̀-tit. Ai-kong mn̄g kóng, Àn-cháiⁿ-iūⁿ pún-sin iā soà boē kı̀-tit? Khóng-chú kóng, Kó͘-chá ê sı̂ ū chı̍t ê Hā Kia̍t-ông, i ê chun-kùi choè kàu hông-tè, i ê hó-gia̍h koán kàu thong kok. M̄-kú m̄ thàn sian-ông ê tō-lí, chhia-chhí iàn-lo̍k, bê tı̄ chiú-sek; āu-lâi kok phoà ka bông, soà hō͘ Thong-ông thâi-khı̀, che kiám m̄ sı̄ soà boē kı̀-tit i pún-sin mah? 
Sè-kan hit hō boē kı̀-tit pún-sin ê lâng, kiám kan-ta Hā Kia̍t nā-tiāⁿ? Sè-kan boē kı̀-tit pún-sin ê sū, iā m̄-tān-nā chiú-sek nā-tiāⁿ. Hoān-nā lâng choè chı̍t hāng bô chiàu lí-khı̀ ê tāi-chı̀, á sı̄ kóng chı̍t kù bô lí ê oē, í-kı̍p chûn chı̍t hāng bô tō-lí ê liām-thâu, chiū lóng kàu-gia̍h thang hāi-tio̍h in ê seng-khu kap sim-koaⁿ. Só͘-í kó͘-chá kun-chú ê lâng, tùi ka-kı̄ chı̍t ê, iā tio̍h chûn kín-sı̄n kéng-kài ê sim. 
Bô sı̀n pı̂n, oē gō͘ sū 
Chiu-tiâu ê sı̂, ū chı̍t ê jı̂n-kun, miâ kiò Hiu-ông, i chē ūi tē saⁿ nı̂, chiū chhoā Po Sū choè phian-hui, ông put-chí tek-thióng. Iā siⁿ chı̍t ê kiáⁿ, miâ kiò Pek-ho̍k. Keh nn̄g nı̂ kú liáu-āu, chiū chiong i ê chiàⁿ-bó͘ Sin-hō͘ kap thài-chú Gı̂-kiū hoè-khı̀, lı̍p Po Sū choè chiàⁿ-keng hông-hō͘, iā lı̍p Pek-ho̍k choè thài-chú. Chóng-sı̄ chit ê Po Sū sui-jiân hō͘ Hiu-ông put-chí thiàⁿ-thàng, iáu-kú m̄-bat khoàⁿ i ū hoaⁿ-hí khui chhùi lâi chhiò ê bı̄n-iông. Hiu-ông ai8-tit i hoaⁿ-hí, ēng chin choē hoat-tō͘, iā lāng i boē chhiò; chiū mn̄g i pún-sin, khoàⁿ i ài àn-cháiⁿ-iūⁿ khah sim-sek. Po Sū kóng, Goá choè cha-bó͘ gín-ná ê sı̂, tı̄ goán chhù-nı̍h teh choè in-chiûⁿ, oē kı̀-tit thiah-khui hit ê tiû-toān ê sı̂, hit hō siaⁿ put-chí hó thiaⁿ. Hiu-ông chiū kóng, Án-ni khah khoài. Chiū kiò lâng thoân chí-ı̀ chhut-khı̀ kau-tāi Hō͘-pō͘, (koán chı̂ⁿ-gûn ê koaⁿ), múi-jı̍t tio̍h phoè chı̍t pah phit ê tiû-toān jı̍p-lâi keng-lāi, iā chiū thoân hiah-ê khah ū la̍t ê thài-kàm, chı̍t lâng khiā chı̍t pêng, chiong hit ê tiû-toān, tùi thâu-á sió-khoá ka khui, chı̍t lâng khiú chı̍t pêng, chhut-la̍t lı̀ khı̀, lı̀ kàu kı̍h-kı̍h kiu̍h-kiu̍h. Po Sū thiaⁿ-liáu put-chí hoaⁿ-hí; m̄-kú kè bô kúi jı̍t, ná thiaⁿ ná koàiⁿ-sı̀, m̄-nā bô sím-mı̍h chhù-bı̄, soà ná chhin-chhiūⁿ chin kiáu-jiáu, iā chiū m̄-ài chhiò, m̄-ài koh thiaⁿ lah. 
Hiu-ông siūⁿ-liáu bô hoat-tō͘, chiū chhoā i chiūⁿ-khı̀ ông-kiong lāi ê tâi-téng nı̍h, chiah kiò lâng khı̀ pàng ian-tun. (lan-tun sı̄ chhin-chhiūⁿ ian-tâng ê khoán-sit, chāi-chá bô tiān-pò kap tiān-oē thang thong-ti siau-sit, hō pa̍t ūi chai, chiah ēng chit hō, tùi kiaⁿ-siâⁿ khí, lı̄ chı̍t phò͘ lō͘, á sı̄ gō͘-lí lō͘ chiū chhāi chı̍t ki, tı̍t-tı̍t soà, tı̍t-tı̍t chhut-khı̀; siat-sú hông-tè tú-tio̍h sím-mı̍h iàu-kín ê sū, á-sı̄ chha̍t-bé lâi chhim-hoān tio̍h, chiū chiong ian-tun pàng-khí-lâi, jı̍t-sı̂ ū khoàⁿ-kı̀ⁿ ian, mı̂-sı̂ ū khoàⁿ-kı̀ⁿ hé, iā thâu chı̍t ki nā pàng, tē jı̄ ki khoàⁿ-kı̀ⁿ, iā chiū pàng-khí-lâi; án-ni bô joā-kú chiū sı̀-koè liâm-piⁿ chai ông ū hoān-lān, kūn-hū ê chu-hô͘ chiū khí peng lâi kiù kà.)
Tng teh beh pàng ê sı̂, ū i ê jı̂n-sı̂n chhut chàu kóng, Che sǹg sı̄ Pē-hā kap lia̍t-kok ê chu-hô͘ ū iok, nā m̄-sı̄ hoān-tio̍h toā iàu-kín ê sū, tek-khak boē ēng-tit pàng chit ê ian-tun tit. Siat-sú chím-má nā pàng, āu-lâi ū sū, lia̍t-kok chu-hô͘ chiū m̄-sı̀n. Hiu-ông kóng, Bô iàu-kín, ū tāi-chı̀ goá chiah tam-tng. Hiān-sı̂ thiⁿ-ē thài-pêng, thài ū sím-mı̍h sū? Chiū kiò lâng khı̀ pàng. Kó-jiân keh bô joā-kú, moá-thiⁿ choân sı̄ hé-ian, kūn kiaⁿ-siâⁿ ê chu-hô͘ khoàⁿ-kı̀ⁿ, sûi-sı̂ niá peng beh lâi kiù kà; tia̍p-á-kú tang-sai lâm-pak kūn-hū ê chu-hô͘ lóng toà peng kàu lah. Hiah-ê chu-hô͘ ta̍k-ê lâi tı̄ tâi-kha, mn̄g-khoàⁿ ông ū pêng-an á bô, sı̄ ū sím-mı̍h kín-kip ê tāi-chı̀. Hiu-ông kah lâng kā in kóng, Kai-chài bô sím-mı̍h tāi-chı̀, sı̄ in-ūi kap Hông-hō͘ teh chhit-thô, pàng-khí-lâi khoàⁿ-bāi teh. Taⁿ chhiáⁿ lia̍t-ūi tò-khı̀ siú lín-ê pún-kok. Hiah-ê chu-hô͘ thiaⁿ-liáu, lí khoàⁿ goá, goá khoàⁿ lí, lóng bô oē thang kóng, chiū koh niá peng tò-khı̀. Po Sū tı̄ hit tâi-téng, khoàⁿ-kı̀ⁿ hiah-nı̍h choē ê peng-bé, cháu kàu phihN-phihN chhoán, kia̍h chhiuⁿ kia̍h kiàm, káng kúi-nā bān lâng, ta̍k-ê hiông kài-kài, lóng sı̄ phah-sǹg beh sio thâi, bô siūⁿ lâi kàu tè iā bô siáⁿ bô sū, tāi-ke bô ı̀ bô sù koh tò-khı̀, siūⁿ-liáu chiū toā chhiò khí-lâi. Hiu-ông khoàⁿ-liáu put-chí hoaⁿ-hí. Bô siūⁿ koh keh gō͘ la̍k nı̂, hut-jiân ū Khián-jiông ê peng kong phah lâi. Hiu-ông kiò lâng koáⁿ-kín pàng ian-tun, thang tiàu kok ūi ê chu-hô͘ niá peng lâi kiù èng. Chāi hiah-ê chu-hô͘, ta̍k-ê phah-sǹg sı̄ Hiu-ông kap Po Sū teh kún-chhiò, soà bô poàⁿ lâng beh niá peng lâi. Keh nn̄g jı̍t kiaⁿ-siâⁿ phoà, Hiu-ông kap Po Sū cháu kàu Lê-soaⁿ-kha, hō͘ Khián-jiông ê ông jip-tio̍h, soà hō͘ chhı̀--sí. 
Lūn-kàu lâng tı̄ chit sè-kan, teh lâi-óng kau-poê, lóng tio̍h ū hit ê láu-sı̍t sı̀n-iōng khah iàu-kín. Chı̍t kù hoân chı̍t kù, nn̄g kù sı̄ chı̍t siang. Kó͘ lâng giân kóng, It giân hòng chhut, sù-má lân tui; chiū-sı̄ kiò lâng tio̍h chiàu i só͘ kóng ê oē lâi kiâⁿ, m̄-thang sit-lo̍h sı̀n-iōng. Siat-sú nā kap lâng chih-chiap tāi-chı̀, sim-lāi iā bô siūⁿ, chhı̀n-chhái lām-sám kóng, hi-hi ha-ha, pe̍h-chha̍t pe̍h-koat, bô beh kóng sı̍t-chāi ê oē, āu-lâi nā tú-tio̍h ū chèng-keng tāi-chı̀, sui-jiân kóng kàu láu-láu sı̍t-sı̍t, lâng iā m̄ khéng siong-sı̀n. Chhin-chhiūⁿ Chiu Hiu-ông chiah chı̍t pái ê choè m̄ tio̍h, chiū tı̀-kàu kok phoà, liân ka-kı̄ ê sı̀ⁿ-miā iā bô khı̀. Khóng-chú kóng, Lâng nā bô sı̀n-sı̍t, m̄ chai án-choáⁿ-iūⁿ thài oē ēng tit; chit hō oē sı̍t-chāi chin bô chhò. 
Pó-sioh kong-im 
Khóng-chú bat ū chı̍t jı̍t chhut-goā ê sı̂, thiaⁿ-kı̀ⁿ ū lâng ê siaⁿ háu kàu put-chí chhám-chhoeh. I chiū kiò sak-chhia--ê kiâⁿ khah kín teh, thang lâi kā khoàⁿ bāi. Kàu ê sı̂, khoàⁿ-kı̀ⁿ sı̄ Ko Gû tı̄ lō͘-piⁿ nı̍h teh toā khàu. Khóng-chú chiū lo̍h chhia lâi mn̄g i kóng, Sian-siⁿ ū sím-mı̍h tāi-chı̀ chiah-nı̍h siong-sim, khàu kàu chiah-nı̍h ai-chhám? Ko Gû kóng, Goá ū saⁿ hāng tāi-chı̀, choè-liáu chin m̄ tio̍h. Siàu-liân ê sı̂, ài khı̀ sı̀-koè liû-ha̍k, boē oē ho̍k-sāi goá ê sı̄-toā-lâng, sı̄ chı̍t hāng ê m̄ tio̍h. Sim-koaⁿ siuⁿ toā, chı̀ khı̀ khah koâiⁿ, boē hiáu-tit ho̍k-sāi goá ê jı̂n-kun, sı̄ nn̄g hāng ê m̄ tio̍h. Chham pêng-iú kau-poê put-chí hó, in-ūi sió-khoá sū chiū choa̍t-kau, sı̄ saⁿ hāng ê m̄ tio̍h. Chin-chiàⁿ sı̄ chhiū ài pêng-chēng, m̄-kú hong m̄ khéng soah. Kiáⁿ beh chı̄n hàu, sı̄-toā-lâng boē thèng-hāu tit. Kè-khı̀ boē-tit koh-chài lâi ê, sı̄ nı̂-hè, bô--khı̀ boē-tit koh khoàⁿ-kı̀ⁿ ê, sı̄ pē-bú. Taⁿ goá hiān-chāi sı̄ teh thèng-hāu sí nā-tiāⁿ. Khóng-chú-thiaⁿ liáu, chiū tùi i ê ha̍k-seng kóng, Lín tāi-ke tio̍h oē kı̀-tit chiah-ê oē. Tng hit sı̂, ū sı̄-toā-lâng tı̄-teh ê cha̍p-saⁿ lâng, kap Khóng-chú saⁿ-sı̂, tńg-khı̀ in chhù-nı̍h ho̍k-sāi in ê pē-bú. 
Sio̍k-gú kóng, Pē-bú thiàⁿ kiáⁿ, sı̄ tn̂g lâu chúi, kiáⁿ thiàⁿ pē-bú, chhiū bé iô hong. In-ūi choè kiáⁿ ê lâng, chhut-sı̀ chiū siū pē-bú ê iúⁿ-chhı̄, tı̍t-tı̍t lia̍p, tı̍t-tı̍t kò͘, kàu tı̄ oē pê o̍h kiâⁿ ê sı̂-chūn, choè pē-bú ê lâng, poàⁿ pō͘ iā m̄ káⁿ pàng-lı̄. Lio̍h-á khah toā hàn, chiū kè-kàu beh hō͘ i tha̍k-chheh, ǹg-bāng āu-lâi thàn chia̍h khah khoàⁿ-oa̍h. Kàu chiâⁿ-lâng oē chū-lı̍p ê sı̂, ū-ê pē-bú to í-keng lāu-khı̀ lah. Só͘-í tio̍h thàn-chá lâi hêng hàu-tō, iā tio̍h pó-sioh kong-im. In-ūi pē-bú sı̄ pí lán khah lāu, boē oē siông-siông kap lán tı̄-teh. Koh m̄-tān-nā ho̍k-sāi pē-bú tio̍h án-ni; bô lūn sim-mı̍h tāi-chı̀, lóng tio̍h hiān choè hō͘ chiâⁿ sı̄ khah hó. Nā sı̄ beh thèng-hāu kàu bı̂n-á-chài, kiaⁿ-liáu bı̂n-á-chài ū bı̂n-á-chài ê sū thang pān, boē oē iông-ún lí koh choè kin-á-jı̍t ê sū. Lán lâng tı̄ chit sè-kan tē it tio̍h pó-sioh ê, chiū-sı̄ kong-im, put-kò hiān-chāi nā-tiāⁿ. In-ūi chêng ê kong-im í-keng kè-khı̀, bān-kó͘ chhian-chhiu boē-tit koh lâi. Í-āu ê kong-im,iā bô thang sio̍k tı̄ goá, bông-bông biáu-biáu, siⁿ-sí hō͘ lâng boē phah-sǹg tit. Siat-sú nā m̄ chai thang lia̍h kong-im choè tùi-tiōng, chhut-chāi i chı̍t-jı̍t kè chı̍t jı̍t, chı̍t nı̂ kè chı̍t nı̂, tek-khak boē bián-tit ū āu-lâi ê hoán-hoé lah.