Jia̍t-Sim ê Tâng-Kang
Khı̀ Lo̍k-iá pò͘-tō-só͘, chí-ū khoàⁿ-kı̀ⁿ kia-á téng chı̍t-keng tek-á chhù, í-goā bô sím-mı̍h, tı̄ chia ū chı̍t ūi lí-hoat-tiàm ê hiaⁿ-tı̄, siū kau-tāi kàu-hoē ê só-sı̂, í-goā ê hoē-iú lóng sı̀-soàⁿ tı̄ soaⁿ-téng, chit keng kàu-hoē sı̄ Koan-san bó-hoē lâi siat ê, múi lé-pài ē-po͘ Koan-san kàu-hoē ê Chhı̂ kàu-su lâi teh chò kang, chū-hoē ū 30 miâ chó-iū, Chhı̂ kàu-su lé-pài chá-khí tio̍h hū-chek Koan-san kàu-hoē ê Chú-jı̍t-o̍h kap káng-tō, kàu ē-po͘ sı̂ bô thang hioh-tàu, tio̍h sûi-sı̂ lâi Lo̍k-iá pò͘-tō-só͘, tùi Chú-jı̍t-o̍h khai-sí kàu tı̄ káng-tō liáu chiah tńg-khı̀ Koan-san, sı̍t-chāi sı̄ chı̍t-ê chin phah-piàⁿ chò kang ê tâng-kang. Goá tı̄ Lo̍k-iá chò kang chı̍t lé-pài kú, i múi ē-po͘ lâi, àm-sı̂ khı̀ soaⁿ-téng pò͘-tō, pò͘-tō soah tio̍h koh chē 12 tiám goā ê hoé-chhia tńg-khı̀ Koan-san, chı̍t lé-pài kú lóng bô khoat-se̍k, koh goá khı̀ Koan-san chı̍t lé-pài kú, i iā sı̄ jia̍t-sim tâng-kang, hō͘ goá chin kám-kek. Tı̄ Koan-san ū Sun bo̍k-su-niû siat ê san-tē pó-bó ha̍k-hāu, ū 40 miâ ê ha̍k-seng múi àm lâi chham-ka poê-lêng-hoē, tit-tio̍h Ô͘ bo̍k-su ê chhian-kim thoè goá thong-e̍k kok-gú, i ê thong-e̍k hui-siông ê ki-tı̀ lêng-bín, hō͘ káng-tō ê lâng lóng bô kám-kak ū sím-mı̍h bô chū-iû. Í-chêng tı̄ Tiō-chiu kàu-hoē, ū chı̍t ūi Tân-sió-chiá, iā sı̄ chin gâu thong-e̍k, taⁿ goá só͘ o-ló ê chit 2 ūi sió-chiá lóng kè thoân-kàu-chiá, chin chiàⁿ sı̄ Chú hó ê soán-tiàu. Goān Chú sù-hok in gâu pang-chān tiōng-hu tı̄ kàu-hoē it-chhè ê kang.
Lâm Thoân-tō Tio̍h Hū-chek Hū-jı̂n-hoē
Tı̄ Tang-pō͘ ê kàu-hoē, tû-khı̀ kúi keng khah jia̍t-sim chū-hoē ê kàu-hoē, lé-pài téng ē-po͘ í-goā, lóng sı̄ lé-pài siōng-ngó͘ kap àm-sı̂, só͘-í choē-choē sı̀n-tô͘ chí-ū lé-pài chı̍t po͘, Goá tı̄ Tang-pō͘ 13 jı̍t kú chò kang, nā tı̄ ē-po͘ sı̂ bô lé-pài ê kàu-hoē, kak-tit chin koh-iūⁿ ê khoán-sit, chiàu goá pún-sin ê kám-kak, iā sı̄ lé-pài téng ē-po͘ khah hó, khah ū chı̍t ê choân-siú lé-pài-jı̍t ê ı̀-gı̄, chóng-sı̄ tı̄ Tang-pō͘ lé-pài ē-po͘ bô chò lé-pài ê kàu-hoē lóng ū hū-jı̂n-hoē, sin siat ê kàu-hoē iā ū cho͘-chit. Goá khı̀ Ti-pún kàu-hoē, in chí-ū siat 2 nı̂ goā, kàu-hoē iáu chin iù-tı̄, chóng-sı̄ iā ū hū-jı̂n-hoē, tı̄ hia ê Phoaⁿ thoân-tō sı̄ chı̍t ê to̍k-sin chiá, chóng-sı̄ hū-jı̂n-hoē lóng i teh chú-chhı̂ chū-hoē, hiah ê lâi hù-hoē ê chí-bē lóng sı̄ sin hoē-iú, boē hiáu chú-lí, Phoaⁿ thoân-tō tio̍h hū-chek chú-lí, hùn-liān in tha̍k Sèng-keng, kı̂-tó. Phoaⁿ sian-siⁿ chò chit ê kang, goá siūⁿ chiong-lâi beh soán sian-siⁿ-niû, oē-thang chò chin hó ê chham-khó. Tı̄ chia ū kúi ūi hoē-iú, sı̄ tùi Oán-tong kui-chú Koa bo̍k-su lâi pò͘-tō tit-tio̍h tō-lí ê, in iáu chin siàu-liām Koa bo̍k-su. Chú bat kóng “Pháiⁿ lâng tiong ū chı̍t lâng hoán-hoé. Chiū tı̄ thiⁿ-nı̍h iā beh ūi tio̍h i hoaⁿ-hí,” só͘-í lán chò Chú ê kang m̄-thang ià-siān, “Tio̍h chı̄n-la̍t tı̄ Chú ê kang, tio̍h-boâ m̄ sı̄ khang-khang.”
EN-á Kàu-hoē
Sù-tô͘ Pó-lô bat siá phoe hō͘ Ko-lı̂m-to kàu-hoē kóng, Lín ū chia̍h-leng ê eⁿ-á kàu-hoē. Goán lâi Sin-siâⁿ thâu chı̍t-pái khoàⁿ-tio̍h eⁿ-á kàu-hoē, chit keng kàu-hoē sı̄ Hoa phok-sū lâi pò͘-tō, soà chū-chı̍p bō͘-tō-iú lâi sêng-lı̍p ê kàu-hoē, ū khoah-khoah tú-hó ê thô͘-toē, iā khí chı̍t-keng chin hó-sè ê pài-tn̂g, chóng-sı̄ chò lé-pài ê lâng chí-ū 20 goā lâng, sı̀n-tô͘ tùi tō-lí bat bô joā-choē, in-ūi kàu-hoē chí-ū siat poàⁿ nı̂ kú nā-tiāⁿ. Tı̄ chia Tè thoân-tō chū-chāi chò kang, i kap sian-siⁿ-niû lóng sı̄ tùi bı̄-sı̀n-chiá ê ka-têng hō͘ Chú ho͘-tiàu chhut-lâi chò Chú ê kang ê, chin thang hoaⁿ-hí. In bat tú-tio̍h só͘ thiàⁿ ê soè-kiáⁿ (tióng-lâm) poa̍h lo̍h chúi-khut sí ê chhı̀-liān, chóng-sı̄ hu-hū ū tùi bô mê bô jı̍t ê kı̂-tó, lâi iâⁿ koè chit ê toā chhı̀-liān, kèng-ka bô hoe-sim, ūi Chú jia̍t-sim thoân hok-im, thang chò tú-tio̍h chhı̀-liān ê hiaⁿ-ché chin hó ê kó͘-lē. Sin-siâⁿ sı̄ So͘-hoa kong-lō͘ ê jı̍p-kháu, iā sı̄ tang-sai Hoâiⁿ-koàn kong-lō͘ ê jı̍p-kháu. Lı̄ Sin-siâⁿ bô joā hn̄g, ū chhut-miâ ê Thài-ló͘-kok, hong-kéng chin súi, hù-kı̄n iā ū chhut-miâ ê Chi-oán (XXXX) kı̀-liām lé-pài-tn̂g, hiān-chāi kiàn-tio̍k tiong, thiaⁿ kóng oē khí chin súi, thang kı̀-liām chı̍t-ūi san-tē chí-moē ūi Chú ê hok-im cháiⁿ-iūⁿ bô hiâm lô-khó͘, sı̍t-chāi chin ū ı̀-gı̄.
Ū Chiau-thāi-só͘ Thang Toà
Siūⁿ kàu Í-lı̄-sa kiâⁿ kàu Su-liām, ū chı̍t ê hó-gia̍h ê hū-jı̂n-lâng, kiàn-gı̄ i ê tiōng-hu khí chı̍t keng soè keng liâu hō͘ Í-lı̄-sa toà, chit ê kò͘-sū hō͘ chò kang ê lâng chin him-siān, chóng-sı̄ goá chit pái khı̀ Kong-ho̍k chò kang, ū Chiu chip-sū siat-hoat tı̄ thn̂g-chhiúⁿ ê chiau-thāi-só͘ hō͘ goá toà, it-chhè ê siat-pı̄ iâⁿ-koè lú-siā, kang-lâng iā chin chhin-chhiat. Chiu chip-sū sı̄ thn̂g-chhiúⁿ ê chóng-bū khò-tiúⁿ, choân-ke sı̀n Chú iáu bô joā kú, chóng-sı̄ i tı̄ chit-bū koan-hē oē-thang kó͘-bú thn̂g-chhiúⁿ ê tông-sū lâi thiaⁿ tō-lí.
Tı̄ chit keng kàu-hoē, koh ū chı̍t ūi chin khó-chhú ê Tân tiúⁿ-ló, sı̄ boē thang bô kóng ê, i chin jia̍t-sim pang-chān kàu-hoē it-chhè ê kang, lūn keng-giām, jia̍t-sim, thiàⁿ-sim i sı̄ chı̍t ê Chú tiong-sim ê kang-lâng. Goá mn̄g i chò sím-mı̍h sū-gia̍p, i kā goá kóng, goán sı̄ teh chò hu-hū chē tùi-siòng ê kang-chok, goá mn̄g kóng thái ū hit khoán chit-gia̍p? I kóng ū, goán teh chò mı̂-phoē, m̄ sı̄ kó͘-chá sek ēng phah--ê, sı̄ ēng Bí-kok sek chhia--ê, tio̍h hu-hū chē tùi-bı̄n saⁿ-kap ēng chiam-chhia chò, chı̍t jı̍t oē thang chò kúi nā pah niá mı̂-phoē (chiū-sı̄ kiù-chè ê phoē hit khoán ê), só͘-í ū chū-iû ê sı̂-kan thang pang-chān kàu-hoē. Tı̄ pò͘-tō sı̂-kan chin gâu kó͘-bú lâng lâi thiaⁿ, tı̀-kàu liân pài-tn̂g goā iā chin chē lâng, hō͘ goá kám-kak pò͘-tō m̄ nā káng-su gâu kóng chin iàu-kín, chiū-sı̄ sı̀n-tô͘ tāi-ke jia̍t-sim hun ha̍p-chok koh khah sı̄ iàu-kín.
Bo̍k-su Hiàn Hō͘ Lâng Toè
Tang-tiong tē-it toā keng ê sı̄ Hoa-liân kàu-hoē, goá tı̄ 6 nı̂ chêng bat siū chhiáⁿ tı̄ chia chò 8 jı̍t kú ê kang, só͘-í chia ê tióng-chip, chheng-liân, hoē-iú ū it-bı̄n ê siong-se̍k, Tân bo̍k-su tı̄ chia léng-tō cha̍p-nı̂-kú, kàu-hoē ê liōng kap chit lóng ū chhiong-sı̍t, múi-tn̂g ê poê-lêng-hoē ū 300 lâng chó-iū, pò͘-tō ū koh ke kiû-tō-chiá lâi, chóng-sı̄ bô 6 nı̂ chêng 4, 5 pah lâng ê sēng-hóng, thiaⁿ Tân bo̍k-su kóng chit 6 nı̂ lâi kok kàu-hoē chin chia̍p pò͘-tō, só͘-í hoē-goā ê lâng khah koàn-sı̀ lah, án-ni chiàu khoàⁿ ū sı̂ tio̍h tı̀-ı̀ tı̄ hoē-lāi ê chō-chiū, koh khah ū lı̄-ek.
Taⁿ chit keng kàu-hoē koat-tēng àn 60 bān kho͘ í-siōng beh sin khí pài-tn̂g, chı̂ⁿ í-keng ū 3 hūn 2 í-siōng piān lah, in beh khí chı̍t-keng Tang-pō͘ choè toā keng ê pài-tn̂g, bo̍k-su khek-kí ka-kı̄ ê seng-oa̍h, hiàn chı̍t-bān kho͘, chiū 20 lâng toè i hiàn 1 bān kho͘, ū ê koh khah choē, chin kám-siā Chú, ū hit hō bo̍k-su chiū ū hit hō sı̀n-tô͘. Goá siong-sı̀n tı̄ Tâi-oân ê kàu-hoē, nā chhut choē-choē í-sin chok-chek ê thoân-kàu chiá, ún-tàng choē-choē kàu-hoē beh tit-tio̍h ho̍k-heng, khó-sioh ū ê sı̄ ūi-tio̍h pn̄g-oáⁿ, ū ê sı̄ ūi-tio̍h lı̄-kí, m̄-goān soá-ūi, tı̀-kàu kàu-hoē ná sang-soàⁿ, soe-bı̂, ū ê sı̄m-chı̀ kiat-tóng hun-pêng, sı̍t-chāi chin thang siong-sim. Pó-lô siông-siông tùi hoē-iú kóng, “Hiaⁿ-tı̄ ah, lín tio̍h o̍h goá, chhin-chhiūⁿ goá o̍h Ki-tok,” lán thoân-tō lâng iā tio̍h án-ni, káng-tō ê sı̂ kiò sı̀n-tô͘ hiàn 10 hūn 1 hō͘ Siōng-tè, ka-kı̄ bô sı̍t-hêng, lí siūⁿ hoē-iú kiám ū lâng beh hōng-hiàn 10 hūn 1 mah? Só͘-í lán tio̍h o̍h Tân bo̍k-su ê bô͘-hoān lâi thiàⁿ Chú. Tı̄ chia tē 8 mê chū-hoē, goá ū te̍k-pia̍t ê káng-ián, tê-ba̍k sı̄ “Tông-sı̀n kiat-hun Būn-tê” lâi hù-hoē ê hiaⁿ-tı̄ chí-moē, iok ū 300 miâ chó-iū, choē-choē chò pē-bú ê kóng in tùi chú-lú ê kiat-hun būn-tê, chin thâu thiàⁿ, che sı̄ hiān-chāi kok kàu-hoē só͘ tú-tio̍h ê sū-sı̍t, ǹg-bāng kàu-kài ū choan-bûn ê chí-tō-chiá chhut-lâi chí-tō hoē-lāi ê chheng-liân, ū lí-sióng ê kiat-hun lâi kiàn-siat Ki-tok-hoà ka-têng.
Kiaⁿ Liáu Boē Kóng Tō-Lí
Chhut-goā chò kang, sim tē-it kan-khó͘ ê sı̄ tú-tio̍h phoà-pı̄ⁿ, in-ūi boē thang chiàu só͘ kè-oē ê khı̀ chò, koh hō͘ só͘ chhiáⁿ ê kàu-hoē sit-bāng. Kàu Gio̍k-lí chò kang ū tú-tio̍h phoà-pı̄ⁿ, tı̀-kàu tio̍h chhiáⁿ soan-kàu-su lâi thoè 2 mê ê poê-lêng-hoē, kàu tē 3 àm goá chiū thoa-miā ka-kı̄ hū-chek, iáu koh ū 3 àm ê pò͘-tō-hoē, koh ka-kı̄ kè-sio̍k káng-tō, lâi oân-sêng só͘ kè-oē ê kang. Chia ê sian-siⁿ tióng-chip, hoē-iú lóng chin koan-sim goá ê sin-thé, tiúⁿ-ló ū se-i, iā ū hàn-i. Chhoà tiúⁿ-ló ēng se-io̍h kap chù-siā, Lí tiúⁿ-ló sı̄ Kńg-tang lâng, iā sı̄ tiong-i, i iā the̍h hàn-io̍h lâi, ta̍k jı̍t to sı̄ ēng tiong-se lióng-iōng ê io̍h teh kong goá sin-khu ê pēⁿ. Koh ū chı̍t ê lāu chí-moē khı̀ kap kúi nā pái ê chin-chū hó͘-phek lâi hō͘ goá chia̍h, hō͘ goá kám-kak bô phoe-miā káng-tō tùi Chú tùi lâng lóng boē tit-kè, sui-jiân sı̄ chhut-goā, iáu-kú sı̄ tit-tio̍h Thiⁿ-pē kap lâng ê ài-kò͘ moá-moá, kám-siā Chú. Tı̄ chia ê poê-lêng-hoē múi àm ū chı̍t pah lâng chó-iū, pò͘-tō-hoē pài-tn̂g ê í ū chē kàu bô ūi, chóng-sı̄ chit khoán toā só͘-chāi boē thang kóng sı̄ chin hó sêng-chek. Chhoà tiúⁿ-ló kā goá kóng, Gio̍k-lí liâm-piⁿ beh chò-chiò lah, só͘-í ū lâng m̄ káⁿ lâi thiaⁿ tō-lí, kàu goá lâi Hōng-lı̂m ê sı̂, Gio̍k-lí chiū chò-chiò, ū kúi nā cha̍p bān lâng khı̀ khoàⁿ lāu-jia̍t, sı̍t-chāi sı̄ chin o͘-àm ê só͘-chāi. Goá beh lı̄-khui Gio̍k-lí ê sı̂, chia ê hiaⁿ-ché chin choē lâng lâi chhia-thâu sòng-hêng, tı̄ Tâi-tang, Tong-lí, Hoa-liân téng chò kang liáu, beh lı̄-khui iā sı̄ án-ni, ná hō͘ goá kám-kak chò Chú ê po̍k-jı̂n m̄-thang ko͘-hū Chú ê thiàⁿ, kap chèng hiaⁿ-ché ê kı̂-thāi, chiah ū êng-kng Chú.
Pı̂ⁿ-Tē Kàu-Hoē San-Tē Hoē-Iú
Kiàn-hô kàu-hoē sı̄ Tâi-tang kàu-hoē ê chi-hoē, thoân-kàu-chiá khı̀ chò peng, kàu-hoē keh-piah ê Siā sian-siⁿ chiām-sı̂ hū-chek káng-tō, chiàu-kò͘ kàu-hoē, i sı̄ chū hoat-tek chò Chú ê kang, chin kám-sim. Khó-sioh chit keng kàu-hoē bô sím-mı̍h pı̂ⁿ-tē lâng lâi chò lé-pài, lóng sı̄ san-pau, sı̍t-chāi sı̄ oāⁿ chò san-tē kàu-hoē khah ū ha̍h. Tı̄ hia káng-tō tio̍h hoan-e̍k chò san-tē, só͘-í chı̍t lé-pài ê pò͘-tō-hoē ū Tâi-tang kàu-hoē A-lân ché lâi chò thong-e̍k, i bat 5, 6 chióng ê hoan-siā oē, sı̍t-chāi chin thang pang-chān san-tē thoân-tō Lâi thiaⁿ pò͘-tō ê lâng múi àm ū 2, 3 pah lâng, toā-pō͘ hūn lóng sı̄ san-tē lâng. Tı̄ chia khiā-khí ê pı̂ⁿ-tē lâng, iā sı̄ chin ngı̄-sim, lán eng-kai tio̍h koh khah tı̀-ı̀ thoè chit só͘-chāi ê lâng kı̂-tó, kiû Chú hō͘ in ū tit-kiù ê ki-hoē.
Goán Bô Pài-Tn̂g Thang Lé-Pài
Tāi-bú sı̄ Tâi-tang soàⁿ iàu-kín ê só͘-chāi, chhia ê chhut-jı̍p, lóng ū tı̄ chia thêng-khùn, ū sı̂ 10 hun, ū sı̂ 30 hun, chit tiâu ke chin lāu-jia̍t, lóng sı̄ seng-lí lâng, tû-khı̀ keng-chio, bo̍k-koe í-goā, ta̍k-hāng to chin kùi, sı̄ teh kòng chiah ê chhut-jı̍p ê lú-kheh. Tı̄ chia kàu Tâi-tang iáu ū 75 kong-lí í-siōng, khó-sioh bô kàu-hoē. Chia ū chı̍t ūi tùi Tang-káng lâi chò hiong-tiúⁿ ê N̂g sian-siⁿ, i chin ı̀-ài siat kàu-hoē, sı̄ chı̍t ūi jia̍t-sim ê bō͘-tō-iú, i ài toē-hng ū Ki-tok-kàu ê sı̀n-gióng, sui-jiân ke-lāi ê lâng iáu boē sı̀n Chú, goá tı̄ hia chò kang ū toà tı̄ i ê kong-koán, siū in ê chiau-thāi. Thâu chı̍t àm ê pò͘-tō ū chı̍t ūi Éng-hong kàu-hoē poaⁿ khı̀ ê Mái hiaⁿ-tı̄ kap choân-ke ê lâng, kı̀ⁿ tio̍h goá ê bı̄n hoaⁿ-hí kàu lâu ba̍k-sái, Mái thài-thài kóng, goá chı̍t nı̂ khah ke m̄ bat thiaⁿ tio̍h tō-lí, goá mn̄g i, lí m̄ bat khı̀ chò lé-pài mah? I kóng goán bô lé-pài-tn̂g thang lé-pài, goá thiaⁿ liáu chin siong-sim, ài lé-pài ê lâng bô pài-tn̂g thang khı̀ lé-pài. Tâi-tang kàu-hoē ū chı̄n-la̍t teh siat-hoat, beh khui pò͘-tō-só͘ tı̄ Tāi-bú, nā sı̄ lō͘ hn̄g iáu ū choē-choē khùn-lân. N̂g hiong-tiúⁿ kóng nā oē thang tı̄ hia siat kàu-hoē, thó͘-tē i beh tàu hū-chek. Chhin-ài ê tho̍k-chiá, lán kiám m̄ tio̍h thoè chit só͘-chāi siat kàu-hoē ê sū lâi kı̂-tó mah?
Hoān-Lâng Siū Kám-Kek
2 ge̍h tiong tı̄ Hoa-liân kàu-hoē chò kang ê sı̂, Khng kàu-su lâi hóng-būn goán, soà thok goá tı̄ 2 ge̍h 18 jı̍t kàu Hoa-liân kaⁿ-ga̍k thoân-tō, goá chin hoaⁿ-hí, chiū tah-èng i, kàu hit jı̍t siōng-ngó͘ 9 tiám-poàⁿ, Khng kàu-su chiū lâi chhoā goán khı̀. Kàu ūi tāi-seng kap tián-ga̍k-tiúⁿ kóng oē, āu-lâi chiū khai-sí chū-hoē, Khng kàu-su su-hoē, Si sian-siⁿ kà koa, iok 70 goā ê hoān-lâng toā-siaⁿ chhiùⁿ “Chı̀-hó pêng-iú chiū sı̄ Iâ-so͘”, goá chiong chit kù chò tê-ba̍k, thoân “Iâ-so͘ Ki-tok lâi sè-kan sı̄ choân kang beh chò pháiⁿ lâng ê pêng-iú, I chiah thiàⁿ lán, lín kiám m̄ chiap-siū Iâ-so͘ ê thiàⁿ, lâi chò lí chı̀-hó ê pêng-iú mah?” In tiong-kan kúi-nā lâng siū Chú ê thiàⁿ kám-tōng lâu ba̍k-sái, koat-sim beh chiap-la̍p Iâ-so͘ chò in ê Kiù-chú, Kàu goán beh lı̄-khui kaⁿ-ga̍k ê sı̂, in tùi goán kóng, sian-siⁿ chhiáⁿ lín koh lâi, goá ū tah-èng 3 ge̍h tiong oē koh tı̄ chhı̄-lāi pa̍t keng kàu-hoē chò kang, só͘-í oē koh lâi, khó-sioh goán beh khı̀ ê kàu-hoē siá-phoe lâi kóng ū tô͘-ha̍p, goán soà bô koh khı̀ chhı̄-lāi ê ki-hoē, iā bô thang koh thoân hok-im hō͘ hiah ê siū koaiⁿ ê pêng-iú thiaⁿ, sı̍t-chāi tùi in chin phāu-khiám. Chú bat kóng, “Goá tı̄ kaⁿ-nı̍h lín lâi thàm Goá”, chit kù oē kám-kek goá, tio̍h cháiⁿ-iūⁿ koh khah tı̀-ı̀ kaⁿ-ga̍k thoân-tō, khó-sioh chin bô ki-hoē, iā bô chı̄n pún-hūn, ǹg-bāng tı̄ kaⁿ-ga̍k thoân-tō ê tâng-kang m̄-thang ià-siān chit ê sú-bēng, iā lán chia ê sı̀n-tô͘ tio̍h siông-siông ūi chit ê kang-chok saⁿ thoè kı̂-tó, thang hō͘ hiah ê pêng-iú tit-tio̍h têng-thâu-siⁿ ê seng-oa̍h, sı̄ só͘ ǹg-bāng. Taⁿ goá siá pı̂ⁿ-tē kàu-hoē ê thoân-tō siau-sit kàu chia kiat-sok, koh lâi beh siá san-tē kàu-hoē ê kiàn-bûn-kı̀ kap kò-jı̂n siau-sit hō͘ lán chò chham-khó.
San-Tē Kàu-Hoē
San-Tē Thoân-Tō ê Sı̍t-Chêng
Lâi Tang-pō͘ ê tâng-kang, tāi-khài lóng oē chı̀-goān tı̄ san-tē kàu-hoē thoân hok-im, te̍k-pia̍t lâi koè Tang-pō͘ ê soan-kàu-su koh khah sı̄ tông-kám. Tang-pō͘ san-tē kàu-hoē ta̍k só͘-chāi ū, sı̀n-tô͘ choē, toā-poàⁿ ê kàu-hoē sı̀n-tô͘ chin jia̍t-sim, khó-sioh ū ē-bı̄n kúi-hāng ê khùn-lân, chiū-sı̄ 1) Chò kang ê lâng chió, (tı̄ Sin-káng hong-bı̄n 10 keng kàu-hoē chí ū 3 ê thoân-kàu-chiá). 2) Sı̀n-tô͘ ê keng-chè khùn-lân. 3) Kau-thong toā put-piān, koh thoân hok-im iā ū giân-gú ê khùn-lân, in-ūi Tâi-tang, Hoa-liân 2 koān ê san-tē lâng ū 7 cho̍k, kóng oē bô saⁿ-tâng, in beh ǹg pa̍t-cho̍k ê lâng thoân-tō, sı̄ ēng Jı̍t-pún-oē chò thoân-ta̍t ê kang-kū. Lán pı̂ⁿ-toē bo̍k-su ū 4 ūi, choan-bûn chò san-tē kàu-hoē sûn-hoê ê kang-chok, iā ū soan-kàu-su, lú thoân-tō kap pı̂ⁿ-toē kàu-hoē ê bo̍k-su, teh tàu pang-chān san-tē thoân-tō ê kang, in tāi-khài iā sı̄ ēng Jı̍t-gú kap Kok-gú lâi kóng tō-lí. Sui-jiân sı̄ chiah choē lâng chhut-la̍t teh chò chit ê kang, chóng-sı̄ chiàu goá só͘ khoàⁿ, ná chhin-chhiūⁿ iúⁿ-chúi bô kàu in lim chí-khoah ê khoán, che sı̄ san-tē kàu-hoē ê sı̍t-chêng, lán eng-kai tio̍h koh khah ūi-tio̍h san-tē thoân-tō, lâi hōng-hiàn kap kı̂-tó, chiàu sı̍t-chêng lâi khoàⁿ, in ū chin choē ê khùn-lân, chóng-sı̄ in iā sı̄ tı̄ khùn-lân tiong teh seng tióng. Ē-bı̄n ài kè-sio̍k pò lán chai chiah ê siau-sit.
Bô Niá Sin-súi Ê Kang-lâng
Ū chı̍t ê sûn-hoê soan-tō-su kā goá kóng, in khu-lāi ū 13 miâ ê tâng-kang, kı̂-tiong 3 miâ múi-ge̍h niá 3 pah-kho͘, 4, 5 miâ múi-ge̍h niá chı̍t-pah kho͘, kı̂-thaⁿ ê lâng lóng bô niá, goá mn̄g in beh cháiⁿ-iūⁿ seng-oa̍h, i kóng khı̀ ku̍t-phiâⁿ chèng-chok, á sı̄ chiūⁿ soaⁿ bán chhiū-tı̂n lâi boē, kap chhı̄ cheng-siⁿ lâi ı̂-chhı̂ seng-oa̍h, i koh kóng, jı̍t--sı̂ chiūⁿ soaⁿ chò chho͘-kang. Koh bô chı̂ⁿ thang boé chheh lâi tha̍k, khoàⁿ beh ná ū sím-mı̍h tō-lí thang kóng, chóng-sı̄ in bô in-ūi niá chió, á sı̄ bô sin-súi thang niá chiū pı̂n-toāⁿ, in sı̍t-chāi chı̄n-la̍t chò in só͘ oē chò ê. Chu-ūi tho̍k-chiá, lí kám-kak án-choáⁿ?
Pêng Sı̀n-tô͘ Hiàn-sin Chò-kang
Ū chı̍t chá-khí goá khı̀ Sin-káng ê san-tē kàu-hoē hóng-būn, khoàⁿ-kı̀ⁿ tı̄ sin-khí ê pài-tn̂g lāi ū 40 goā miâ ê lâm-lú teh tha̍k Má-khó hok-im-su, ū chı̍t-ūi 30 goā hoè ê hiaⁿ-tı̄ liām chı̍t-kù, chèng-lâng toè chı̍t-kù, sı̄ A-mı̄-cho̍k oē, in khoàⁿ goá jı̍p-khı̀, hit-ūi teh kà ê hiaⁿ-tı̄ chiū lâi kap goá saⁿ chhéng-an, goá mn̄g i sı̄ bo̍k-su mah? I kóng m̄ sı̄, i sı̄ Chio̍h-kheⁿ-á kàu-hoē (lı̄ Sin-káng iok 27 kong-lí) ê tiúⁿ-ló, hiàn-sin khı̀ ta̍k kàu-hoē hú-tō tha̍k Sèng-keng, in-ūi chit pún A-mı̄-cho̍k ê Má-khó hok-im-su, tú-chiah hoan-e̍k hó, in ēng ka-kı̄ ê oē, tha̍k Sèng-keng hui-siông ê hoaⁿ-hí. Goá siūⁿ chit-ūi chheng-liân tiúⁿ-ló hiàn-sin chò chit ê kang, iā sı̄ kóng boē chhut ê hoaⁿ-hí.
Lé-pài Āu Beh Thiah Pài-tn̂g
Lán thiaⁿ tio̍h chit-kù oē, m̄-thang tio̍h kiaⁿ, tio̍h tàu hoaⁿ-hí. Goá tı̄ Tāi-bú pò͘-tō ê sı̂, in-ūi hia bô pı̂ⁿ-toē ê kàu-hoē, só͘-í Tāi-niáu ê soan-tō-su chiū chhiáⁿ goá tı̄ 3 ge̍h 15 jı̍t (1959 nı̂) ê lé-pài, tı̄ hia káng-tō, hit ê hiuⁿ-siā chin chéng-choê, kéng-tı̀ chin súi, lán ê kàu-hoē tı̄ kiā-téng. Lán ū Chú-jı̍t-o̍h, Chú-jı̍t-o̍h liáu chiū ū toā lé-pài, tek-á-chhù ê pài-tn̂g chē 70 goā lâng tú-hó moá, tāi-ke chù-sı̂n thiaⁿ káng-tō, goá ēng bô chū-jiân ê Jı̍t-gú, soan-tō-su hoan-e̍k chò Phai-oán-cho̍k ê oē. Kàu káng-tō soah, soan-tō-su pò-kò, lé-pài āu hoē-iú m̄-thang soàⁿ, beh thiah pài-tn̂g, goá mn̄g cháiⁿ-iūⁿ beh thiah, i kóng, tı̄ soaⁿ-téng khí chı̍t-keng sin pài-tn̂g, hiān-sı̂ khí kàu thang-téng tio̍h tah kè, bô liāu, só͘-í tio̍h thiah kū pài-tn̂g lâi tah, goá thiaⁿ liáu chin hoaⁿ-hí, chiū kap in khı̀ khoàⁿ sin pài-tn̂g, khoàⁿ liáu bô chhò, tı̄ san-tē nā ū 3 bān kho͘ khí ê pài-tn̂g, sǹg iā boē sit lâng ê lé lah.
In Bô Mı̄-hún Chiū Bô Mı̂-sat
Tı̄ Tāi-niáu koh hō͘ goá kám-kak chı̍t kù sim-sek ê oē, chiū-sı̄ Thian-chú kàu-tn̂g sui-jiân khí liáu chin súi, chóng-sı̄ lé-pài-jı̍t chēng-chēng, goá mn̄g soan-tō-su kóng, ná bô khoàⁿ-kı̀ⁿ in teh chū-hoē ah? I kóng in nā ū mı̄-hún lâi, kàu-iú chiah ū lâi chò mı̂-sat (XX), (mı̂-sat sı̄ in ê lé-pài) nā bô mı̄-hún chiū bô mı̄-sat, goá siūⁿ liáu chin chiàⁿ tio̍h, in-ūi mı̄-sat sı̄ choan-bûn teh chia̍h mı̄-hún, nā bô mı̄-hún mı̄-sat bô khı̀ pa̍t ūi thó-chia̍h, beh gō sí mah? Kai-chài lán ê sı̀n-tô͘ bô mı̄-hún, iā oē lâi kèng-pài Siōng-tè, goān Chú hō͘ in tit-tio̍h pí mı̄-hún koh khah toā ê hok-khı̀.
Goán Ū Kàu-hoē Lín Ka-kı̄ Bô Kàu-hoē
Koh tı̄ Tāi-bú ê hù-kı̄n, hóng-būn Lâm-heng kàu-hoē, tı̄ chia ū chı̍t ūi soan-tō-su bat chò hiong-bı̂n tāi-piáu, i chin chhut-la̍t thoân hok-im, tı̄ chng-nı̍h iā siū pún-cho̍k ê lâng hoan-gêng. Tı̄ chia lán ê kàu-hoē kap Thian-chú kàu-tn̂g chhù-piⁿ pâi chò-hoé, sı̂n-hū ūi-tio̍h Thian-chú kàu-tô͘ khí súi ê pài-tn̂g, in chiū chhiò lán ê sı̄ phoà chháu-liâu, lán ê hoē-iú chiū kā in kóng, goán ê pài-tn̂g sı̄ ka-kı̄ ê, hit keng súi kàu-tn̂g sı̄ sı̂n-hū khí chioh lín--ê, lín ka-kı̄ bô pài-tn̂g. Āu-lâi lán iā têng-sin khí chı̍t keng sin pài-tn̂g, khai kúi nā bān kho͘, koh siat iù-tı̄-hn̂g, 2 ūi pó-bó chí-ū hùn-liān poàⁿ-nı̂ kú, chiū chin gâu kà. Khí-chho͘ iā ū Thian-chú-kàu ê gín-ná lâi tha̍k, āu-lâi sı̂n-hū chai-iáⁿ, chiū kı̀m-chí in ê gín-ná lâi tha̍k lán ê iù-tı̄-hn̂g, sı̍t-chāi sı̄ chin choân-koân khó-lı̂n ê kàu-phài, hō͘ lán kèng-ka jı̄n-bat Thian-chú-kàu sı̄ sím-mı̍h?
Chúi Sı̄ Tùi Soaⁿ-téng Lâu Lo̍h-lâi
Tı̄ pı̂ⁿ-tē thoân hok-im ê sı̂, siông-siông siū tio̍h san-tē kàu-hoē ê pang-chān, tı̄ Tāi-bú pò͘-tō ū Tāi-niáu, Lâm-heng kap hù-kı̄n ê kàu-hoē lâi pang-chān, goá tùi in seh-siā ê sı̂, in chiū kóng “Che sı̄ goán ê pún-hūn, siat-sú nā m̄ sı̄ ū giân-gú ê chó͘-gāi, goán chiū í-keng tùi pı̂ⁿ-tē lâng thoân hok-im, in-ūi in chin khó-lı̂n, iáu teh pài ngó͘-siōng.” Koh tı̄ Tiông-pin ǹg pı̂ⁿ-tē lâng pò͘-tō ê sı̂, Tek-ô͘ kàu-hoē siat-hoat beh hō͘ goá toà lú-siā, chóng-sı̄ hù-kı̄n ê san-tē kàu-hoē, chhiáⁿ goá khı̀ hioh in hia, chiū sı̄ Chio̍h-kheⁿ-á kàu-hoē. Chit keng kàu-hoē ū 300 chó-iū ê lâng teh chū-hoē, pài-tn̂g tē khoah chéng-lí liáu chin chheng-iu, goá chiū bô kheh-khı̀ toà in hia, in sûi-sı̂ phài Hū-jı̂n-hoē kúi-nā ê chí-moē lâi chú-chia̍h, soé-saⁿ téng chiau-thāi. Àm-sı̂ sèng-koa-tūi kap ga̍k-tūi lâi tàu èng-oān pò͘-tō, sèng-koa-tūi chhiùⁿ kok-gú, sı̀-pō͘ chhiùⁿ chin hó thiaⁿ, bô su to͘-chhı̄ kàu-hoē ê sèng-koa-tūi, ga̍k-tūi ha̍p-chàu iā sı̄ sı̀-pō͘ ê, sı̍t-chāi thian-châi. Tı̄ Tiông-pin ê pò͘-tō hiah-nı̍h sēng-hóng, sı̄ choân khò san-tē hoē-iú ê toā pang-chān, goá kā in kóng, pı̂ⁿ-tē lâng ê pò͘-tō tit-tio̍h lín ê toā pang-chān chin kám-siā, in kóng “sian-siⁿ, chúi eng-kai sı̄ tùi soaⁿ-téng lâu lo̍h lâi”, ı̀-sù goán eng-kai tio̍h ǹg pı̂ⁿ-tē lâng thoân hok-im, goá thiaⁿ liáu hui-siông ê kám-kek. Tı̄ hia pò͘-tō ê sı̂, tú-tn̄g chı̍t àm lo̍h toā-hō͘, in tong-tı̍t ê tiúⁿ-ló kóng (hia bô thoân-kàu-chiá) sian-siⁿ ē-hng tiàm goán ê kàu-hoē lâi khui poê-lêng-hoē, goá kóng lo̍h-hō͘ kiám ū lâng beh lâi? I kóng, ū, kàu chū-hoē ê sı̂ ū 2 pah lâng chún-sı̂ lâi chhut-se̍k, chū-hoē soah tiúⁿ-ló tùi hoē-chiòng kóng, lán bı̂n-á chá-khí 7 tiám koh lâi chū-hoē hó-bô? Tāi-ke chàn-sêng, kàu keh-jı̍t chá-khí 7 tiám chêng chiū ū 140 lâng lâi hù chū-hoē, in ê tiúⁿ-ló kóng, ē-hng nā lo̍h-hō͘ boē thang khı̀ pò͘-tō, iû-goân beh chū-hoē, chóng-sı̄ hit jı̍t thiⁿ-khı̀ chin hó, chiū koh khı̀ kè-siok khui pò͘-tō-hoē, in chin ǹg-bāng āu-hoê choan-kang ūi-tio̍h in lâi khui poê-lêng-hoē, in sı̍t-chāi sı̄ iau koh chhùi-ta, chóng-sı̄ keng-kè chı̍t-nı̂ kú iáu boē ūi-tio̍h in chò sím-mı̍h. Tı̄ chia iā sı̄ ū iù-tı̄-hn̂g, 2 ê pó-bó kà 60 miâ ê gín-ná, chhiùⁿ-koa, iû-hı̀, chin thian-chin lān-bān, nā chiàu án-ni khoàⁿ, koh bô kúi nı̂ āu, san-tē kàu-hoē tùi tı̄ chong-kàu kàu-io̍k ê hoat-tián oē iâⁿ-koè pı̂ⁿ-tē kàu-hoē.
In-ūi tı̄ Koan-san ū Sun bo̍k-su-niû siat ê san-tē pó-bó ha̍k-hāu, tùi Tang-pō͘ kok-cho̍k kok kàu-hoē phài lú-chú lâi tha̍k, chia̍h-hùi, ha̍k-hùi lóng ha̍k-hāu hū-tam, pit-gia̍p liáu nā phài khı̀ kàu-hoē sin-súi thiaⁿ kóng iā tùi Sun bo̍k-su-niû, só͘-í oē chin khoài phó͘-kı̍p chong-kàu kàu-io̍k ê sū-gia̍p. Chú kóng tāi-seng ê choē-choē beh chò lō͘-boé, lō͘-boé ê iā ū ê beh chò tāi-seng, chin-chiàⁿ ū iáⁿ.
Kàu-hoē Khí Tùi-siòng
Te̍k-pia̍t tı̄ Sin-káng iân-hái hit tiâu soàⁿ-lō͘, lí nā chē chū-tōng-chhia oē siông-siông khoàⁿ-tio̍h pài-tn̂g khí 2 keng tùi-siòng, chiū-sı̄ lán ê kap Chin Iâ-so͘-kàu ê. Tı̄ chit hong-bı̄n Chin Iâ-so͘-kàu, chin hoat-tián, sui-jiân iâⁿ lán, chóng-sı̄ iā sı̄ m̄ jı̄n su. Sin-káng ê Chin Iâ-so͘-kàu, sı̄ choân-séng tē-it toā-keng ê, tı̄ Sin-káng ū 4 keng pài-tn̂g, chiū-sı̄ san-tē Tiúⁿ-ló-hoē, Chin Iâ-so͘-kàu, Thian-chú-kàu, chit 3 keng lóng khí chin toā-keng koh súi, saⁿ-lı̄ bô joā hn̄g, chí-ū pı̂ⁿ-toē ê kàu-hoē tē-it soè-keng, sı̍t-chāi chin bô pí-phēng, ǹg-bāng sı̀n-tô͘ nā ke-thiⁿ, oē thang koh khí khah lí-sióng ê. Chhin-chhiūⁿ án-ni, san-tē ê só͘-chāi ū sı̂ m̄-nā pài-tn̂g 2 keng tùi-siòng, ū sı̂ 3 keng chhāi 3 kak hêng chò hoé, goá kóng sı̄ thoân hok-im ê piàⁿ-koán, só͘-í lán nā bô hùn-liān choē-choē hó ê kang-lâng, sı̄ bô pān-hoat thang pí pa̍t kàu-phài khah chı̀n-pō͘.
Boē-hiáu Pâi Sūn-sū ( XXXXX) Ê Bo̍k-su
Sin-káng ê san-tē kàu-hoē, kiàn-tio̍k khai 20 bān chó-iū, San-tē-chhù pang-chān sió pō͘-hūn, í-goā lóng sı̄ in ka-kı̄ chhut-la̍t hōng-hiàn khí ê, pài-tn̂g oē thang toé iok 400 lâng í-siōng, sı̄ chúi-nı̂ thih-kin khí ê. Goá tı̄ Sin-káng chò kang ê sı̂, in tú-hó chún-pı̄ beh chò hiàn-tn̂g tn̂g-sek, san-tē lâng ê bo̍k-su lâi pài-thok Lı̂m bo̍k-su pâi hiàn-tn̂g tián-lé ê sūn-sū, kı̂-thaⁿ ta̍k-hāng iā lóng khò Lı̂m bo̍k-su kā in siat-hoat. Chhin-chhiūⁿ án-ni san-tē ê thoân-kàu-chiá sı̄ chiah-nı̍h iù-tı̄, ǹg-bāng San-tē-chhù oē siông-siông chū-chı̍p in chı̀n-siu ê ki-hoē lâi kian-kò͘ san-tē thoân-tō ê sū-kang.
Lín Hoān Lín Goán Hoān Goán
Tı̄ san-tē ū chı̍t ê pháiⁿ sı̍p-koàn, chiū-sı̄ chiah ê A-mı̄-cho̍k ê lâng, (kiám-chhái pa̍t-cho̍k iā ū) nā koah chhek-á liáu, chng-nı̍h ê lâng tio̍h liân-ha̍p chò siu-koah-cheh, tāi-ke tio̍h thâi-ti chú chheⁿ-chhau, lim-chiú, thiàu-bú, nā sı̄ choân-chng sı̀n Chú ê í-keng hoè-chí chit hō pháiⁿ hong-sio̍k, nā ū Thian-chú-kàu, á-sı̄ bô sı̀n Chú ê lâng, in oē lâi chio lán ê hoē-iú chham-ka chò-choeh, chóng-sı̄ kúi-nā só͘-chāi, lán ê hoē-iú ū kā in kū-choa̍t. Thian-chú kàu-tô͘ chin ài chia̍h chiú, in oē kong-kek lán, chóng-sı̄ lán oē kā in kóng, lín bô sèng-kiat ê seng-oa̍h, goán boē-thang chham-ka, lín hoān lín, goán hoān goán. Só͘-í múi-chng, nā ū Ki-tok-kàu kap Thian-chú-kàu in lóng oē saⁿ kong-kek,chúi-hoé put siong-iông, te̍k-pia̍t ū sı̂ chı̍t ka-têng sı̀n 2 kàu-phài ê, in sui-jiân kāng lāi-bı̄n chia̍h-pn̄g, iā sı̄ bô kóng oē, chhin-chhiūⁿ tùi-te̍k chı̍t-iūⁿ. Goá kóng lán m̄-thang oàn-hūn in, bô kap ke-lāi ê lâng kóng oē, in kóng-khí sı̀n Thian-chú-kàu ê m̄ kap lán kóng, m̄ sı̄ goán m̄ kap in kóng, Iâ-so͘ bat kóng, “Tùi-te̍k sı̄ tı̄ lí ke-lāi ê lâng” kiám sı̄ teh chí án-ni mah?
