Khó-chhı̀ Tiong 3 Lâng Khí-siáu
Tı̄ Koan-san kàu-hoē chò-kang ê sı̂, ū khı̀ chham-koan Sun bo̍k-su-niû siat ê san-tē hı̀-lô liâu-ióng só͘, che lóng sı̄ bián-hùi jı̍p-ı̄ⁿ, san-tē lâng chin choē tio̍h hı̀-pı̄ⁿ, sı̍t-chāi ū khó-lı̂n, ǹg-bāng Chú oē i-tı̄ chiah ê lâng, hō͘ in sim-sı̂n jio̍k-thé lóng siū i-tı̄. Goá koh kúi-nā pái khı̀ chham-koan san-tē pó-bó ha̍k-hāu, tı̄ hia chò kang ê sı̂, in tú teh kı̂-khó, 40 miâ ê ha̍k-seng, ūi-tio̍h khó-chhı̀ piàⁿ kàu bô mê bô jı̍t, khó-tê sı̍t-chāi chin chhián, chóng-sı̄ tı̄ chit kúi-jı̍t kú ū 3 ê ha̍k-seng khí-siáu, hō͘ kı̂-û ê ha̍k-seng kap sian-siⁿ tio̍h toā-kiaⁿ. Goá mn̄g in, hoat siáu tio̍h loā-kú chiah oē hó? In kóng khó-chhı̀ liáu chiū hó khı̀ lah, thang chai khó-chhı̀ sı̄ in chin toā ê kiaⁿ-hiâⁿ kap tāng-tàⁿ.
Iáu Boē Chı̍t-nı̂ Oē Chhiùⁿ Hallelujah Chorus
Iû-goân tı̄ Koan-san ê sı̂ tı̄ lé-pài-jı̍t ū XXXX cho̍k ê soan-tō-su, tùi Hoa-liân koān Bān-lêng hiong chhoā 18 miâ lâm-lú chheng-liân lâi chham-koan pó-bó ha̍k-hāu, kap hóng-būn Koan-san kàu-hoē, hit ē-po͘ kap kàu-hoē T.K.C. chhin-bo̍k-hoē, hoē-tiong in ū chhēng hoan-saⁿ thiàu-bú, gı̂m-si, iû-hı̀, koa-sû sı̄ “Chú tı̄ sı̍p-jı̄-kè téng siū-khó͘ chhám-sí.” In iû-hı̀ pâi choè sı̍p-jı̄-hêng chin súi, tiāu iā sı̄ in ê tiāu, in ê sian-siⁿ ná soat-bêng hō͘ goá thiaⁿ, hō͘ goá siū toā kám-tōng. In koh ha̍p-chhiùⁿ chin choē si, chı̍t ūi thǹg chhiah-kha ê chheng-liân tam-jı̄m chí-hui kap khí-tiāu, chin oa̍h-phoat, choè-āu in ū chhiùⁿ Hallelujah Chorus, siaⁿ koân koh chéng-chê, hui-siông gâu chhiùⁿ koh chin chāi-táⁿ, goá mn̄g in o̍h joā-kú, in kóng goán ê sèng-koa-tūi sêng-lı̍p iáu boē chı̍t-nı̂, chin chiàⁿ sı̄ pún-sū, boē chı̍t-nı̂ oē hiah gâu chhiùⁿ. In ê lâm-chú khoàⁿ khí-lâi chhēng-chhah khah boē hiah chéng-chê, nā sı̄ lú-chú chin liû-hêng, chhēng nı̂-liông (XXXX) ê saⁿ, bı̄n-bah pe̍h koh súi, bô su pı̂ⁿ-toē lâng, in chin ài lâi Sai-pō͘ lú-hêng.
Tı̄ Sai-pō͘ Kiám Iáu Ū Tiúⁿ-ló-hoē
Thian-chú-kàu tı̄ tang-pō͘ ēng chin choē pún-chı̂ⁿ khí pài-tn̂g, in soà soan-thoân Sai-pō͘ bô Tiúⁿ-ló-kàu lah, lóng hoán-lâi sı̀n Thian-chú. Só͘-í choē-choē sı̀n-tô͘ mn̄g goá kóng, tàu-tí sı̄ sū-sı̍t á m̄ sı̄? Hō͘ goá siūⁿ-liáu chin hó chhiò, goá ēng Sin-heng kàu-hoē chò lé-pài ê hoàn-teng-phı̀ⁿ hō͘ in khoàⁿ, kap khı̀ Kah-sian khai-bō͘ tián-lé chhiàⁿ 7 tâi iû-lám chhia ê hoàn-teng-phı̀ⁿ hō͘ in khoàⁿ, in chiū bêng-pe̍k Thian-chú-kàu ê pe̍h-chha̍t soan-thoân. Goá chin ài Sai-pō͘ to͘-chhı̄ ê kàu-hoē, chiau-thāi chiah ê kó͘-chíⁿ lāi ê sı̀n-tô͘, koè-lâi chham-koan thang ke-thiⁿ in ê sı̀n-sim kap kiàn-sek, bián siū pa̍t kàu-phài ê ín-iú, lâi iô-tāng in ê sı̀n-sim. Koh khah iàu-kín ê, chiū-sı̄ tı̄ san-tē kàu-hoē ê kang-chok jı̂n-oân, tio̍h siông-siông ēng kang lâi chō͘-chiū in ū sı̀-chiàⁿ ê sı̀n-gióng, hō͘ in ū kian-kò͘ ê sı̀n-sim tı̄ hong-hiám ê jı̍t tí-tng oē tiâu.
Sı̂n-siā Piàn-chò Pài-tn̂g
Jı̍t-pún lâng gâu soán-te̍k sı̂n-siā tē, tı̄ Tang-pō͘ chē-chē sı̄ Jı̍t-pún lâng ê ı̂-bı̂n-chhoan, kı̀ⁿ-nā sı̄ ı̂-bı̂n-chhoan, it-tēng ū sı̂n-siā. Ū só͘-chāi, ı̂-bı̂n-chhoan tı̄ kong-ho̍k āu, hō͘ pún-séng lâng chiap-siu lâi, chiū chiong sı̂n-siā kái chò biō hō͘ lâng kèng-pài ngó͘-siōng, nā sı̄ sı̂n-siā san-tē lâng chiap-siu lâi, in chiū kái-chò lé-pài-tn̂g. Tı̄ Siū-hong A-mı̄-cho̍k ê kàu-hoē chiū-sı̄ sı̂n-siā kái-chō ê, chin lí-sióng, khoân-kéng hó, koh ha̍h-ēng, nā bô soaⁿ-kha hit ki toā sı̂n-siā mn̂g (XXX) bô lâng chai chit-keng pài-tn̂g sı̄ sı̂n-siā kái ê, in-ūi in koh ēng kúi-nā bān kho͘, ēng chúi-nı̂ thih-kin, kái-kiàn kàu hoàn-jiân it-sin, hō͘ beh khı̀ chò lé-pài ê lâng oē seⁿ-chhut chong-giâm ê sim. Goán tı̄ lé-pài āu khı̀ chham-ka in ê lé-pài, sian-siⁿ káng-tō tiong, khoàⁿ goán jı̍p-khı̀ chin hoaⁿ-hí, āu-lâi ū chhiáⁿ goá tùi in kóng oē, goá ū kóng kúi-kù ê chhéng-an, in chin hoaⁿ-hí, sı̍t-chāi iā ū su-iàu lán siông-siông tùi in kó͘-lē.
Tē-it Toā Keng Ê Tiúⁿ-ló-hoē
Lán nā siūⁿ-tio̍h Tâi-pak, Tâi-tiong, Tâi-lâm, Ko-hiông, Pı̂n-tong téng ê hó kàu-hoē, chiū beh siūⁿ kóng sı̄ Tiúⁿ-ló-hoē ê toā kàu-hoē, chóng-sı̄ sū-sı̍t Tâi-oân Tiúⁿ-ló-hoē, tē-it toā keng ê kàu-hoē sı̄ Tang-pō͘ A-mı̄-cho̍k ê Kong-ho̍k kàu-hoē, chit keng kàu-hoē chò lé-pài chí téng-po͘ ū 600 lâng í-siōng, kı̂-tó-hoē ū 300 goā lâng, lán pı̂ⁿ-tē ê kàu-hoē ū 95 nı̂ ê le̍k-sú, ū chı̍t-keng kui-bô͘ chiah toā ê kàu-hoē á bô? In hiān-chāi tı̄ sı̂n-siā tē khí chı̍t keng tn̂g 100 chhioh, khoah 40 chhioh, chúi-nı̂ thih-kin ê lé-pài-tn̂g, in só͘ ēng ê thih-ki chin toā, in-ūi kiaⁿ tē-tāng kap hong-thai ê koan-hē, chit ê kū sı̂n-siā tē sı̄ chı̍t-lia̍p ê sió-soaⁿ, tı̄ Kong-ho̍k choè koân ê só͘-chāi, khoân-kéng chin hó, chē khı̀-iû-chhia khoàⁿ tit chin chheng-chhó, beh peh chiūⁿ soaⁿ-téng ê jı̍p-kháu, iā sı̄ ū chı̍t ê toā sı̂n-siā ê mn̂g, tú hó kap Siū-hong kàu-hoē saⁿ-tâng ê khoân-kéng, put-kò chit keng pài-tn̂g chiah khí kàu thang-téng ê só͘-chāi, hiān-sı̂ iáu bô chı̂ⁿ thang kè-sio̍k chı̀n-hêng kang-sū, goá mn̄g in kang-sū-hùi ū-tēng joā-chē? In kóng goán boē-hiáu ū-sǹg, chí-ū khí kàu hó ûi-chí. Chit khoán sı̀n-sim kap hōng-hiàn ê cheng-sı̂n, kiám ū khah su pı̂ⁿ-tē kàu-hoē mah? Kiaⁿ-liáu “choē-choē tāi-seng ê beh chò lō͘-boé, iā choē-choē lō͘-boé ê beh chò tāi-seng” goá sı̀n chit kù oē oē sı̍t-hiān tı̄ san-tē kàu-hoē.
Khí Sin Pài-tn̂g Jia̍t
Tang-pō͘ ê san-tē kàu-hoē, hiān-chāi sı̄ kiàn-tn̂g choè ko-tiâu ê sı̂-kı̂, goá tı̄ kū-nı̂ chhin-ba̍k khoàⁿ-kı̀ⁿ ê, ū 12 keng, chiah ê lóng sı̄ pı̂ⁿ-tē ê san-tē kàu-hoē, m̄-bián jı̍p-soaⁿ-chèng, in só͘ chè ê nâ-tô͘ lóng sı̄ hiān-tāi-sek ê kiàn-tio̍k-bu̍t, tùi chiâⁿ-cha̍p bān-kho͘, khí kàu kúi-cha̍p-bān kho͘ put-téng, in oē thang ēng séng chı̂ⁿ khí súi koh ióng ê chhù, hit ê khí hoat sı̄ án-ni: chúi-nı̂, thih-tiâu, hiā, ēng chı̂ⁿ khı̀ boé, bo̍k-liāu, soa lóng hoē-iú ka-kı̄ chhut-kang chhái-chı̍p, sai-hū-kang chhiáⁿ hoē-iú chò, chóng-sı̄ kang-chı̂ⁿ chin sio̍k, sió-kang it-khài hoē-iú chò kong-kang, só͘-í oē thang séng 3 hūn 1 ê hùi-iōng, sı̍t-chāi chin thang chò lán ê bô͘-hoān, in múi-keng chí ū tit-tio̍h San-tē-chhù sió pō͘-hūn ê pang-chān, í-goā bô tàng tê-chı̂ⁿ, chí-ū ka-kı̄ lia̍p-chek hōng-hiàn. Phı̀-jū lâi kóng, 3 nı̂ chêng goá khı̀ thàm-hóng Bān-lêng kàu-hoē, hit sı̂ chí-ū chı̍t keng phoà-chháu-liâu ê pài-tn̂g, in khoàⁿ-kı̀ⁿ keh-piah chı̍t-keng bo̍k-chō phín-khı̀ (XXXX) chin súi ê Thian-chú-tn̂g, chiū koat-sim beh khí sin pài-tn̂g, te̍k-pia̍t Hū-jı̂n-hoē múi chı̍t ê hoē-oân, gı̄-koat chhı̄ chı̍t chiah ti lâi hōng-hiàn, kàu goá kū-nı̂ 9 ge̍h koh khı̀ hóng-būn in ê sı̂, chiū khoàⁿ-tio̍h chı̍t keng tú khí hó ê, chúi-nı̂ thih-kin ê sin pài-tn̂g, hō͘ goá siū chin toā ê kám-kek, tı̄ keh-piah ê Thian-chú-tn̂g liân oē thang pí-tit to͘ boē, hō͘ lán chai in khí pài-tn̂g ê jia̍t-sêng, chı̀-khı̀ sı̄ joā-nı̍h toā?
Chhàu Sim-koaⁿ Hiàn Noā Chhâi-liāu
Sin-káng Lı̂m bo̍k-su, chhoā goá thàm-hóng hù-kı̄n chı̍t-keng A-mı̄-cho̍k ê kàu-hoē, in chí-ū 20 goā hō͘, iā khí chı̍t-keng 7, 8 bān-kho͘ ê sin pài-tn̂g, thiaⁿ kóng hiàn chı̂ⁿ hiàn kang í-goā, chı̍t ê hoē-iú tio̍h koh hiàn chı̍t ê thang-liāu, kı̂-tiong chı̍t ê thang-kheng sı̄ í-keng pháiⁿ khı̀ lah. Goán kóng chit ê thang-liāu bô hó, chı̍t-ūi tiúⁿ-ló kóng, chit ê hoē-iú sı̀n-gióng chhàu khı̀, só͘-í hiàn chit ê noā ê thang-liāu (XX信者X信仰X臭XXXXX臭XXXXXX獻上XX), chit kù oē iā hō͘ goá siū toā kám-tōng, lán m̄ chai bat ēng noā ê mı̍h. hiàn hō͘ Chú á m̄ bat? Lán tio̍h chin kín-sı̄n.
Chi-oán (XXX) Kı̀-Liām-tn̂g
Chi-oán chit-ūi hok-im ê lú chiàn-sū, sı̄ Thai-ia-lu cho̍k (XXXX) tiong bô lâng m̄ bat ê, tı̄ Jı̍t-chèng sı̂-tāi i chin hoaⁿ-hí lô-khó͘ thoân hok-im tı̄ tâng-cho̍k ê tiong-kan, kong-ho̍k āu ū lâng siá chı̍t pún chheh kiò choè “I chhoā in chhut”, iā thang kóng sı̄ “Chi-oán toān”. Sun bo̍k-su ūi-tio̍h beh siàu-liām i thoân hok-im hi-seng ê cheng-sı̂n, tı̄ Thài-ló͘-kok jı̍p kháu ê soaⁿ-kha ūi i khí chı̍t keng “Chi-oán kı̀-liām lé-pài-tn̂g” sui-jiân khí bô toā-keng, chóng-sı̄ chin gē-su̍t ê khí-hoat (chhin-chhiūⁿ Tâi-oân Sı̂n-ha̍k-ı̄ⁿ ēng chio̍h-thâu, thih-kin, chúi-nı̂ khí) ê chit keng kàu-hoē, iā thang kóng le̍k-sú siōng ta̍t-tit kı̀-liām ê kàu-hoē, tı̄ chia khoân-kéng súi, thang hō͘ hoâiⁿ-koàn, So͘-hoa nn̄g kong-lō͘ ê lú-kheh tám-gióng Ki-tok-tô͘ ê thoân-kàu cheng-sı̂n, chin-chiàⁿ thoân hok-im ê lâng, in ê kha-pō͘ súi kàu cháiⁿ-iūⁿ?” Goán chı̍t-hêng sı̀-miâ jı̍p Thài-ló͘-kok oán-chiok, tú-hó hoâiⁿ-koàn kong-lō͘ siū chúi-chai toā sún-hāi, kui-tiâu ê chúi-nı̂ lō͘, lóng lâu pháiⁿ, ko͘-put-chiong tio̍h koh ēng pōng-chí pōng soaⁿ-phiâⁿ. Kúi-nā pah lâng teh chò kong-kéng hō͘ goán tio̍h-kiaⁿ, ūi-tio̍h beh khui chit tiâu lō͘ hiah khó͘-sim mah? Thang chai lán ê Chú thè lán khui chı̍t-tiâu éng-oa̍h ê lō͘, só͘ chhut ê tāi-kè joā-toā, lán iā tio̍h án-ni bô hiâm lô-khó͘ thàn ki-hoē thoân tō-lí hō͘ hiah ê bı̄ tit-kiù ê lâng lâi pò-tap Chú ê toā un. Thài-ló͘-kok ê kéng-tı̀ chin súi, goá ài chhiáⁿ chu-ūi tho̍k-chiá ū ki-hoē khı̀ thit-thô, lí chiū beh kám-kak Siōng-tè chhòng-chō ê kı̂-biāu kap úi-tāi. Thiaⁿ kóng Thian-siông ê kéng-tı̀ koh khah súi, chóng-sı̄ hit sı̂ lō͘ pháiⁿ boē tit jı̍p.
Tha̍k Bián-chı̂ⁿ Ê Ha̍k-hāu
Tı̄ Tang-pō͘ ū 3 keng tha̍k-chheh bián chı̂ⁿ ê ha̍k-hāu, chiū-sı̄ lán Tiúⁿ-ló-hoē kap Sun bo̍k-su-niû kò-jı̂n só͘ siat ê. Thâu chı̍t keng sı̄ Gio̍k-san-sı̂n-ha̍k-su-ı̄ⁿ, ūi-tı̀ sı̄ tı̄ Siū-hong Tı̂-lâm-chhoan, tùi Hoa-liân kàu siū-hong, ū kong-lō͘ khı̀-chhia tùi Su-ı̄ⁿ keng-koè, hia ê san-súi kéng-tı̀ ke̍k-kı̂ hó, Hoa-liân koān siūⁿ beh chiong hit ūi chò hong-kéng khu, tı̀-kàu Su-ı̄ⁿ sin hāu-sià ê kiàn-siat siū choē-choē ê chó͘-gāi, hiān-sı̂ ha̍k-hāu chí-ū kúi keng tek-á-chhù tı̄ soaⁿ-phiâⁿ, thâu-chêng ū chı̍t ê toā-pi iā ū soaⁿ, kéng-tı̀ chin súi, chhin-chhiūⁿ chı̍t-pak ê tô͘. Goán tı̄ Siū-hong chò kang ê sı̂, ū 2 pái khı̀ hia kò-chûn tiò-hı̂, iā tı̄ ha̍k-hāu chia̍h-pn̄g, hāu-tiúⁿ Ko bo̍k-su chin jı̄n-chin keng-êng ha̍k-ı̄ⁿ, ha̍k-seng tı̄ kong-khò í-goā, ū chéng-lí ha̍k-hāu iōng-tē, koân-kē ku̍t hō͘ pêⁿ, bô lō͘ chō kàu ū lō͘, koh iā ū chō lı̂m, chai kam-á, lóng sı̄ sian-siⁿ ha̍k-seng saⁿ-kap chò, ū chı̍t ūi Tiuⁿ bo̍k-su tùi chit hong-bı̄n chin ū keng-giām. Tı̄ lé-pài-jı̍t ha̍k-seng siū phài kàu san-tē pún-cho̍k ê kàu-hoē khı̀ chò kang. Chit keng ha̍k-hāu, chóng-sı̄ sū-sı̍t chiân-tô͘ iáu chin choē khùn-lân, lán tio̍h to-to ūi chit keng ha̍k-hāu tāi-tó.
Koh lâi tē-jı̄ keng sı̄ tı̄ Koan-san-tı̀n, kau-thong lı̄-piān, só͘-chāi ha̍p-ēng, sı̄ Sun bo̍k-su-niû siat ê, ū 40 miâ ê san-tē lú-chú tùi ta̍k-cho̍k ê só͘-chāi phài lâi tha̍k-chheh, khí-thâu sı̄ tha̍k poàⁿ-nı̂ kú, chiū pit-gia̍p phài khı̀ kok kàu-hoē kà iù-tı̄-hn̂g, sui-jiân chí-ū tha̍k poàⁿ-nı̂, chóng-sı̄ in ū im-ga̍k ê thian-châi, toâⁿ-khı̂m, kà koa, iû-hı̀, lóng ū te̍k-sek, bô su pêⁿ-tē kàu-hoē iù-tı̄-hn̂g kà ê chiat-bo̍k. Tùi chit keng ha̍k-hāu í-keng chhut chin choē lāu-su, hiān-chāi thiaⁿ kóng sı̄ 2 nı̂ chè, Ô͘ bo̍k-su kiam hāu-tiúⁿ teh liāu-lí, in iā sı̄ tha̍k-chheh, chia̍h-pn̄g lóng bián chı̂ⁿ, só͘-í san-tē lú-chú chin ài tha̍k.
Tē saⁿ keng sı̄ Khèng-hong lú-chú hō͘-lí ha̍k-hāu, iā sı̄ Sun bo̍k-su-niû siat ê, chhiáⁿ Toh bo̍k-su-niû teh liāu-lí, ha̍k-seng 40 miâ, iû-goân tùi ta̍k cho̍k lâi ha̍k ê, in ta̍k chá-khí ū chó-thian kı̂-tó-hoē, lé-pài-jı̍t iā tio̍h khı̀ pún-cho̍k pang-chān Chú-jı̍t-o̍h, chia ê ha̍k-seng chiām-sı̂ tı̄ Khèng-hong kàu-hoē lāi tha̍k-chheh, bô hāu-sià, khiok sı̄ ū ha̍k-hāu, ha̍k-seng ê chia̍h-sı̍t iā sı̄ ha̍k-hāu hū-tam. Goá tı̄ chia chı̍t lé-pài kú, khoàⁿ-kı̀ⁿ in ê seng-oa̍h chin thian-chin lān-bān, in ê bo̍k-tek sı̄ pit-gia̍p liáu, beh tńg-khı̀ san-tē chí-tō san-tē lâng ū oē-seng, chı̀n-jı̍p tı̄ lí-sióng ê seng-oa̍h, che iā sı̄ chı̍t kiāⁿ chin iàu-kín ê sū. Í-siōng chit saⁿ-keng ha̍k-hāu chóng-ha̍p khí-lâi, sı̄ teh chō-chiū chong-kàu kàu-io̍k kap seng-oa̍h sı̍t-chè hong-bı̄n ê chí-tō-chiá, siong-sı̀n san-tē lâng beh tùi chit 3 keng ha̍k-hāu só͘ chhut ê jı̂n-châi lâi tit-tio̍h chin hó ê chí-tō kap pang-chān, goān Chú pang-chān tı̄ ha̍k-hāu chò kang ê lâng, ū thiàⁿ-sim kap thun-lún ê sim, lâi hoat-tián chit ê iàu-kín ê kang.
Kò-jı̂n Tâm-lūn Kap Siau-sit
Hòng-tōng Chò Thoân-tō
Lō͘-ka 15 chiuⁿ só͘ siá ê hòng-tōng chú, tû-khı̀ lāu-pē ê thiàⁿ, kap hòng-tōng chú ê hoán-hoé, sı̄ bô sím-mı̍h hō͘ lán hó ê ı̀n-siōng, te̍k-pia̍t chit 2 jı̄ hòng-tōng, goá thiaⁿ liáu bô kám-kak hó thiaⁿ, chóng-sı̄ tı̄ san-tē ê soan-tō-su tiong ū chı̍t-ūi kiò chò Ia̍p Hòng-tōng ê, Chú tiàu i chhut-lâi thoân hok-im, Un bo̍k-su kā goá kài-siāu kóng, chit ūi chiū-sı̄ “Hòng-tōng thoân-tō”, goân-lâi sı̄ i ê miâ kiò Hòng-tōng, i í-keng chin jia̍t-sim teh chò Chú ê kang beh chhoā hiah ê hòng-tōng ê kiáⁿ-jı̂, tńg-lâi kui-ho̍k tı̄ chû-ài ê Thiⁿ-pē. In-ūi Chú bat kóng, “Pháiⁿ lâng tiong ū chı̍t lâng hoán-hoé chiū tı̄ thiⁿ-nı̍h iā beh án-ni ūi-tio̍h i hoaⁿ-hí”.
Sím-mı̍h Sı̄ Siōng-tè Ê Chí-ı̀
Tı̄ 1959 nı̂ ê 7 ge̍h, goán tı̄ Tâi-tang kàu-hoē hioh-mê, kap chı̍t ūi tùi Sai-pō͘ beh khı̀ hù-jı̄m ê tâng-kang tâng pâng-keng, i chin hùn-khài tong-kio̍k ê lâng, thàn jı̂n-chêng chò sū, bô chiàu hoat-tō͘, i koh kóng chiàu thiu-khau m̄ sı̄ goá tio̍h lâi Tang Tiong chò-kang, chóng-sı̄ in-ūi bó͘ lâng m̄ lâi chiū tu goá lâi, án-ni kiám iā sı̄ Siōng-tè ê chí-ı̀ mah? I sı̍t-chāi chin hùn-khài, nā sı̄ goá an-ùi i kóng, kiám-chhái hiah ê lâng án-ni choè, iā sı̄ ū Siōng-tè ê hó chí-ı̀. Keng-koè chı̍t-ge̍h jı̍t āu, goá khı̀ i ê kàu-hoē chò kang, thiaⁿ kóng i í-keng kap chı̍t-ūi Tang-pō͘ chhut-miâ ê bo̍k-su ê chhian-kim tēng-hun, (hit ūi sió-chiá bat chò goá ê thong-e̍k), goá koh mn̄g hit ê tâng-kang kóng, tàu-tí lí lâi Tang-pō͘ chò kang sı̄ Siōng-tè ê chí-ı̀ á m̄ sı̄? I ı̀n kóng, “Tek-khak sı̄!” Sı̍t-chāi Chú ê chí-ı̀ chin kı̂-biāu, kàu sı̂ lán chiah oē bêng-pe̍k, lán eng-kai tio̍h sūn-ho̍k Chú, chiah oē siū chiok-hok.
Bêng-khián Thau Kā Ê
Hù-lí ê Tiuⁿ bo̍k-su, chhı̄ chı̍t chiah 4 chheng kho͘ ê káu-á kiáⁿ, i ēng chin choē cheng-sı̂n kap hong-hoat teh kà, iā tùi Jı̍t-pún boé chheh lâi tha̍k, í-keng ū kà chin choē pō͘-sò͘ lah! Chóng-sı̄ chit chiah káu-á ta̍k-àm to͘ lâi goán ê bı̂n-chhn̂g-kha kā phoê-ê, goán chiū kā bo̍k-su kóng, bo̍k-su chiū kà káu m̄ thang kā lâng-kheh thau kā ê, nā sı̄ káu-á lóng m̄ thiaⁿ chú-lâng ê oē, chin-chiàⁿ Bêng-khián thau kā oê. Kin-á-jı̍t choē-choē Ki-tok-tô͘ iā sı̄ chhin-chhiūⁿ Bêng-khián oē thau kā ê, in iáu oē lim-chiú, chia̍h-hun, chhoh-pháiⁿ chhùi, khah kóng to m̄ koé.
Ki-su̍t Būn-toê
Hōng-lı̂m kàu-hoē lâng-kheh-thiaⁿ ê mn̂g chin kē, chóng-pho͘ téng kàu mn̂g-bâi chiah 4 chhioh goē, só͘-í beh chhut pâng-keng nā bô chù-ı̀ oē kho̍k tio̍h thâu-khak, Í-chêng chı̍t ūi bo̍k-su khı̀ chò kang, sian-siⁿ kóng tio̍h chù-ı̀, m̄ thang kòng tio̍h thâu-khak, hit ūi bo̍k-su kóng, boē lah! che sı̄ ki-su̍t būn-toê, chóng-sı̄ bô chı̍t-sı̂-á-kú kòng tio̍h 2 pái. Goá khı̀ chò kang ê sı̂, sian-siⁿ kap thài-thài iā sı̄ seng kā goá thong-ti, goá kóng goá ê ki-su̍t ún-tàng khah hó, chhiáⁿ bián khoà-ı̀, kàu khùn tiong-tàu khí-lâi, sûi-sı̂ thâu-khak kòng chı̍t-lûi, sian-siⁿ hu-hū tı̄ in ê pâng-keng chhiò kàu ha̍h ha̍h kiò, soà kóng lí ê ki-su̍t ū iáⁿ boē bái to-tio̍h, chhin-chhiūⁿ án-ni Ki-tok-tô͘ nā bô kín-sı̄n, chí khò ka-kı̄ chiū beh sit-pāi, ná ū iáⁿ ki-su̍t joā-hó?
Khòng Kâu Ka
Iā sı̄ tı̄ Hōng-lı̂m kàu-hoē só͘ tú-tio̍h ê sū, thoân-tō sian-siⁿ hu-hū, ūi-tio̍h goá khı̀ ta̍k àm to hiâⁿ e̍k-tháng chúi hō͘ goá soé sin-khu, chóng-sı̄ in hiâⁿ chúi sı̄ ēng chit ê toā seⁿ-tiáⁿ, chhin-chhiūⁿ e̍k-tháng hiah toā, chit khoán tiáⁿ tāi-khài sı̄ lông-chhoan ê lâng sa̍h ti-liāu teh ēng ê, tiáⁿ toé ēng pang chū teh, chóng-sı̄ nā lo̍h khı̀ chı̀m, bô soè-jı̄, pang cháu khı̀ lı̄-khui tiáⁿ-té oē ù-tio̍h sin-khu, sio-tio̍h chin thiàⁿ, in-ūi goá sı̄ siùⁿ kâu, só͘-í ta̍k-pái nā beh lo̍h khı̀ chı̀m, chiū kám-kak beh lo̍h-khı̀ khòng kâu-ka chı̍t-iūⁿ, āu-lâi hō͘ sian-siⁿ in chai-iáⁿ, kàu sı̂-chūn chiū kiò kóng, “Tân sian-siⁿ chhiáⁿ lí lâi khòng kâu-ka.”
Goá Iā Sı̄ Bô Pâi Ê
Gio̍k-lí kàu-hoē Chhoà tiúⁿ-ló, tı̄ Tang-pō͘ ê kàu-hoē tāi-khài lâng lóng bat i, i chò i-seng, i-su̍t te̍k-pia̍t hó, tı̄ kàu-hoē koh jia̍t-sim, i mn̄g goá kóng “Lí sı̄ tó-ūi ê Sı̂n-ha̍k-hāu pit-gia̍p ê ”, goá sêng-sı̍t tùi i kóng, “Goá bô tha̍k sím-mı̍h Sı̂n-ha̍k, nā chiàu it-poaⁿ lâi khoàⁿ, sı̄ bô pâi ê.” I chin pháiⁿ-sè ê khoán, sûi-sı̂ ı̀n kóng “Bô iàu-kín, goá chò i-seng iā sı̄ bô pâi ê”. Sı̍t-chāi sı̄ tông-pēng siong-lı̂n.
Kó͘-bú Chia̍h Káu Bah
Tı̄ Gio̍k-lí kàu-hoē iáu chı̍t ūi Lí tiúⁿ-ló, sı̄ Kńg tang lâng, iā sı̄ tiong i-su, i ê bı̄n kap hêng-thé, kap Chhoà tiúⁿ-ló chin saⁿ-tâng, bô saⁿ-tâng ê sı̄ chí-ū kóng oē. Ū chı̍t jı̍t goán 4 ūi tâng-kang khı̀ thàm-hóng i, i chin hoaⁿ-hí, sûi-sı̂ kiò tiúⁿ-ló-niû khı̀ kiò 2 toā phiat ê bah-pau, pún-sin khı̀ chàu-kha phâng chı̍t tiáⁿ káu-bah, kó͘-bú goán chia̍h bah-pau, phoè káu-bah, goá í-goā ê tâng-kang iáu m̄ bat chia̍h káu-bah, khí-thâu m̄ káⁿ chia̍h, chóng-sı̄ boē kham-tit i kó͘-bú, tāi-ke chiū o̍h chia̍h, chí-ū chı̍t ūi m̄ káⁿ chia̍h bah, iáu-kú káu-bah thng lim kàu pá, Lí tiúⁿ-ló kóng, Tâi-oân ê káu-bah chı̍t-kin 10 kho͘ chó-iū, nā sı̄ Kńg-tang 3 kin ti-bah chiah oē thang oāⁿ chı̍t kin káu-bah, nā tı̄ Tâi-oân boē hiáu chia̍h káu-bah sı̄ chin gōng, i tùi goán kóng ê goán lóng ū tông-ı̀ ê khoán. Lia̍t-ūi tho̍k-chiá, lán kó͘-bú lâng sı̀n Iâ-so͘, ū chit-khoán ê jia̍t-chêng á-bô? Kiám m̄ sı̄ khah su Lí tiúⁿ-ló teh kó͘-bú lâng chia̍h káu-bah mah?
Goá M̄-tio̍h Chhoā 4 Chhioh Poàⁿ Ê
Tı̄ Tang-pō͘ thoân-tō ê sı̂, bat tı̄ 3 keng kàu-hoē káng-ián “Chheng-liân kap kiat-hun būn-tê”, múi hoê hù-hoē ê lâng ū chı̍t pah goā, nn̄g pah, saⁿ pah, chit khoán ê sēng-hóng. Tı̄ káng-ián tiong goá bat kóng-khí beh chò chhin ê lâm-lú, sin-thé ê koân-kē tio̍h ū phoè-ha̍p lâm ê tio̍h koân lú ê 3 chhùn chı̀ 5 chhùn ê tiong-kan, goá káng-ián soah ê sı̂, ū chı̍t-ūi chheng-liân cháu lâi mn̄g goá kóng “Sian-siⁿ chiàu lí kóng, goá m̄ tio̍h chhoā 4 chhioh poàⁿ ê? nā án-ni kiám m̄ sı̄ ná seⁿ ná soè-hàn?” Goá khoàⁿ i chin put-ho̍k goá ê soat, in-ūi i khah bô 4 chhioh 9, goá kā i kóng, “Nā sı̄ lí kiám-chhái chhoā pí lí khah toā-hàn ê khah hó”, in-ūi chit hō put-chāi tı̄ lu̍t-hoat ē, sı̄ tı̄ un-tián ē.
Goá Hō͘ Lí Chhiáⁿ Chin Pá
Iáu tı̄ bó͘ kàu-hoē, siāng-khoán káng-ián chit ê toê-ba̍k, hit àm iok ū 3 pah miâ ê thiaⁿ-chiòng, iû-goân sı̄ kóng-khí beh chò chhin ê lâm-lú, thé-keh ê soán-te̍k tio̍h ū sek-ha̍p, lâm-lú ê pûi, sán, tio̍h ū sù-phoè, chhin-chhiūⁿ pûi ê phoè sán ê, sán-ê chhoā pûi ê sı̄ chin pháiⁿ khoàⁿ, kap o͘-chhiu chhoā súi-gû bô koh-iūⁿ, chóng-sı̄ kiat-hun āu chiah piàn hêng ê put-chāi chhú-hān, thiaⁿ-chiòng tāi-ke lóng chhiò chhut-siaⁿ soà chù-ba̍k khoàⁿ chı̍t ūi iok 130 kin ê tiúⁿ-ló-niû, in-ūi i ê tiōng-hu chin sán, kàu káng-ián soah, tiúⁿ-ló-niû chhiò-chhiò tùi goá kóng “sian-siⁿ chin to-siā, goá ē-hng hō͘ lí chhiáⁿ chin pá”, goá sûi-sı̂ kā i hoē sit-lé, chhiáⁿ i goân-liōng, i koh kā goá kóng, “goá sı̄ teh kap lí kóng-chhiò, koh goá iā sı̄ kiat-hun āu chiah pûi ê, chhiáⁿ lí an-sim,” goá thiaⁿ liáu sim chiah khui, kak-tit kóng oē sı̄ chı̍t kiāⁿ khùn-lân ê sū.
Chèng Chhiū-á Chai Chio̍h-Thâu
Hoa-liân Tiong-san kàu-hoē, chin choē tióng-chip chhù-bı̄ oân-gē chèng koaⁿ-lân, á sı̄ chhiū-á, ū ê khioh chio̍h-thâu pâi tı̄ tiâⁿ-nı̍h, chin ū gē-su̍t. Sèng-keng Kong-hoē ê Gūi tiúⁿ-ló, koh khah sı̄ chhù-bı̄, i iā ū chhoā goá khı̀ Chiu chip-sū ê chhù khoàⁿ lân, i só͘ chèng ê lân, ū ê chı̍t-châng 5 chheng chı̀ chı̍t-bān put-téng, goá khoàⁿ lóng m̄ chai ū hit ê kè-ta̍t, i iā chèng chin choē kó͘-tóng-chhêng, múi-châng ū 1, 2 chheng-kho͘ ê kè-ta̍t, i kóng ū ê tiau 2, 3 cha̍p nı̂ kú, ēng chin choē kang, chóng-sı̄ iáu kú tı̄ poâⁿ-nı̍h soè-soè châng, teh pâi kó͘-tóng, hō͘ goá siūⁿ kàu tı̄ kin-á-jı̍t ê kàu-hoē, iû-goân ū pâi chin choē lêng-miā bô tióng-chı̀n ê hiaⁿ-ché, chhin-chhiūⁿ Chiu chip-sū ê kó͘-tóng chhiū chı̍t-iūⁿ. Pó-lô iā bat tùi Ko-lı̂m-to ê sı̀n-tô͘ kóng “Goá bat ēng lin chhı̄ lín, bô ēng bí-niû, in-ūi chêng boē kham-tit, kàu-taⁿ iáu boē oē”. Lia̍t-ūi tho̍k-chiá, kó͘-tóng ū khoàⁿ súi ê kè-ta̍t, kó͘-tóng sı̀n-tô͘ kiám ū sím-mı̍h kè-ta̍t mah? Gūi tiúⁿ-ló koh chhoā goá khı̀ chı̍t ūi, chham-koan pâi chio̍h-thâu ê tiâⁿ, pâi kàu ū hoe ū jı̄, i kóng pâi chio̍h-thâu tē-it séng-kang, in-ūi m̄-bián ak-chúi, goá siūⁿ liáu chin ū-thong, í-āu nā chhut-goā ū khoàⁿ tio̍h koh-iūⁿ ê chio̍h-thâu, chiū khioh tńg--lâi, tâng-kang ê Si sian-siⁿ kóng, “Lí iā teh chio̍h-thâu siáu mah?”
Lán Sı̀n Iâ-so͘ M̄ Thang Pháiⁿ Sim
Iû-goân tı̄ Hoa-liân kàu-hoē só͘ thiaⁿ-tio̍h ê sū, ū chı̍t ūi Tiuⁿ chip-sū sı̄ teh chò bí-siong, i tı̄ 6 nı̂ chêng lâi sı̀n Iâ-so͘, tùi 6 nı̂ chêng saⁿ bat kàu-taⁿ i lóng kiò goá “Hiong-chhin--ê”, in-ūi i sı̄ Lo̍k-káng lâng, goá sı̄ Hô-bí lâng, tùi án-ni lâi khan chhin. I kā goá kóng, í-chêng lóng kap pháiⁿ-sim ê Ki-tok-tô͘ chò chhù-piⁿ, chı̍t-ê sı̄ thè-jı̄m ê lāu thoân-tō (hiān-sı̂ koh chhut-lâi chò kang) chı̍t-ê sı̄ tiúⁿ-ló, in lóng chin pháiⁿ-sim, ka-kı̄ oa̍h chiū hó, pa̍t-lâng sí liáu-liáu bô iàu-kín, goá mn̄g i, “in sı̄ ū sím-mı̍h phiⁿ-khàm lí á m̄ sı̄?” I kóng, “He m̄ sı̄ nò͘!” “Nā bô sı̄ cháiⁿ-iūⁿ pháiⁿ-sim?” I ı̀n kóng, “Sı̀n Iâ-so͘ ê lâng oē chiūⁿ thian-tông, bô sı̀n ê lâng oē lo̍h tē-ge̍k, in kap goá chò chhù-piⁿ, m̄ bat chio goá sı̀n Iâ-so͘, án-ni bô pháiⁿ-sim mah?” Goá thiaⁿ-liáu siū toā kám-kek. Chit-ūi chip-sū hu-hū sı̀n Chú 6 nı̂, í-keng chhoā kúi-nā hō͘ lâi sı̀n Chú, i kóng goá tek-khak m̄ ài chò chı̍t ê pháiⁿ-sim ê Ki-tok-tô͘. Chu-ūi Chú-lāi ê hiaⁿ-ché, lí sı̄ pháiⁿ-sim ê, á sı̄ hó-sim ê Ki-tok-tô͘? Pó-lô kóng “Hok-im goá nā bô thoân chiū ū chai-ē,” lán eng-kai tio̍h o̍h Tiuⁿ chip-sū jı̍t-jı̍t ūi Chú chò kiàn-chèng, hō͘ bān kok lóng kui Ki-tok sı̄ sim só͘ goān.
