Tang-pak-hong chhoe-koè ê Hoa-liân

Tang-pak-hong chhoe--koè ê Hoa-liân, léng-ki-ki, tâm-lok-lok. Tı̄ siā-pān lāi-té, Tâi-gí lāu-koa khoaⁿ-khoaⁿ-á chhiùⁿ--chhut-lâi, goá tih khoàⁿ Sam-kiap lāu-ke ê kı̀-lo̍k-phı̀ⁿ, tı̄ hit-ê pi-khó͘ ê sı̂-tāi, in kám ē-tàng án-ne sù-sı̀ teh hiáng-siū? Siūⁿ-tio̍h chhù--nih ê a-pà a-bú. Ē-po͘ 3-tiám, a-pà m̄-sı̄ koh tı̄ kang-tiûⁿ siōng-pan, tō sı̄ tı̄ hn̂g--nih choh-sit, a-bú khó-lêng tih ka kiat-á, 4-tiám i tō koh ài khı̀ hn̂g piⁿ--á ê gû-liâu-á siōng-pan. Ta̍k-kài tńg khı̀ chhù--nih, a-pà tō ē kā goa “pò-kò” chhù--nih ê tāi-chı̀----hn̂g ê kiat-á kap lāu-hoe seⁿ kah án-choáⁿ; chit-má chhái-siu ê chêng-hêng kap kè-siàu; a-bú ê sin-thé chōng-hóng; sió-tı̄ ê tha̍k-chheh-tāi; chng-á-lāi hoat-seng ê tāi-chı̀...... I mā ē mn̄g goá kám koh ū chı̂ⁿ? Kiò goá aÌ hó-hó-á tha̍k-chheh. Chit-ê sı̂-chūn, goá ē kā i kóng 1-koá tı̄ Hoa-liân ê chhiò-khoe tāi-chı̀, án-ne i tō ē khah hòng-sim--a. Kı̂-sı̍t, goá m̄-káⁿ kā ka-tı̄ chin-chiàⁿ ê chêng-hêng kóng hō͘ i chai, goá m̄-bat kā kóng-koè beh chò ūn-tōng chit-hong-bı̄n ê tāi-chı̀. A-pà i chóng--sı̄ ǹg-bāng goán pêng-an bô tāi-chı̀, maÌ jiá siáⁿ-mih hong-pho, kā chheh tha̍k hō͘ hó tō hó--a, āu-pàiⁿ khoàⁿ ē-sái thàn koá chı̂ⁿ, mài koh koè kah chiah kan-khó͘. M̄ chai-iáⁿ kan-khó͘-lâng ê ka-têng kám lóng sı̄ án-ne? Goá beh chò ūn-tōng ê 1-ê siōng ki-pún ê lí-iû, tō sı̄ boài koh hō͘ chhù--nih ê lâng koè kah hiah kan-khó͘, m̄-bián hoân-ló seng-oa̍h-hùi, kàu-io̍k-hùi, tı̄ hit-ê sin ê siā-hoē lāi-té, bô hó-gia̍h kap sàn-chhiah ê chha-pia̍t, ta̍k-ke lóng sı̄ pêng-téng--ê, bô put-kong, bô put-gı̄. (TGB Thong-sı̀n tē 7 kı̂, 2000 nı̂ 4 goe̍h)