Tang-thiⁿ Chhı̀-pho

Chū kó͘ í-lâi Thian-chú-kàu ê hoat-lē tı̄ chē-chē só͘-chāi ū lēng-goā siat chı̍t-keng choan-choan sı̄ beh hō͘ lâng tiàm hia thang thoat-lı̄ sè-chêng, choa̍t-tn̄g sek-io̍k. Ū keng hō͘ sek-lâm toà, ū keng hō͘ sek-lú toà. Chiàu in táⁿ-sǹg lâm-lú khah hó m̄ thang hūn-cha̍p saⁿ kau-chhap chiah ū kong-lô. chāi-chá tı̄ Tē-tiong-hái ê bó͘ hái-sū ū siat chı̍t keng teh hō͘ sek-lâm toà. Kı̄n tı̄-hia ū koh chı̍t ê hái-sū siat chı̍t keng teh hō͘ sek-lú toà. Tı̄ hit nn̄g keng chiông-tiong ū chı̍t-lâm, chı̍t-lú pún sı̄ tông-pau ê hiaⁿ-moē.

Hit ê hiaⁿ sam-put-gō͘-sı̂ koè hái khı̀ chhoē sió-moē. Tı̄ in sió-moē toà hit ê hái-sū hia chhı̀-pho chin sēng. Hit ê hiaⁿ ke̍k hàuⁿ hit hō koé-chí. Chóng--sı̄ hit hō koé-chí khah siông chhut tı̄ hā-thiⁿ-sı̂, só͘-í éng-pái kàu hit-sı̂ i chiū khı̀ hia thàm sió-moē. Kàu āu--lâi hit ê hiaⁿ ka-tı̄ giâu-gı̂ siūⁿ i koè-khı̀ hit ê hái-sū chin bē-chò-tit, in-ūi hit téng lâng siūⁿ-kiò nā iáu ū jı̂n-chêng ê chhin-ài tı̄-teh, kiaⁿ-liáu khah bē choân-sim chiâⁿ-chò-sèng. Só͘-í liáu-āu i chiū hán-tit khı̀.

I ê sió-moē khoàⁿ i hán-tit lâi chiū ut-būn soà ko͘-chiâⁿ i. Lō͘-boé ín i kóng ta̍k-nı̂ nā kàu chhı̀-pho siong-se̍k ê sı̂-hān chiah beh lâi, pa̍t-sı̂ tiāⁿ-tio̍h bô beh lâi. Sió-moē thiaⁿ chè oē chiū chhe lâng khı̀ kúi-nā kok sı̀-kè bā put-lūn ke̍k-chá ke̍k-mńg chhut ê chhı̀-pho-chêng, lóng poâⁿ-koè lâi i hia chai. Kàu āu--lâi hit ê hái-sū ū chin-chē chhı̀-pho-châng. Sió-moē múi jı̍t chhiàⁿ chē-chē kang lâi teh poê-iúⁿ chiàu-kò͘, liân i pún-sin ia̍h khı̂n-kín tok-kang, chiū tı̀-kàu hō͘ chhı̀-pho put-sı̂ ē hoat-seⁿ.

Kú-kú i ê hiaⁿ bô lâi chhoē i, sió-moē siông-siông teh ǹg-bāng i beh kàu, thang siū i ê hó chêng-ı̀. Tán kàu tang-thiⁿ-sı̂ koè, í-keng lı̍p-chhun chiū chhe lâng khı̀ thong-ti in hiaⁿ kóng, Chhı̀-pho hiān-chāi se̍k lah chhiáⁿ lí tio̍h lâi. I hiaⁿ chin hoaⁿ-hí koè hái khı̀ thàm sió-moē soà chia̍h chhı̀-pho, chiū jı̍t-jı̍t óng-lâi. Án-ni keng-koè chı̍t goe̍h jı̍t chhı̀-pho iáu chhun loā-chē. Liân-liân koè saⁿ goe̍h jı̍t hit ê koé-chí iáu-kú ū moá sı̀-kè, iân kàu la̍k goe̍h jı̍t koé-chí chhut bô làng-sı̂, soà kàu tn̂g-nı̂ thàng-thiⁿ chhı̀-pho ia̍h chhut bē koè. Kàu nı̂ tú nı̂ koh lı̍p-chhun iû-goân iáu ū. Hit ê hiaⁿ khoàⁿ kàu thong-nı̂ ū chhı̀-pho, chiū tùi i ê sió-moē kóng, Che bêng-bêng sı̄ Siōng-tè beh chí-tiám goá chai sam-put-gō͘-sı̂ lâi chhoē lí sı̄ m̄ tio̍h, taⁿ í-āu tiāⁿ-tio̍h ta̍k jı̍t beh lâi saⁿ-kı̀ⁿ.

Án-ni-seⁿ tùi chit chân kò͘-sū thang chai hit ê sió-moē chin-chiàⁿ sı̄ tı̀-sek, ia̍h soà chai tang-thiⁿ chhut chhı̀-pho sui-jiân put-ha̍p-sı̂ iáu-kú thang tit-tio̍h. Nā-chhin-chhiūⁿ án-ni, lán tio̍h ē-hiáu-siūⁿ ū-sı̂ sui-bóng tı̄ chhám-khó͘ ê tiong-kan iáu-kú ē tit-tio̍h hok-khı̀.

(Tâi-lâm Hú-siâⁿ Kàu-hoē-pò tē 138 koàn, 1896 nı̂ 10 ge̍h)