Thâu-sū
Lán lâi káng-kiù Kū-iok ê Sèng-keng, ài pâi-lia̍t chhù- sū, tio̍h chai tē-it kó͘-chá tiàm sè-kan sı̄ sím-mı̍h lâng, sím-mı̍h sū. Lán tio̍h bêng-pe̍k chai sı̄ Tān-í-lí, á-sı̄ A-pek-lia̍p-hán, á-sı̄ Tāi-pı̍t, á-sı̄ Í-lı̄-a, tah-lo̍h chı̍t lâng khah kó͘-chá, chhut-sı̀? Tah-lo̍h chı̍t ê khah lō͘-bé? Koh Kū- iok ê Le̍k-sú tio̍h chai sím-mı̍h hāng khah kó͘-chá? Sím-mı̍h hāng khah lō͘-bé? Phı̀-lūn sı̄ toā chúi, á-sı̄ Í-sek-lia̍t cho̍k tı̄ Ai-kı̍p, á-sı̄ saⁿ lâng tı̄ hé-lô͘, á-sı̄ Só͘-to-má Gô-mô͘-lia̍p hō͘ jiû-n̂g hé tùi thiⁿ lâi sio khı̀; tah-lo̍h chı̍t hāng sı̄ khah chá, tah-lo̍h chı̍t hāng khah āu-lâi? Chit pún sı̄ beh chān lán thang chiàu chhù-sū pâi-lia̍t Kū-iok só͘ kı̀ kúi-nā hāng iàu-kín ê sū.
Tē-it chiuⁿ Lūn Gín-ná
Lô-poè ê Ióng-kám
Hoat-kok ū chı̍t ê gín-ná miâ kiò Lô-poè, i ê pē-bú sı̄ kèng-khiân ê sı̀n-tô͘. Lô-poè tùi soè-hàn oē hiáu kı̂-tó gı̂m-si. Gō͘, la̍k hè ê sı̂, i khoàⁿ ta̍k jı̍t ê chá-àm tē-it iàu-kín ê sū chiū-sı̄ kı̂-tó siā-un, ho̍k-sāi Thiⁿ Pē. Chhin-chhiūⁿ án-ni chiū chiām- chiām chiâⁿ choè sı̍p-koàn.
Cha̍p-jı̄ hè pē-bú sàng i jı̍p Tiong-o̍h-tn̂g. Khí- thâu kàu, hit ê-hng, i put-chí siū khún-pek, in-ūi sin ha̍k-seng jı̍p o̍h siông-siông hō͘ lâng khoàⁿ sông, Lô-poè iû-goân chiàu tiāⁿ-tio̍h ê hoat-tō͘ kı̂- tó. Beh khùn ê tāi-seng, chiū kong-hêng kūi tı̄ bı̂n-chhn̂g chêng, kı̂-tó kóng, "To-siā Thiⁿ Pē sàng goá lâi chia tha̍k chheh, sı̀ chiu-ûi lóng sı̄ sin kau-poê--ê, kiû Chú Iâ-so͘ pang-chān goá, kín-sı̄n sió- sim, tı̄ in ê tiong-kan, phín-hēng toan-chiàⁿ, tı̀-kàu bô lêng-jio̍k Lí ê miâ. Ba̍k-chiu chêng ê lō͘ ke̍k- kı̂ hn̄g, kiû Chú chhoā goá, ióng-kám tı̍t-tı̍t chı̀n- chêng, koh kiû Chú pı̀-iū goá ê pē-bú, pêng-an bô siáⁿ-sū, A-bēng." Kı̂-tó soah chiūⁿ bı̂n-chhn̂g chiū beh khùn. Chiah ê ha̍k-seng chhiò--ê chhiò, hoah--ê hoah, koh choê-choê ēng chím-thâu tùi i ê thâu- khak kap ka-chiah tı̍t-tı̍t hmh, sè chhin-chhiūⁿ phah kàu beh piàn-sūi. In hı̀-lāng kàu chı̍t khùn- á pá, to̍k-to̍k Lô-poè lóng bô siū-khı̀, soà koh kı̂- tó kóng, "Kiû Chú sià-bián in ê choē, in-ūi in só͘ choè sı̄ tùi boē bêng."
Ta̍k jı̍t chá-àm, Lô-poè chiàu siông kı̂-tó, bô kúi jı̍t āu, i chiū bô siū khún-pek, soà ū joā choē lâng jı̄n i ê m̄-tio̍h, iā koh soà hoán-hoé lâi sı̀n Chú Iâ- so͘. Khoàⁿ chit ê gín-ná ūi Chú Iâ-so͘ choè kan- chèng, chin-chiàⁿ eng-kai tio̍h o-ló Chú.
Pi-su ê Sı̀n-sim
Tı̄ Lûn-tun lâm-sı̀ chhit-cha̍p lí, Bí-lí-su ê hiuⁿ- siā tiong, ū chı̍t ūi Pi-su Bo̍k-su, hit-tia̍p tı̄ bó͘ siâⁿ thoân tō-lí, tē-it chhut-miâ. Chit lâng soè hàn ê sı̂ ê kéng-gū, hui-siông ê kan-khó͘. La̍k hè pē sí, chhit hè bú sí, ū sı̂ oá-khò goā chhek, ū sı̂ oá-khò lāu-pē ê pêng-iú, sı̀-koè liû tı̄ sı̀-hng, lóng bô ióng-sin tiāⁿ-tio̍h ê só͘-chāi.
Cha̍p-it hè ê sı̂, chı̍t jı̍t tı̄ koe-lō͘ kap soè-hàn gín-ná teh thit-thô, hut-jiân ū chı̍t ê lú thoân-tō tùi Pi-su kóng, "Lí chit ê gín-ná, cháiⁿ-iūⁿ m̄ jı̍p- o̍h tha̍k-chheh?" Pi-su ı̀n kóng, "Goá bô chı̂ⁿ, koh bô pêng-iú, iā bô lâng thang pang-chān, beh cháiⁿ-iūⁿ ū thang tha̍k-chheh nih?" Lú thoân-tō kóng, "Lí nā goān-ı̀, kiû chit ūi tek-khak èng-ún kı̂-tó ê Iâ-so͘ Ki-tok, I tek-khak pang-chān lí." Pi-su kóng, "Iâ-so͘ Ki-tok tı̄ tah-lo̍h?" Lú thoân- tō kóng, "I sı̄ tı̄ Thian-tông, ūi-tio̍h kiù-sio̍k lâng ê choē, kàng-seng tı̄ Iû-thài kok, taⁿ iû-goân koh tò-khı̀ Thian-tông."
Lú thoân-tō khı̀ liáu-āu, Pi-su ka-kı̄ siūⁿ kóng, "Thian-tông kiù kèng tı̄ tah-lo̍h, goá nā chhin-sin khı̀ chhē I, ū choē-choē put piān, m̄ ta̍t tio̍h siá phoe kiû I." Chiū chhiáⁿ chı̍t ê pí i khah toā ê ha̍k-seng, Pi-su kóng ı̀-sù, hit ê ha̍k-seng chiū thoè siá. Siá liáu chiū hong--khí-lâi, sàng kàu Iû-chèng. Iû-chèng ê lâng chı̍t ē khoàⁿ bı̄n-téng siá--ê, sı̄ beh kià kàu Thian-tông Iâ-so͘ Ki-tok siu, chiū gông- ngia̍h kóng, "Chit ê phoe boē kià-tit" Pi-su kóng, "the̍h phoe sı̄ lí ê chit hūn, cháiⁿ-iūⁿ kóng boē?" Kóng soah la̍p iû-hùi, chiū choè i khı̀.
Liáu-āu Pi-su siông-siông teh ǹg-bāng hê-phoe, ǹg-bāng kàu chin tio̍h-kip. Kè nn̄g lé-pài ū chı̍t ūi Bo̍k-su kàu Iû-chèng-ke̍k kià phoe, hut-jiân khoàⁿ-kı̀ⁿ tı̄ kià boē kàu phoe-sı̀n a̍h-lāi ū Pi-su kià hō͘ Chú Iâ-so͘ ê phoe. (Chit ê kià boē kàu phoe-sı̀n a̍h, sı̄ in hit ūi nā phoe kià boē kàu, chiū koh the̍h tò-tńg ēng hit ê a̍h toé) Bo̍k-su chin hi-kı̂, Chiū lâi mn̄g i ê lâi-le̍k. Iû-chèng ê lâng lóng-chóng kā i kóng-bêng. Bo̍k-su kóng. "Goá beh thiah khí-lâi khoàⁿ." Í-keng thiah khui, khoàⁿ-kı̀ⁿ lāi-bı̄n siá--ê sı̄, "Goá só͘ thiàⁿ ê Iâ-so͘ Ki- tok ah, thiaⁿ-kı̀ⁿ kóng, Lí khoán-thāi sè-kan lâng nā ū kiû tek-khak èng-ún, it-chhè ê hó-sū, bô m̄ pang-chān. Goá chit ê bô pē-bú, bô chı̂ⁿ-châi, bô tè oá-khò ê soè-hàn gín-ná, thiâu-tı̂ lâi kiû Lí lı̂n-bín, hō͘ goá ū ki-hoē oē tit-tio̍h thang jı̍p o̍h tha̍k- chheh. Lí sı̄ lāu sian-siⁿ, bô lūn cháiⁿ-iūⁿ an-pâi goá lóng thiaⁿ-thàn bēng-lēng, chit tia̍p goá í-keng pı̄-pān, kiû Lí chhoā goá jı̍p o̍h. Bô lō͘-ēng ê Pi-su kiok-kiong." Bo̍k-su khoàⁿ liáu, kóng, "Iâ-so͘ Ki- tok ún i só͘ kiû lah." Hit ê Bo̍k-su chiū khı̀ chhē Pi-su, toê chı̂ⁿ lâi hō͘ i jı̍p o̍h. Pi-su pit-gia̍p liáu saⁿ nı̂, chiū hō͘ chhut miâ ê tông-hoē chhiáⁿ i choè Bo̍k-su. Chit tia̍p tı̄ Eng-kok ê Bo̍k-su tiong i choè tē-it chhut-miâ--ê.
Chú Iâ-so͘ ê oē kóng, "Lín hōng Goá ê miâ, bô lūn kiû sím-mı̍h, Goá tek-khak beh chiâⁿ." Chit kù oē chin-chiàⁿ thang sı̀n.
Tè Tek-seng Soè-hàn Hiàn Sim hō͘ Chú
Loē-tē-hoē ê Tè-kong, choè gín-ná ê sı̂, i ê lāu-bú in-ūi ū iàu-kín ê sū, khı̀ pa̍t ūi chı̍t lé-pài kú. Tò- lài ê sı̂, i ê kiáⁿ chiū khı̀ ngiâ-chih i. Í-keng khoàⁿ-kı̀ⁿ, chiū hoaⁿ-hoaⁿ hí-hí, tùi i ê lāu-bú kóng, "Goá tı̄ chit lé-pài lāi í-keng chiong sim hiàn hō͘ Chú." I ê lāu-bú moá bı̄n tài chhiò kóng, "Goá ê kiáⁿ, lí chit hāng-sū, goá chá-chá í-keng chai." Tè-kong kóng, "Lāu-bú cháiⁿ-iūⁿ oē chai leh? Un2-tàng sı̄ goá ê toā-chí kā lí kóng." Lāu- bú kóng, "M̄ sı̄, sı̄ Siōng-tè kā goá kóng, goá lı̄- khui ke liáu-āu, ū chı̍t jı̍t ēng chı̍t po͘ kang, ūi- tio̍h lí kı̂-tó, āu--lâi Sèng Sı̂n kā goá kóng, goá ê kiáⁿ í-keng tit-tio̍h kiù lah, só͘-í goá chá-chá chai, lí chiong sim hiàn hō͘ Chú."
Āu-lâi chha chai lāu-bú ūi i kı̂-tó ê sı̂, i tı̄ ke- lāi tú-á teh khoàⁿ chı̍t phiⁿ tō-lí; liông-sim toā tín-tāng, chai Siōng-tè beh ēng i, chiū liâm-piⁿ kūi --lo̍h-khı̀, chiong sim kau hō͘ Kiù-chú. Koh chiong chit ê kong-kéng kā i ê toā-chí kóng, koh kóng lāu-bú nā tò-lâi, iā tek-khak beh kín kā i kóng- To̍k-to̍k i ê lāu-bú í-keng chai lah. Gâu kı̂-tó ê sı̀n-tô͘ oē bêng Chú ê chí-ı̀, chhiáⁿ khoàⁿ Loē-tē-hoē kin-á-jı̍t ê kong-hāu, lóng sı̄ tùi hit ē-po͘ khí-tiám. Kı̂-tó ê kong-hāu cháiⁿ-iūⁿ kàu hiah kı̂-biāu. Choè lāu-bú--ê chhiáⁿ chù-ı̀.
Má-lı̄ Tha̍k Sèng-keng Koáⁿ Chha̍t
Eng-kok ū chit ê sı̀ⁿ Ông ê choh-chhân lâng. I ū toē gō͘-cha̍p bó͘, khiā-khí tı̄ phian-phiah ê hiuⁿ- siā, ke-lāi ê hū-jı̂n-lang kap kiáⁿ-jı̂, pêng-an tō͘ jı̍t. Sı̀ⁿ Ông--ê sı̄ chı̍t ê jia̍t-sim ê sı̀n-tô͘, siông-siông tùi ke-lāi ê lâng kóng, "Lâng oa̍h tē-it iàu-kín ê sū, tio̍h kà-sı̄ kiáⁿ cha-bó͘-kiáⁿ kèng-khiân ho̍k-sāi Chú." Só͘-í ta̍k lé-pài, tû lâu chı̍t lâng kò͘ mn̂g í- goā, kı̂-û--ê lóng tio̍h khı̀ lé-pài.
I ū chit ê soè cha-bó͘ kiáⁿ miâ-kiò Má-lı̄, tú-á sı̄ cha̍p hè, chiū ū toā lâng ê khı̀-khài, siông-siông tùi lāu-pē kóng, "A-tia goá thang tiàm teh kò͘- mn̂g á m̄-thang?" Sı̀ⁿ Ông ê in-ūi i soè-hàn, só͘-í m̄ káⁿ ún. Gín-ná ta̍uh-ta̍uh mn̄g, i chiū ta̍uh-ta̍uh sı̂.
In hit ūi lóng bô chha̍t, só͘-í sı̀ⁿ Ông--ê āu-lâi ū chı̍t lé-pài kóng, "Má-lı̄ siông-siông thó beh tiàm teh kò͘-mn̂g, m̄ ta̍t-tio̍h hō͘ i chhı̀ khoàⁿ, koh ū káu thang choè phoāⁿ, liōng káⁿ bô iàu-kín." Tùi án-ni Má-lı̄ chiū chiâⁿ i ê sim-goān hō͘ pē-bú lóng khı̀ lé-pài.
In khı̀ bô joā kú, Má-lı̄ tāi-seng chin hoaⁿ-hí, āu- lâi siūⁿ bô-phoāⁿ, sûi-sı̂ hian khui Sèng-keng, hian kàu Si-phian 34 phiⁿ chū-chū jiân-jiân chiū tha̍k liām koh-chài liām, tı̀-kàu oē oa̍t-liām. Āu-lâi chin bô sio̍h, chiū chhoā káu kàu hoe-hn̂g thit-thô.
Hit sı̂ tú-á cha̍p-it tiám, sı̀ⁿ Ông--ê kap i ê bó-kiáⁿ tio̍h cha̍p-jı̄ tiám chiah oē tò-lâi. Má-lı̄ tı̄ hoe-hn̂g lāi thit-thô kàu tuh-ka-chē, kàu chhíⁿ jı̍p chhù beh pı̄-pān pn̄g. Hut-jiân ka-kı̄ kóng, "Káu tah-lo̍h khı̀?" Chhut-lâi kiò ê sı̂, lóng bô tōng-chēng. Hit sı̂ liâm-piⁿ ū pháiⁿ lâng, kàu Má-lı̄ ê bı̄n-chêng, mn̄g Má-lı̄ kóng, "Lí ê lāu-pē tı̄ ke-lāi bô?" Ìn kóng, "Bô, goá ê pē bô tı̄ ke-lāi, chí-ū goá kap káu nā-tiāⁿ. Lín beh chhòng sím-mı̍h?" In chhiò kóng, "Lí boē oē koh khoàⁿ-kı̀ⁿ lí ê káu lah." Má- lı̄ m̄ chai káu í-keng hō͘ in hāi-sí.
I siông-siông khoàⁿ-kı̀ⁿ lāu-bú un-khûn khoán- thāi lâng-kheh, só͘-í tùi hit nn̄g lâng kóng, "Chhiáⁿ jı̍p chhù-lāi, goá beh pı̄-pān pn̄g-tǹg lâi chhiáⁿ lín chia̍h, lín tio̍h thèng-hāu kàu goá ê pē tò-lâi." In jı̍p lâi, Má-lı̄ pı̄-pān pn̄g hó, chiū pâi tı̄ toh-téng, Má-lı̄ kóng, "Kı̂-tó, lán tāi-ke chiū chia̍h." In nn̄g lâng lóng chhiò, chı̍t ê kóng, "Goá boē hiáu-tit, hō͘ lí kı̂-tó." Tùi án-ni Má-lı̄ chiū ēng kán ê oē, kám-siā Thiⁿ Pē. Kám-siā liáu chiū chia̍h. In chia̍h hui-siông kín, koh tùi Má-lı̄ iā put-chí chho͘- ló͘, Má-lı̄ hit sı̂ chiah giâu-gı̂, in m̄ sı̄ hó lâng. Ū chı̍t ê kóng, "Lí tio̍h kā goán kóng. Lí ê pē chá- jı̍t boē ti ê chı̂ⁿ hē tı̄ tah-lo̍h?" Má-lı̄ tú-á beh ı̀n. Hit chı̍t ê kóng, "Lí bô kiaⁿ goán mah? Phı̀- jū goán sı̄ chha̍t, lí kiám bô kiaⁿ mah?" Má-lı̄ kóng, "Goá put-chí kiaⁿ, to̍k-to̍k goá tú-á tha̍k ê Sèng-keng, hō͘ goá chai, Thiⁿ Pē tek-khak chiàu- kò͘ goá, kap goá ê chhù, nā-sı̄ lí kam-goān thiaⁿ, goá beh in-ūi lín koh-chài tha̍k." Sûi-sı̂ liām kóng, "Kèng-ùi Chú ê lâng, sı̀-ûi ū Chú ê sù-chiá, chat iâⁿ chín-kiù."
In khoàⁿ-kı̀ⁿ Má-lı̄ hit iūⁿ ê sı̀n-sim. Tiong-kan chı̍t ê, liông-sim toā tín-tāng, chiū tùi tâng-phoāⁿ kóng, "Kín kiâⁿ, goá m̄ pang-chān lí thau chit hō lâng ê chı̂ⁿ, khoàⁿ chit ê soè-hàn cha-bó͘ gín-ná, thang chai in sı̄ hó lâng, goá iā m̄ káⁿ thau --in, in- ūi Thiⁿ Pē khoàⁿ-kò͘ --in." Koh chı̍t ê chiù-choā kóng, "Nā bô thau tām-po̍h chı̂ⁿ, koat-toàn m̄ khı̀." I ê tâng-phoāⁿ m̄ hō͘ i choè chit hō sū, sûi-sı̂ chiū chhut mn̂g-goā, kap Má-lı̄ saⁿ-sı̂. Oa̍t-thâu kóng, "Goán m̄ thèng-hāu lí ê lāu-pē."
Sı̀ⁿ Ông--ê kap ke-lāi ê lâng tùi lé-pài tn̂g tò-lâi chı̍t ē jı̍p mn̂g khoàⁿ-kı̀ⁿ soè chiah káu sí, chiū chin kiaⁿ, phah-sǹg í-keng hō͘ chha̍t thau.
Kàu jı̍p chhù, khoàⁿ-kı̀ⁿ Má-lı̄ ê pn̄g í-keng pı̄- pān hó, chiū soè-jı̄ mn̄g hit ê in-toaⁿ. Mn̄g soah, chiū kap i ê hū-jı̂n-lâng saⁿ-kap siā un, in-ūi i ê soè cha-bó͘ kiáⁿ tha̍k Sèng-keng, ū tit-tio̍h chit ê hó ê hāu-kó.
Hok-tek Kóng Sêng-sı̍t
Tı̄ Bí-kok bó͘ o̍h-tn̂g, ū chı̍t ê sòng-hiong ê ha̍k- seng, miâ kiò Hok-tek, tha̍k chheh bô choē, koh bô put-chí chhang-miâ, to̍k-to̍k i ê siá jı̄, boē su chèng lâng. I ū chı̍t kho, kek-goē ê ēng kang, ka-kı̄ phah-sǹg kàu khó ê sı̂, pa̍t kho ê pò-siúⁿ m̄ káⁿ ǹg-bāng, siá jı̄ chit kho, ū thang hūn chı̍t hūn.
Kàu nı̂-bé khó chheh ê sı̂, Kam-tok lâi-pin lóng khı̀ chham-koan, pún o̍h ê sian-siⁿ tāi-seng kiò ha̍k-seng chiàu ūi chē, āu-lâi chiong ta̍k ê ha̍k- seng ê siá-jı̄-phō͘, pun hō͘ ta̍k lâng, kiò in hiān siá, bián tit ū su sim ê pē-pēng. Khoàⁿ chit tia̍p siá ê chı̄-chūi khah hó, chiū hō͘ i pò-siúⁿ. Khó- sioh sian-siⁿ bô soè-jı̄, chiong Hok-tek ê siá-jı̄-phō͘ the̍h hō͘ Hí-tek, Hí-tek ê hō͘ Hok-tek. Ta̍k ê ha̍k-seng siá liáu, Kam-tok ta̍k ê ta̍k ê khoàⁿ; kéng chhut nn̄g pún hó --ê, chı̍t bı̄n khoàⁿ, chı̍t bı̄n tùi chèng lâng kóng, "Kin-nı̂ siá jı̄ ê pò-siúⁿ beh kui tı̄ chí nn̄g ê ha̍k-seng."
Tng hit sı̂ Hok-tek khoàⁿ-kı̀ⁿ hí nn̄g pún ê tiong-kan, ū chı̍t pún sı̄ i ê, sim-lāi chiū cha̍p hun ê hoaⁿ-hí. Khah thêng sian-siⁿ chiong pò-siúⁿ kap siá-jı̄-phō͘ pun hō͘ ta̍k ê ha̍k-seng. Hok-tek chı̍t ē khoàⁿ, phō͘-á sı̄ ka-kı̄ ê, jı̄ sı̄ Hí-tek siá--ê, chiū kā sian-siⁿ kóng, "Goá m̄ eng-kai tit-tio̍h pò- siúⁿ, in-ūi che m̄ sı̄ goá siá--ê, sı̄ Hí-tek siá--ê." Sian-siⁿ kóng, "Án-ni sı̄ goá bô sió sim, chiong phō͘-á oāⁿ chhò." Ìn kóng, "Bô lūn cháiⁿ-iūⁿ, goá m̄ eng-kai tit-tio̍h siúⁿ." Sian-siⁿ chiū chiong pò-siúⁿ hō͘ Hí-tek.
Ha̍k-seng tiong ū ê kóng, "Hok-tek chin gōng, nā bô choè siaⁿ, pò-siúⁿ kiám m̄ sı̄ i ê mah?" Iā ū ê kóng, "Hok-tek chin-chiàⁿ sı̄ hó-lâng, lêng- khó͘ sit-lo̍h pò-siúⁿ, m̄ khéng kóng pe̍h-chha̍t lâi sún-hāi --lâng." Hok-tek sui-jiân sit-lo̍h oē khoàⁿ- kı̀ⁿ ê pò-siúⁿ, chóng--sı̄ i ún-tàng oē tit-tio̍h boē khoàⁿ-kı̀ⁿ ê pò-siúⁿ.
Chú Iâ-so͘ kóng, "Lín ê oē, sı̄ chiū kóng sı̄, m̄ sı̄ chiū kóng m̄ sı̄, nā-sı̄ kóng kè-thâu, chiū-sı̄ tùi pháiⁿ siⁿ chhut-lâi."
Hok-tek í-keng chiàu chit ê oē kiâⁿ. Iâ-so͘ hō͘ i pêng-an khoài-lo̍k, kiám m̄ sı̄ tē-it pó-kùi ê pò- siúⁿ mah? Soè-kiáⁿ tio̍h thiaⁿ ah, tio̍h bián-lē ah.
Chheng-khı̀ Chin Hó
Ū chı̍t ê gín-ná tú-á gō͘ hè, chit pái kap i ê soè- hàn sió-tı̄, tı̄ chhù-lāi teh thit-thô. Hut-jiân tú- tio̍h hé-sio, hé-ian chin toā chhèng--khí-lâi, sè-bı̄n teh-beh sio sí lâng. Hit ê gín-ná iû-goân chū-chū jiân-jiân, chiong sió-tı̄ nn̄g chhiú phō--khí-lâi, khut- sin jím khı̀ chiū cháu.
Tú-á kàu mn̂g-kháu, ū nn̄g lâng cháu lâi, i kap i ê sió-tı̄ lóng siū kiù chhut. Chı̍t ē kàu goā-bı̄n, chhoán chı̍t ê toā khùi kóng, "Hāi ah! Chheng ê khı̀ chin hó, chheng ê khı̀ chin hó." Piⁿ--á ū chı̍t lâng chhap chhùi kóng, "Lí pêng-jı̍t kiám m̄ sı̄ siông-siông khip chheng ê khong-khı̀ mah? Cháiⁿ- iūⁿ kin-á-jı̍t chiah chai hó nı̍h?" I chiū ı̀n kóng, "Goá kin-á-jı̍t nā m̄ sı̄ tùi hé-ian lāi cháu--chhut-lâi, chheng ê khı̀ sui-jiân hó kàu cháiⁿ-iūⁿ iā m̄ chai."
Sèng-tô͘ siông-siông tı̄ Thiⁿ Pē ê un-tián tiong, lóng boē hiáu kám-un. Kàu tú-tio̍h kan-khó͘ í-āu, chiah chai pêng-jı̍t tit-tio̍h un bô chió, sı̍t-chāi chin khó-sioh khó-sioh.
Lí Sêng-bí kóng Pe̍h-chha̍t
Lí Sêng-bí cha̍p-jı̄ hè, i ê pē-bú sı̄ jia̍t-sim ê kàu- iú, hoân-sū chiàu liông-sim, iā kà-sı̄ gín-ná pó-siú liông-sim.
Chı̍t jı̍t Lí Su-niû koáⁿ-kín beh khı̀ boé kúi kun hān-chû, hoan-hù Sêng-bí tı̄ ke-lāi kò͘-mn̂g, m̄-thang chhut-khı̀ thit-thô, kiaⁿ-liáu ū lâng lâi thau- the̍h mı̍h. Sêng-bí ı̀n, "Hó". Lí Su-niû chiū koāⁿ tek-lâng-á chhut--khı̀.
Sêng-bí tı̄ ke-lāi bô joā kú, chiū siūⁿ bô sio̍h, chiū khı̀ khui thoah, loān-loān hiau kàu chı̍t khùn- á pá. Koh khui oáⁿ-tû, khoàⁿ-kı̀ⁿ ū kúi tè piáⁿ- koaⁿ, toé tı̄ kong-thih a̍h-lāi, chı̍t ē khoàⁿ-kı̀ⁿ chiū liâm-piⁿ ài beh chia̍h. Liông-sim kóng, "M̄-thang, tio̍h hē-teh, m̄-thang phah tín-tāng." Sat-tàn kóng,"Tio̍h chia̍h, tio̍h chia̍h." Sêng-bí m̄ thiaⁿ liông-sim, kéng-jiân thiaⁿ Sat-tàn. Bô joā kú chiong kong- thih a̍h-lāi ê piáⁿ-koaⁿ lóng chia̍h liáu-liáu. Liông-sim koh kah i tio̍h hoán-hoé. Sat-tàn kóng, "Bô iàu-kín, chiong chńg-thâu-á chhit chheng-khı̀ lí ê chhùi, oáⁿ-tû iû-goân koaiⁿ teh, lí ê lāu-bú tò-lâi, beh thái oē chai."
Liông-sim kóng, "Lāu-bú tò-lâi tio̍h kóng sêng- sı̍t, m̄-thang pe̍h-chha̍t." Sêng-bí koh m̄ thiaⁿ, cháu kàu tiâⁿ lâi kap chhù-piⁿ ê gín-ná thit-thô. To̍k-to̍k liông-sim ta̍uh-ta̍uh koh-chài kek-tōng i, kóng, "Lí só͘ choè m̄-tio̍h, thèng-hāu lāu-bú tò-lâi, iàu-kín tio̍h kóng sêng-sı̍t."
Lí Su-niû tò-lâi ê sı̂, in-ūi chin ià-siān, tùi Sêng- bí kóng, "Kā goá phàu chı̍t poe tê lâi, tı̄ oáⁿ-tû lāi ū kúi tè piáⁿ-koaⁿ, the̍h lâi hō͘ goá chia̍h."
Sêng-bí the̍h gō͘ ê lui, chhut khı̀ boé tê-sim phàu chı̍t koàn tê. Chit sı̂ sim-lāi í-keng chin kan-khó͘ choè. Liông-sim kóng, "Tio̍h kóng sêng- sı̍t." Sat-tàn kóng, "M̄ bián, tio̍h kóng piáⁿ-koaⁿ hō͘ niau chia̍h --khı̀."
Tê í-keng phàu hó, Lí Su-niû kóng, "Piáⁿ-koaⁿ tı̄ oáⁿ-tû lāi, kín khı̀ the̍h--chhut-lâi."
Sêng-bí chiū khı̀ khui oáⁿ-tû khoàⁿ, kóng, "Bô piáⁿ-koaⁿ."
Liông-sim kóng, "Kín jı̄n m̄ tio̍h."
Sat-tàn kóng, "M̄-thang, chí-ū tio̍h kóng niau chia̍h khı̀."
Sêng-bí hit sı̂ í-keng hō͘ Sat-tàn lōng-tó, boē oē bô thiaⁿ i kiau-so, chiū kóng, "Piáⁿ-koaⁿ hō͘ niau chia̍h khı̀."
Liông-sim thiaⁿ-kı̀ⁿ i kóng pe̍h-chha̍t, tı̄ lāi-bı̄n chhut-la̍t tı̍t-tı̍t ku̍t, ku̍t, kàu hō͘ i bı̄n chin âng, soà kiò i tio̍h kín sêng-jı̄n.
Lí Su-niû kóng, "Soè chiah niau chia̍h khı̀, lí ê bı̄n cháiⁿ-iūⁿ oē âng?"
Sêng-bí ê liông-sim tı̄ lāi-bı̄n, koh-chài chhut-la̍t kong-kek, kā i kong-kek kàu hō͘ i háu, chiah sı̍t- sı̍t kóng, "Piáⁿ-koaⁿ sı̄ goá chia̍h --khı̀, kiû lāu-bú tio̍h khoan-sù --goá."
Lí Su-niû in-ūi i thâu pái tú choè m̄-tio̍h, koh ka-kı̄ chai choē, chí-ū khó͘-khǹg --i, kiò i ē-pái m̄-thang koh kóng pe̍h-chha̍t, iā bô hêng-hoa̍t --i, án- ni chit ê tāi-chı̀ chiū bêng-pe̍k.
Tok-sı̀n Kı̂-tó Hō͘-soàⁿ
Ū chı̍t ê soè-hàn cha-bó͘ gín-ná, miâ-kiò Tok-sı̀n. Chı̍t jı̍t kap i ê lāu-bú tùi koe-lō͘ tò-lâi, chı̍t-ê jı̍p pâng-mn̂g, lāu-bú kóng, "Ai-ioh, tı̄ koe-lō͘-nih, goá só͘ ài ê hō͘-soàⁿ phah m̄ kı̀ⁿ lah, goá kiaⁿ-liáu chhē bô."
Soè-hàn cha-bó͘ gín-ná kóng, "Lán thang ūi-tio̍h chit ê kı̂-tó, Chú Iâ-so͘ oē the̍h tò-lâi."
Lāu-bú chhiò kóng, "Hó." To̍k-to̍k sim-lāi khiok giâu-gı̂, Chú Iâ-so͘ bē tek-khak ūi-tio̍h chit ê sió-khoá sū hùi sim.
Tok-sı̀n chiū kūi-lo̍h khı̀ kı̂-tó, kı̂-tó soah chiū khı̀ khùn. Tē jı̄ jı̍t chá-khí, ū lâng kàu in tau kóng, "Chā-jı̍t khioh-tio̍h chı̍t ki hō͘-soàⁿ, m̄ chai sı̄ lín ê á m̄ sı̄?"
Tok-sı̀n kap i ê lāu-bú chı̍t ē khoàⁿ, gông-ngia̍h kóng, "Chin sı̄ hi-kı̂, chin-chiàⁿ tio̍h o-ló Thiⁿ Pē, liân chit ê sió-khoá sū, I iā pang-chān lán."
Hoān-nā ū kan-khó͘, bô lūn toā soè, lóng tio̍h kā Thiⁿ Pē kóng, in-ūi I sı̄ chû-ài oân-choân ê Siōng-tè, toā sū soè sū lóng-chóng teh koan-sim.
Soè Iok-sek ê Kı̂-tó
Eng-kok ū nn̄g ê gín-ná, chı̍t ê miâ Iok-pek, chı̍t ê miâ Iok-sek. Chı̍t jı̍t khı̀ thàm i lāu ê a-má, tiàm hia kúi-nā jı̍t, sı̀-koè khoàⁿ kong-kéng. Iok-pek siⁿ-jı̍t beh kàu, chiàu Se-kok ê hong-sio̍k, bô-lūn toā lâng gín-ná, siⁿ-jı̍t hit jı̍t chhin lâng ū sı̂ sàng lé-mı̍h. Iok-pek put-chí ǹg- bāng i ê a-má oē sàng i mı̍h thang toà tò-lâi ke- lāi kè siⁿ-jı̍t.
Hit ê-hng beh chiūⁿ bı̂n-chhn̂g ê sı̂, a-má kóng, "Lóng kūi --lo̍h-khı̀, goá tāi-seng kı̂-tó, lín nn̄g ê chiah liân soà kı̂-tó." Iok-pek kı̂-tó ê sı̂, toā siaⁿ kóng, "Kiû Chú Iâ- so͘, tē-it iàu-kín m̄-thang boē kı̀-tit goá āu--jı̍t siⁿ- jı̍t, kiû lí sàng goá chı̍t lia̍p toā lia̍p phê-kiû, iā tio̍h tēng koh hó ê."
Iok-sek kóng, "Ho͘hN, mih-sái ēng kàu chiah toā siaⁿ, Siōng-tè m̄ sı̄ chhàu-hı̄ lâng."
Iok-pek ı̀n kóng, "M̄-kú, a-má sı̄ chhàu-hı̄ lâng."
Che sui-jiân sı̄ chı̍t ê gín-ná ê kò͘-sū, to̍k-to̍k kı̂- tiong ū toā kà-sı̄ tı̄-teh.
Ū choē-choē lâng kı̂-tó, m̄ sı̄ ǹg-bāng Siōng-tè thiaⁿ, to̍k-to̍k kiû lâng chai, miâ sui sı̄ kı̂-tó, khiok toā sit-lo̍h kı̂-tó ê goân-ı̀, bô kı̂-koài kı̂-tó ê lâng bô chió, tit-tio̍h èng-ún ê lâng bô choē, in-ūi in bô chiàu lí kı̂-tó.
