Goá ê kò͘-hiong

Ùi Wiki Tô·-su-kóan

Chiok chē lâng siá tē 1 phiⁿ bûn-chiuⁿ ê sı̂, lóng ē siá i ê kò͘-hiong iah sı̄ kò͘-hiong ê tāi-chı̀, in-ūi kò͘-hiong sı̄ siōng ū kám-chêng mā siōng hō͘ lâng hoâi-liām ê só͘-chāi. Khoàⁿ--lâi, goá mā èng-kai siá 1 phiⁿ “Goá ê kò͘-hiong”. M̄-koh, goá ê kò͘-hiong tàu-té tı̄ toh--leh? Gún papa sı̄ Pı̂n-tong lâng, gún mama tı̄ Sūi-hong toā-hàn, goá tı̄ Tâi-pak chhut-sı̀, chū sè-hàn tō toà Thô-hn̂g, chit-má toà tı̄ Tâi-tiong. Án-ne kóng--lâi, goá tàu-té sı̄ toh-ūi ê lâng? Ū lâng kóng 1-ka-chi-chú sı̄ papa, tong-jiân í i chò chún, m̄-koh, goá chia̍h kah chiah toā-hàn, tńg-khı̀ ē-káng to bô kúi-pái, 10 ki chéng-thâu-á lâi sǹg koh siuⁿ chē; Sūi-hong? M̂...tı̄ ı̀n-sióng lāi-té, hia sı̄ chhit- thô kap koè-nı̂ koè-chiat ê só͘-chāi; Thô-hn̂g......che Thô-hn̂g mā...... Kóng lâi kóng khı̀, goá kèng-jiân tùi kan-taⁿ toà 3 nı̂ ê Tâi-tiong jı̄m-bat khah chē, m̄-tāⁿ án-ne, koh tı̄ chia o̍h tio̍h ū Hái-kháu-khiuⁿ ê Tâi-gí, mā tı̄ chia se̍k-sāi Tâi-gí-bûn, koh tı̄ chia tn̄g tio̍h 1-tı̄n ū kám-chêng ê lâng. Sui-bóng goá koh beh khı̀ lēng-goā 1-ê siâⁿ-chhı̄ liû-lōng--a, m̄-koh, lâng nā mn̄g goá sı̄ toh-ūi ê lâng, goá ē chin hoaⁿ-hí kā i kóng: “Tō-sı̄『太陽餅』chin chhut-miâ ê hit-ê --lah!” (TGB Thong-sı̀n tē 25 kı̂, 2001 nı̂ 10 goe̍h)