Thâng Tòng Hoé-chhia

Tı̄ Eng-kok ū chı̍t chá-khí hoé-chhia ê lâng-kheh tah kàu moá-moá,beh khı̀ Lûn-tun.Chhia tú-hó chhut-la̍t teh cháu ê sı̂,hut-jiân-kan ki-koan-chhiú khoàⁿ-kı̀ⁿ chêng-bı̄n lō͘-piⁿ ê sı̀n-hō ū pò m̄ thang koè-khı̀. In-ūi án-ne hoé-chhia liâm-piⁿ choān hō͘ thêng. Koh bô loā-kú āu-piah lâi ê hoé-chhia iā tù-leh,ná chek ná chē, lóng tòng-teh m̄-káⁿ koè-khı̀, tah-kheh lóng chin kiaⁿ-hiâⁿ, m̄ chai beh cháiⁿ-iūⁿ.

Khí-thâu thih-lō͘ ê chit-oân lóng m̄ chai án-choáⁿ sı̀n hō ē pò án-ne, kàu chhe lâng siông-sè tiāu-cha,chiàⁿ chai sı̄ chı̍t khoán ê thâng kiâⁿ m̄-tio̍h lō͘ ê iân-kò͘.

Chāi Eng-kok ū chı̍t chéng ê thâng chhin-chhiūⁿ káu-hiā ê khoán,pêng-sò͘ chin ùi kng, só͘-í mê--sı̂ chiah chhut-lâi thó-chia̍h,jı̍t-sı̂ chiū bih tı̄ thô͘-khang-lāi, lâi siám-pı̄ jı̍t ê kng. Hit chiah chó͘-tòng hoé-chhia ê thâng, kui mê chhut lâi chhoē chia̍h, thiⁿ-kng beh tò-khı̀, kiâⁿ m̄-tio̍h lō͘, sô tùi hit ki sı̀n-hō ê lāi-bı̄n,seng-khu hō͘ tiān ê ki-khı̀ teh tio̍h, hit ê tiān chiong án-ne ín koè-khı̀,soà hián-chhut hit ê pò m̄-thang koè--khı̀ ê hō, tı̀-kàu hiah ê hoé-chhia lóng m̄-káⁿ koè--khı̀. Hit-sı̂ thiaⁿ-kı̀ⁿ ê lâng bô-m̄ chin hó-chhiò.

Án-ne lán kàu-hoē ê hoē-iú só͘ kiâⁿ kiám m̄-sı̄ tio̍h chin sè-jı̄ mah? Nā ū kiâⁿ sió-khoá ê m̄-tio̍h,iā ē chó͘-tòng kàu-hoē ê chı̀n-pō͘,chhin-chhiūⁿ chit hō sè boé thâng,ē chó͘-tòng hiah-nı̍h toā ê hoé-chhia hō͘ i m̄-káⁿ chı̀n-chêng.

(hoan-e̍k)

0356 kı̂, 1914 nı̂ 11 goe̍h