Thó-lūn Kàu-io̍k kap Lô-má-jı̄ ūn-tōng ê su-giân
Tùi chho͘-tāi kàu-hoē Ki-tok-kàu, chin chù-tiōng bûn-jı̄. Nā m̄-bat jı̄, ka-kı̄ boē-hiáu tha̍k Sèng-keng. Ki-tok-kàu ê sı̀n-gióng chiū oh-tit khiā-chāi kap chı̀n-pō͘. Thang kóng, bûn-jı̄ sı̄ thoân-tō-siōng choè iàu-kín ê bú-khı̀. Tı̄ 1934 nı̂ ê Chinese Recorder, Thomas Barcley (Pa Bo̍k-su) ū kóng, “Kàu-hoē ê hoē-iú bô-lūn cha-po͘, cha-bó͘, lóng-chóng tı̄ in ê ka-têng, mı̂-jı̍t ka-kı̄ tio̍h ài tha̍k Sèng-keng. Chit ê sı̄ sı̀n-gióng seng-oa̍h-siōng choè iàu-kín ê tāi-chı̀. Lí nā ēng hàn-jı̄, lí éng-oán boē-thang tit-tio̍h chit khoán ê kiat-kó. M̄-kú nā-sı̄ ēng hit toē-hng ê khiuⁿ-kháu ê Lô-má-jı̄, lí chiū iông-ı̄ⁿ koh chin kín tit-tio̍h chit khoán ê kiat-kó. Tı̄ Tâi-oân ê hoē-iú í-keng Kū-iok tùi Chhòng-sè-kı̀ kàu Má-lia̍p-ki, Sin-iok tùi Má-thài kàu Khé-sı̄-lio̍k, sūn-sūn lı̄-lı̄ lóng ka-kı̄ oē-hiáu tha̍k. Chit ê kiat-kó lóng sı̄ chhái iōng Lô-má-jı̄, chiah oē thang tit-tio̍h ê.” Án-ni hō͘ lán thang chai, Lô-má-jı̄ tùi Tâi-oân ê kàu-hoē ê kòng-hiàn m̄-sı̄ sió-khoá. Chit ê lí-iû ū nn̄g ê. Tē it, Lô-má-jı̄ oē thang oân-choân piáu-hiān lán múi-jı̍t só͘ teh sú-iōng ê khiuⁿ-kháu. Tē jı̄, Lô-má-jı̄ chin iông-ı̄ⁿ ha̍k-sı̍p. Taⁿ kong-ho̍k-āu kàu-hoē ê bûn-jı̄ m̄-chai pı̀ⁿ cháiⁿ-iūⁿ? Siū-tio̍h kok-lāi kàu-hoē ê éng-hióng, ū lâng chiām-chiām teh sú-iōng hàn-jı̄, beh lâi oāⁿ Lô-má-jı̄. Te̍k-pia̍t Pak-pō͘ ê kàu-hoē ū chit khoán ê kheng-hiòng. Chiàu goá ê tiau-cha, kin-nı̂ 5 ge̍h 12 jı̍t kàu 7 ge̍h 11 jı̍t ê nn̄g ge̍h-jı̍t ê tiong-kan tı̄ Tâi-pak ê Ki-tok-kàu Chu-pâng ū boē-chhut 4729 pún ê Sèng-keng. Kı̂-tiong 4704 pún sı̄ hàn-jı̄ Sèng-keng, Lô-má-jı̄ Sèng-keng chí-ū 23 pún nā-tiāⁿ. Tı̄ Lâm-pō͘ iû-goân tām-po̍h ū chit khoán ê kheng-hiòng. Nā-sı̄ chiàu Kong-ho̍k Ìn-su-kio̍k, Ko Sian-siⁿ-niû kóng, hiān-chāi Lô-má-jı̄ Sèng-keng kap hàn-jı̄ Sèng-keng boē-chhut ê pí-lu̍t sı̄ 100 tùi 20. Sū-sı̍t kin-nı̂ ê Hā-lēng-hoē chham-ka-chiá ê tiong-kan, ū chin choē lâng toà hàn-jı̄ Sèng-keng lâi, ia̍h khoàⁿ-kı̀ⁿ ū bo̍k-su chú-lí ê sı̂ teh tha̍k hàn-jı̄ ê Sèng-keng. Chit ê oē thang piáu-sı̄ choè-kūn kàu-hoē bûn-jı̄ ê kheng-hiòng. Chóng-kóng bûn-jı̄ sı̄ beh ta̍t-sêng thoân-tō ê bo̍k-tek ê chı̍t ê chhiú-toāⁿ nā-tiāⁿ. Beh chhái-iōng sím-mı̍h bûn-jı̄ tùi hok-im ê pún-chit sı̄ bô éng-hióng, sı̄ kan-ta chı̍t ê hong-hoat-lūn nā-tiāⁿ. M̄-kú kap it-poaⁿ ê tāi-chı̀ siāng khoán, chhiú-toāⁿ ê soán-te̍k sı̄ tio̍h ài tāi-seng koat-tēng. Goá siūⁿ nā thang hō͘ hoē-iú á-sı̄ kiû-tō-chiá choè iông-ı̄ⁿ tha̍k Sèng-keng, oân-choân lí-kái Sèng-keng, chit-khoán bûn-jı̄ sı̄ tı̄ kàu-hoē choè hó ê bûn-jı̄. Taⁿ hit ê bûn-jı̄ tàu-té sı̄ hàn-jı̄ á-sı̄ Lô-má-jı̄? Nā-sı̄ chiàu Bêng Iú-tek Bo̍k-su ê tiau-cha, tı̄ pak-pō͘ ê hoē-oân-tiong (toā-lâng, gín-ná lóng chāi-lāi) oē-hiáu tha̍k Sèng-keng ê sı̄ lâm 1572 miâ, lú 1221 miâ, kiōng 2793 miâ; thang kóng, chí-ū 3 hūn chi it oē-hiáu tha̍k Sèng-keng nā-tiāⁿ, oāⁿ oē lâi kóng, chiū-sı̄ 3 hūn chi 2 iáu boē-hiáu tha̍k Sèng-keng. Tı̄ chit khoán chêng-hêng, chiong-lâi tı̄ Tâi-oân kàu-hoē tàu-té tio̍h ài chhái-iōng hàn-jı̄ á-sı̄ Lô-má-jı̄? Hiān-chāi lán ê kàu-hoē koan-hē bûn-jı̄ ê būn-toê sı̄ khiā tı̄ siang-chhe-lō͘. Tı̄ chit ê sı̂-ki bô koat-tēng chit ê hong-chiam sı̄ boē ēng-tit.
(Tâi-oân Kàu-hoē Kong-pò 729 kı̂, 1949 nı̂ 9 goe̍h)