Thô͘-thoàⁿ-á
Bó͘ kok ū hiaⁿ-tı̄ nn̄g lâng chò tiâu-lāi ê bûn-koaⁿ. Hiaⁿ-ko ū seⁿ chı̍t-ê cha-bó͘-kiáⁿ miâ kiò Pó-siān. Kàu 14 hoè, Pē-bó lóng koè-óng, chiū hō͘ in chek chhoā khı̀ chiàu-kò͘. Sió-tı̄ iā ū seⁿ nn̄g-ê cha-bó͘-kiáⁿ; chı̍t-ê miâ kiò Pó-chu, chı̍t-ê miâ kiò Pó-ge̍k. Pó-chu chit sı̂ 12 hoè, Pó-ge̍k 13 hoè. In lāu-pē chit-sı̂ sin-thé tı̀-pēⁿ, chiū sı̂ koaⁿ hoê-ke ióng-pēⁿ.
In chím chin thiàⁿ i nn̄g ê cha-bó͘-kiáⁿ, múi jı̍t kan-ta kò͘ se-chng. Pó-siān múi jı̍t liāu-lí chú-chia̍h sé i-chiûⁿ,iā tio̍h kéng thô͘-thoàⁿ, tı̀-kàu seng-khu siông-siông ū thô͘-thoàⁿ ê lâ-sâm, soà kā i kiò-chò Thô͘-thoàⁿ-á. Chóng-sı̄ hiah-nı̍h tio̍h-boâ ia̍h m̄-bat siū-khı̀, sǹg sı̄ chin hó lú-tek. Tùi lâi in chek tau 7 nı̂ kú, i nn̄g ê sió-moē chng-thāⁿ súi-súi êng-êng, i lóng m̄-bat khêng-hun, ka-tı̄ ta̍k jı̍t jı̄n-chit lí-ke.
Chit-sı̂ tú-tio̍h Thài-chú beh chhoā-bó, tiàu thong-kok ê chāi-sek-lú, tio̍h lâi hō͘ i chhiáⁿ. Hit-tia̍p in nn̄g ê sió-moē chē chhia beh khı̀ hù Thài-chú ê iân-sia̍h. Thô͘-thoàⁿ-á kā in chím pín i iā ài khı̀; in chím kap i nn̄g ê sió-moē lóng hiâm i kóng, “Lí chit ê pān iā káⁿ thí khui-chhùi kóng beh khı̀, chin bē kiàn-siàu leh!.” Hō͘ in chím kap nn̄g-ê sió-moē chek-pı̄, bı̄n âng-âng chiū koh jı̍p-khı̀ thô͘-thoàⁿ-keng, ba̍k-sái ná lo̍h-hō͘, chóng-sı̄ m̄-káⁿ háu chhut siaⁿ. Hut-jiân ū chı̍t tiuⁿ bé-chhia chē chı̍t-ê chin lāu ê hū-jı̂n-lâng lâi, mn̄g Pó-siān kóng, Háu siáⁿ-sū? Goá sı̄ lí ê chó͘-má chai lí ê kan-khó͘, taⁿ lí iā thang khı̀ hù Thài-chú ê iân-sia̍h. Chiū chiong koáiⁿ-á loa̍h Pó-siān ê seng-khu, chek-sı̂ pı̀ⁿ-chò chhēng chin súi ê si-tiû; iā ēng koáiⁿ-á phah nn̄g tè chio̍h, chek-sı̂ pı̀ⁿ-chò chı̍t siang ge̍k-ê, chiū hoan-hù i kóng, Lí khı̀ tio̍h m̄-thang koè 12 tiám tńg-lâi. Pó-siān pài-siā chó͘-má chē chhia chiū khı̀. Chóng-sı̄ hit-sı̂ lâng lóng í-keng teh lim-chia̍h lah!
Thài-chú khoàⁿ-kı̀ⁿ Pó-siān hí chhut bōng-goā, pún-sin the̍h hó mı̍h hō͘ i chia̍h, chia̍h poàⁿ-se̍k liáu, khoàⁿ-kı̀ⁿ teh-beh 12 tiám, Pó-siān chiū khí-sin chhut-khı̀; chin kú lóng bô koh lâi. Thài-chú chin iu-būn, sı̀-kè lóng chhoē bô, iā m̄-chai i ê sèⁿ-miâ chū-chí. Āu-lâi khoàⁿ-kı̀ⁿ toh-kha chı̍t-siang ge̍k-ê, chiū chiong ge̍k-ê chhe Khim-chhe khı̀ ta̍k só͘-chāi hō͘ chāi-sek-lú ê cha-bó͘-gín-ná chhēng. Nā chhēng tú-hó hit-ê chiū-sı̄ Thài-chú-hui. Khim-chhe niá-chí chek-sı̂ khı̀.
Hit-tia̍p Pó-siān tńg-lâi kàu chhù iáu-boē 12 tiám, i-chiûⁿ iû-goân pı̀ⁿ-chò kap kū-sı̂ tâng, in chím lóng m̄-chai i khı̀ hù Thài-chú ê iân-sia̍h. I nn̄g-ê sió-moē kàu 4 tiám chiàⁿ tńg-lâi, chiū kā in niâ kóng, Kin-á-jı̍t khoàⁿ-kı̀ⁿ chı̍t-ê chin-súi, pí sian-lú iâⁿ-koè chin chē. Pó-siān tı̄ thô͘-thoàⁿ-keng àⁿ-thâu chhut lâi khoàⁿ kóng, Kiám ū chhin-chhiūⁿ goá? Pó-chu, pó-ge̍k chin siū-khı̀,chek-pı̄ i kóng, Lí chit-ê ná kúi iā teh bē kiàn-siàu. Soà bô-ı̀ bô-ı̀ koh kiu-jı̍p thô͘-thoàⁿ-keng.
Keh jı̍t Khim-chhe lâi kàu in tau,kiò nā ū chāi-sek-lú lóng tio̍h lâi chhı̀ chhēng ge̍k-ê, chhēng nā tú-hó, chiū-sı̄ chò Thài-chú-hui. Pó-chu, Pó-ge̍k khoàⁿ tio̍h ge̍k-ê khah sè, chiū tı̄ lāi-bı̄n chām chı̍t-tè kha-chiúⁿ, kín-kín chiong pò͘ chat hó, chiū beh lâi chhēng. Khim-chhe khoàⁿ-kı̀ⁿ kóng, M̄-thang phah lâ-sâm ge̍k-ê, in-ūi lí ê kha m̄-sı̄ chū-jiân-ê iáu teh lâu-hoeh leh. Pó-siān tı̄ lāi-bı̄n iā beh chhut lâi chhēng. In chím kap Pó-chu, Pó-ge̍k lóng mē i, Lí bē kiàn-siàu iā káⁿ chhut khı̀ chhēng. Khim-chhe thiaⁿ-kı̀ⁿ kóng, M̄-thang hun-pia̍t súi-bái, kan-ta chhú chhēng ē ha̍h kha, tio̍h lâi chhēng. Chhut lâi chı̍t-ē chhēng tú-tú ha̍p kha. Khim-chhe liâm-piⁿ pài-i chò Sió-chú-bó.
Téng-bı̄n só͘ kı̀ sui-jiân sı̄ siáu-soat,iáu-kú ū thang chò lán ê kà-sı̄; in-ūi Iâ-so͘ bat kóng, Ài beh chò toā, tio̍h chò lâng ê chhe-ēng; iū koh chū-ko ê ē kàng-lo̍h chò sè. (Hoan-e̍k)