Kū-sū tiông thê, chài lūn pe̍h-oē-jı̄ ê tiōng-iàu-sèng. Tı̄ kúi nı̂ chêng í-keng ū kiông-tiau teh ho͘-io̍k kóng, Pe̍h-oē-jı̄ m̄-thang hoè; m̄-kú choè-kūn sū-sı̍t-siōng sı̄ chiām-chiām teh hong-hoè ê khoán, sui-jiân ū chin-choē in-sò͘ teh siū éng-hióng, chóng-sı̄ siong-sı̀n pe̍h-oē-jı̄ iû-goân oē kè-sio̍k chûn-chāi, lán ài kiōng-tông lâi ló-le̍k ı̂-chhı̂.
Lán chai, Jı̍t-jı̂n sı̂-tāi, ēng tông-hoà chèng-chhek kiông-chè thóng-tı̄ Tâi-oân ê sı̂, lán to lóng jı̄n-tēng pe̍h-oē-jı̄ sı̄ lán kàu-hoē su-iàu ê bûn-jı̄; só͘-í pó-chûn kàu taⁿ.
Lūn pe̍h-oē-jı̄ tùi lán Tâi-oân Ki-tok kàu-hoē lâi khoàⁿ, sı̄ bûn-hoà ê kong-sı̂n, tùi kàu-hoē ê kiàn-lı̍p sı̄ ū chin toā ê pang-chān le̍k-liōng. Tâi-oân chho͘-tāi kàu-hoē ê sı̂, bat jı̄ ê lâng chin chió-sò͘, kai-chài tùi bat pe̍h-oē-jı̄ oē tha̍k Sèng-keng, oē gı̂m-si, thang piàn-thoân tō-lí tı̄ kok toē-hng, lâi heng-khí kàu-hoē tı̄ ta̍k só͘-chāi. Pe̍h-oē-jı̄ ê kòng-hiàn iā ū Kàu-hoē kong-pò, ū í-goā ê khan-bu̍t á-sı̄ chheh, kı̂-thaⁿ ê tù-chok thang tha̍k, lâi thê-ko hoē-iú bûn-hoà ê chúi-chún. Chiàu ló-hu só͘ keng-giām lâi chèng-sı̍t, tùi 6, 70 nı̂ chêng kàu-hoē jı̂n-sū pí í-goā ê lâng, khah chá chı̀n-pō͘, khah chai-bat ê in-sò͘ toā pō͘ hūn tùi pe̍h-oē-jı̄ ê éng hióng só͘ chō-sêng ê le̍k-liōng put-sián.
Che sı̄ kè-khı̀ kàu-hoē bûn-hoà ê sú-sı̍t . Kiám thang hoè-iōng pe̍h-oē-jı̄ mah?
Eng-kai ài kó͘-lē kè-sio̍k chhui-hêng, pó-chûn, thang kóng pē-bú-oē ê kè-ta̍t, iā sı̄ kàu-hoē bûn-hoà sú-siōng ê tiōng-iàu būn-toê. Lán ê pē-bú-oē chiū-sı̄ Bân-lâm-gú, chiū-sı̄ lán Tiong-hoâ Bı̂n-kok ê hong-giân, hiān-sı̂ piàn-pò͘ tı̄ Tong-lâm A kap sè-kài ta̍k só͘-chāi, iā sı̄ chin tiōng-iàu ê gú-giân. Choè-kūn chheng-siàu-liân ê oē-gú chin bô chèng-khak ê hoat-im, nā ēng pe̍h-oē-jı̄, oē-thang chèng-khak. Só͘-í iú-sim ê kàu-hoē jı̂n-sū ài liû-sim chit ê būn-toê. Kok-kok lóng ū i ê bûn-chiuⁿ kap bûn-hoat teh hoat-piáu i ê su-siúⁿ, chóng-sı̄ iā ū i ê giân-bûn it-tı̀ ê bûn-jı̄, chiū-sı̄ oē kap bûn siāng-sı̂ piáu-ta̍t chhut-lâi, oē sı̄ bûn, bûn sı̄ oē, chit hō tan-khúi-sèng ê pe̍h-oē-jı̄ chin kán-tan koh hó ēng, bô bûn-hoat, iā bián kái-sek, chin khoài ha̍k-sı̍p, chin pe̍h, chin hó tha̍k; ha̍k-sı̍p pe̍h-oē-jı̄ choè bān kúi ge̍h-jı̍t chiū oē-thang tha̍k Sèng-keng kap í-goā ê khan-bu̍t; nā beh tha̍k Kok-bûn Sèng-keng, chiū ài tha̍k kúi-nā nı̂, chho͘-tiong í-siōng ê thêng-tō͘ chiah oē hiáu tha̍k, chóng-sı̄ iā boē sūn-lı̄. Tùi kok-bı̂n ha̍k-hāu kàu chho͘-tiong ài kúi nı̂ kú, kiám bô pí pe̍h-oē-jı̄ ê ha̍k-sı̍p khah ûi-lân?
Goá tı̄ kàu-hoē seng-oa̍h 60 goā nı̂ kú ê koan-kám, chiàu khoàⁿ hiān-sı̂ Tâi-oân ê bûn-hoà chúi-chún iáu bē ta̍t kàu lí-sióng ê thêng-tō͘, 3-40 hè í-siōng ê hoē-iú, iû-kı̂-sı̄ chng-siā ê lâm-lú hoē-iú, tha̍k Kok-bûn ê Sèng-keng oē chheng-chhó ê iáu sı̄ chin chió-sò͘. In-ūi Jı̍t-jı̂n sı̂-tāi só͘ tha̍k ê Kok-bûn bat bô choē, lóng sı̄ ēng pe̍h-oē-jı̄ ê Sèng-keng kap si khah choē; tı̄ to͘-chhı̄ iā chha-put-to. Goá bat siat tha̍k Sèng-keng-pan (tı̄ lé-pài-jı̍t) tha̍k pe̍h-oē-jı̄ ê chin sūn-sū koh khah oē bêng-pe̍k, tha̍k Kok-bûn ê chiū khah ûi-lân, iā boē sūn-lı̄, iā oh bêng-pe̍k hit ê ı̀-gı̄. Pe̍h-oē-jı̄ sı̄ giân-bûn it-tı̀; Kok-bûn tio̍h koh kái-sek chin oh lí-kái. Goá kóng chı̍t ê sū-sı̍t, m̄-sı̄ phian-tiōng pe̍h-oē-jı̄, hut-lio̍k Kok-bûn, Kok-bûn sı̄ lán Tiong-hoâ Bı̂n-kok bûn-hoà ê cheng-hoâ, sı̄ kok-bı̂n lóng tio̍h ha̍k-sı̍p ê, chóng-sı̄ tı̄ chit ê chheng-hông put chiap ê sı̂-tāi, pe̍h-oē-jı̄ sı̄ pó͘-chō͘ chit ê èng-hù put-kı̍p ê chı̍t chióng bûn-jı̄, iā sı̄ pang-chān Kok-bûn ê chı̀n-tián, in-ūi tùi bat pe̍h-oē-jı̄ lâi ha̍k-sı̍p Kok-bûn ê lâng, tı̄ kàu-hoē tiong put-kè kı̂ sò͘, ū Kam jı̄-tián, ū La̍k-pah-jı̄ phian, ū í-goā chin-choē ê Kok-bûn pe̍h-oē-jı̄ tùi-chiàu ê chheh thang ha̍k-sı̍p, pang-chān Kok-bûn ê chı̀n-pō͘.
Pe̍h-oē-jı̄ ài tı̄ Chú-jı̍t-o̍h ha̍k-hāu, tı̄ ka-têng chit nn̄g hong-bı̄n jı̄n-chin kàu-io̍k, m̄-thang hong-hoè, tùi soè-hàn kà kàu oē tha̍k oē siá, ū hó ê ki-chhó͘, chiū kàu lāu iā khó-í thang ēng. Goá ê keng-giām, pún-lâng tùi soè-hàn tı̄ ka-têng o̍h, iā goá ê kiáⁿ-sun chū soè-hàn kà oē bat, chin piān-lı̄, beh tha̍k Kok-bûn iā hó, beh tha̍k pe̍h-oē-jı̄ iā hó, tı̄ Bí-kok ê kiáⁿ-jı̂ ēng pe̍h-oē-jı̄ siá pē-bú-oē ê phoe, kám-kak chin chū-jiân.
Sng Hông-tı̀n Bo̍k-su chài lūn-khí pe̍h-oē-jı̄ ê tiōng-iàu-sèng, tông-sı̂ thê-gı̄ hi-bāng kái-chı̀n ê kúi tiám, iā ū “Kong-pò-siā ê chhù-piⁿ” iú só͘ kám-giân ê chham-khó, taⁿ goá bô ài to-giân phêng-tiông lūn-toán, put-kò kak-tit pe̍h-oē-jı̄ ê “tông-im-hoà”, “kán-bûn-hoà”, “kán-jı̄-hoà” sı̄ lí-sióng àn, chóng-sı̄ sı̍t-chè-siōng iáu ū saⁿ-lı̄ ê tiám, hi-bōng chhú-āu chài gián-kiù lâi ha̍p sı̍t-iōng.
Chóng-kóng, Pe̍h-oē-jı̄ tùi lán Ki-tok kàu-hoē ê tiōng-iàu-sèng, kàu-hoē iú-sim jı̂n-sū lâi saⁿ kó͘-lē kap thui-hêng sı̄ só͘ goān-bāng.
(Tâi-oân Kàu-hoē Kong-pò tē 1019, 1020 hō, 1967 nı̂ 12 ge̍h)
