Thiàⁿ-sim

Chı̍t ê chûn-lāi ê i-seng, kā Bí-ní phok-sū (Dr.C.Meyars) kóng khí ē-bı̄n ê keng-giām: “Ū chı̍t-pái, goán chûn-téng ê chı̍t ê gín-ná poa̍h-lo̍h hái-té, chúi-siú chiong i kiù khí-lâi, thǹg goā-saⁿ, si-ēng jı̂n-kong ho͘-khip hoat, goá koáⁿ-lâi ê sı̂, chúi-siú lóng kóng gín-ná í-keng sí-lah, bô ǹg-bāng lah. In-ūi lâng choē, goá bô khoàⁿ chheng-chhó gín-ná ê bı̄n-māu. Goá tú beh lı̄-khui, hut-jiân hoat-hiān hit ê sı̄ goá ê kiáⁿ, goá chiū sûi-sı̂ thǹg-khı̀ goā-saⁿ, bô koh siong-sı̀n i í-keng bô ǹg-bāng, chı̄n-la̍t ēng ta̍k-chióng ê pān-hoat, ēng la̍t tùi i ê phı̄ⁿ pûn-khùi, koh chiong i ê sin-khu hoan-lâi hoan-khı̀, iā chı̍t-bı̄n âu-kiò Siōng-tè chín-kiù i. Goá án-ni bô thêng ló͘-le̍k 4 tiám-cheng kú, jı̍t-lo̍h ê sı̂, chiah hoat-hiān tio̍h i iáu oē chhoán-khùi.” Thiàⁿ-sim hō͘ lán chiong múi lâng lóng lia̍h-choè ka-kı̄ choè chhin-ài ê lâng, lâi kò͘-liām in ê lêng-hûn ê tit-kiù būn-toê, éng-oán bô sit-chı̀. Chú ah! Ke-thiⁿ goán chı̍t-iūⁿ ê thiàⁿ-sim! (Oa̍h-miā ê Bí-niû tē 50 kı̂,1959 nı̂ 8 ge̍h)