Thiàⁿ-sioh lán ê khe
Thiàⁿ-sioh lán ê ūn-hô
Thiàⁿ-sioh lán ê thó͘-tē
Ūi lán kiáⁿ-sun tāi-tāi hó
Bô khe-chúi
Bô ūn-hô ê to͘-chhı̄
Beh án-choáⁿ
Ū hông-hun ê si
Beh án-choáⁿ tı̄ chia
Thiaⁿ tui-sióng khek ê koa-siaⁿ
Bô chúi ê só͘-chāi
Beh án-choáⁿ kiò khe
Bô hı̂ bô hê
Beh án-choáⁿ kiò khe-chúi
Bô khe-chúi ê to͘-chhı̄
Bô khe-chúi ê sim-koaⁿ
Beh án-choáⁿ ū si
Bô lâng ài khı̀ ê chúi-piⁿ
Beh án-choáⁿ kiò ūn-hô
Hō͘ lâng m̄-káⁿ phı̄ⁿ ê chúi
Chhiū-á chai koh khah choē
Beh án-choáⁿ ū si
An-pêng-lō͘ ê chhiū-á
Chhiū-á-kha ê í-á
Hong chhoe jı̍t pha̍k
Ou-tó͘-bái chū-tōng-chhia
Tı̍t-tı̍t sái
Hiông-hiông lâi
Ū siáⁿ lâng leh thiaⁿ
Thiaⁿ tui-sióng-khek ê koa-siaⁿ
Kim-khoài--á thiàu ūn-hô
Oan-ioⁿ bāng ê kò͘-sū
Tı̄ chit chióng ê chúi lāi
Í-keng bô lâng koh lâi thê-khí
Bô lâng káⁿ koh chò chit chióng
Hô-piⁿ ê chhun-bāng
Ou-o͘ ê chúi
Bô lâng hoaⁿ-hí
Bô lâng chò bāng
Bô hoaⁿ-hí ê liông-chûn
Thiaⁿ bô tui-sióng-khek ê koa-siaⁿ
Siōⁿ beh bé chûn-phiò
Khı̀ khoàⁿ kó͘-chá ê siâⁿ
Tı̄ hông-hun ê chhái-hûn lāi
Goá í-keng chhoē bô
Kó͘-chá ê bé-thâu
Í-keng thiaⁿ bô
Hiàng-sı̂ ê phōng-chûn-á siaⁿ
