Thiàⁿ Chhù-piⁿ

Chit ê kò͘-sū sı̄ hoat-seng tı̄ pún-séng ê lâm-pō͘, chı̍t ê sió-sió ê hiong-chhoan. Tı̄ chit ê hiong-chhoan ê sai-pêng ū chı̍t keng bô chin toā ê Kok-bı̂n ha̍k-hāu. Tı̄ ha̍k-hāu lāi ê 5 nı̂ kip tiong, ū chı̍t pan lóng sı̄ lú-seng; in-ūi án-ni, só͘-í hāu-tiúⁿ phài chı̍t ê lú ê siàu-liân lāu-su tam-jı̄m. Choân-pan ê ha̍k-seng tı̄ chit ê hoa̍t-phoat ê lú lāu-su léng-tō hā, lóng chin jı̄n-chin, koh khoài-lo̍k teh ha̍k-sı̍p. M̄-kú choân-pan ê ha̍k-seng tiong, ū chı̍t ūi sió pêng-iú miâ kiò-choè Lâu Bí-eng. I ê sèng-keh ū sió-khoá te̍k-pia̍t. I siⁿ-choè sán koh oé-soè, ta̍k jı̍t lóng tiām-tiām, chin hán-tit kóng-oē. Iā tı̄ i ê bı̄n siông-siông toà tio̍h chı̍t chióng iu-iông, chin hán-tit khoàⁿ tio̍h i chı̍t sı̂ ê chhiò-iông. Ta̍k jı̍t tı̄ hā-khò ê sı̂, ha̍k-seng lóng cháu khı̀ chháu-tiûⁿ thit-thô; chóng-sı̄ i lóng ka-kı̄ chēng-chēng chē tı̄ kàu-sek teh khoàⁿ chheh. Lóng bô siūⁿ beh kap i ê tông-o̍h chhut-khı̀ thiàu soh-á á-sı̄ thit-thô kiû. Taⁿ in-ūi ha̍k-hāu ê kui-tēng, ha̍k-seng tı̄ tiong-tàu boē ēng-tit tńg-khı̀ chhù chia̍h-pn̄g, lóng tio̍h chah piān-tong. Só͘-í Bí-eng iû-goân tio̍h chah pn̄g khı̀ ha̍k-hāu chia̍h. M̄-kú múi pái chia̍h tiong-tàu-tǹg ê sı̂, i lóng ka-kı̄ chı̍t lâng bih tı̄ kàu-sek ê piⁿ-á, thâu àⁿ-àⁿ chin kín chiū chia̍h pá. In-ūi án-ni, choân-pan ê tông-o̍h lóng chin kı̂-koài, bô lâng chai i piān-tong lāi só͘ chah ê sı̄ sím-mı̍h? Sı̄ pe̍h-bí pn̄g, á-sı̄ han-chû-chhiam? Múi pái chia̍h-pn̄g ê sı̂, ū ê tông-o̍h lóng ké beh lim tê, tiâu-kò͘-ı̀ kiâⁿ tùi i ê sin-piⁿ kè, beh thau khoàⁿ i piān-tong lāi só͘ chah ê sı̄ sím-mı̍h? Chóng-sı̄ Bí-eng kı̀ⁿ-nā khoàⁿ-tio̍h ū tông-o̍h lâi, i chiū koáⁿ-kín chiong piān-tong khàm khí--lâi, chē teh m̄ chia̍h-pn̄g. Chin-choē tông-o̍h khoàⁿ-tio̍h án-ni, lóng chin siū-khı̀, kóng i sı̄ koài-lâng. Bí-eng tùi tı̄ tông-o̍h só͘ hō͘ i ê bú-jio̍k, lóng ēng jím-nāi lâi tùi-hù, liân chı̍t kù oē to bô beh kap lâng piān-lūn. Ū ê tông-o̍h khoàⁿ tio̍h án-ni, soà “Nńg thô͘ chhim-ku̍t”, jú mē jú lı̄-hāi. Tān-sı̄ tı̄ choân-pan tông-o̍h tiong, ū lēng-goā chı̍t ūi tông-o̍h, i ê miâ kiò-choè Khu Sò͘-hâ. I sı̄ chı̍t ê Chú-jı̍t-o̍h ê ha̍k-seng, ta̍k pái nā khoàⁿ tio̍h ū lâng teh mē Bí-eng sió pêng-iú ê sı̂, sim-lāi lóng chin kan-khó͘. I siông-siông siūⁿ: Bí-eng it-tēng ū sím-mı̍h kan-khó͘ ê só͘-chāi, boē thang chiong piān-tong hō͘ pa̍t lâng khoàⁿ. Só͘-í i koat-sim kóng: Ká-sú Bí-eng ū sím-mı̍h khùn-lân, goá chin goān-ı̀ pang-chān i. Tı̄ chı̍t ê pài 5 ê tē 4 chiat, Thé-io̍k khò, Khu Sò͘-hâ in-ūi kha thiàⁿ, só͘-í lāu-su phài i kò͘ kàu-sek. Choân-pan tông-o̍h lóng chhut-khı̀, kàu-sek chí-ū Khu Sò͘-hâ chı̍t lâng nā-tiāⁿ. Hit sı̂ i siūⁿ khí Bí-eng ê piān-tong, só͘-í i koáⁿ-kín kiâⁿ oá-khı̀ Bí-eng ê toh-á. Tùi toh-á té chiong Bí-eng ê piān-tong the̍h chhut-lâi, phah khui chı̍t-ē khoàⁿ, lāi-bı̄n lóng sı̄ o͘ han-chû-chhiam. Tùi án-ni Sò͘-hâ chiah chai Bí-eng chia̍h pn̄g m̄ hō͘ lâng khoàⁿ ê goân-in. Put-ti put-kak tiong, Sò͘-hâ lâu chhut tông-chêng ê ba̍k-sái. Hit jı̍t pàng-o̍h, Sò͘-hâ tńg-khı̀ chhù, chiū chiong Bí-eng tông-o̍h ê tāi-chı̀ kā i ê ma-ma kóng, ǹg-bāng ū pān-hoat thang pang-chān Bí-eng. Choè-āu in koat-tēng tùi bı̂n-á-chài khí, Sò͘-hâ ta̍k jı̍t lóng ke chah chı̍t ê piān-tong thang hō͘ Bí-eng. Keh jı̍t, Sò͘-hâ pí i phó͘-thong sı̂ khah chá khı̀ ha̍k-hāu, khoàⁿ tông-o̍h lóng iáu-bē lâi ê sı̂, àm-chı̄ⁿ chiong piān-tong hē tı̄ Bí-eng ê toh-á-lāi. Kàu hit tiong-tàu beh chia̍h pn̄g ê sı̂, Bí-eng chhun chhiú jı̍p toh-á-lāi the̍h piān-tong ê sı̂, chiah hoat-kak tio̍h ke chı̍t ê chhiⁿ-chhau ê piān-tong. I kám-kak tio̍h chin gông-ngia̍h, só͘-í i ēng hò͘ⁿ-kı̂ ê ba̍k-chiu khoàⁿ choân-pan ê tông-o̍h, i khoàⁿ boē chhut sím-mı̍h lâng hō͘ i, in-ūi tāi-ke lóng àⁿ-thâu teh chia̍h pn̄g. Tùi tı̄ án-ni soà m̄-káⁿ chia̍h, iû-goân hē tı̄ toh-á-lāi. Hit sı̂ chē tı̄ i āu-bı̄n pâi ê Sò͘-hâ khoàⁿ tio̍h chiū chin tio̍h-kip, in-ūi che sı̄ i sêng-sim sêng-ı̀ beh pang-chān Bí-eng, chóng-sı̄ i m̄-káⁿ chiap-siū. Tong-sı̂ Sò͘-hâ iā m̄-káⁿ tı̄ chèng-lâng bı̄n-chêng kā Bí-eng kóng, kiaⁿ-liáu siong tio̍h i ê chū-chun sim. Kàu hit jı̍t beh pàng-o̍h, Sò͘-hâ chiah siá chı̍t tiuⁿ choá-tiâu-á hō͘ Bí-eng, ài i sió tán teh. Bí-eng khoàⁿ chit tiuⁿ choá-tiâu liáu-āu, chiah chai goân-lâi tiong-tàu hit ê piān-tong sı̄ siông-siông chio i khı̀ Chú-jı̍t-o̍h ê Sò͘-hâ hē--ê. I the̍h tio̍h hit tiuⁿ choá hui-siông ê kám-kek! Boē kı̀m-tit soà lâu chhut chı̍t-tih chı̍t-tih ê ba̍k-sái. Sò͘-hâ khoàⁿ tio̍h án-ni, koáⁿ-kín kiâⁿ oá-lâi an-ùi Bí-eng, chhiáⁿ Bí-eng chiap-siū i ê pang-chān, iā chin goān-ı̀ choè i ê pêng-iú, choa̍t-tùi bô chiong pı̀-bı̍t kong-khai. Tùi hit jı̍t khí, in lóng chin khoài-lo̍k koh chin jı̄n-chin tı̄ ha̍k-hāu tha̍k-chheh, iā siông-siông choè-tı̄n khı̀ hù Chú-jı̍t-o̍h. （Lú-soan Ge̍h-khan Tē 70 kı̂, 1965 nı̂ 10 ge̍h)