Thiⁿ--nı̍h ê Siaⁿ
Thang kóng ū 300 nı̂ lâi ê bûn-hoà, sè-kài só͘ sǹg ū tio̍h ê Tang-kiaⁿ tè-to͘ chit pang in-ūi siū-tio̍h hui-siông ê tē-tāng, í-kı̍p hoé-chai, it-sı̂-kan kok chéng ê sū-gia̍p, ta̍k-iūⁿ ê ki-koan, chiū keng-chè kài, kàu-io̍k kài, chèng-tı̄ kài kok hong-bı̄n siū toā éng-hióng. Chit ê hoân-hoa sēng-koan ê tè-to͘, oá chiâⁿ-poàⁿ, tı̄ chı̍t-ba̍k-nih-kú ê tiong-kan oán-jiân pı̀ⁿ-chò khòng-iá hoé-sio-po͘. Hāiⁿ-ah ! Chı̀n-chai chêng hiah-ê toā keng koân-lâu, chhòng súi-súi ê siong-tiàm, kó͘-chek, bêng-só͘, ke-lō͘, sı̄ phó͘-thong chèng-lâng him-bō͘ ài kàu, ài khoàⁿ ê só͘-chāi. Nā-sı̄ kàu chit chūn só͘ chhun--ê sı̄ hiah-ê sio bô khı̀ ê chng-á-koe̍h, thih-phiáⁿ kap hoé-sio-hu nā-tiāⁿ. Chin-chiàⁿ sı̄ chhám-tām, thang khó-lı̂n ê chōng-thāi. Goá sui-jiân tı̄ Chı̀n-chai āu chiâⁿ goe̍h-jı̍t chiah jı̍p Kiaⁿ, sui-sı̄ bô khoàⁿ-tio̍h hit hō lúi-lúi tūi-tūi ê sin-si, á-sı̄ hoé teh to̍h ê sı̍t-kéng; iáu-kú khoàⁿ-tio̍h só͘ chhun ê pı̄-lān-bı̂n, hoé-sio jiah, kut-thâu-hu ê hiān-siōng, chū-jiân iā ē-tit liāu-sióng tng-sı̂ chhám-chōng ê kong-kéng. Iā m̄-sı̄ pit-sia̍t só͘ hêng-iông ē chı̄n. Lūn chit-hō m̄-bián goá koh tı̄-chia siá kàu loā siông-sè lâi kiáu-jiáu lia̍t-ūi ê ba̍k-chiu, iā sı̄ só͘ chai-iáⁿ ê sū. Put-kò chit pang chit hō tē-tāng, kiám-chhái ū ha̍k-chiá tùi tē-chit-ha̍k lâi kóng, sı̄ tē-chit ê goân-lí iā kú-káⁿ, khiok ū-iáⁿ, boē bián-tit; iáu-kú tı̄-chia lán chò sı̀n-chiá ê chı̍t-hūn-chú, kiám ē bián-tit siūⁿ chit khoán thian-chai tē-piàn, bô koh-iūⁿ oán-jiân sı̄ chı̍t chéng Thiⁿ--nı̍h ê Siaⁿ ? Chit khoán kàn-chiap ê siaⁿ, tùi tı̄ cha̍p-goā bān ê sí-sit ê, thàu-koè kàu tı̄ chhı̄-bı̂n ê sim-lāi. Chit khoán siaⁿ kó-jiân chē-chió ū kiò-chhéⁿ, kám-chhiok tio̍h chhı̄-bı̂n lêng-tek ê sim. He sı̄ án-choáⁿ kóng ? In-ūi lia̍t-ūi lóng chai, to͘-chhı̄ jú toā, chhı̄-ke jú lāu-jia̍t, sı̄ hō͘ jı̂n-sim chhia-chhí, hi-êng jú kiông. Bûn-bêng ha̍k-būn jú koân, chiū lûn-lí tō-tek jú pāi; jı̂n-chêng hong-sio̍k jú-bái. Tùi án-ni, chong-kàu-sim, sı̀n-tek chiū jı̍t-goe̍h ná tūi-lo̍h. Che sı̄ siā-hoē it-poaⁿ chū-jiân ê hoat-chek. Chêng jı̍t ū lâng beh kóng, “N̂g-kim bān-lêng, á-sı̄ kho-ha̍k bān-lêng.” Nā oāⁿ oē lâi kóng, chiū-sı̄ chı̂ⁿ á-sı̄ ha̍k-būn chò pún-ūi, ū la̍t iâⁿ-koè bān-hāng, só͘-í tùi án-ni Chong-kàu kā i lia̍h-chò chı̍t piⁿ. Taⁿ kàu tı̄ chit-chūn chit hō soeh, chha-put-to hō͘ hit-ê toā chū-jiân bē tí-khòng ê la̍t phah-phoà khı̀ lah ! In-ūi jı̂n-sim khah chai-iáⁿ taⁿ bô tú-tú sı̄ án-ni, in-ūi tı̄ cha̍p-chı̀, sin-bûn, siông-siông ū khoàⁿ-kı̀ⁿ m̄-sı̄ sı̀n-chiá, kàu chit ê sı̂, iáu-kú só͘ siá, só͘ ēng ê giân-sû, jı̄-gán, su-siúⁿ sı̄ ū khah oá tı̄ Chong-kàu ê kheng-hiòng. Án-ni bu̍t-chit chit bı̄n sui-sı̄ thang khó-lı̂n, iáu-kú sı̂n-lêng chit bı̄n thang ǹg-bāng hoaⁿ-hí, in-ūi liông-sim siū kak-chhéⁿ, lâng khah chai kok-ka, siā-hoē, kò-jı̂n ê khoat-tiám. Tng tı̄ chit ê tōng-iô iau-kiû Chong-kàu ê sı̂-tāi, tı̄ chit ê sı̂, Ki-tok-kàu kiám ē jím-sim kan-ta lám-heng teh chò Pông-koan-chiá ? M̄-tio̍h bē jím-tit tông-pau ê kan-khó͘, Ki-tok-kàu sēng chit ê ki-hoē, ke̍k-le̍k ēng chióng-chióng ê chhiú-oán teh oān-chō͘ kiù-chè. Pí-phēng kià-hù chı̂ⁿ, chia̍h-mı̍h, jı̍t-iōng phín, lı̂m-sı̂ siat Soat-kàu-só͘, khui Chú-jı̍t-o̍h téng-téng. Chiông-tiong Bêng-tı̄ Ha̍k-ı̄ⁿ Ki-tok-kàu ha̍k-seng ê Chheng-liân-hoē kap chêng pang tò Tâi ê Hō-chhoan (Kagawa) Sian-seⁿ iā cho͘-chit chı̍t ê thoân-thé, tı̄ kúi-nā só͘-chāi teh oa̍h-tāng. Só͘-í kim-hō͘ m̄-nā goá kò-jı̂n, chiū it-poaⁿ tè-kok Ki-tok-kàu-kài lóng teh kia̍h thâu jia̍t bōng kok bı̂n choân-thé ē siū-tio̍h cheng-sı̂n-chiūⁿ chin-chiàⁿ ê sé-lé. Tùi kin-pún-tek ê kak-chhéⁿ, chiong-lâi kàu-hoē ê toā chín-heng, hoat-tián, beh tùi chia chhut-hoat, sūn-soà kiàn-siat cheng-sı̂n-tek ê bûn-hoà, thang sı̍t-hiān lán lâng só͘ teh lí-sióng ê kàu-hoē. M̄-nā án-ni, chiū chāi-lâi ê kū Tang-kiaⁿ beh koh chhut-hiān chò chı̍t ê éng-oán sin koh toā ê Tang-kiaⁿ. Nā kó-jiân án-ni, lán bē bián-tit kóng, sı̄ choán chai-hō hō͘ i pı̀ⁿ-chò hok-khı̀. “Koh lán chai bān-hāng saⁿ-kap lâi hō͘ thiàⁿ Siōng-tè ê lâng tit-tio̍h lı̄-ek.” (Lô-má 9 : 28). (Tı̂-oân Kàu-hoē-pò tē 465 koàn, 1923 nı̂ 12 ge̍h)