Thiⁿ-kong thiàⁿ gōng-lâng

Choè-kı̄n liân khoàⁿ nn̄g-phı̀ⁿ Jı̍t-pún tō-ián Ou-te̍k-bêng ê tiān-iáⁿ, “Bāng” kap “Peh-goe̍h ê kông-sióng-khek”. Ta̍k-pái khoàⁿ i ê tiān-iáⁿ, hit-mı̂ lóng khùn-boē-khı̀. “Bāng” tùi jı̂n-sèng ê io̍k-bōng, chiàn-cheng ê chân-hāi, khoân-kéng ê ù-jiám thê-chhut it-liân-chhoàn ê khòng-sò͘ liáu-āu, ēng chı̍t-ê oán-lı̄ bûn-bêng, hoân ngó͘ sûn-phok ê “ húi-chhia-chhoan kò͘-sū“ chò kiat-sok, thè jı̂n-lūi oē-chhut chı̍t-pak tò-tńg lo̍k-hn̂g seng-oa̍h ê bāng. Chóng-sı̄ tú chhin-chhiūⁿ i tı̄ “Peh-goe̍h ê kông-sióng-khek” lāi-bı̄n, chioh-tio̍h a-pô ê chhùi kóng-chhut ê sim-siaⁿ: “1945 nı̂ ūi-tio̍h beh khah-kín thêng-chí chiàn-cheng, Bí-kok tı̄ Jı̍t-pún tı̀m-lo̍h nn̄g-lia̍p thiⁿ-kap tē lóng pàng-siaⁿ toā-khàu ê Goân-chú-toâⁿ, chiàn-cheng chiū án-ni lâi kiat-sok?“ Ta̍k-jı̍t ê sin-bûn péng-khı̀--lâi tha̍k khoàⁿ-māi-lè, nā chhoē-bô chiàn-cheng ê sin-bûn, goá kóng lí gâu! Siá kàu chia, boē-kı̀m--tit siūⁿ-khí Thian-hiàn ê si “Koh pó͘ phoà-bāng”. lāi-bı̄n ê si-kù: “A-pa bat kóng: Chit-niá phoà-bāng í-keng kúi-cha̍p tang, sı̍t-chāi hō͘ lâng thâu chin tāng, kiáⁿ-ah! M̄-thang kā tín-tāng, chiah boē ka-kı̄ chhoē mâ-hoân, m̄-thang jı̍t-sı̂ chò bı̂n-bāng, chiah boē hō͘-lâng chhiò gōng-lâng.” Ou-te̍k-bêng sı̄ gōng-lâng, tı̄ Tâi-oân khiā-tı̄ bı̂n-chú chiân-soàⁿ teh phah-piàⁿ ê lâng mā-sı̄ gōng-lâng, chóng-sı̄ ná chhin-chhiūⁿ goán kong iā bat án-ni kóng? “Thiⁿ-kong thiàⁿ gōng-lâng!” (Tâi-oân Kàu-hoē Kong-pò tē 2074 kı̂, 1991 nı̂, 12 goe̍h)