Thiⁿ Chù-tiāⁿ

Chù-tiāⁿ sı̄ boē koé-oāⁿ ê ı̀-sù, kóng chù-tiāⁿ ná chhin-chhiūⁿ kóng bān-mı̍h sı̄ thiⁿ siⁿ-sêng boē pok-tit, lâng siông-siông ài kóng ta̍k hāng sı̄ chù-tiāⁿ, tı̄ soaⁿ-nı̍h tú-tio̍h chhiⁿ-hoan ta̍k lâng cháu-lı̄, chí-ū bó͘ lâng thâi-khı̀, sı̄ chù-sí. Bó͘ hoē-iú chı̍t ke chhit lâng kap chhù hō͘ toā chúi lâu-khı̀, la̍k lâng sí, chí ū chı̍t ê cha-bó͘ gín-ná cha̍p-sı̀ hè khı̂ⁿ í-á hō͘ chúi lâu-khı̀, kha̍h tı̄ tek-ûi-nı̍h, hō͘ lâng kiù khı̀, che bô chù-sí. Jı̄-cha̍p-goā nı̂ chêng Sam-tiau lio̍k-kun khan cha̍p lâng khı̀ thâi, chı̍t ê thâi khin-siong, koh kúi-nā tiám cheng kú koh-oa̍h, cháu-khı̀ kô͘-io̍h, hiān-sı̂ iáu tı̄-teh, chit ê bô chù-sí. Bó͘ sià-jı̂n i ê pē sí liáu pàng kúi-cha̍p-bān ke-gia̍p hō͘ i, āu-lâi khai-liáu teh kā lâng pun, che chù-tit i khit-chia̍h miā. Koe-lâng Boa̍t-kóng ê thâu-ke chiong lú-koán boē Y3,5000. Koh kè nn̄g-jı̍t sit-hé choân-pō͘ pı̀ⁿ hé-hu, boé-chú chù-liáu chı̂ⁿ. Sio̍k-gú kóng, Siⁿ sí thiⁿ chù-tiāⁿ; ia̍h kóng, Ū kiáⁿ ū kiáⁿ miā, bô kiáⁿ thiⁿ chù-tiāⁿ; ia̍h kóng, Hó-pháiⁿ lí ê miā, in-iân thiⁿ chù-tiāⁿ. Sè-sio̍k lâng lóng án-ni sı̀n, sı̄ chù tiāⁿ-tio̍h. Hoê-hoê kàu ê sı̀n-gióng kóng, Bān-sū thiⁿ chù-tiāⁿ. Sèng-chheh iā ū kóng, Bān-sū sı̄ Siōng-tè ê chí-ı̀. Koh ū bô sı̀n kàu ê lâng kóng, Bô chù-tiāⁿ, ta̍k hāng sū ka-kı̄ ê châi-lêng, teh choè kap kéng-gû sı̂-ki chiū chiâⁿ. Taⁿ lâi siūⁿ chit ê chù-tiāⁿ ê ı̀-sù, hoē-iú iā ū lâng ta̍k hāng án-ni siūⁿ sı̄ chù-tiāⁿ. Goá phah-sǹg iā ū chhò-gō͘ tı̄-teh. Sui-jiân sı̄ ū tiāⁿ-tio̍h, ia̍h sı̄ m̄ thang bê-sı̀n. Siat-sú bó͘ lâng nā m̄-choh teh chē, kám ū chù-tiāⁿ i boē gō ū thang chia̍h ? Nā tı̄ liû-hêng-pı̄ⁿ teh phe-sí thih-khí kám thang sı̀n chù-tiāⁿ boē sí ? Lâng nā hòng-táⁿ phe-sí thâu-mn̂g chhı̀-hé, ge̍k-lâu ge̍k-chúi, Thiⁿ-pē kám iā chù-tiāⁿ i boē hāi mah ? Goá khı̀ thàm hoē-iú tú-tio̍h i ê gín-á phoà-pı̄ⁿ, goá kā i kóng ū gûi-hiám ê hoân-ló tio̍h chiū i-seng, i kóng: “Káⁿ m̄-bián, che sı̄ thiⁿ-pē ê chí-ı̀, ū miā m̄ ùi pı̄ⁿ.” Koh 3 lé-pài sí; i iā sı̀n chù sí. Koh ū chı̍t ê hoē-iú kā goá kóng i ū gû sí, tùi koân-soaⁿ ū chı̍t tè chio̍h iok nn̄g chheng kin lak lo̍h-lâi gû-liâu, gû hō͘ i khàm sí. Goá mn̄g í-chêng bat lak mah? I kóng siông-siông ū, chit-pái thiaⁿ-kı̀ⁿ hū-hū-háu tō kín cháu, ū chı̍t tè kúi-nā pah kin lak lo̍h-lâi, bô cháu tek-khak sí; ia̍h siông-siông lak lo̍h-lâi ti-tiâu, tiū-tiâⁿ. Goá kā i kóng hiah gûi-hiám tio̍h soá-ūi m̄-thang tiàm hia. I kóng: “Hem̂ iā ū iàu-kín! Seⁿ-sí sı̄ thiⁿ-pē chù hó-hó.” Goá kóng: “Thiⁿ-pē káⁿ ū chù-tēng lí m̄-thang poaⁿ-soá?” Siōng-tè hò͘ⁿ-seng chi tek sı̄ ài lâng oa̍h, káⁿ ū kā lâng chù-tiāⁿ tio̍h chū-chı̄n mah? Siōng-tè ài hó oán pháiⁿ, hiah-ê poa̍h-kiáu, chia̍h a-phı̀ⁿ, chò chha̍t, thâi lâng, káⁿ sı̄ Siōng-tè kā i chù-tiāⁿ mah? Sè-sio̍k-lâng kóng thiⁿ chù-tiāⁿ sı̄ hó, jı̄n thiⁿ--nih ū chı̍t ê bān-koân ê chú. Hoē-iú koh khah chai thiⁿ chù-tiāⁿ. Chóng-sı̄ m̄-thang chhin-chhiūⁿ sè-sio̍k-lâng ê sı̀n-gióng. Ū pı̄ⁿ tio̍h chia̍h io̍h, gûi-hiám tio̍h siám-pı̄, m̄ eng-kai tō m̄-thang phe sí. Lâng nā jia̍t-sim sı̀n Chú siông-siông kı̂-tó, siat-sú só͘-ūi tú-tio̍h ê hāi thiⁿ-pē iā ē kiù i, thái thang chip-ı̀ sı̄ chù-tiāⁿ? (Tâi-oân Kàu-hoē-pò tē 426 koàn,1920 nı̂ 9 ge̍h)