Chhiáⁿ bān-chhiáⁿ chek-pı̄ goán thó-hái ê hiong-chhin
Chhiáⁿ bān-chhiáⁿ chek-pı̄ goán pha̍k-iâm ê hiong-chhin
Chhiáⁿ bān-chhiáⁿ chek-pı̄ goán chò-un-á ê hiong-chhin
Kóng in kóng-oē bē-hiáu kńg-chı̍h hoat chu-chhu-su ê siaⁿ-im
Phı̀-siùⁿ in kóng-oē chho͘-ló͘ hō͘ lín goā-ūi-á-lâng thiaⁿ bô
Chū sè-hàn hái-kháu ê hong-thai toā-hō͘
Chı̍t-tang chı̍t-tang kông-to loān-kiàm
Siá tı̄ goán hiong-chhin sin-khu téng ê ok-giân ok-gú
Chá tio̍h piàn-sêng o͘-chheⁿ ê sek-tı̄
Khoàⁿ--khí-lâi khak-sı̍t ná chio̍h-thâu tiau-siōng
Tēng-tēng tı̍t-tı̍t ngē-ngē ê piáu-chêng
Hō͘ lín siū-khı̀ ê lí-iû ū chiok-choē chiok-choē
Pí-jû kóng goán hái-kháu ê hiong-chhin
Tı̄ un-á hâm iâm-tiâⁿ im-toā-chúi ê jı̍t-chí
Bô lâng ū-êng chhin-chhiōⁿ lín khı̀ chhiò͘ⁿ
Tâi-pa̍k liû-hêng ê siáⁿ-mı̍h “khû-chiô mân pe”、 “lân-só tò bńg”
Bô lâng tı̄ chúi-chhia piⁿ
Chhiò͘ⁿ lín ài chhiòⁿ ē “siàu-mâu-lı̂”、 “chau-chin-chhu-sái”
Bô lâng toà tek-pâi-á téng
Chhiòⁿ lín ē lâu ba̍k-sái ê “chia chái san tò ná í pian”
Goá hiong-chhin iā bô kong-hn̂g
Chhin-chhiōⁿ lín ū lâng ta̍k-jı̍t khı̀ iô kha-chhng-hoe
Jı̍t-thâu beh àm ê sı̂
Mn̂g-kháu-tiâⁿ piah-téng
Nı̂-lāu iáu-bē thè-hiu ê chháu-le̍h-á
Tiām-tiām khoàⁿ i ka-tı̄
Pha̍k-sêng ná hoé-thoàⁿ ê bı̄n-phê
Tiām-tiām leh khoàⁿ--i
Kāu-kāu pih-khui ê kha-té-phê
Tiām-tiām leh siōⁿ--i
Iân iâm-chhia té seⁿ-sian ê thih-ki-lō͘
Kiâⁿ kàu pe̍h-siak-siak ê iâm-soaⁿ
I iân-tio̍h ū thih-teng-lê
Ū hâm-khak-á
Ū ô-khak-á ê toā-hoāⁿ
I kiâⁿ khı̀ kau-kı̂ⁿ sái pâi-á-chhia
Khı̀ khoàⁿ lāi-hái ê ô-kè
Khı̀ sûn bāng-kô-á khioh hı̂-á
Í-siong lóng-sı̄
Goán kóng-oē bē-hiáu kńg-chı̍h
Hiong-chhin tiām-tiām ê hêng-thô͘
Lóng sı̄ goán-hiong oa̍h-miā ê kiàn-chèng
Goán bē-hiáu
Iōng Eng-kok-oē kóng chit-koán seng-oa̍h
Goán bē-hiáu
Iōng La-teng-gú siāu-kài
Chit-khoán mı̍h-kiāⁿ hō͘ lín chai-iáⁿ
Chhiáⁿ lín goā-ūi-á-lâng mài siū-khı̀
Bı̄n-tùi lín ko-kùi ê phê-ê
Téng-bı̄n ko-kùi ê se-chong
Téng-bı̄n ko-kùi ê gán-sı̂n
Lāi-té ko-kùi ê miâ-phı̀ⁿ téng-bı̄n
Ū ko-kùi chit-ūi ê thâu-hâm
Ē-hiáu “chu-chhu-su” ê goā-ūi-á-lâng
Goán chí-ū toā-siaⁿ hiòng lín kó͘-bú
Chí-iàu lín goān-ı̀ ū-chı̍t-kang
Lín ē ná-chhiōⁿ ē-hiáu “ABC káu kā ti” kāng-khoán
Chai-iáⁿ goán hiong-chhin leh kóng siáⁿ
Oa̍h kah chiok sóng-khoài hoaⁿ-hoaⁿ hí-hí
Ná-chhiōⁿ lín hâm a-tok-á kóng goā-kok-oē kāng-khoán
Chin-gâu chin bô kán-tan
