Thok-ní-su-thài chok
Nn̄g ê cha-bó͘ gín-ná tı̄ nn̄g keng chhù-kha ê sió lō͘-á sio tú-tio̍h; tùi chhân-nih lâu lâi ê lo̍k-ko͘-bê chúi, lóng lâu kàu tı̄ chit tiâu sió lō͘-á, piàn choè chı̍t ê chúi-khut. Chı̍t ê cha-bó͘ gín-ná chin soè-hàn, iáu chı̍t ê khah toā-hàn chı̍t sut-á. In nn̄g lâng ê lāu-bú lóng kā in chhēng sin ê saⁿ. Soè-hàn ê chhēng chı̍t niá nâ-sek--ê, toā-hàn ê chhēng chı̍t niá n̂g-sek--ê; koh in nn̄g ê tı̄ in ê thâu-mn̂g lóng ū pa̍k chı̍t lúi ê âng-sek ê ia̍h-á. Tāi-ke tı̄ lō͘-nih tú-tio̍h ê sı̂, sı̄ tú-tú tùi pài-tn̂g tńg-lâi, khí-thâu in teh tián in ê súi saⁿ, āu-lâi saⁿ-kap tı̄ hia thit-thô. Hut-jiân-kan in m̄-chai siūⁿ án-choáⁿ, siūⁿ tio̍h beh lo̍h-khı̀ chúi-khut-nih sńg chúi. Soè-hàn ê chhēng oê chū án-ni siūⁿ beh liâu lo̍h-khı̀, toā-hàn ê kā i tòng kóng:
“M̄-thang án-ni ta̍h lo̍h-khı̀, A-bí,án-ni lín a-bú oē kā lí mē! Goá beh thǹg oê khí-lâi, lí mā thǹg lí ê oê khí-lâi.”
In thǹg oê khí-lâi, láng kûn chiū liâu lo̍h-khı̀. Chúi kàu A-bí ê kha-ba̍k, i chiū hoah kóng:
“A-lí-á, chúi hiah-nih chhim goá oē kiaⁿ lah!”
“Lâi ! ” A-lí-á kā i ı̀n, chı̍t bı̄n siūⁿ beh chhun chhiú kā i khan, m̄-kú kiaⁿ-liáu kûn pàng lo̍h-khı̀ oē kō tio̍h chúi, “M̄-bián kiaⁿ lah, khut-á boē koh-khah chhim à-lah.”
I beh kiâⁿ oá-khı̀ ê sı̂, A-lí-á kā A-bí kóng: “A-bí, lí tio̍h kiâⁿ hō͘ hó ô͘, m̄-thang that chúi.”
Tú-tú án-ni teh kóng ê sı̂, A-bí ê kha that tio̍h chúi; chúi phùn tio̍h A-lí-á ê saⁿ, iā phùn tio̍h i ê ba̍k-chiu kap phı̄ⁿ. A-lí-á khoàⁿ-tio̍h i ê saⁿ lâ-sâm khı̀, siū-khı̀ khí-lâi, jiok beh phah A-bí. A-bí ka-ki chai, iā chin kiaⁿ, koáⁿ-kín peh khí-lâi, siūⁿ beh cháu tńg-khı̀ chhù-nih. A-lí-á in ma-ma tı̄ chit ê sı̂ tú-tú tùi chia keng-kè, khoàⁿ-tio̍h in cha-bó͘-kiáⁿ chı̍t seng-khu bak kah o͘ sô-sô, chiū-kóng:
“Lí chit ê chok-gia̍t gín-ná, lí sı̄ án-choáⁿ bak kah chı̍t seng-khu o͘ sô-sô!”
“A-bí tiâu-kò͘-ı̀ kā lâng chhòng ê lah!” A-lí-á thiaⁿ tio̍h ma-ma ê siaⁿ chiū bô koh jiok A-bí, ēng án-ni ı̀n i ê lāu-bú.
A-lí-á ê lāu-bú thiaⁿ tio̍h, chiū tùi A-bí kā khiú-teh, tùi i ām-kún ê āu-bı̄n kā i liàm kúi-nā ē.
A-bí khàu chin toā siaⁿ thong koe-lō͘ ê lâng lóng ū thiaⁿ-kı̀ⁿ, A-bí ê lāu-bú chiū chhut-lâi.
“Lí sı̄ án-choáⁿ phah goán cha-bó͘ kiáⁿ?” I án-ni jióng, chiū khai-sí tı̍t-tı̍t mē A-lí-á in lāu-bú. In nn̄g ê khai-sí sio-mē. Ta-po͘ lâng iā chhut-lâi; koe-lō͘ nih sûi-sı̂ ûi kah o͘-khâm-khâm, hı̄-hoā-kiò, bô lâng teh thiaⁿ pa̍t-lâng kóng-oē. In tı̍t-tı̍t mē, khiú lâi khiú khı̀, chha-put-to kiông beh sio phah khí-lâi, A-lí-á ê a-má chı̍t-pō͘ chı̍t-pō͘ kiâⁿ lâi kàu tiong-ng, beh lâi kā in kóng-hô.
“Lín mā siūⁿ khoàⁿ-māi leh! Kin-á-jı̍t sı̄ Koh-oa̍h-choeh, mā m̄-thang án-ni tiàm tı̄ chia tı̄-teh sit thé-biān, hiah-nih gōng tı̄-teh thı̄n gín-ná piⁿ.”
In lóng bô beh thiaⁿ a-má ê oē, kiông-kiông beh kā i kheh tó-lo̍h-khı̀.
In teh sio-mē ê sı̂, A-lí-á jı̍p-khı̀ chhù-lāi, í-keng chiong lâ-sâm chhit chheng-khı̀, koh cháu khı̀ chúi-khut-á ê só͘-chāi. I the̍h chı̍t lia̍p píⁿ-píⁿ ê chio̍h-thâu tùi chúi-khut-á ê piⁿ-á ó͘ chı̍t choā kau, chúi lâu tùi lō͘-nih lâi. A-bí iā the̍h chı̍t tè pang-á chhut-lâi, teh kā A-lí-á tàu chhòng. In hiah ê lâng ná toā siaⁿ, teh beh sio-phah ê sı̂, khut-á ê chúi í-keng lâu kàu a-má khiā ê só͘-chāi. Nn̄g ê cha-bó͘ gín-ná tè hit ê chúi ná hoah ná cháu.
“A-bí jiok hō͘ tio̍h! Jiok hō͘ tio̍h!” A-lí-á tı̍t-tı̍t hoah, ná hoah ná chhiò, tı̍t-tı̍t cháu tùi chit tı̄n lâng chia lâi.
Pang-á tı̄ chúi-téng teh lâu, gín-ná khoàⁿ liáu ná hoaⁿ-hí, ná chhiò. A-má khoàⁿ-tio̍h in nn̄g ê, tùi hiah ê lâng án-ni kóng:
“Lín án-ni kiám boē kiàn-siàu, hiah-nih ài thı̄n gín-ná piⁿ,” “Lâng in nn̄g ê to͘ lóng boē kı̀-tit lah, tiàm tı̄ hia teh thit-thô!” “Lín pí chiah ê gín-ná khah gōng!” “Ah! Koai sun-á!”
Hiah ê lâng khoàⁿ-tio̍h, ka-kı̄ kám-kak chin kiàn-siàu. Tāi-ke soà chhiò chhut-lâi, ta̍k ê lâng tńg-khı̀ in tau.
“Lín nā bô oa̍t tò-tńg chhin-chhiūⁿ gín-ná ê, koat-toàn boē tit jı̍p thian-kok.”
(Tâi-oân Kàu-hoē-kong-pò tē 894 hō, 1962 nı̂ 9 ge̍h)
