Hit-sı̂ Sek-sı̄ khan i ê chhiú, chhoā i jı̍p chı̍t-keng toā thiaⁿ, lāi-bı̄n kú-kú bô piàⁿ-sàu, tı̂n-ai chek kàu tı̄ⁿ that-that. Ki-tok-tô͘ khoàⁿ-khoàⁿ tiap-á-kú, Sek-sı̄ chiū kiò lâng lâi sàu; khí chhiú teh sàu, tı̂n-ai sı̀-koè pe, tı̍t-tı̍t eng kàu Ki-tok-tô͘ beh boē chhoánkhùi. Hit-sı̂ ū chı̍t-ê cha-bó͘-gín-ná tı̄ hí piⁿ-á--nih teh khiā, Sek-sı̄ kah i khı̀ phâng chúi lâi hiù; kiâⁿ án-ni thiaⁿ--nih chiū tè chhiú sàu chheng-khı̀.
Ki-tok-tô͘ mn̄g, Che sı̄ sím-mı̍h ı̀-sù?
Sek-sı̄ kóng, Chit-ê thiaⁿ sı̄ chí lâng ê sim-koaⁿ, bē siū Siōng-tè ê un chiâⁿ sèng; tı̂n-ai sı̄ chí lâng pún-sèng ê choē-sio̍k, kap sim-lāi ê pháiⁿ, phah lâ-sâm seng-khu. Tāi-seng khí chhiú teh sàu, sı̄ chí lu̍t-hoat, āu-lâi ēng chúi hiù, sı̄ chí hok-im. Taⁿ lí khí-thâu khoàⁿ-kı̀ⁿ chı̍t-lâng teh sàu, tı̂n-ai sı̀-koè pe, só͘-í thiaⁿ--nih sàu boē-oē chheng-khı̀; chhin-chhiūⁿ Siōng-tè ê lu̍t-hoat, kú boē-oē soé lâng ê sim, tû-khı̀ lâng ê choē. Lu̍t-hoat nā kàu, choē-sio̍k chiū siⁿ-khí, it-hoat ū la̍t, it-hoat ū choē, in-ūi lu̍t-hoat chheng-chheng oē piáu-bêng lâng ê choē-sio̍k; án-ni kı̀m tiāⁿ-tiāⁿ, boē-oē hō͘ lâng ū la̍t thang khah-iâⁿ châu-bia̍t i ê choē. Koh lí ū khoàⁿ-kı̀ⁿ chı̍t-ê cha-bó͘ gín-ná ēng chúi hiù thô͘-kha, tı̂n-ai lóng-chóng teh lo̍h, thiaⁿ--nih chiū tè chhiú sàu chheng-khı̀; chhin-chhiūⁿ hok-im ê tō-lí, kam-tiⁿ koh pó-poè, chı̍t-ē kám-hoà lâng ê sim, choē-sio̍k chiū sit-pāi hâng-ho̍k, sim-koaⁿ sı̄ sı̀n hok-im, chiah tit-tio̍h chheng-khı̀-siùⁿ, thang hō͘ êng-kng ê Chú khiā-khí.
Hit-sı̂ goá koh bāng-kı̀ⁿ Sek-sı̄ khan i ê chhiú, chhoā i jı̍p chı̍t-keng soè-keng pâng, lāi-bı̄n ū N̄g ê gín-ná, ta̍k-ê chē i ê ūi; chı̍t-ê khah toā-hàn--ê, miâ Kip-io̍k , chı̍t-ê miâ Jím-thāi . Kip-io̍k ê hêng-chōng sı̄ kāu-khoê, Jím-thāi ê khoán-sit sı̄ put-chí thiâm-chēng. Ki-tok-tô͘ mn̄g, hit-ê Kip-io̍k siáⁿ-sū kàu hiah kāu-khoê? Sek-sı̄ kóng, I èng-hūn ê ke-gia̍p, chiáng-teh ê lâng nā kàu mê-nı̂, chiah beh hō͘ i, i ài kin-nı̂ tit-tio̍h, só͘-í kāu-khoê; chheng-chheng Jím-thāi kam-sim, thèng-hau, só͘-í thiâm-chēng.
Hit-sı̂ goá koh khoàⁿ-kı̀ⁿ chı̍t-lâng toà chı̍t-tē ê kim-gûn pó-poè, piàⁿ tı̄ Kip-io̍k ê bı̄n-chêng, i chiū the̍h khí-lâi khoàⁿ, put-chí hoaⁿ-hí, teh chhiò Jím-thāi; chóng-sı̄ bē loā kú, kim-gûn pó-poè lām-sám ēng liáu, chhun chı̍t-niá phoà-saⁿ tiāⁿ-tiāⁿ.
Hit-sı̂ Ki-tok-tô͘ mn̄g Sek-sı̄ kóng, Chhiáⁿ khui-thiah chit-ê sū-chêng, siông-sè kà-sı̄ goá.
Sek-sı̄ kóng, Chí N̄g ê gín-ná, chı̍t-ê sı̄ chí kim-sè ê lâng, chı̍t-ê sı̄ chí lâi-sè ê lâng. Lí ū khoàⁿ-kı̀ⁿ Kip-io̍k ài liâm-piⁿ tit-tio̍h i ê ke-gia̍p, boē thèng-hāu tit kàu mê-nı̂, che chhin-chhiūⁿ kim-sè ê lâng, khak-khak beh chit-sı̀ tit-tio̍h i ê hok-khı̀, boē thèng-hāu tit kàu lâi-sè. Lâi-sè ê hok-khı̀ sı̄ ke̍k hó, Siōng-tè choē-choē pái pún-sin choè kan-chèng, sè-kan lâng iáu-kú hut-lio̍k i, m̄ khéng kiû. Sio̍k-gú ū kóng, ‘Cha̍p chiah chiáu tı̄ chhiū--nih, m̄-ta̍h-tio̍h chı̍t-chiah chiáu tı̄ chhiú--nih’, che lâng chiū tùi-tiōng, choan-choan kiû ba̍k-chiu chêng ê hok-khı̀. Chheng-chheng Kip-io̍k ê ke-gia̍p bē loā-kú lóng liáu, nā chhun chı̍t-niá phoà-saⁿ tiāⁿ-tiāⁿ; kiû chit sè-kan ê hok-khı̀, hit-hō ê lâng boa̍t-jı̍t ia̍h tek-khak chhin-chhiūⁿ án-ni.
Ki-tok-tô͘ kóng, Tùi án-ni khoàⁿ, Jím-thāi chiū ū tı̀-sek, in-ūi m̄-nā chı̍t-hāng ê iân-kò͘, tē it hāng, i oē thèng-hāu-tit, āu-lâi chiah tit-tio̍h khah hó ê mı̍h; tē-jı̄ hāng, Kip-io̍k ê ke-gia̍p í-keng lóng liáu, chí-ū chhun chı̍t-niá phoà-saⁿ tiāⁿ-tiāⁿ, Jím-thāi êng-kng ê ke-gia̍p ka-nn̂g tı̄-teh.
Sek-sı̄ kóng, M̄-nā án-ni tiāⁿ-tiāⁿ, iáu-kú ū pa̍t-mı̍h ê iân-kò͘. Lâi-sè êng-kng ê ke-gia̍p éng-oán tı̄-teh, boē hoè-bô, kám ū chhin-chhiūⁿ sè-kan ê hok-khı̀, hut-jiân siau-soàⁿ bô khı̀. Án-ni Kip-io̍k khí-thâu tit-tio̍h i ê ke-gia̍p, Jím-thāi chiū khit i chhiò; Jím-thāi lō͘-bé tit-tio̍h i ê ke-gia̍p, Kip-io̍k chiū koh-khah hō͘ i choè hó-chhiò. In-ūi khí-thâu--ê, tek-khak ū lō͘-bé--ê thang sio-soà; lō͘-bé--ê, sui-bóng iáu-bē kàu, tek-khak ū i ê sı̂, hit-ê lō͘-bé--ê, chiū bô thang lâi sio-soà i. Án-ni khí-thâu tit-tio̍h i ê ke-gia̍p, tek-khak tāi-seng choè chı̍t-sı̂ ēng liáu, chheng-chheng lō͘-bé tit-tio̍h i ê ke-gia̍p, chiah thang kú-kú tn̂g-tn̂g tı̄-teh; Sèng-chheh chí hit-ê pù-lâng kóng, “Lí oa̍h-teh ê sı̂ siū lóng-chóng ê hok-khı̀, Lia̍p-sat-lō͘ siū lóng-chóng ê chai-lān; taⁿ i an-ùi, lí siū khó͘.”
Ki-tok-tô͘ kóng, Tùi án-ni kè-khoàⁿ, chiū-sı̄ ba̍k-chiu chêng ê hok-khı̀, chin-chiàⁿ m̄-thang tham, tio̍h thèng-hāu āu-lâi ê hok-khı̀ sı̄ khah hó.
Sek-sı̄ kóng, Lí ê oē chin-chiàⁿ ū-iáⁿ, in-ūi só͘ oē khoàⁿ-kı̀ⁿ sı̄ chiām-sı̂--ê, só͘ boē khoàⁿ-kı̀ⁿ sı̄ éng-oán--ê. Nā-sı̄ só͘ khoàⁿ-kı̀ⁿ--ê, chiū-sı̄ chit-sı̂ ê mı̍h, kap lâng ê su-io̍k choè keh-piah, só͘-í kau-poê sı̄ koē koē thn̂g-tiⁿ bı̍t-tiⁿ; só͘ boē khoàⁿ-kı̀ⁿ--ê, chiū-sı̄ lâi-sè ê ke-gia̍p, kap lâng ê su-io̍k sı̄ hn̄g-hn̄g kek-khui, só͘-í kú-kú chhiⁿ-so͘, oh-tit chhin.
Hit-sı̂ goá koh bāng-kı̀ⁿ Sek-sı̄ khan i ê chhiú, chhoā i jı̍p-khı̀ chı̍t só͘-chāi, khoàⁿ-kı̀ⁿ ū hé tùi hit-ê chhiûⁿ-á kha khí-lâi, chı̍t-lâng tı̄ piⁿ-á--nı̍h teh khiā, sı̂-sı̂ ēng chúi thı̂n tı̄ hé, beh hō͘ i hoa, m̄-kú hé ná iām.
Ki-tok-tô͘ kóng, Che sı̄ sím-mı̍h ê iân-kò͘?
Sek-sı̄ ı̀n kóng, Chit-ê hé sı̄ chí sim-tiong un-tián ê kám-hoà, ēng chúi thı̂n tı̄ hé--nih, beh lóng-chóng hō͘ i hoa, sı̄ chí mô͘-kúi; sui-bóng hō͘ i án-ni, nā-sı̄ hé it-hoat ná iām, hit-ê iân-kò͘, goá ia̍h tit-beh hō͘ lí khoàⁿ. Án-ni chiū chhoā i se̍h kè chhiûⁿ-á goā, khoàⁿ-kı̀ⁿ ū chı̍t-lâng chhiú the̍h iû-kan, siông-siông tùi chhiûⁿ-á goā ēng iû àm-chı̄ⁿ thiⁿ tı̄ hé--nih.
Ki-tok-tô͘ chiū kóng, Che koh sı̄ sím-mı̍h ı̀-sù?
Sek-sı̄ kóng, Chit-ê lâng sı̄ chí Ki-tok, siông-siông ēng un-tián lâi pang-chān kám-hoà lâng, ná chhiūⁿ iû, só͘-í mô͘-kúi sui-bóng chı̄n-la̍t beh hō͘ i hoa, nā-sı̄ Ki-tok ê peh-sı̀ⁿ éng-éng tit-tio̍h I ê un. Koh hit-ê lâng ēng iû thiⁿ tı̄ hé, lí ū khoàⁿ-kı̀ⁿ, i sı̄ àm-chı̄ⁿ teh khiā tı̄ chhiûⁿ-á goā; che sı̄ hō͘ lí chai lâng nā tú-tio̍h mô͘-kúi ê chhı̀-liān, ka-kı̄ ta̍uh-ta̍uh boē hiáu-tit, sim-tiong ê un-tián cháiⁿ-á-iūⁿ iáu-kú tı̄-teh, boē bia̍t-bô.
Hit-sı̂ Sek-sı̄ koh khan i ê chhiú, chhoā i jı̍p chı̍t-ê khoàⁿ-oa̍h ê só͘-chāi, tiong-ng ū chı̍t-keng tiān, hâng-ngó͘ kàu-ke̍k. Ki-tok-tô͘ khoàⁿ-kı̀ⁿ, chiū put-chí hoaⁿ-hí; koh khoàⁿ-kı̀ⁿ tiān-téng ū lâng teh kiâⁿ, lóng-chóng sı̄ chhēng kim ê saⁿ.
Ki-tok-tô͘ kóng, Lán thang jı̍p-khı̀ hia mah?
Sek-sı̄ chiū chhoā i ǹg hit-ê mn̂g, chiah khoàⁿ-kı̀ⁿ choē-choē lâng khiā tı̄ mn̂g-chêng, chhin-chhiūⁿ ài beh jı̍p-khı̀, teh m̄-káⁿ. Koh lı̄ hit-ê mn̂g bô hn̄g, ū chı̍t-lâng chē-oá toh, toh-téng ū chheh kap pit ba̍k; lóng-chóng beh jı̍p hit-ê mn̂g--ê, i chiū kı̀ in ê miâ. Koh khoàⁿ-kı̀ⁿ chhēng kah kia̍h to, choē-choē lâng khiā tı̄ mn̂g-ak teh chiú, ı̀-sù sı̄ beh chı̄n-la̍t hāi-tio̍h lóng-chóng ài jı̍p-khı̀ ê lâng.
Ki-tok-tô͘ khoàⁿ-kı̀ⁿ chiū kı̂-koài. Hiah-ê ài jı̍p-khı̀ ê lâng khoàⁿ-kı̀ⁿ kia̍h to ê lâng, lóng-chóng tò-thè; āu-lâi koh ū chı̍t-lâng, bı̄n put-chí béng, oá-kūn hit-ê kı̀-miâ ê kóng, Chhiáⁿ lí kı̀ goá ê miâ. I ê miâ í-keng kı̀ liáu, chiū tı̀ khoe pu̍ih kiàm, pek-oá beh thâi hiah-ê kia̍h to ê lâng, hiah-ê kia̍h to ê lâng ia̍h chhut-la̍t kap i thâi; chóng-sı̄ hit-ê lâng lóng bô lio̍h-á tah-hiahN, chiàⁿ chha̍k tò phut, hit-pêng chit-pêng lóng tio̍h-siong; āu-lâi phoà-khui chı̍t-tiâu lō͘, tı̍t-tı̍t chông jı̍p, chiū thiaⁿ-kı̀ⁿ tiān-lāi ê lâng chhut siaⁿ, hoaⁿ-hí kiò i, Jı̍p--lâi, jı̍p--lâi, tek-khak tit-tio̍h éng-oán ê êng-kng. Hit-ê lâng chiū jı̍p-khı̀, ia̍h chhēng kim ê saⁿ. Ki-tok-tô͘ khoàⁿ-kı̀ⁿ án-ni, chiū bah-bûn-chhiò kóng, Chit-ê tāi-chı̀ ê ı̀-sù, phah-sǹg goá tek-khak chai. Hit-sı̂ chiū tùi Sek-sı̄ kóng, Lí chhiáⁿ, goá beh khí-sin--lah.
Sek-sı̄ kóng, Bē thang; thèng-hāu goá hō͘ lí khoàⁿ-kı̀ⁿ pa̍t hō ê sū-chêng, jiân-āu chiah thang khı̀. Án-ni koh khan i ê chhiú, chhoā i jı̍p chı̍t-keng àm-pâng, lāi-bı̄n ū chı̍t-lâng chē tı̄ thih-lâng lāi, bı̄n put-chí iu-būn, ba̍k-chiu ǹg toē, nn̄g chhiú thong-siū, chhiⁿ-chhám teh thó͘-khùi, chhin-chhiūⁿ sim-koaⁿ tn̂g-á beh piak-khui.
Ki-tok-tô͘ chiū mn̄g kóng, Che sı̄ in-ūi sím-mı̍h iân-kò͘?
Sek-sı̄ ı̀n kóng, Lí thang mn̄g i, chiū chai.
Ki-tok-tô͘ chiah mn̄g i kóng, Lí choè lâng cháiⁿ-iūⁿ?
Hit-ê lâng ı̀n kóng, Goá taⁿ choè lâng toā-toā koh-iūⁿ chêng jı̍t.
Ki-tok-tô͘ kóng, Lí chêng án-cháiⁿ-iūⁿ ?
Hit-ê lâng ı̀n kóng, Goá chêng choè sèng-tô͘, phín-hēng lóng-chóng hó, m̄-nā goá ka-kı̄ kóng, chiū pa̍t lâng iā án-ni o-ló. Hit-sı̂ goá ka-kı̄ phah-sǹg ia̍h tı̍t-tı̍t kiâⁿ thiⁿ-lō͘, kàu thiⁿ-siâⁿ, sim-koaⁿ siông-siông hoaⁿ-hí.
Ki-tok-tô͘ kóng, Lí chêng nā án-ni, taⁿ sı̄ cháiⁿ-iūⁿ?
Hit-ê lâng ı̀n kóng, Taⁿ goá sı̄ choa̍t-bāng, hō͘ hit-ê choa̍t-bāng pa̍k-teh, chhin-chhiūⁿ kı̀m tı̄ thih-lâng lāi, lóng boē-oē cháu chhut; chhám--ah! taⁿ boē tit chhut lah!
Ki-tok-tô͘ ı̀n kóng, Lí tı̀-kàu án-ni, sı̄ siáⁿ-sū?
Hit-ê lâng ı̀n kóng, Kéng-séng kín-siú, goá ûn-ûn-á boē kı̀-tit; chiū hòng-chhiòng su-io̍k, hoān-tio̍h sèng tō, ko͘-hū Siōng-tè ê un, hō͘ Sèng-sı̂n iu-būn, I ū lı̄-khui goá; goá chio mô͘-kúi, i ū chiū-kūn goá; chhiok-tio̍h Siōng-tè ê siū-khı̀, I ū pàng-sak goá; sim-koaⁿ ka-kı̄ tēng khok-khok, kàu boē-oē hoán-hoé choē.
Ki-tok-tô͘ chiū tùi Sek-sı̄ kóng, Chit-hō͘ lâng kiám bô thang koh ǹg-bāng mah?
Sek-sı̄ kóng, Lí thang mn̄g i.
Ki-tok-tô͘ chiū mn̄g i, Chit-ê choa̍t-bāng ê thih-lâng, lí kám tek-khak tiāⁿ-tiāⁿ tiàm-teh, lóng bô thang koh ǹg-bāng chhut mah?
Hit-ê lâng ı̀n kóng, Goá toàn-toàn bô thang koh ǹg-bāng.
Ki-tok-tô͘ kóng, Lí siáⁿ-sū kóng án-ni? Siōng-tè ê Kiáⁿ, i ê sim kám bô lı̂n-bín lâng?
Hit-ê lâng kóng, Siōng-tè ê kiáⁿ, goá koh-chài tèng i tı̄ sı̍p-jı̄-kè téng; bú-bān i ê ūi; biáu-sı̄ i ê gı̄; khoàⁿ-khin i ê huih, lia̍h-choè sı̄ pêng-siông; siat-to̍k Sèng-sı̂n. Só͘-í Siōng-tè ín hok-khı̀ ê oē, goá taⁿ bô hūn--lah, chheng-chheng giâm-giâm hêng-hoa̍t ê oē, beh kàu goá sin-chiūⁿ; goá ûi-ke̍h Siōng-tè, Siōng-tè ê toā siū-khı̀ beh châu-bia̍t goá.
Ki-tok-tô͘ kóng, Lí pêng-sò͘ ài-tio̍h sím-mı̍h, chiah tı̀-kàu án-ni?
Hit-ê lâng ı̀n kóng, Goá pêng-sò͘ ài su-io̍k, chok-lo̍k sè-kan ê lı̄-ek, phah-sǹg tit-tio̍h che, sim-koaⁿ tek-khak chı̄n-thâu hoaⁿ-hí; taⁿ che kúi-nā hāng ê sū-chêng, hoán-tńg chhin-chhiūⁿ thâng chhia goá ê sim-koaⁿ.
Ki-tok-tô͘ kóng, Sui-jiân án-ni, lí taⁿ siáⁿ-sū boē hoán-hoé koé-pı̀ⁿ?
Hit-ê lâng ı̀n kóng, Taⁿ Siōng-tè m̄ ín goá hoán-hoé koé-pı̀ⁿ; in-ūi hoán-hoé koé-pı̀ⁿ, ǹg-bāng un-tián, hit-ê mn̂g, Siōng-tè pún-sin ū koaiⁿ--lah; í-keng kı̀m goá tı̄ chit-ê thih-lâng lāi, chiū thong sè-kan ê lâng lóng boē-oē pàng goá chhut. Chhám--ah, chhám--ah! éng-oán ê chai-ē, goá beh thài-oē tng tit khí!
Sek-sı̄ chiū kā Ki-tok-tô͘ kóng, Chit-ê lâng ê chhám, lí eng-kai tio̍h kı̀-tit, hō͘ lí choè éng-oán ê khoàⁿ-iūⁿ.
Ki-tok-tô͘ kóng, I ê sū-chêng nā án-ni-siⁿ, chin-chiàⁿ thang kiaⁿ-hiâⁿ. Choan-choan kiû Siōng-tè pang-chān goá kéng-séng kín-siú, hō͘ goá kı̂-tó bô soah; bián-tit chhin-chhiūⁿ i ê khoán, siū-tio̍h che ê chhám. Koh tùi Sek-sı̄ kóng, Taⁿ goá thang khí-sin mah?
Sek-sı̄ kóng, thèng-hāu goá koh hō͘ lí khoàⁿ chı̍t-hāng, jiân-āu chiah thang khı̀. Án-ni chiū khan i ê chhiú, chhoā i jı̍p-khı̀ chı̍t-keng pâng, lāi-bı̄n ū chı̍t-lâng tú-á tùi bı̄n-chêng khùn khí-lâi, moa-saⁿ ê sı̂ kiaⁿ kàu ngiāu-ngiāu-chhoah.
Ki-tok-tô͘ kóng, Chit-ê lâng kiaⁿ kàu ngiāu-ngiāu-chhoah sı̄ siáⁿ-sū? Sek-sı̄ chiū kah hit-ê lâng kā i kóng.
Hit-ê lâng chiū kóng, kim-mı̂ khùn ê sı̂, goá tit-tio̍h chı̍t-ê bāng, chiū khoàⁿ-kı̀ⁿ thiⁿ pı̀ⁿ choè chin o͘-ám; lûi m̄ chhè, sih-nà nı̄ teh-sih; hō͘ goá chı̄n kiaⁿ. Hit-sı̂ goá kia̍h-ba̍k khí-lâi khoàⁿ, khoàⁿ-kı̀ⁿ loān-hûn, kín-kín pe, thiaⁿ-kı̀ⁿ hō-thâu toā siaⁿ tân; hûn-téng chı̍t-lâng teh chē, bān-bān thiⁿ-sài kun-sûi teh khiā, iām-hé ûi-teh, moá thiⁿ lóng sı̄ hé. Hit-sı̂ ū chhut-siaⁿ kóng, ‘Sí ê lâng tio̍h khí-lâi siū sím-phoàⁿ.’ Chio̍h-poâⁿ hut-jiân lı̍h, bōng lóng khui, sí-lâng choè chı̍t-ē chhut-lâi, in tiong-kan ū-ê put-chí kiaⁿ-hiâⁿ, beh cháu khı̀ bih tı̄ soaⁿ-ē. Chē hûn--ê, chiū hian-khui chheh, bēng-lēng sè-kan lâng lóng-chóng kūn-chêng; in-ūi tùi i ê bı̄n-chêng ū iām-hé chhiong-chhut, chèng-lâng chiū tı̄ lı̄-á hn̄g, hó thang hō͘ i sím-phoàⁿ. Koh ū siaⁿ thoân bēng-lēng, kā lóng-chóng ê thiⁿ-sài kóng, ‘Tio̍h chū-chı̍p phoē kap khng, lóng-chóng hiat tı̄ hé-khiⁿ. Án-ni bô toé ê khiⁿ, kūn goá teh khiā ê só͘-chāi, hut-jiân khui; hé-hûn, ian-thoàⁿ, kı̂-koài ê siaⁿ, lín-lín lòng-lòng chhiong-chhut. Chē hûn--ê koh bēng-lēng thiⁿ-sài kóng, ‘Goá ê gō͘-kak tio̍h siu jı̍p chhng.’ Án-ni choē-choē lâng hō͘ thiⁿ-sài hû in chiūⁿ-khı̀ hûn--nı̍h, nā-sı̄ lâu goá tı̄ ē-toé; hit-sı̂ goá ia̍h beh cháu, chóng-sı̄ bô só͘-chāi thang bih, in-ūi chē hûn--ê ba̍k-chiu tiāⁿ-tiāⁿ teh siòng goá. Koh goá chhíⁿ-gō͘ chı̍t-sı̀-lâng ê choē, liông-sim sı̀-bı̄n chek-pı̄ goá. Bāng kàu án-ni chiū chhíⁿ.
Ki-tok-tô͘ kóng, Lí só͘ khoàⁿ-kı̀ⁿ nā-sı̄ án-ni, ū sím-mı̍h thang hō͘ lí toā kiaⁿ?
Hit-ê lâng ı̀n kóng, Goá sı̄ phah-sǹg sím-phoàⁿ ê jı̍t í-keng kàu; goá bē tāi-seng pı̄-pāng, khoàⁿ-kı̀ⁿ thiⁿ-sài hû choē-choē lâng chiūⁿ-khı̀, lâu goá tı̄ ē-toé, che sı̄ hō͘ goá put-chí toā kiaⁿ. Koh tē-ge̍k ê hé-khiⁿ tú-á kūn goá teh khiā ê só͘-chāi, khui chhùi; liông-sim ia̍h chek-pı̄ goá; koh sím-phoàⁿ ê Chú, ū siū-khı̀ ê bı̄n-sek, kim-kim siòng goá, só͘-í goá chiah toā kiaⁿ.
Hit-sı̂ Sek-sı̄ kā Ki-tok-tô͘ kóng, Só͘ hō͘ lí khoàⁿ lóng-chóng ê sū-chêng, lí ū siūⁿ á-bô?
Ki-tok-tô͘ ı̀n kóng, Ū--ah, só͘ khoàⁿ-kı̀ⁿ lóng-chóng ê sū-chêng, hō͘ goá chı̍t-piⁿ ǹg-bāng, chı̍t-piⁿ kiaⁿ.
Sek-sı̄ kóng, Án-ni che lóng-chóng ê sū-chêng, lí tio̍h soè-jı̄ kı̀-teh, ēng che bián-lē lí koáⁿ-kín kiâⁿ thâu-chêng ê lō͘.
Hit-sı̂ Ki-tok-tô͘ koh pih-chah beh khı̀, Sek-sı̄ chiok-hok i kóng, ‘Hó ê Ki-tok-tô͘--ah, Thiⁿ-siâⁿ ê lō͘, goān Pó-hūi-su chhoā lí tı̍t-tı̍t kiâⁿ.
Ki-tok-tô͘ chiū khı̀, hit-sı̂ ia̍h kóng,
Lâi chia tit-khoàⁿ kı̂-ı̄ⁿ chêng,
Pek goá cháu-chı̀n, lóng bô thêng,
Só͘ khoàⁿ siông-siông chhûn tı̄ sim,
Sèng-sı̂n kà-sı̄ koh khah chhim.
Hit-sı̂ goá bāng-kı̀ⁿ Ki-tok-tô͘ só͘ beh kiâⁿ ê lō͘, N̄g piⁿ ū ûi-chhiûⁿ, hit-ê chhiûⁿ ê miâ kiò Kiù. Ki-tok-tô͘ tùi chit-ê lō͘ toā pō͘ kiâⁿ, in-ūi keng-thâu-téng ê tàⁿ tāng, oh-tit khí pō͘, án-ni toā-pō͘ ı̀n, āu-lâi kàu chı̍t-ê lio̍h-á khoâiⁿ ê só͘-chāi, téng-bı̄n khiā sı̍p-jı̄-kè, ē-toé chı̍t-ê khang bōng. Ki-tok-tô͘ tú-á kàu hia, i ê tàⁿ chiū tùi keng-thâu-téng lut-lo̍h-khı̀, liàu jı̍p bōng-lāi; āu-lâi goá bô koh khoàⁿ-kı̀ⁿ--i.
Hit-sı̂ Ki-tok-tô͘ hut-jiân khin-sang, hoaⁿ-hoaⁿ hí-hí kóng, ‘Chiong i ê iu-būn, hō͘ goá an-ùi; chiong i ê sí, hō͘ goá oa̍h.’ Chiū goâng-ngia̍h, tiāⁿ-tiāⁿ teh khiā, āu-lâi chiū chı̍t-piⁿ khoàⁿ, chı̍t-piⁿ kı̂-koài, in-ūi chı̍t-ē khoàⁿ-kı̀ⁿ sı̍p-jı̄-kè, i ê tàⁿ chiū lut-lo̍h, só͘-í chhim-chhim teh kı̂-koài. Khoàⁿ-liàu koh khoàⁿ, kàu sim-koaⁿ ke̍k kám-tōng, hō͘ ba̍k-sái chhē-chhē-tò. Tú-á teh khiā, chı̍t-piⁿ khoàⁿ, chı̍t-piⁿ lâu ba̍k-sái, hut-jiân ū saⁿ-ê êng-kng chhàn-lān--ê lâi kóng, Goān lí pêng-an. Thâu-chı̍t-ê kā i kóng, ‘Lí ê choē sià--lah.’ Tē-jı̄--ê kā i thǹg phoà-saⁿ, oāⁿ pe̍h ê saⁿ hō͘ i chhēng. Tē-saⁿ--ê ēng ı̀n, ı̀n i ê thâu-hia̍h, koh ēng chı̍t-kńg ê bûn-pı̂n hō͘ i, téng-bı̄n khàm-ı̀n, bēng-lēng i kiâⁿ lō͘ ê sı̂ tio̍h khoàⁿ; nā kàu thiⁿ-mn̂g thang chiong chit kńg kau hō͘ i. Kóng soah, hí saⁿ ê êng-kng chhàn-lān--ê chiū choè in khı̀.
Hit-sı̂ Ki-tok-tô͘ put-chí hoaⁿ-hí, chài-saⁿ phut-phut-thiàu koh khı̀. I chiū gı̂m-si:
Kàu sı̍p-kè só͘ khoàⁿ bōng khang,
Tāng tàⁿ chiū thǹg, lâng khin-sang;
Kiù-chú siá-sin hō͘ goá oa̍h,
Goá chiū kám-siā éng bô soah.
Hit-sı̂ Ki-tok-tô͘ kàu hia, chiàⁿ chhin-chhiūⁿ si kóng,
Saⁿ pe̍h ná seh che cháiⁿ-iūⁿ?
Kū khoán liâm-piⁿ oāⁿ sin-siùⁿ,
Kiù-chù ēng gı̄ jia chē-koà,
Sim tùi Sèng-sı̂n siū kám-hoà.
